កាសែតញូវយ៉កថែមស៍ ៖ មហាសេដ្ឋី ដូណាល់ ត្រាំ បង់ពន្ធតែ ៧៥០ដុល្លារក្នុងមួយឆ្នាំ
ចុះផ្សាយនៅថ្ងៃ៖
ស្តាប់ - ០៦:៥៤
នៅសហរដ្ឋអាមេរិក សំណុំរឿងបង់ពន្ធ របស់លោកត្រាំ ដែលធ្លាប់ជាប់អាស្រូវតាំងពីបួនឆ្នាំមកហើយ បានពុះកញ្ជ្រោលឡើងជាថ្មី។ ពីរថ្ងៃមុនការតស៊ូមតិតាមកញ្ចក់ទូរទស្សន៍រវាងបេក្ខជនប្រធានាធិបតីទាំងពីរមកដល់ កាសែតញូវយ៉កថែមស៍ បានចេញផ្សាយ នៅថ្ងៃអាទិត្យទី ២៧កញ្ញា ម្សិលមិញ របាយការណ៍ស៊ើបអង្កេតផ្តាច់មុខរបស់ខ្លួន ទម្លាយព័ត៌មានដ៏គួរឱ្យរន្ធត់។ មហាសេដ្ឋី ដូណាល់ ត្រាំ បានបង់ពន្ធលើប្រាក់ចំណូលប្រចាំឆ្នាំ តែ ៧៥០ដុល្លារប៉ុណ្ណោះ នៅឆ្នាំ២០១៦ ឆ្នាំដែលលោកជាប់ឆ្នោតជាប្រធានាធិបតីអាមេរិក។
នៅទីបំផុតការសម្ងាត់ដែលលោកដូណាល់ត្រាំខំប្រឹងលាក់បំផុត ត្រូវបានទម្លាយ។ ខុសពីប្រពៃណី ដែលបណ្តាប្រធានាធិបតីអាមេរិកមុនៗ តែងលំអោនតាមតាំងពីឆ្នាំ១៩៧០ លោកដូណាល់ ត្រាំ មិនលាតត្រដាងទ្រព្យធន និងការបង់ពន្ធប្រចាំឆ្នាំរបស់លោក ដូចសន្យាក្នុងពេលឃោសនា។ លោកថែមទាំងបានជ្រើសរើស ប្រើសិទ្ធ លាក់បាំងទ្រព្យមិនឱ្យគេមើលទៀត។
ប៉ុន្តែកាសែតញូវយ៉កថែមស៍ បានទៅស្រាវជ្រាវរកឃើញឯកសារទាក់ទងនឹងការបង់ពន្ធរបស់លោកត្រាំ ចំនួន២០ឆ្នាំ និងព័ត៌មានលម្អិតស្តីពីការបង់ពន្ធរយៈពេលពីរឆ្នាំដំបូងរបស់លោកត្រាំ ក្នុងអាណត្តិជាប្រធានាធិបតី។ ជាលទ្ធផល មហាសេដ្ឋី ដូណាល់ ត្រាំ បានបង់ពន្ធលើប្រាក់ចំណូល ប្រចាំឆ្នាំ តែ៧៥០ដុល្លារប៉ុណ្ណោះ នៅ ២០១៦(ឆ្នាំដែលលោកជាប់ឆ្នោតជាប្រធានាធិបតី) និងនៅឆ្នាំ២០១៧។
១៥ឆ្នាំមុននេះទៅទៀត លោក ត្រាំ មិនបានបង់ពន្ធលើប្រាក់ចំណូលសោះ សូម្បីតែមួយកាក់ក៏គ្មាន ចំនួន១០ឆ្នាំ។
ជាការប្រៀបធៀប ប្រធានាធិបតីអាមេរិកមុន ដែលពុំសូវមានបាន លោកបារ៉ាក់ អូបាម៉ា ឬលោក ប៊ីលគ្លីនតុន បង់ពន្ធមួយឆ្នាំ យ៉ាងតិច ១០ម៉ឺនដុល្លារ។ អតីតអនុប្រធានាធិបតី និងបច្ចុប្បន្នបេក្ខជនប្រធានាធិបតី ចូបៃដិន បង់ពន្ធ៣,៤លានដុល្លារ នៅឆ្នាំ២០១៧ ពោលគឺ៥ពាន់ដងលើសលោកត្រាំ។
តែឯកសារដែលកាសែតញូវយ៉កថែមស៍ទទួលបាន មិនអាចវាយតម្លៃអំពីទំហំនៃទ្រព្យធនរបស់លោកត្រាំបានទេ។
រកស៊ីខាតច្រើនជាងចំណេញ
មូលហេតុចំបងដែលនាំឱ្យលោកដូណាល់ត្រាំ បង់ពន្ធតិច ឬមិនបង់ពន្ធសោះ នៅឆ្នាំខ្លះនោះ គឺបណ្តាលមកពីជំនួញរកស៊ីរបស់លោកខាតច្រើនជាងចំណេញ និងជាប់បំណុលទៀត។ កម្មវិធីទូរទស្សន៍របស់លោកដែលមានឈ្មោះ The Apprentice បាននាំចំណូលឱ្យក្រុមហ៊ុន ចំនួនដល់ទៅ៤០០លានដុល្លារមែនក្នុងមួយឆ្នាំៗ ប៉ុន្តែសាខាជាង៥០០ផ្សេងទៀត របស់ក្រុមហ៊ុន Trump Organisation ភាគច្រើនសុទ្ធតែខាត។ បើតាមញូវយ៉កថែមស៍ ក្លឹបវាយកូនគោលដែលក្រុមហ៊ុនត្រាំបានទិញកាលពីពីរទសវត្សរ៍មុន និងសណ្ឋាគារ Trump Horel នៅវ៉ាស៊ីងតោន ខាតមួយឆ្នាំៗរាប់សិបលាន។
កាលពីឆ្នាំ១៩៩៥ បើតាមការទម្លាយរបស់ញូវយ៉កថែមស៍នៅឆ្នាំ២០១៦ ក្រុមហ៊ុនត្រាំប្រកាសខាត ប្រមាណ៩១៦លានដុល្លារ ដែលជំរុញឱ្យក្រុមហ៊ុនអាចរួចពន្ធរយៈពេល២០ឆ្នាំ។
ក្រៅពីរកស៊ីខាត ញូវយ៉កថែមស៍រកឃើញតួលេខដ៏សម្បើមមួយទៀត គឺលោកត្រាំ ជាប់បំណុលដល់ទៅ ៤២១លានដុល្លារ ដែលត្រូវបន្តសងក្នុងរយៈពេលបួនឆ្នាំទៀត ពោលគឺរយៈពេញមួយអាណត្តិទីពីរប្រសិនបើលោកជាប់ឆ្នោតជាថ្មី នៅថ្ងៃទី ៣វិច្ឆកាខាងមុខ។ បំណុល៤២១លានដុល្លារនេះ គឺមកពីកាសែតបូកបន្ថែមទុកជាមុននូវបំណុលដែលលោកត្រាំ អាចនឹងត្រូវសងត្រលប់ទៅឱ្យរដ្ឋវិញ បើចាញ់ក្តី។ ក្រោយវិបត្តិហិរញ្ញវត្ថុ ឆ្នាំ២០០៨ បុរសអ្នកជំនូញត្រាំ តាមរយៈវិធានការសង្គ្រោះរបស់រដ្ឋាបាលអូបាម៉ា ក្រុមហ៊ុនត្រាំ បានទទួលជំនួយពីរដ្ឋាភិបាលចំនួន ៧២,៩លានដុល្លារ ចំពោះការខាតបង់នៅកាស៊ីណូAtlantic City។ ប៉ុន្តែខាងពន្ធដារកំពុងប្តឹងទារឱ្យសងលុយវិញ ដោយបូកថែមនឹងការប្រាក់ជាងម្ភៃលានដុល្លារទៀត។
កាន់តែចាញ់ប្រៀបលោក ចូបៃដិន
នៅក្នុងសន្និសីទកាសែតប្រចាំថ្ងៃ លោកត្រាំ បានបញ្ចេញប្រតិកម្ម ប្រឆាំងនឹងកាសែតញូវយ៉កថែមស៍ ដោយចាត់ទុកការទម្លាយព័ត៌មាននេះថារឿងប្រឌិត និងបានអះអាងថាលោកបង់ពន្ធច្រើនណាស់។ លោកមិនបង្ហាញទ្រព្យមែនតែមានការត្រួតពិនិត្យត្រឹមត្រូវ ហើយអាជ្ញាធរកំពុងធ្វើសវនកម្មទ្រព្យសម្បត្តិលោកទៀត។
តែទោះលោកបដិសេធយ៉ាងណា ក៏រឿងអាស្រូវនេះមិនមែនជាដំណឹងល្អសម្រាប់លោកឡើយ។ ទីមួយគឺព័ត៌មាននេះបានឆ្លុះបញ្ចាំងឱ្យឃើញពីភាព ខុសគ្នារវាងពាក្យអួតអាងរបស់លោកត្រាំ ដែលតែងតែលើកឡើងអំពីភាពជោគជ័យក្នុងរបរជំនួញ រហូតបានក្លាយជាមហាសេដ្ឋី។ នេះប្រសិនបើក្រុមហ៊ុន Trump Organisation ពិតជាខាតដូចអ្វីដែលកាសែតលើកឡើងមែន។ បើមិនមែន តើប្រឹងរកវិធីបង្វែរបង្វៀងធ្វើយ៉ាងណាឱ្យតែខាងបង់ពន្ធតិចនេះ ស្របច្បាប់ និងស្ថិតក្នុងក្របខណ្ឌច្បាប់ដែរឬអត់។ នោះជាបញ្ហាមួយទៀត។
ចង់ឬមិនចង់ រូបភាពជាមហាសេដ្ឋី ជាអ្នកជំនួញដ៏ល្បីរបស់លោកត្រាំត្រូវប្រលាក់ប្រលូស និងអាប់អោនបន្តិចហើយ។ សំណុំរឿងបង់ពន្ធ និងតម្លាភាពក្រុមហ៊ុនត្រាំ និងទំនាស់ផលប្រយោជន៍ក្នុងនាមជាប្រធានាធិបតី ជារឿងអាស្រូវជាប់បណ្តឹងច្រើនណាស់។ ញូវយ៉កថែមស៍សន្យានឹងទម្លាយព័ត៌មានបន្ថែមទៀតនៅថ្ងៃខាងមុខ។
ម្យ៉ាងវិញទៀត នៅថ្ងៃស្អែក លោកត្រាំ ក្នុងនាមបេក្ខជនប្រធានាធិបតីបក្សសាធារណរដ្ឋ ត្រូវជជែកតទល់នឹងបេក្ខជនលោកចូបៃដិនមកពី បក្សប្រជាធិបតេយ្យ តាមកញ្ចក់ទូរទស្សន៍ជាលើកទីមួយផង។ ព័ត៌មាននេះជាថ្នាំ ប៉ូវបន្ថែមសម្រាប់លោកចូបៃដិន ដែលកំពុងនាំមុខលោកត្រាំស្រាប់ ឱ្យកាន់តែមានប្រៀប។ ឯលោកត្រាំវិញ ត្រូវស្ថិតក្នុងជំហរប្រឹងទប់ការពារខ្លួន។
បើតាមការស្ទង់មតិ ពលរដ្ឋអាមេរិកមានចេតនាចង់ផ្តល់ទំនុកចិត្តលើលោកបៃដិន ដល់៥១% ទល់នឹង៤០%លើលោកត្រាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ