លោកដូណាល់ ត្រាំ ប្តូរចិត្តនិងសម្រេចប្រឆាំងនឹងវិធានការបិទក្រុងញូវយ៉កទាំងមូល
ចុះផ្សាយនៅថ្ងៃ៖
ស្តាប់ - ០៧:១៨
សហរដ្ឋអាមេរិក មានចំនួនអ្នកឆ្លងវីរុសកូវីដ១៩ ច្រើនជាងគេបំផុតនៅក្នុងពិភពលោក។ គិតត្រឹមថ្ងៃអាទិត្យ ទី២៩ មីនានេះ ករណីឆ្លងនៅអាមេរិកមានចំនួនច្រើនជាង ១២ ម៉ឺន ៤ ពាន់ករណី ហើយក្នុងចំណោមនោះ អត្រាអ្នកឆ្លងចំនួនជិតពាក់កណ្តាលស្ថិតនៅក្នុងទីក្រុងញ៉ូវយក។ តែទោះជាបែបនេះក្តី លោកប្រធានាធិបតីអាមេរិក ដូណាល់ ត្រាំ មិនចង់ចាក់សោក្រុងញូវយ៉កទាំងមូលនោះទេ ហើយនៅល្ងាចថ្ងៃសៅរ៍មិ្សលមិញ លោកត្រាំ ថែមទាំងបានប្រកាសប្រឆាំងទៅនឹងវិធានការបិទខ្ទប់ការចេញចូលក្រុងនេះទៀតផង។
បច្ចុប្បន្នភាពទាក់ទងនឹងជំងឺកូវីដ១៩ នៅសហរដ្ឋអាមេរិក
នាពេលបច្ចុប្បន្ននេះ សហរដ្ឋអាមេរិកមានអត្រាអ្នកឆ្លងវីរុសកូវីដ១៩ ខ្ពស់ជាងប្រទេសណាៗទាំងអស់ក្នុងពិភពលោក គឺមានចំនួនរហូតដល់ជាង ១២ម៉ឺន ៤ពាន់ករណី ដោយវ៉ាឈ្នះប្រទេសអ៊ីតាលីដែលមានករណីឆ្លងច្រើនជាង ៩ម៉ឺនករណី និងបានវ៉ាឈ្នះប្រទេសចិនដែលមានជាង ៨ម៉ឺនករណី។
ចំណែកអ្នកស្លាប់វិញ ក៏មានចំនួនកើនឡើងដែរនៅក្នុងទឹកដីអាមេរិក។ បើយោងទៅតាមស្ថិតិដែលចេញផ្សាយដោយសារព័ត៌មានអង់គ្លេស BBC នៅថ្ងៃអាទិត្យ ទី ២៩ មីនានេះ ចំនួនអ្នកស្លាប់ដោយសារកូវីដ១៩ នៅសហរដ្ឋអមេរិកឡើងដល់ចំនួនប្រមាណ ២ ១០០ នាក់។ អត្រានេះកើនឡើងទ្វេដងលើសកាលពី ២ ថ្ងៃមុន។
យ៉ាងណាក៏ដោយ ចំនួនអ្នកស្លាប់នៅអាមេរិកនៅតែទាបជាងចំនួនអ្នកស្លាប់នៅអ៊ីតាលី ដែលមានចំនួនមនុស្សស្លាប់ជាង ១ម៉ឺននាក់ និងនៅអេស្ប៉ាញដែលមានប្រមាណ ៦ពាន់នាក់ និងនៅចិនមានប្រមាណ ៣ ពាន់ ៣ រយនាក់។
ប៉ុន្តែ គេមានការបារម្ភ អំពីការកើនឡើងខ្លាំងនៃករណីឆ្លងកូវីដ១៩ នៅតាមទីក្រុងធំៗសំខាន់ៗមួយចំនួនរបស់អាមេរិកដូចជានៅ ញូវយ៉ក ញូវអរលែន ឌីត្រយ និង ស៊ីអាថល។
គ្រាន់តែនៅក្នុងទីក្រុងញូវយ៉កមួយ អត្រាអ្នកឆ្លងមានចំនួនជាង ៥ម៉ឺ ២ ពាន់ករណី ពោលគឺស្មើជិតពាក់កណ្តាល នៃចំនួនឆ្លងសរុបក្នុងប្រទេសទាំងអស់ដែលមានជាង ១២ម៉ឺន ៤ពាន់ករណី។
ហេតុអ្វីលោកត្រាំ ប្តូរចិត្តឈប់បិទទីក្រុងញូវយ៉ក?
ជាការពិត លោកប្រធានាធិបតីអាមេរិកដូណាល់ ត្រាំ នៅប៉ុន្មានថ្ងៃមុន បានលើកឡើងអំពី គោលបំណងចង់ចាក់សោទីក្រុងញូវយ៉កទាំងមូល និងក្រុងនៅក្បែរៗនោះ មានដូចជា ក្រុងញូវអរលែន ឌីត្រយ និង ក្រុងស៊ីអាថល ដើម្បីទប់ស្កាត់កុំឲ្យជំងឺកូវីដ១៩ កាន់តែ ឆ្លងរាលដាលខ្លាំងក្លាទៅមុខទៀត។
ដោយឡែក កាលពីល្ងាចថ្ងៃសៅរ៍ម្សិលមិញនេះ លោកប្រមុខរដ្ឋអាមេរិក ស្រាប់តែប្តូរគំនិត និងបានប្រកាសប្រឆាំងទៅនឹងវិធានការចាក់សោរយៈពេលពីរសប្តាហ៍ លើទីក្រុងញ៉ូវយក និងក្រុងក្បែរៗនោះទៅវិញ។
តាមពិតទៅ ការសម្រេចចិត្តចុងក្រោយរបស់លោកដូណាល់ ត្រាំ គឺធ្វើឡើងដោយស្របទៅតាមអនុសាសន៍របស់ក្រុមការងារពិសេសនៃសេតវិមានមួយក្រុម ដែលជាអ្នកធ្វើការទទួលខុសត្រូវផ្នែកវីរុសកូវីដ១៩។
ជាក់ស្តែង ប្រមុខរដ្ឋាភិបាលអាមេរិករូបនេះ បានសរសេរនៅលើបណ្តាញសង្គមធ្វីតទ័រ កាលពីព្រឹកព្រលឹមថ្ងៃអាទិត្យនេះថា គ្មានការចាក់សោក្រុងញូវយ៉ក និងក្រុងនៅក្បែរនោះទេ។ នេះ គឺដោយយោងទៅតាម អនុសាសន៍របស់ក្រុមការងារពិសេស នៃសេតវិមានស្តីអំពីមេរោគកូរ៉ូណាថ្មី និង ក្រោយពិគ្រោះយោបល់ជាមួយអភិបាលក្រុង ញូវយ៉ក និងក្រុងមួយចំនួនទៀត។
ទោះជាបានសម្រេចមិនបិទទីក្រុង និងរាំងខ្ចប់ការដើរហើររបស់ប្រជាជនយ៉ាងណាក្តី លោកដូណាល់ ត្រាំ មានលើកឡើងដែរថា គេនឹងដាក់បំរាមមួយចំនួនលើការដើរហើររបស់ពលរដ្ឋអាមេរិកដែលរស់នៅក្នុងទីក្រុងញ៉ូវយក និងរដ្ឋញូជឺស៊ី។
វិធានការបិទខ្ទប់ការធ្វើដំណើរចេញចូលប៉ះពាល់សេដ្ឋកិច្ចអាមេរិកខ្លាំង
ការបិទទីក្រុងទាំងមូល បិទមិនឲ្យប្រជាពលរដ្ឋចេញក្រៅផ្ទះ ពិតជាប៉ះពាល់ខ្លាំងណាស់ដល់សេដ្ឋកិច្ច មិនថាតែសេដ្ឋកិច្ចរបស់អាមេរិក ឬក៏សេដ្ឋកិច្ចរបស់ប្រទេសណាមួយនោះទេ។
ចាក់សោបិទខ្ទប់ទីក្រុង ឬបិទខ្ទប់ប្រទេសទាំងមូលរយៈពេលយូរ មានន័យថា ផលិតកម្មរោងចក្រ សហគ្រាស ហាងទំនិញ ក្នុងប្រទេសនឹងលែងដំណើរការ។ និន្នាការនេះ អាចនឹងធ្វើចំនួនអ្នកអត់ការងារធ្វើនៅអាមេរិកកើនឡើងខ្លាំង ហើយសេដ្ឋកិច្ចនៃប្រទេស នឹងត្រូវរងផលប៉ះពាល់ខ្លាំងជាមិនខាន។
គួរកត់សម្គាល់ថា រយៈពេលត្រឹមតែមួយសប្តាហ៍ប៉ុណ្ណោះ បន្ទាប់ពីអាមេរិក សម្រេច បិទទីក្រុងមួយចំនួន មានមនុស្សចំនួន ៣លាន ៣សែននាក់ បាត់បង់ការងារនៅក្នុងប្រទេស។
ដូច្នោះហើយ បើនៅតែបន្តចាក់សោទីក្រុង និងរដ្ឋកាន់តែច្រើន និងកាន់តែយូវអង្វែង សេដ្ឋកិច្ចអាមេរិក នឹងរងផលប៉ះពាល់ខ្លាំង ហើយអាចនឹងជួបគ្រោះអាសន្នធំនាពេលខាងមុខនេះមិនខាន។
អភិបាលក្រុងញូវយ៉កលោកអេនឌ្រូ គួរម៉ូ (Andrew Cuomo) បាននិយាយថា ការដាក់ក្រុងញូវយ៉ក ឲ្យលែងដំណើរការ លែងមានសង្វាក់ផលិកម្ម គឺជារឿងមិនត្រឹមត្រូវនោះទេ និងថានេះជាគំនិតធ្វើបាបពលរដ្ឋអាមេរិក។
លោកអភិបាលក្រុងញូវយ៉ក បានបន្ថែមថាបែបនេះថា ការបិទខ្ទប់ទីក្រុងកាន់តែច្រើន នឹងបណ្តាលឱ្យទីផ្សារភាគហ៊ុនធ្លាក់ចុះ ហើយសេដ្ឋកិច្ចអាមេរិកនឹងមិនអាចងើបក្បាលឡើងវិញបានឡើយបើមិនរាប់ឆ្នាំ ក៏រាប់ខែដែរ។ គេអាចចាត់ទុកបញ្ហានេះថាជាគ្រោះថ្នាក់ធំណាស់ គឺធំជាងការបិទក្រុង ឬប្រទេសទាំងមូលទៅទៀត។
តែទោះជាបែបនេះក្តី រដ្ឋាភិបាលអាមេរិក បាននិងកំពុងយកចិត្តទុកដាក់ខ្ពស់ណាស់ក្នុងការ ប្រយុទ្ធប្រឆាំង នឹងមេរោគកូរ៉ូណាថ្មី តាមរយៈការដាក់បំរាមមិនឲ្យមានការជួបជុំធំៗ និងអំពាវនាវឲ្យប្រជាជននៅក្នុងផ្ទះបើគ្មានកិច្ចការចាំបាច់នោះទេ។
ក្រៅពីនេះ រដ្ឋអំណាចអាមេរិក ក៏បានត្រៀមថវិកាយ៉ាងច្រើនសន្ធឹកសន្ធាប់ផងដែរ ដើម្បីដោះស្រាយវិបត្តិបង្កដោយវិបត្តិកូវីដ១៩។ ជាក់ស្តែង នៅសប្តាហ៍នេះ អាមេរិក បានសម្រេចអនុម័តលើកកញ្ចប់ថវិកាចំនួនជាង ២ ទ្រីលានដុល្លារ ឬស្មើនឹង ២០០ ម៉ឺនលានដុល្លារ ដើម្បីជួយពលរដ្ឋអាមេរិក រោងចក្រ ក្រុមហ៊ុន សហគ្រាស និងមន្ទីរពេទ្យដែលរងគ្រោះខ្លាំងពីជំងឺរាតត្បាតសកល កូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ