បន្ទាប់ពីការបង្ក្រាបហិង្សា ចលនាបាតុកម្មនិស្សិតហុងកុង នៅតែបន្ត
ចុះផ្សាយនៅថ្ងៃ៖
ស្តាប់ - ០៦:៣៥
ការប្រមូលផ្តុំធ្វើបាតុកម្មនៅហុងកុង មិនថមថយទេ ! នៅថ្ងៃចន្ទទី ២៩ កញ្ញានេះ បាតុកររាប់ពាន់នាក់ នៅតែបន្តជួបជុំគ្នា និងកាន់កាប់សង្កាត់ពាណិជ្ជកម្ម ដើម្បីទាមទារសេរីភាពនិងប្រជាធិបតេយ្យឱ្យបានធំជាងមុន ពីរបបកុម្មុយនិស្តក្រុងប៉េកាំង។ ភាគច្រើនជានិស្សិត ចលនាបាតុកម្មទាមទារសិទ្ធិជ្រើសរើសប្រមុខដឹកនាំដែនដីហុងកុងដោយខ្លួន ចាប់ពីឆ្នាំ២០១៧ទៅ ដោយគ្មានការលូកលាន់ពីរដ្ឋអំណាចកណ្តាលប៉េកាំង។ ចលនាបាតុកម្ម បានស្ទុះឡើងខ្លាំងរាលដាលជាអំពើហិង្សានៅចុងសប្តាហ៍នេះ ដោយមានការបង្ក្រាបពីប៉ូលិស មានអ្នករបួស មានអ្នកត្រូវចាប់ខ្លួន និងត្រូវបញ្ជូនទៅតុលាការកាត់ទោសទៀត។ កាន់តែគាបសង្កត់ កាន់មានការប្រមូលផ្តុំគ្នាខ្លាំងឡើង ប៉ុន្តែអាជ្ញាធរក្រុងហុងកុងបានប្រើវិធីសាស្ត្រសម្របសម្រួល ដោយដកកម្លាំងប៉ូលិសចេញវិញ នៅថ្ងៃនេះ។
នៅព្រឹកនេះ ហុងកុងគ្មានទិដ្ឋភាពដូចហុងកុងដែលគេធ្លាប់ល្បីថាមានសណ្តាប់ធ្នាប់ល្អនោះទេ។ ផ្លូវថ្នល់ធំៗ ផ្លូវបំបែកសំខាន់ៗ ត្រូវបិទខ្ទប់ និងមិនអាចធ្វើដំណើរបានឡើយ។ ចរាចរណ៍ត្រូវជាប់គាំង។ រថយន្តក្រុងជាង២០០ខ្សែ ត្រូវផ្អាកដំណើរការ ដោយផ្លូវត្រូវបិទ។ សាលារៀនរាប់សិប និងធនាគារ ក៏បិទ។ ស្ថាប័នខ្លះ បានអនុញ្ញាតឱ្យបុគ្គលិកឈប់សម្រាកមិនធ្វើដំណើរមកការិយាល័យតែម្តង នៅថ្ងៃចន្ទនេះ។
រដ្ឋាភិបាលហុងកុង បានប្រកាសដកកម្លាំងប៉ូលិសប្រឆាំងនឹងអំពើហិង្សាចេញ ដើម្បីបង្ហាញពីកាយវិការសម្របសម្រួល បន្ទាប់ពីមានការប៉ះទង្គិចហិង្សាអស់មួយយប់។ ហើយបានស្នើសុំជាថ្នូរមកវិញ ឱ្យនិស្សិតបើកផ្លូវ ដែលពួកគេកាប់កាប់ទាំងអម្បាលម៉ាន តាមដែលអាចធ្វើទៅបាន ដើម្បីឱ្យរថយន្តសង្គ្រោះ និងរថយន្តក្រុងជាមធ្យោបាយដឹកជញ្ជូនសាធារណៈអាចដំណើរការបាន។
បាតុកម្មអហិង្សា
ភាពស្ងប់ស្ងាត់ បានវិលមកគ្របដណ្តប់ហុងកុងដ៏ពិតមែន តែឥស្សរជន អ្នកមុខអ្នកការហុងកុង ដូចយ៉ាងអ្នកទទួលខុសត្រូវវិហារកាតូលិក សមាជិកសភា ឬសាស្ត្រាចារ្យផង បានមកជួយធ្វើបាតុកម្ម លើកទឹកចិត្តនិស្សិត និងគាំទ្រចលនាបាតុកម្មអហិង្សា ជាពិសេសនៅទីតាំង មុខសង្កាត់ពាណិជ្ជកម្មនៃទីផ្សារភាគហ៊ុនហុងកុងដ៏ល្បីល្បាញ។ សកម្មភាពអហិង្សាដែលគួរឱ្យកោតសរសើរ ព្រោះថ្វីបើមានការប៉ះទង្គិចគ្នា តានតឹងខ្លាំងនៅរសៀល និងយប់ថ្ងៃអាទិត្យទី ២៨ កញ្ញានេះមែន ប៉ុន្តែនិស្សិតហុងកុង កំពុងអង្គុយកាន់កាប់ យ៉ាងមានសណ្តាប់ធ្នាប់ គ្រប់គ្រងចលនាបាតុកម្មបានយ៉ាងត្រឹមត្រូវ ចេះអធនគ្រប់គ្នាៗ។ បាតុករមិនបានតវ៉ា ឬរំលោភបំពានលើរាងកាយប៉ូលិសទេ។ ពេលប៉ូលិសសំឡុតគំរាមបង្ក្រាប បាតុករលើកដៃព្រមឱ្យប៉ូលិសចាប់ខ្លួនភ្លាម ដើម្បីសម្តែងអំពីធម៌អហិង្សា។
ចលនាបាតុកម្មប្តូរទ្រង់ទ្រាយ
មូលហេតុទីមួយ ដែលជំរុញឱ្យបាតុកម្មនិស្សិតស្ងៀមៗស្រាប់ផ្ទុះទៅជាចលនាប៉ះបោរស៊ីវិលខ្លាំងនៅចុងសប្តាហ៍នេះ គឺពីមានចលនាមួយទៀតមកចូលរួមជាមួយកម្លាំងនិស្សិត។ ចលនាOccupy Central ចលនាប៉ះបោរស៊ីវិល មានការគាំទ្រពីប្រជាជនទូទៅ គ្រោងចុះធ្វើបាតុកម្មដែរ នៅថ្ងៃពុធខាងមុខទេ ប៉ុន្តែនៅពេលបានឃើញចលនានិស្សិតមានឆន្ទៈហើយ ក៏អាចប្រមូលគ្នាបានយ៉ាងឆាប់រហ័សចូលធ្វើបាតុកម្មជាមួយគ្នាភ្លាមនៅចុងសប្តាហ៍នេះតែម្តង។ ចំណុចសំខាន់មួយទៀត គឺទំនងមកពីក្រុមនិស្សិតអស់អំណត់ កើតការសង្ស័យកាន់តែធំៗឡើងចំពោះអាជ្ញាធរហុងកុង ដែលហាក់ដូចជាមិនធ្វើដឹងធ្វើឮសំណើរបស់ពួកគេសោះ ទើបចង់ប្តូរយុទ្ធសាស្ត្រពីការដើរដង្ហែក្បួនលើកទង់ជាតិ ស្រែកជ័យឃោសទាមទាររួចត្រលប់ចូលផ្ទះរៀងៗខ្លួនទៅជាការតស៊ូ កាន់កាប់កន្លែងដែលជាទាក់ភ្នែកពិភពលោកទាំងមូលវិញ។ ម្យ៉ាងវិញទៀតមកពីកម្លាំងមានសមត្ថកិច្ចប្រើកម្លាំងហួសប្រមាណប្រឆាំងនឹងក្រុមនិស្សិតមុន។ យុទ្ធនាការបះបោរស៊ីវិល ក៏បានលេចជារូបរាងឡើង !
ចលនាOccupy Central កំណែទម្រង់នយោបាយ
ចលនាបាតុកម្ម បានកើតមានតាំងពីជាច្រើនថ្ងៃមកហើយ ដើម្បីទាមទារឱ្យមានការបោះឆ្នោតដោយសេរី និងសកល នៅហុងកុង និងទាមទារឱ្យអាជ្ញាធរហុងកុង ដកសេចក្តីសម្រេចចិត្តរបស់អំណាចកណ្តាលក្រុងប៉េកាំង កាលពីខែសីហា ដែលប្រកាសថាជាអ្នកសម្រេចជ្រើសតាំងបេក្ខជនពីរបីនាក់មកឈរឈ្មោះឱ្យពលរដ្ឋបោះឆ្នោតជាប្រមុខដឹកនាំហុងកុង។ ចលនាOccupy Central ដែលជាតំណាងចលនាប្រឆាំងរដ្ឋាភិបាលសំខាន់ជាងគេ នៅហុងកុង ដឹកនាំដោយសាស្ត្រាចារ្យនៅសកលវិទ្យាលស័យនិងនិស្សិត បានទាមទារឱ្យអាជ្ញាធរហុងកុងរៀបចំពិគ្រោះយោបល់ និងផ្តល់សន្ទុះឡើងវិញ ដល់ដំណើរការកែទម្រង់នយោបាយ។ ប៉ុន្តែលោកអភិបាលហុងកុង ថ្វីបើបានអះអាងថានឹងរៀបចំសាកសួរយោបល់សាធារណៈមែន តែដាច់ខាត ប្រយុទ្ធប្រឆាំងនឹងសកម្មភាពកាន់កាប់ខុសច្បាប់របស់បាតុករ។
អាជ្ញាធរហុងកុងព្រមានបំបែកបាតុកម្ម
ប្រមុខរដ្ឋាភិបាលហុងកុង លោក លឿង ជន់យីង បានបដិសេធពាក្យចចាមអារាមថាមិនបានសុំកម្លាំងទាហានចេញមកបង្ក្រាបចលនាបាតុកម្មនិស្សិតទេ និងបានអំពាវនាវ មិនឱ្យពលរដ្ឋចូលជិតចលនាបាតុកម្ម ដែលមានទ្រង់ទ្រាយធំមិនធ្លាប់មានសោះ គិតចាប់តាំងហុងកុងត្រលប់មកស្ថិតក្រោមរដ្ឋបាលប៉េកាំងនៅឆ្នាំ១៩៩៧មក។ ជាមួយនឹងសភាពស្ងប់ស្ងាត់ អាចចាត់ទុកថាការសម្រាកយកកម្លាំង និងការបន្ធូរបន្ថយសម្ពាធបន្តិច និងដើម្បីរៀបផែនការ ក្រុមនិស្សិតក្នុងជួរបាតុករខ្លួនឯងផ្ទាល់តែម្តង យល់ថានឹងអាចមានអំពើហិង្សា បង្ក្រាបថ្មីទៀត ពីសំណាក់អាជ្ញាធរជាក់ជាមិនខាន ព្រោះរដ្ឋាភិបាលហុងកុង ពិតជាមិនបណ្តោយឱ្យចលនាទាមទារប្រជាធិបតេយ្យ កាន់កាប់ក្រុងដោយខុសច្បាប់បែបនេះទេ។
ម្យ៉ាងវិញទៀត នៅថ្ងៃម្សិលមិញជាលើកទីមួយ រដ្ឋាភិបាលហុងកុងបានទទួលការគាំទ្រពីអំណាចកណ្តាលក្រុងប៉េកាំង ក្នុងការទប់ស្កាត់ និងបង្ក្រាបបាតុករ ដោយថែមទាំងចាត់ទុកថាចលនាបាតុកម្មនេះ ជាស្នាដៃរបស់ពួកក្រុមជ្រុលនិយម។ សារព័ត៌មានចិន បានធ្វើអត្ថាធិប្បាយ និងបរិហារគ្រប់ៗគ្នា ថាបាតុកម្មនិស្សិតនិងចលនាប្រជាធិបតេយ្យ កំពុងតែធ្វើឱ្យខូចរូបភាពហុងកុង។ ជាក់ស្តែងទីផ្សារភាគហ៊ុន បានបើកទ្វារនិងបិទទ្វារនៅថ្ងៃនេះជាមួយនឹងការដាំក្បាលចុះយ៉ាងខ្លាំង។
ប៉េកាំងក្រែងឥទ្ធិពលប្រជាធិបតេយ្យឆ្លងរាតត្បាត
ថ្វីបើប៉េកាំង ព្រមផ្តល់ស្វ័យភាពធំច្រើនដល់ហុងកុង ផ្តល់សេរីភាពទូលំទូលាយខ្លាំងដល់ហុងកុង ក្នុងក្របខ័ណ្ឌរដ្ឋមួយប្រព័ន្ធពីរមែន (ក្រោយពេលអង់គ្លេសប្រគល់ហុងកុងមកឱ្យចិនវិញនៅឆ្នាំ១៩៩៧) ប៉ុន្តែ រាល់សកម្មភាពបាតុកម្ម ដើម្បីសេរីភាពនិងប្រជាធិបតេយ្យ ត្រូវបានប៉េកាំងក្រលេកមើលក្នុងក្រសែភ្នែកប្រុងប្រយ័ត្នបំផុត។ ព្រោះ២៥ឆ្នាំក្រោយការបង្ក្រាបយ៉ាងបង្ហូរឈាមចលនានិស្សិតនៅទីលានធានអាន់មៀន នាទីក្រុងប៉េកាំង មេដឹកនាំកុម្មុយនិស្តចិន ប្រុងប្រយ័ត្ន និងព្រួយបារម្ភជានិច្ចខ្លាចមានជំងឺប្រជាធិបតេយ្យឆ្លងពីហុងកុងទៅកាន់តំបន់ផ្សេងទៀត។ ហេតុដូច្នេះហើយ បានជាប៉េកាំងបានបិទខ្ទប់ភ្លាម ការស្វែងរកតាមប្រព័ន្ធអ៊ីនធ័រនែត នៃពាក្យថា Occupy Central បិទខ្ទប់ប្រព័ន្ធសង្គម ដើម្បីកាត់បន្ថយការផ្សព្វផ្សាយ។ រាល់ព័ត៌មានទាំងឡាយទាក់ទងនឹងព្រឹត្តិការណ៍នៅហុងកុង ត្រូវបានបញ្ជាឱ្យដកចេញពីទំព័រវិបសៃតិ៍ចិនទាំងអស់។ នេះបើតាមគេហទំព័រចិនជាភាសាអង់គ្លេស។
សេណារីយោសម្រាប់ពេលខាងមុខ អាស្រ័យទៅលើសមត្ថភាពរបស់ចលនាប្រជាធិបតេយ្យ និងទៅលើចម្លើយតបរបស់អាជ្ញាធរហុងកុង ប៉ុន្តែបើនិយាយពី ប៉េកាំងវិញ គឺមិនងាយនឹងបន្ទន់ជំហរទេ។ កំណែទម្រង់ស្នើឡើងដោយប៉េកាំង នឹងត្រូវអនុម័តដោយសំឡេងពីរភាគបីនៃសមាជិកសភាហុងកុង។ ប្រសិនបើសភាហុងកុងមិនគាំទ្រ ប៉េកាំងអាចនឹងវិលទៅអនុវត្តវិធីចាស់ជ្រើសរើសប្រមុខរដ្ឋាភិបាលហុងកុង ដោយគ្មានពលរដ្ឋហុងកុង៥លាននាក់ចូលរួមជាមួយវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ