តើហេតុអ្វីបានជាអាមេរិកសម្រេចដកទណ្ឌកម្មលើគ្រឿងសព្វាវុធចេញពីវៀតណាម
ចុះផ្សាយនៅថ្ងៃ៖
ស្តាប់ - ០៤:២៣
នៅក្នុងអំឡុងដំណើរទស្សនកិច្ចទៅកាន់ប្រទេសវៀតណាម លោកអូបាម៉ាបានប្រកាសឲ្យដឹង អំពីការលុបចោលទណ្ឌកម្មគ្រឿងសព្វាវុធ ដែលអាមេរិកបានដាក់លើវៀតណាមអស់រយៈពេលជាច្រើនទសវត្សរ៍មកហើយ គឺចាប់តាំងពីក្រោយសង្រ្គាមវៀតណាម ឆ្នាំ១៩៧៥។ តើមានមូលហេតុអ្វីខ្លះដែលជំរុញឲ្យអាមេរិកលុបចោលបម្រាមនាំចេញអាវុធទៅឲ្យវៀតណាមនៅពេលនេះ?
“ការដកបម្រាមលក់គ្រឿងសព្វាវុធទៅឲ្យវៀតណាមនៅពេលនេះ ធ្វើឡើងក្នុងគោលដៅពង្រឹងទំនាក់ទំនងអាមេរិក-វៀតណាម មិនមែនធ្វើឡើងក្នុងគោលដៅប្រឆាំងនឹងចិននោះទេ” នេះគឺជាអ្វីដែលលោកអូបាម៉ាបានលើកឡើង នៅពេលប្រកាសដកទណ្ឌកម្មគ្រឿងសព្វាវុធចេញពីវៀតណាម។ ក៏ប៉ុន្តែ នៅក្នុងបរិបទនៃភូមិសាស្រ្តនយោបាយក្នុងតំបន់អាស៊ីនៅក្នុងពេលបច្ចុប្បន្ននេះ គេពិបាកនឹងមិនភ្ជាប់សេចក្តីសម្រេចរបស់លោកអូបាម៉ាទៅនឹងចិន។
វៀតណាមគឺជាប្រទេសដែលកំពុងតែជាប់ជម្លោះជាមួយចិន នៅក្នុងតំបន់សមុទ្រចិនខាងត្បូង ហើយនៅក្នុងចំណោមប្រទេសដែលជាប់ជម្លោះនេះ គេសង្កេតឃើញថា វៀតណាម រួមជាមួយនឹងហ្វីលីពីន គឺជាប្រទេសដែលចេញមុខច្រើនជាងគេ ក្នុងការប្រឈមមុខជាមួយនឹងចិន។ នាវាវៀតណាម និងនាវាចិន ក៏ធ្លាប់បានប៉ះទង្គិចគ្នាយ៉ាងខ្លាំងក្លាដែរ នៅក្នុងតំបន់សមុទ្រជាប់ជម្លោះ។
អាមេរិកវិញ ឬនិយាយឲ្យចំ គឺលោកប្រធានាធិបតីអូបាម៉ាផ្ទាល់ បានកំណត់អាទិភាពដ៏សំខាន់មួយ នៅក្នុងនយោបាយការបរទេសរបស់ខ្លួន គឺបង្កើនវត្តមានរបស់អាមេរិក នៅក្នុងតំបន់អាស៊ី ដើម្បីប្រជែងឥទ្ធិពលជាមួយនឹងចិន។ ទាក់ទងនឹងជម្លោះនៅសមុទ្រចិនខាងត្បូងទៀតសោត អាមេរិកតែងតែបានចេញមុខធ្វើការតវ៉ា និងរិះគន់សកម្មភាពរបស់ចិន នៅក្នុងតំបន់ជាប់ជម្លោះ ហើយថែមទាំងបានបញ្ជូនយន្តហោះ និងនាវាចម្បាំងឲ្យចូលទៅល្បាតក្នុងតំបន់ជាប់ជម្លោះជាច្រើនលើក រហូតមានការប្រឈមមុខដាក់គ្នា ជាមួយនឹងយន្តហោះចម្បាំងរបស់ចិន កាលពីពេលថ្មីៗកន្លងទៅនេះ។
ដូច្នេះ សម្រាប់លោកអូបាម៉ា វៀតណាមអាចជាប្រទេសជាយុទ្ធសាស្រ្តមួយ ក្នុងការជួយឲ្យអាមេរិកអាចប្រជែងឥទ្ធិពលជាមួយចិន នៅក្នុងតំបន់អាស៊ី ហើយការដកទណ្ឌកម្មដ៏ចំណាស់ បន្សល់ទុកពីសម័យសង្រ្គាមវៀតណាម វាគឺជាជំហានដ៏សំខាន់មួយ ក្នុងការបិទបញ្ចប់អតីតកាលនៃសង្រ្គាមនិងភាពជាសត្រូវ ដើម្បីឈានទៅបើកទំព័រថ្មីនៃភាពជាដៃគូ ក្នុងការប្រឈមមុខនឹងគូប្រជែងរួម។
ជាការពិតណាស់ថា ចិនទំនងមិនមែនជាហេតុផលតែមួយគត់នោះទេ តែចិនជាកត្តាដ៏ចម្បងមួយ ដែលជំរុញឲ្យលោកអូបាម៉ាសម្រេចដកទណ្ឌកម្មគ្រឿងសព្វាវុធចេញពីវៀតណាម ហើយកត្តាដ៏ចម្បងមួយទៀត គឺផលប្រយោជន៍សេដ្ឋកិច្ច។
នៅក្នុងពេលដែលសេដ្ឋកិច្ចពិភពលោកកំពុងស្ថិតក្នុងស្ថានភាពត្រដាបត្រដួសដូចជាពេលបច្ចុប្បន្ននេះ អាមេរិកក៏ដូចជាប្រទេសជាច្រើនផ្សេងទៀត កំពុងតែស្វះស្វែងរកទីផ្សារ ដើម្បីបង្កើនការនាំចេញ និងជំរុញកំណើនសេដ្ឋកិច្ចរបស់ខ្លួន។ វៀតណាមវិញ គឺជាប្រទេសដែលមានប្រជាជនសរុបរហូតដល់ទៅជាង ៩០លាននាក់, មានកំណើនសេដ្ឋកិច្ចខ្ពស់ក្នុងរង្វង់ ៧% ហើយលើសពីនេះទៅទៀត វៀតណាម គឺជាប្រទេសហត្ថលេខីនៃកិច្ចព្រមព្រៀងពាណិជ្ជកម្មសេរីអន្តរប៉ាស៊ីហ្វិក ដែលជាគំនិតផ្តួចផ្តើមរបស់អាមេរិក។ ដូច្នេះ វៀតណាម គឺជាទីផ្សារប្រកបដោយសក្តានុពលសម្រាប់អាមេរិក។
ការលុបចោលបម្រាមនាំចេញគ្រឿងសព្វាវុធទៅឲ្យវៀតណាមអាចនឹងជួយឲ្យអាមេរិកទាញផលប្រយោជន៍សេដ្ឋកិច្ចជាលក្ខណៈទូទៅ តាមរយៈការពង្រឹងទំនាក់ទំនងការទូត និងពាណិជ្ជកម្ម ហើយជាងនេះទៅទៀត គឺអាចទាញយកផលប្រយោជន៍នៅក្នុងវិស័យនាំចេញគ្រឿងសព្វាវុធដោយផ្ទាល់។
គេមិនត្រូវភ្លេចទេថា អាមេរិកគឺជាប្រទេសនាំចេញគ្រឿងសព្វាវុធច្រើនជាងគេលំដាប់ទី១នៅលើពិភពលោក ចំណែកឯវៀតណាមវិញ នៅក្នុងបរិបទនៃភាពតានតឹងក្នុងសមុទ្រចិនខាងត្បូងនាពេលបច្ចុប្បន្ននេះ វៀតណាមកំពុងតែស្វះស្វែងពង្រឹងកម្លាំងយោធារបស់ខ្លួន។
យោងតាមតួលេខរបស់វិទ្យាស្ថានក្រុងស្តុកខុម ដែលចេញផ្សាយកាលពីពេលថ្មីៗកន្លងទៅនេះ គ្រឿងសព្វាវុធដែលវៀតណាមនាំចូលពីបរទេសបានកើនឡើងរហូតដល់ទៅជិត ៧០០% នៅក្នុងចន្លោះពេលពី ឆ្នាំ២០១១ ដល់ឆ្នាំ២០១៥ ដែលជាអត្រាកំណើនខ្ពស់ជាងគេបង្អស់។ ជាលទ្ធផល វៀតណាម ដែលកាលពី ៥ឆ្នាំមុន ស្ថិតនៅលំដាប់ទី ៤៣ បានហក់ឡើងមកនៅលំដាប់ទី ៨ ខាងការនាំចូលគ្រឿងសព្វាវុធ។ បើគិតត្រឹមក្របខ័ណ្ឌអាស៊ី វៀតណាម គឺជាប្រទេសដែលនាំចូលគ្រឿងសព្វាវុធច្រើនជាងគេលំដាប់ទី ៤ បន្ទាប់ពី ឥណ្ឌា ចិន និងប៉ាគីស្ថាន ហើយបើនិយាយតែពីតំបន់អាស៊ាន វៀតណាមជាប់លំដាប់លេខ១។
បើនិយាយដោយសរុបយ៉ាងខ្លីមកវិញ អ្វីដែលអាមេរិកបានធ្វើចំពោះវៀតណាមនៅពេលនេះ គឺប្រទេសនាំចេញគ្រឿងសព្វាវុធច្រើនជាងគេដកបម្រាមនាំចេញគ្រឿងសព្វាវុធទៅឲ្យប្រទេសដែលកំពុងតែត្រូវការទិញគ្រឿងសព្វាវុធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ