ប្រតិបត្តិការកងអាកាសរុស្ស៊ី នៅស៊ីរី ប្រព្រឹត្តទៅ ក្រោមក្រសែភ្នែកអូតង់
ក្នុង១ថ្ងៃ១យប់កន្លងទៅ កងអាកាសរុស្ស៊ី បានទំលាក់គ្រាប់បែកទៅលើ ទីតាំង ចំនួនដល់ទៅ១១៨កន្លែង របស់អង្គការភេរវនិយមរដ្ឋអ៊ីស្លាម គឺច្រើនមិនធ្លាប់មានដូចទេ បើគិត តាំងពីថ្ងៃ ៣០កញ្ញាមក។ ប៉ុន្តែ ពួកប្រទេសអូតង់ នាំគ្នាឆ្លៀតចោទម៉ូស្គូ ថា ការវាយប្រហារ របស់រុស្ស៊ីនៅស៊ីរី បានប៉ះពាល់ ដល់សំណង់ស៊ីវិលនានា ដែលបណ្តាលឲ្យ អ្នកស្រុកស្លូតត្រង់ ធ្លាក់ខ្លួនស្លាប់ អស់សឹបនាក់ទៅហើយ។ ម៉ូស្គូ ពីចំណែកខ្លួន ទាមទារពីអូតង់ ឲ្យបង្ហាញមក តឹកតាងជាសំអាង ការចោទប្រកាន់នោះ។
ចុះផ្សាយនៅថ្ងៃ៖
ស្តាប់ - ០២:០៨
ល្ងាចថ្ងៃ២៨តុលា អង្គភាពព័ត៌មានក្រសួងការពារជាតិរុស្ស៊ី បានប្រកាសថា ក្នុង ២៤ ម៉ោងចុងក្រោយ កងអាកាសរុស្ស៊ី បានចេញប្រតិបត្តិការ សកម្មខុសពីធម្មតា ចំនួន ៧១ លើក ឯណោះ ដោយបានវាយប្រហារទៅលើទីតាំង របស់ពពួកក្រុមភេរវនិយមនៃអង្គការរដ្ឋអ៊ីស្លាម ចំនួនរហូតដល់១១៨កន្លែង ដែលច្រើនមិនធ្លាប់មានដូចទេ គិតតាំងពីពេលដែលកងអាកាស រុស្ស៊ី បានចូលខ្លួនអន្តរាគមន៍នៅស៊ីរីថ្ងៃ៣០កញ្ញាមក។ ទីតាំងទាំងនោះ ស្ថិតក្នុងខេត្ត Hama និង ខេត្ត Homs នៅកណ្តាលប្រទេស ខេត្ត Idleb និង ខេត្ត Alep ប៉ែកពាយ័ព្យ ខេត្តLattaquié ប៉ែកខាងលិច និង តំបន់រដ្ឋធានី Damas ខាងត្បូងប្រទេស។
ក្រសួងយោធារុស្ស៊ី គូសបញ្ជាក់ថា ទីតាំងដែលកងអាកាសខ្លួនវាយប្រហារនេះ គឺជា ទីបញ្ជាការ ជា ឃ្លាំងស្តុកអាវុធ ជា ជំរំបង្វឹកបង្ហាត់ ជា រោងជាងផលិតគ្រឿងផ្ទុះ ជា បណ្តុំហេដ្ឋារចនាសម្ព័ន្ធ របស់ពួកភេរវជន ដែលមុននឹងវាយប្រហារ ត្រូវបានរុស្ស៊ី សិក្សាលំអិត យោងទៅលើរូបភាពថត ដោយផ្កាយរណប ដោយយន្តហោះគ្មានពីឡុតបើកបរ Drone មិនមែនជាសំណង់ស៊ីវិល ដូចដែលកាសែតបស្ចិមលោក និងមជ្ឈដ្ឋានអូតង់ នាំគ្នាផ្សព្វផ្សាយដើម្បី ជាលេសចោទប្រកាន់ ក្រុងម៉ូស្គូឡើយ។
មកពីមូលហេតុនេះ បានជានារសៀលថ្ងៃ២៧តុលា ក្រសួងការពារជាតិរុស្ស៊ី បានអញ្ជើញ សេនានុព័ន្ធប្រទេសអូតង់ បែបយ៉ាង អាមេរិក អង់គ្លេស បារាំង អាល្លឺម៉ង់ អ៊ីតាលី តួកគី ព្រម ទាំង អារ៉ាប៊ី សាអ៊ូឌីត ផង ដើម្បីសុំឲ្យគេពន្យល់អំពីសេចក្តីថ្លែងការណ៍ ដែលគេធ្វើកាន់តែ ញឹកញយនាពេលចុងក្រោយ រិះគន់ សកម្មភាពកងអាកាសរុស្ស៊ីនៅស៊ីរី។
ថ្លែងក្នុងឱកាសនោះ លោកអនុរដ្ឋមន្ត្រីការពារជាតិរុស្ស៊ី ឧត្តមសេនីយ Anatoly Antonov សង្កត់ធ្ងន់ថា ៖ បើអូតង់ មានភស្តុតាងមែនពិត ដែលសឲ្យឃើញថា កងអាកាសរុស្ស៊ី បានវាយប្រហារ ទៅលើសំណង់ស៊ីវិល បែបយ៉ាង មន្ទីរពេទ្យ សាលារៀន វិហារអ៊ីស្លាម ជាដើម ដែលបណ្តាលឲ្យ អ្នកស្រុកស៊ីរីធ្លាក់ខ្លួនរងគ្រោះ និង ស្លាប់ សូមបង្ហាញតឹកតាងទាំងនេះមក បើគ្មានទេ គប្បីធ្វើ សេចក្តីថ្លែងការណ៍បដិសេធទៅ ពុំនោះសោតទេ ម៉ូស្គូសូមចាត់ទុកទង្វើរបស់គេ ជា ការផ្លុំបញ្ឆេះ សង្គ្រាមឃោសនា ប្រឆាំងរុស្ស៊ីតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ