លោកដូណាល់ ត្រាំ សម្រេចមិនដកទ័ពអាមេរិកចេញពីអាហ្វហ្កានីស្ថាន
ចុះផ្សាយនៅថ្ងៃ៖
ស្តាប់ - ០៥:១៦
ថ្ងៃចន្ទម្សិលមិញ លោកដូណាល់ ត្រាំ បានប្រកាសមិនដកកងទ័ពអាមេរិកចេញពីអាហ្វហ្កានីស្ថានទេ។ ប្រធានាធិបតីអាមេរិកថែមទាំងសន្យាបន្ថែមចំនួនទាហានអាមេរិកក្នុងទឹកដីអាហ្វហ្កានីស្ថានទៀតផង។ ទន្ទឹមនេះដែរ លោកដូណាល់ ត្រាំបានដាក់សម្ពាធប៉ាគីស្ថាន អោយសហការជាមួយអាមេរិក ក្នុងការដោះស្រាយបញ្ហាអាហ្វហ្កានីស្ថាន។ ប៉ាគីស្ថានរងការចោទប្រកាន់ថា ជាទីជម្រករបស់ក្រុមភេរវជន។ ក្រោយលោកត្រាំប្រកាសមិនដកទ័ពអាមេរិកចេញពីអាហ្វហ្កានីស្ថាន ក្រុមតាលីបង់បានបញ្ចេញប្រតិកម្ម ភ្លាមៗវិញថា នឹងធ្វើអោយអាហ្វហ្កានីស្ថានក្លាយជាផ្នូរកប់ខ្មោចសតវត្សទី២១សម្រាប់អាណាចក្រអាមេរិក។
លោកដូណាល់ ត្រាំ ទទួលស្គាល់ថាពិបាកធ្វើការសម្រេចចិត្តទាក់ទងនឹងការដកកងទ័ពអាមេរិកពីអាហ្វហ្កានីស្ថាន
អ្នកណាក៏ដឹងដែរថា តាំងពីណាពីណីមក លោកដូណាល់ ត្រាំ មានជំហរចង់អោយអាមេរិកដកកងទ័ពចេញពីអាហ្វហ្កានីស្ថាន មិនចង់អោយទ័ពអាមេរិកបន្តស្លាប់ក្នុងហិង្សានៅអាហ្វហ្កានីស្ថាន។ លោកដូណាល់ ត្រាំ ទទួលស្គាល់ថា លោកមានការលំបាកក្នុងការសម្រេចចិត្តរឿងនេះ។ លោកថា លោកចង់ដក ប៉ុន្តែ លោកថា ដល់ពេលត្រូវសម្រេចចិត្ត លោកបែរជាធ្វើផ្សេងពីចិត្តលោកទៅវិញ។ មូលហេតុគឺដោយសារលោកត្រាំ យល់ថា បើអាមេរិកឆាប់ដកទ័ពពីអាហ្វហ្កានីស្ថានពេក ក្រុមភេរវជនដូចជាក្រុមតាលីបង់ ច្បាស់ជាកាន់តែបានចិត្ត ហើយឆ្លៀតពេលវាយប្រហារកាន់តែខ្លាំងយកដែនដីបានកាន់តែច្រើន ពីរដ្ឋាភិបាលក្រុងកាប៊ូល។ លោកដូណាល់ ត្រាំគិតមិនខុសទេ។ មើលភាពជាក់ស្តែង រដ្ឋអំណាចអាហ្វហ្កានីស្ថានកាន់កាប់ដែនដីសឹងមិនដល់ពាក់កណ្តាលផង។ ក្រុមជំនាញគិតថា ការដែលអាមេរិកប្តូរចិត្តសម្រេចមិនដកទ័ពចេញភ្លាមៗបែបនេះ គឺជាដំណោះស្រាយបន្ទាន់ ប្រឈមនឹងស្ថានការណ៍ក្នុងស្រុកអាហ្វហ្កានីស្ថាន ដែលនៅតែបន្តរងគ្រោះដោយក្រុមតាលីបង់។
រដ្ឋមន្ត្រីការពារជាតិអាមេរិក លោកចេម ម៉ាទិស ប្រាប់ថា នឹងពិភាក្សាជាមួយអង្គការអូតង់ឆាប់បំផុត ហើយប្រាប់ដែរថា ប្រទេសដៃគូអាមេរិកជាច្រើនបានសន្យាបន្ថែមកងទ័ពពួកគេដែរ។ គិតទៅ អាមេរិកធ្វើអន្តរាគមន៍យោធានៅអាហ្វហ្កានីស្ថាន១៦ឆ្នាំហើយ គឺតាំងពីឆ្នាំ២០០១មក ដើម្បីគាស់រំលើងក្រុមភេរវជនតាលីបង់ ដែលគាំទ្រក្រុមអាល់កៃដា។ ក្រុមអាល់កៃដានេះហើយ ដែលបានបង្កភេរវកម្មសម្លាប់ប្រជាជនអាមេរិក កាលពីថ្ងៃ១១កញ្ញា ឆ្នាំ២០០១។ ប៉ុន្តែ អន្តរាគមន៍១៦ឆ្នាំមកនេះ ក៏នៅតែពិបាកមិនអាចរកសន្តិភាពអោយអាហ្វហ្កានីស្ថាន ព្រោះតែក្រុមតាលីបង់នៅតែមានអានុភាពហ្នឹងហើយ។ ទាហានអាមេរិកនៅអាហ្វហ្កានីស្ថានសព្វថ្ងៃ មាន៨៤០០នាក់ បម្រើការក្នុងកងកម្លាំងអន្តរជាតិ ដែលមានកងទ័ពសរុប ១ម៉ឺន៣ពាន់៥រយនាក់។ កងទ័ពអន្តរជាតិទាំងនេះ មានតួនាទីផ្តល់យោបល់ ជួយដល់កងទ័ពអាហ្វហ្កានីស្ថាន កំចាត់ភេរវកម្ម។ រដ្ឋាភិបាលក្រុងកាប៊ូលបានស្វាគមន៍នឹងការសម្រេចរបស់លោកត្រាំ ដែលមិនដកកងទ័ពអាមេរិកចេញពីអាហ្វហ្កានីស្ថាន។
ក្រុមជំនាញ៖ទោះជាអាមេរិកបន្ថែមទាហាន៣៩០០នាក់ ក៏នៅតែមិនអាចទប់ទល់ក្រុមតាលីបង់
ក្នុងសន្ទរកថាម្សិលមិញ លោកត្រាំមិនបានប្រាប់ពីតួលេខទាហានដែលត្រូវបន្ថែមនៅអាហ្វហ្កានីស្ថានទេ តែមន្ត្រីជាន់ខ្ពស់អាមេរិកមួយរូបប្រាប់ថាលោកត្រាំព្រមអោយអាមេរិកដាក់ទាហានបន្ថែម ដល់ទៅ៣៩០០នាក់។ តែបើយោងតាមក្រុមជំនាញ គឺមិនគ្រប់គ្រាន់នឹងទប់ទល់ក្រុមភេរវជនទេ។ ដូចយើងដឹងអញ្ចឹង ក្រុមភេរវជនតាលីបង់ពូកែវាយប្រហារណាស់។ យោងតាមអ្នកជំនាញ បើចង់ទប់ទល់ ទាល់តែមានទាហានយ៉ាងអន់ក៏៣០ម៉ឺននាក់ដែរ។ ប៉ុន្តែ ទាហានអន្តរជាតិនៅអាហ្វហ្កានីស្ថាន មានមិនដល់២ម៉ឺននាក់ផង។
ឥឡូវនេះ គេកំពុងបារម្ភថា ការដែលអាមេរិកសម្រេចមិនដកទ័ពទៅវិញនេះ នឹងធ្វើអោយក្រុមតាលីបង់ធ្វើការវាយប្រហារកាន់តែខ្លាំង នៅអាហ្វហ្កានីស្ថាន។ ហើយអ្នកដែលរងគ្រោះធ្ងន់ធ្ងរនោះ គ្មានអ្នកណាក្រៅពីប្រជាជនស្លូតត្រង់ទេ។ ក្រោយលោកដូណាល់ ត្រាំ ប្រកាសមិនដកទាហាននេះ ក្រុមតាលីបង់បានព្រមានរួចហើយថា នឹងបន្តសកម្មភាពជីហាតរបស់ខ្លួនតទៅទៀត។
ហេតុអ្វីក៏សហគមន៍អន្តរជាតិពិបាកដោះស្រាយបញ្ហាអាហ្វហ្កានីស្ថាន?
ដើម្បីរកដំណោះស្រាយបញ្ហាអាហ្វហ្កានីស្ថាន លោកត្រាំ មិនបានទាត់ចោលគោលគំនិតនៃការចរចាសន្តិភាពរវាងក្រុមតាលីបង់ និងរដ្ឋាភិបាលអាហ្វហ្កានីស្ថានទេ។ ហើយលោកក៏បានទាមទារអោយក្រុងកាប៊ូលធ្វើកំណែទម្រង់កំចាត់អំពើពុករលួយ អោយបានត្រឹមត្រូវដែរ។ លោកព្រមានថា អាមេរិកមិនមែនចេះតែជួយដោយគ្មានដែនកំណត់ទេ។
នយោបាយអាមេរិកគាំទ្រអោយមានការចរចាសន្តិភាពរវាងក្រុមតាលីបង់ និងរដ្ឋាភិបាលក្រុងកាប៊ូល មិនមែនជានយោបាយថ្មីទេ។ ដំណោះស្រាយបញ្ហាសង្គ្រាមអាហ្វហ្កានីស្ថាន ស្មុគស្មាញណាស់ មិនមែនមានត្រឹមតែភាគីតាលីបង់ និងរដ្ឋាភិបាលអាហ្វហ្កានីស្ថានតែ២តួអង្គនេះទេ។ គឺត្រូវបន្តបែកធ្លាយរហូតដល់ប្រទេស២សំខាន់ទៀត ក្នុងតំបន់ គឺប៉ាគីស្ថាននិងឥណ្ឌា។
ប៉ាគីស្ថាននិងឥណ្ឌាប្រជែងគ្នាដាក់ឥទ្ធិពលនៅអាហ្វហ្កានីស្ថាន។ ឥណ្ឌាបានផ្តល់លុយសន្ធឹកសន្ធាប់ជួយសាងសង់អាហ្វហ្កានីស្ថានឡើងវិញ ដោយបានមើលឃើញថា អាចទទួលប្រយោជន៍សេដ្ឋកិច្ចនៅអាស៊ីកណ្តាល។ ប៉ុន្តែ ប៉ាគីស្ថានវិញមើលឃើញថា ឥណ្ឌាធ្វើដូច្នេះ គឺដើម្បីឡោមព័ទ្ធទឹកដីប៉ាគីស្ថាន។ បើយើងមើលផែនទី ដែនដីប៉ាគីស្ថានស្ថិតនៅចន្លោះអាហ្វហ្កានីស្ថាន និងឥណ្ឌា។ ខាងលិចប៉ាគីស្ថាន គឺមានអាហ្វហ្កានីស្ថាន ហើយម្ខាងទៀត គឺខាងកើតប៉ាគីស្ថាន គឺជាដែនដីឥណ្ឌា។ អញ្ចឹង ឥណ្ឌាអាចក្តោបប៉ាគីស្ថានបាន បើឥណ្ឌាឆ្លងទៅអាហ្វហ្កានីស្ថាន តាមទឹកដីប៉ាគីស្ថាន។ កន្លងមក ប៉ាគីស្ថានធ្លាប់ហាមមិនអោយឥណ្ឌាត្រង់ស៊ីតទំនិញ ក្នុងទឹកដីប៉ាគីស្ថានទេ ជាទំនិញដែលឥណ្ឌាផ្តោះប្តូរជាមួយអាហ្វហ្កានីស្ថាន។ អញ្ចឹង ឥណ្ឌាក៏ឆ្លងទៅអាហ្វហ្កានីស្ថានដោយវៀងតាមផ្លូវទឹកវិញ។
ដើម្បីកុំអោយឥណ្ឌាដាក់ឥទ្ធិពលខ្លាំងនៅអាហ្វហ្កានីស្ថានបាន ទាហានប៉ាគីស្ថានបានចាក់រឺសគល់ នៅតាមព្រំដែនអាហ្វហ្កានីស្ថាន ដោយធ្វើយុទ្ធនាការកំចាត់ក្រុមតាលីបង់ហ្នឹងហើយ។ ប៉ុន្តែ ប៉ាគីស្ថានប្រើអាវុធមុខ២ គឺថា សហការជាមួយអាមេរិកកំចាត់ក្រុមតាលីបង់ ចាប់មេខ្លោងតាលីបង់បានច្រើននាក់កន្លងមក ក៏ដើម្បីរារាំងកុំអោយក្រុមតាលីបង់អាចចរចាសន្តិភាពជាមួយរដ្ឋាភិបាលអាហ្វហ្កានីស្ថានដែរ។ ប៉ាគីស្ថានចង់មានមុខមាត់ ចង់មានវត្តមានក្នុងការចរចាសន្តិភាពនេះដែរ គឹដើម្បីដាក់ឥទ្ធិពលខ្លួននៅអាហ្វហ្កានីស្ថាន ប្រឈមនឹងឥណ្ឌាហ្នឹងហើយ។ រដ្ឋាភិបាលលោកអូបាម៉ាអាណត្តិមុនដឺងច្បាស់ថា ដំណោះស្រាយអាហ្វហ្កានីស្ថាន មិនអាចគ្មានប៉ាគីស្ថាននិងឥណ្ឌាទេ។ ទាល់តែប៉ាគីស្ថាននិងឥណ្ឌាកាត់បន្ថយភាពតានតឹងនឹងគ្នាទើបអាចជួយដោះស្រាយបញ្ហាអាហ្វហ្កានីស្ថាន។
ឥឡូវនេះ លោកដូណាល់ត្រាំ ដាក់សម្ពាធអោយប៉ាគីស្ថានសហការជាមួយអាមេរិក ដោះស្រាយបញ្ហាអាហ្វហ្កានីស្ថាន ក៏គ្មានអ្វីថ្មីដែរ វាជាទិសដៅនយោបាយអាមេរិកតាំងតែពីអាណត្តិមុនៗម្ល៉េះ។ ខែមុននេះ រដ្ឋបាលលោកត្រាំបានព្យួរជំនួយសម្រាប់ផ្នែកយោធាប៉ាគីស្ថាន ៥០លានដុល្លារ។ អាមេរិកចោទថា មកពីប៉ាគីស្ថានមិនសូវជាពេញដៃពេញជើង ក្នុងការកំចាត់ក្រុមហាក់កានី Haqqani ដែលជាក្រុមដៃគូរបស់ក្រុមតាលីបង់។ ក្រុមហាក់កានីនេះរងការចោទប្រកាន់ថា មានទំនាក់ទំនងជាមួយផ្នែកចារកិច្ចប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ