លោកអូបាម៉ា ត្រៀមប្រកាសប្រើកម្លាំងទ័ពវាយកម្ទេចពួកជីហាតជ្រុលនិយម
ប្រធានាធិបតីសហរដ្ឋអាមេរិក លោក បារ៉ាក់ អូបាម៉ា បានប្តេជ្ញានៅថ្ងៃពុធម្សិលមិញថា នឹងប្រើកម្លាំងដើម្បីកំទេចរដ្ឋអ៊ីស្លាម ក្នុងប្រទេសស៊ីរី ហើយនឹងពង្រីកប្រតិបត្តិការនៅអ៊ីរ៉ាក់ដើម្បីប្រឆាំងទីជម្រករបស់ពួកជីហាតនិកាយស៊ុននីតនិយមជ្រុល។ ការសម្រេចចិត្តរបស់លោកអូបាម៉ាបានធ្វើឲ្យការអត់ធ្មត់របស់លោកដែលចង់បញ្ចប់សង្គ្រាមនៅក្រៅប្រទេសរបស់សហរដ្ឋអាមេរិកនោះមិនទាន់អាចសម្រេចបានទេ។
ចុះផ្សាយនៅថ្ងៃ៖
ស្តាប់ - ០២:០៥
លោកអូបាម៉ា ដែលចង់ឲ្យប្រវត្តិសាស្ត្រចងចាំរូបលោកថាជាអ្នកដែលបានបញ្ចប់សង្គ្រាមក្រៅប្រទេសក្នុងមួយទស្សវត្សរ៍ចុងក្រោយនេះ បានចាប់ផ្តើមជាថ្មីនូវយុទ្ធនាការសង្គ្រាមក្រៅប្រទេសម្តងទៀតហើយ។ ជាសង្គ្រាម ធ្វើឡើងក្នុងតំបន់មជ្ឈឹមបូព៌ា ដើម្បីប្រឆាំងនឹងពួកជីហាតនិកាយស៊ុននីត ដែលបានសម្លាប់អ្នកកាសែតអាមេរិកាំង២នាក់ដោយកាត់កកាលពីខែសីហាកន្លងទៅ។
នៅក្នុងយុទ្ធនាការថ្មីរបស់ខ្លួននៅពេលនេះ លោកអូបាម៉ាសន្យាថានឹងគាំទ្រកងកម្លាំងអ៊ីរ៉ាក់ ហើយលោកនឹងបង្កើនជំនួយទ័ពទៅកាន់បក្សប្រឆាំងស៊ីរីផងដែរ។ លោកអូបាម៉ាបាននិយាយថា នៅពេលនេះលោកមានគោលដៅច្បាស់លាស់ហើយ ពោលគឺអាមេរិកនឹងប្រើយុទ្ធសាស្ត្រ ប្រឆាំងភេរវកម្មដើម្បីកំទេចសម្បុករបស់ក្រុមក្រុមភេរវជន។ ច្បាស់ណាស់ថា ពេលនេះគោលដៅរបស់អាមេរិកគឺកំទេចភេរវជន ដែលមកយាយីសហរដ្ឋអាមេរិក។ អាមេរិកមិនខ្វល់ថាគេជានរណានោះទេ តែអាមេរិកនឹងមិនលើកលែងឡើយសម្រាប់ទង្វើរបស់គេ។
សេចក្តីថ្លែងការណ៍បែបនេះបានធ្វើឡើងមួយថ្ងៃមុននឹងការប្រារព្ធខួបអំពើភេរវកម្ម១១កញ្ញាទៅលើមជ្ឈមណ្ឌលពាណិជ្ជកម្មអាមេរិកកាលពីឆ្នាំ២០០១ ។ ក្នុងសុន្ទរកថារយៈពេល១៥នាទីលោកអូបាម៉ាក៏បានព្រមានថាក្រុងវ៉ាស៊ីនតោននឹងមិនធ្វើការជាមួយលោកប្រធានាធិបតីស៊ីរី លោកបាសា អាល់ អាសាដ ក្នុងប្រតិបត្តិការប្រយុទ្ធប្រឆាំងនឹងរដ្ឋអ៊ីស្លាមជ្រុលនិយមទេ។ លោកបានលើកហេតុផលថាប្រធានាធិបតីស៊ីរីបានបាត់បង់ភាពស្របច្បាប់រួចទៅហើយ ចាប់តាំងពីការធ្វើសង្គ្រាមប្រឆាំងនឹងប្រជាជនស៊ីវិលខ្លួនឯងមកនោះ។
នៅពេលនេះ លោកបានជំរុញឱ្យសមាជិកសភា អនុម័តសំណើទឹកប្រាក់ប្រមាណ 500 លានដុល្លារអាមេរិក សម្រាប់ជាមូលនិធិក្នុងបេសកកម្ម បណ្តុះបណ្តាលកងទ័ពស៊ីរី ដែលធ្លាប់បានធ្វើរួចហើយកាលពីខែមិថុនាកន្លងទៅ។ នេះជាផ្នែកមួយរបស់អាមេរិក ដើម្បីគាំទ្រដល់ប្រទេសស៊ីរី។
គួររបញ្ជាក់ថា ពេលនេះប្រជាជនអាមេរិកប្រមាណ៧៦% គាំទ្រនូវបេសកម្មរបស់អាមេរិកប្រឆាំងនឹងភេរវជនតាមផ្លូវអាកាស។ យ៉ាងណាក៏ដោយ លោកអូបាម៉ាមិនបានបញ្ជាក់ពីកាលបរិច្ឆេទថានឹងត្រូវបើកយុទ្ធនាការវាយប្រហារតាមផ្លូវអាកាសទៅលើរដ្ឋអ៊ីស្លាមនេះនៅពេលណានោះទេ។ ប្រធានាធិបតីអាមេរិក ក៏នៅតែមិនប្រើកងទ័ពជើងគោកនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ