ហេតុអ្វីបានជាអង្គការអូតង់ និងប្រទេសរុស្ស៊ីផ្តើមកិច្ចសន្ទនាជាថ្មី?
ចុះផ្សាយនៅថ្ងៃ៖
ស្តាប់ - ០៥:២១
នៅថ្ងៃពុធ ទី២០ មេសា អង្គការអូតង់ និងប្រទេសរុស្ស៊ីបានបើកកិច្ចប្រជុំជាថ្មីនៅទីស្នាក់ការរបស់អង្គការអូតង់ក្នុងទីក្រុងព្រុចសែល ប្រទេសបែលហ្ស៊ិក។ គឺជាកិច្ចប្រជុំថ្នាក់រដ្ឋមន្រ្តីការបរទេសមកពី២៨ប្រទេសសមាជិកអង្គការអូតង់ និងប្រទេសរុស្ស៊ី។ នេះជាលើកទី១ ដែលអូតង់ និងរុស្ស៊ីផ្តើមកិច្ចសន្ទនាជាថ្មី បន្ទាប់ពីបានបែរខ្នងដាក់គ្នាអស់រយៈពេល ២ឆ្នាំដោយសារតែវិបត្តិអ៊ុយក្រែន។ ២ឆ្នាំក្រោយមក វិបត្តិអ៊ុយក្រែនមិនទាន់បានដោះស្រាយទេ ចុះហេតុអ្វីបានជាអូតង់ និងរុស្ស៊ីព្រមព្រៀងវិលមកសន្ទនាគ្នាជាថ្មី?
អស់រយៈពេល ២ឆ្នាំ ពោលតាំងពីខែមិថុនា ឆ្នាំ ២០១៤ ដែលអូតង់ និងរុស្ស៊ីបានដេកបែរខ្នងដាក់គ្នា។ កាលណោះ អូតង់ខឹងរុស្ស៊ីលូកដៃជ្រៅពេកនៅក្នុងវិបត្តិផ្ទៃក្នុងប្រទេសអ៊ុយក្រែនរហូតដល់ក្រសោបយកទឹកដីគ្រីមេរបស់អ៊ុយក្រែនតែម្តង។ បន្ទាប់មក អូតង់មិនសប្បាយចិត្តនឹងរុស្ស៊ីដែលបានចេញមុខគាំទ្រទាំងអាវុធ លុយកាក់ និងកម្លាំងទ័ពដល់ក្រុមឧទ្ទាមបះបោរទាមទារផ្តាច់ទឹកដីនិយមនៅប៉ែកខាងកើតប្រទេសអ៊ុយក្រែន។
ដើម្បីបង្កើនគំនាបដាក់រុស្ស៊ី អូតង់មិនញញើតនឹងបង្ហាញសាច់ដុំដោយចាប់ផ្តើមដាក់ពង្រាយប្រព័ន្ធខែលមីស៊ីលប្រឆាំងមីស៊ីលនៅក្នុងអតីតសាធារណរដ្ឋជំនាន់សហភាពសូវៀតទេ ពិសេសនៅក្នុងប្រទេសរូម៉ានី និងប្រទេសប៉ូឡូញដែលស្ថិតមិនឆ្ងាយប៉ុន្មានពីព្រំដែនរុស្ស៊ី។ អូតង់បានបញ្ជាក់ជាច្រើនដងថា ប្រព័ន្ធខែលមីស៊ីលប្រឆាំងមីស៊ីលនៅរូម៉ានី ឬក៏នៅប៉ូឡូញមិនមែនសំដៅវាយប្រហាររុស្ស៊ីទេ។ តែបញ្ហានៅត្រង់ថា ក្រុងមូស្គូមិនល្ងង់ជឿលើការអះអាងរបស់អូតង់ឡើយ និងបានចោទជាសំណួរថា បើមិនសំដៅរុស្ស៊ី តើសំដៅលើអ្នកណានៅទីនោះ?។
គួររម្លឹកជូនឡើងវិញបន្តិចថា កិច្ចប្រជុំក្រុមប្រឹក្សាអូតង់ និងរុស្ស៊ីដែលបានចាប់ផ្តើមដំបូងក្នុងឆ្នាំ ២០០២ ធ្លាប់បានព្យួរម្តងហើយក្នុងចន្លោះខែសីហា ឆ្នាំ ២០០៨ និងខែមីនា ឆ្នាំ ២០០៩។ កាលណោះ អូតង់ក្តៅក្រហាយនឹងអន្តរាគមន៍ទ័ពរស្ស៊ីនៅក្នុងទឹកដីនៃប្រទេសហ្សកហ្ស៊ី ពិសេសនៅក្នុងតំបន់អាប់កាហ្ស៊ី និងអូសេធីខាងត្បូង។ រហូតមកដល់សព្វថ្ងៃ អូតង់នៅតែបន្តអំពាវនាវវិមានក្រិមឡាំងឲ្យពិនិត្យមើលឡើងវិញនូវសេចក្តីសម្រេចចិត្តរបស់ខ្លួនក្នុងការទទួលស្គាល់ដែនដីហ្ស៊កហ្ស៊ីទាំងពីរជារដ្ឋឯករាជ្យ។ ទង្វើរបស់អូតង់របៀបនេះមានគោលដៅធានាក្រុមប្រទេសប៉ែកខាងលិចដែលបារម្ភខ្លាចតំបន់អាប់កាហ្ស៊ី និងអូសេធីខាងត្បូងមានវាសនាដូចតំបន់គ្រីមេនៅអ៊ុយក្រែន។
ក្នុងរយៈពេល ២ឆ្នាំកន្លងទៅ អូតង់ និងរុស្ស៊ីបានចែកផ្លូវគ្នាដើររហូតដល់គ្រប់គ្នាបារម្ភពីការផ្ទុះសង្រ្គាមត្រជាក់ជាថ្មីទៀតផង។ រវាងអូតង់ និងរុស្ស៊ី គ្មាននរណាយល់ព្រមធ្វើសម្បទានឲ្យអ្នកណាទេ។ តែឥឡូវនេះ និង២ឆ្នាំក្រោយមក គូស្រកររុស្ស៊ី និងអូតង់ហាក់ដូចជាគ្មានជម្រើសអ្វីក្រៅពីជ្រលក់មាត់រកគ្នាឡើងវិញតាមរយៈការផ្តើមកិច្ចសន្ទនាជាថ្មី។ តើនេះមកពីហេតុអ្វី និងថា តើអ្នកណាឈ្នះ អ្នកណាចាញ់?
គ្មានអ្នកឈ្នះ ហើយក៏គ្មានអ្នកចាញ់ទេនៅក្នុងការប្រឈមមុខដាក់គ្នារវាងអូតង់ និងរុស្ស៊ីនារយៈពេល ២ឆ្នាំកន្លងទៅ។ ក៏ប៉ុន្តែ រុស្ស៊ីត្រូវបានគេមើលឃើញថា ហាក់ដូចជាមានប្រៀបជាងដៃគូអូតង់។ ការហ៊ានអះអាងយ៉ាងដូចនេះដោយគេសំអាងថា រុស្ស៊ីរបស់លោកប្រធានាធិបតីពូទីនបន្តធ្វើអ្វីដែលខ្លួនយល់ថាត្រឹមត្រូវដោយមិនខ្ចីពិគ្រោះយោបល់ជាមួយនរណា និងក៏មិនត្រូវការមេរៀនពីនរណាដែរ។ ២ឆ្នាំក្រោយមក វិបត្តិអ៊ុយក្រែននៅតែគ្មានច្រកចេញ តំបន់គ្រីមេក៏ត្រូវបានរុស្ស៊ីក្តាប់កាន់តែណែនក្នុងដៃ ហើយរុស្ស៊ីក៏កាន់តែបង្កើន និងពង្រីកឥទ្ធិពលរបស់ខ្លួនកាន់តែខ្លាំង ពិសេសអន្តរាគមន៍យោធាប្រកបដោយជោគជ័យនៅក្នុងប្រទេសស៊ីរី។
ទាហានរុស្ស៊ីបានចូលខ្លួនអន្តរាគមន៍នៅស៊ីរីតាមទ្វារមុខ រួចក៏បានដកខ្លួនចេញវិញតាមទ្វារមុខប្រកបដោយកិត្តិយសខ្ពស់ ព្រោះបានជួយកម្លាំងទ័ពរបស់រដ្ឋាភិបាលស៊ីរីវាយដណ្តើមបានទីក្រុងប៉ាល់មៀរពីកណ្តាប់ដៃពួកជីហាតអង្គការរដ្ឋអ៊ីស្លាមត្រឡប់វិញ។ តើនេះមិនមែនជាមោទនភាព និងជាជោគជ័យការទូតរបស់រុស្ស៊ីទេ ឬយ៉ាងណា?។ បើគេពិនិត្យមើលមួយភ្លែតទៅឃើញថា វិបត្តិរវាងអូតង់ និងរុស្ស៊ីគឺជាការប្រជែងកម្លាំងគ្នា។ តែបើគេពិនិត្យមើលឲ្យបានស៊ីជ្រៅបន្តិចទៅឃើញថា មិនមែនជាវិបត្តិប្រជែងកម្លាំងគ្នា ឬក៏ដណ្តើមឥទ្ធិពលគ្នាទេ តែគឺជារឿងមិនទុកចិត្តគ្នា។
អូតង់ហាក់ដូចជាភ្ញាក់ខ្លួនថា នយោបាយប្រើកម្លាំងបាយចំពោះរុស្ស៊ីមិនបានហុចលទ្ធផលអ្វីទាំងអស់។ ម្យ៉ាងទៀត អូតង់ក៏បានដឹងខ្លួនឯងថា ខ្លួនត្រូវការសហការណ៍ជាមួយរុស្ស៊ីជាជាងធ្វើឲ្យរុស្ស៊ីឯកោ។ គឺនៅក្នុងន័យនេះហើយបានជាអូតង់សុខចិត្តដាក់ចិត្ត ដាក់កាយនិយាយជាមួយរុស្ស៊ីជាថ្មីនៅពេលនេះ។ ហើយអ្នកដែលផ្តួចផ្តើមគំនិតឲ្យមានកិច្ចសន្ទនាជាថ្មីជាមួយរុស្ស៊ីពេលនេះមានច្រើន រាប់ទាំងប្រមុខការទូតអាមេរិកចន ឃែរីផងដែរ។ រីឯប្រធានបទដែលត្រូវជជែកមានច្រើន រួមមាន វិបត្តិអ៊ុយក្រែន វិបត្តិស៊ីរី បញ្ហាប្រទេសអាហ្វហ្កានីស្ថាន និងសន្តិសុខតំបន់។
តែអ្វីដែលសំខាន់នៅក្នុងជំនួបជាថ្មីពេលនេះ អូតង់ និងរុស្ស៊ីគួរតែបង្កើតឲ្យមានការទុកចិត្តគ្នាជាថ្មីឡើងវិញក្នុងគោលដៅបញ្ជៀសការមិនមើលមុខគ្នាមិនចំជាថ្មីនៅថ្ងៃក្រោយ។ អូតង់ និងរុស្ស៊ីសុទ្ធតែបានដឹងច្បាស់ថា គូស្រកររបស់ខ្លួនមានភាពរកាំរកូសមែន តែគ្មានថ្ងៃនឹងលែងលះគ្នាទេ។ រាត្រីទឹកឃ្មុំក៏មាន ទឹកខ្មេះក៏មានដែរ តែបើនិយាយឲ្យចំទៅ រាត្រីទឹកខ្មេះមានច្រើនជាងរាត្រីទឹកឃ្មុំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ