រដ្ឋញូយ៉ក គឺជាសមរភូមិប្រយុទ្ធរបស់បេក្ខជនប្រធានាធិបតីប្រចាំគណបក្ស
ចុះផ្សាយនៅថ្ងៃ៖
បច្ចុប្បន្ននេះ បេក្ខជនខាងគណបក្សប្រជាធិបតេយ្យ និងគណក្សសាធារណរដ្ឋកំពុងដឹកនាំយុទ្ធនាការយ៉ាងសកម្មនៅរដ្ឋញូយ៉ក។ ការបោះឆ្នោតនៅរដ្ឋនេះគ្រោងនឹងធ្វើឡើងនៅថ្ងៃទី១៩ មេសាខាងមុខនេះ។ ជាធម្មតា កាលបរិច្ឆេទនៃការបោះឆ្នោតនៅទឹកដីនេះ គឺធ្វើឡើងក្រោយគេបង្អស់ ដើម្បីទុកពេលអោយសាធារណជនចង់តាមដានបន្ត និងកាន់តែជក់ចិត្តថែមទៀត។ហើយ វាក៏ជាការបោះឆ្នោតដ៏ធំជាងគេបង្អស់ ដោយសារតែនៅទីក្រុងញូយ៉កក៏ត្រូវបានរាប់បញ្ចូលនៅក្នុងទឹកដីនៃរដ្ឋមានឈ្មោះដូចគ្នានេះផងដែរ។ បេក្ខជន៣នាក់កំពុងដឹកនាំយុទ្ធនាការយ៉ាងលេចធ្លោនៅក្នុងរដ្ឋនេះ ព្រោះពួកគេស្គាល់រដ្ឋនេះច្បាស់ដូចបាតដៃ។
ទោះបីជាសល់ជាងមួយសប្តាហ៍ទៀតទើបការបោះឆ្នោតនឹងប្រព្រឹត្តទៅនៅរដ្ឋញូយ៉ក ប៉ុន្តែបណ្តាបេក្ខជននៅតាមគណបក្សនីមួយៗបានដឹកនាំយុទ្ធនាការឃោសនា ចាប់តាំងពីប៉ុន្មានសប្តាហ៍មុននេះមកម្ល៉េះ។ ព្រមពេលជាមួយគ្នានេះ សង្គ្រាមពាក្យសម្តីរវាងបេក្ខជនក៏កំពុងឆ្លើយទៅវិញទៅមកផងដែរ។ បន្ទាប់ពីរដ្ឋកាលីហ្វ័រញ៉ា ញូយ៉ក គឺជារដ្ឋសំខាន់មួយសំរាប់ការបោះឆ្នោតជ្រើសរើសបេក្ខជនផ្លូវការតំណាងបក្ស។ ចំនុចសំខាន់ គឺចំនួនប្រតិភូដ៏ច្រើនសន្ធឹកសន្ធាប់ប្រចាំរដ្ឋនេះ ដែលបេក្ខជនម្នាក់ៗត្រូវដណ្តើមយកឲ្យបាន។ សំរាប់គណបក្សប្រជាធិបតេយ្យ ចំនួនប្រតិភូ គឺចំនួន ២១៩ នាក់ ហើយគណបក្សសាធារណរដ្ឋ គឺមានចំនួន ៩៥ នាក់។
អ្វីដែលសំខាន់សំរាប់ទឹកដីញ៉ូវយក គឺមានបេក្ខជនបីរូបដែលធ្លាប់រស់នៅ និងស្គាល់ទីក្រុងញូយ៉កច្បាស់ដូចថ្ងៃតែម្តង។ គណបក្សប្រជាធិបតេយ្យ គឺលោកស្រី Hillary Clinton។ លោកស្រីធ្លាប់ជាសមាជិកព្រឹទ្ធសភាប្រចាំរដ្ឋញូយ៉កនេះស្រាប់តែម្តង ចន្លោះពីឆ្នាំ២០០១ ដល់ឆ្នាំ២០០៩។ ហើយលោកស្រីក៏មានគេហដ្ឋានមួយកន្លែងនៅខាងជើងទីក្រុងញូយ៉កផងដែរ។ កាលពីសប្តាហ៍មុន អតីតស្រ្តីទីមួយអាមេរិករូបនេះបានទៅជួបសំណេះសំណាលជាមួយអ្នកគាំទ្រនៅរោងល្ខោន Appolo នៅក្នុងសង្កាត់ Harlem។
ក្រុមការងារដឹកនាំយុទ្ធនាការបោះឆ្នោតរបស់លោកស្រីបានជ្រើសរើសទីកន្លែងនេះ ព្រោះវាជា និមិត្តរូបដ៏ជ្រាលជ្រៅមួយ។ តាមពិតទៅ រោងល្ខោន Appolo គឺ ជាទីតាំងប្រវត្តិសាស្រ្តដ៏សំខាន់មួយនៃការរីកលូតលាស់តន្ត្រីជនជាតិអាមេរិកស្បែកខ្មៅ។ មូលហេតុដែលលោកស្រី Hillary Clinton ជ្រើសរើសសង្កាត់ Harlem នេះធ្វើជាទីតាំងយុទ្ធសាស្រ្ត ព្រោះលោកស្រីចង់ទាក់ទាញសំលេងសហគមន៍ជាតិសាសន៍ចម្រុះនានា ជាពិសេស គឺជនជាតិអាមេរិកស្បែកខ្មៅតែម្តង។ នៅក្នុងសាលពោរពេញដោយអ្នកគាំទ្រគ្រប់វ័យ លោកស្រី Hillary Clinton បានរំលឹកពីអតីតកាលរបស់លោកស្រីក្នុងនាមជាសមាជិកព្រឹទ្ធសភាប្រចាំរដ្ឋញូយ៉ក។
លោកស្រីក៏មិនភ្លេចថ្លែងអំណរគុណដល់រដ្ឋមួយនេះ ដែលបានផ្តល់ឱកាសជូនលោកស្រីក្នុងជីវិតជាអ្នកនយោបាយ។ លើសពីនេះ លោកស្រីក៏បានឆ្លៀតបរិហារគូប្រជែង គឺលោក Bernie Sanders ថាជាអ្នកសន្យាខ្យល់ ព្រោះគំនិតរបស់លោក Sanders មិនអាចសម្រេចទៅជាលទ្ធផលជាក់ស្តែងបានឡើយ។ ព្រមជាមួយគ្នានេះផងដែរ លោកស្រីបានចោទលោក Donald Trump ថាជាអ្នកបំបែកបំបាក់ប្រទេស បំបែកបំបាក់ពលរដ្ឋអាមេរិក។ ចំណែកបេក្ខជនប្រជាធិបតេយ្យ គឺលោក Bernie Sanders បេក្ខជនរូបនេះបានធ្វើដំណើរទៅសង្កាត់ Bronx ដែលជាសង្កាត់ក្រីក្រមួយនៅទីក្រុងញូយ៉ក។
នៅទីនោះ លោកបានជួបសំណេះសំណាលជាមួយអ្នកគាំទ្រចំនួន ១៥ ០០០ នាក់។ ក្នុងចំណោមហ្វូងមនុស្សគាំទ្រ ក្រុមយុវជនបានស្រែកច្រៀងឈ្មោះលោក Sanders ដើម្បីស្វាគមន៍។ គេឃើញក្រុមអ្នកគាំទ្រមកពីសហគមន៍ចម្រុះជាតិសាសន៍ គឺមានទាំងពួកជនជាតិអាមេរិកស្បែកខ្មៅ ពួកអ្នកនិយាយភាសាអេស្ប៉ាញ និងពួកស្បែកស។ មុនក្លាយជាសមាជិកព្រឹទ្ធសភាប្រចាំរដ្ឋ Vermont ចាប់តាំងពីឆ្នាំ២០០៧ លោក Bernie Sanders មានកំណើតនៅសង្កាត់ Brooklyn ក្រុងញូវយ៉ក។ មានប្រភពចេញមកពីគ្រួសារក្រីក្រមួយ លោកមានឳពុកជាជនអន្តោប្រវេសន៍ជនជាតិប៉ូឡូញដើមកំណើតជ្វីស។ លោក Bernie Sanders បានរស់នៅ និង ធំដឹងក្តីក្នុងកូនផ្ទះល្វែងដ៏សាមញ្ញមួយ ដែលមានបីបន្ទប់។
នៅចំពោះមុខអ្នកគាំទ្រ អ្នកនយោបាយអាយុ ៧៤ ឆ្នាំរូបនេះបានរំលឹកពីភាពក្រកីនៅក្នុងសង្កាត់កុមារភាពរបស់គាត់។ លោកបានប្រកាសរក្សាជំហរដដែល ក្នុងនាមជាបេក្ខជនត្រៀមធ្វើបដិវត្តន៍សង្គម ដើម្បីយុត្តិធម៌សង្គម និងកាត់បន្ថយគម្លាតរវាងអ្នកមាន និងអ្នកក្រអាមេរិក។ លោកបានថ្លែងទៅកាន់អ្នកគាំទ្រថា ប្រសិនលោកឈ្នះរដ្ឋញូយ៉ក លោកនឹងបោះជំហានទៅមុខរហូតដល់សេតវិមានតែម្តង។ ងាកមកមើលបេក្ខជន ខាងគណបក្សសាធារណរដ្ឋវិញម្តង។ មហាសេដ្ឋីអចលនទ្រព្យ Donald Trump មានកំណើតនៅសង្កាត់ Queens ក្រុងញូយ៉ក។
លោក Trump រកស៊ីមានបាន និងជាម្ចាស់អាគារជាច្រើនកន្លែងនៅសង្កាត់ Manhattan។ កាលពីចុងសប្តាហ៍នេះ លោកបានទៅបូជនីយដ្ឋានគោរពវិញ្ញាណក្ខន្ធសាកសពជនរងគ្រោះព្រឹត្តិការណ៍ភេរវកម្មថ្ងៃទី ១១ កញ្ញា។ លោក Trump ក៏បានបរិច្ចាកថវិកាចំនួន ១ សែនដុល្លារដល់សារមន្ទីរនេះផងដែរ។ បេក្ខជនដ៏ចម្រូងចម្រាស់រូបនេះបានពន្យល់ថា ការបរិច្ចាកនេះ គឺជាការឆ្លើយតបទៅនឹង «ពាក្យពេចន៍ប្រមាថមើលងាយចំពោះតម្លៃក្រុងញូយ៉ក និងអ្នករស់នៅទីក្រុងនេះ» របស់គូប្រជែង គឺលោក Ted Cruz។ សូមរំលឹកថា ក្នុងកំឡុងកិច្ចពិភាក្សាបេក្ខជនកាលពីខែមីនាកន្លងទៅនេះ លោក Ted Cruz ធ្លាប់បានរិះគន់តម្លៃសីលធម៌ក្រុងញូយ៉កថាមិនបានគោរពទៅតាមគោលការណ៍គ្រឹស្តសាសនា។
បេក្ខជនមហាអភិរក្សនិយមរូបនេះក៏បានរិះគន់គូបដិបក្ខ គឺលោក Donald Trump ថាជាជនឆ្វេងនិយម និងកំណែទម្រង់និយម ដែលមិនតំណាងឲ្យតំលៃអភិរក្សនិយមរបស់គណបក្សសាធារណរដ្ឋឡើយ។ បើយោងតាមការស្ទង់មតិរបស់ក្រុមហ៊ុន Quinnipiac លោកស្រី Hillary Clinton ទំនងអាចទទួលសំលេងគាំទ្រ ៥៤% ខណៈពេលដែលលោក Bernie Sanders ទំនងអាចទទួលបានតែ ៤២% ប៉ុណ្ណោះ។ ខាងបេក្ខជនសាធារណរដ្ឋវិញ លោក Donald Trump ទំនងអាចទទួលបានសំលេង គាំទ្រ ៥៦% ដឹកមុខគូប្រជែងគឺ លោក Ted Cruz ដែលអាចទទួលបាន ២០% និងលោក John Kasich ដែលអាចទទួលបាន ១៩%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ