ចិនបើកជំនួបកំពូលត្រីភាគី ជាមួយ ជប៉ុន និងកូរ៉េខាងត្បូង ដើម្បីនិយាយពីសំណុំរឿងកូរ៉េខាងជើង
ចុះផ្សាយនៅថ្ងៃ៖
ស្តាប់ - ០៨:០៥
ប្រទេសចិន នៅថ្ងៃអង្គារទី ២៤ ធ្នូ បានធ្វើជាម្ចាស់ផ្ទះរៀបចំជំនួបកំពូលត្រីភាគី ចិន ជប៉ុន និងកូរ៉េខាងត្បូង។ នៅក្នុងជំនួបកំពូលលើកទី៨ ដែលរៀបចំឡើងនៅទីក្រុងChengdu ភាគនិរតី ប្រទេសចិន ប្រមុខដឹកនាំរបស់ប្រទេសជិតខាងទាំងបី នឹងផ្តោតសំខាន់ទៅលើបញ្ហានុយក្លេអ៊ែរកូរ៉េខាងជើង ដែលកំពុងចោទខ្លាំងឡើងវិញ នៅក្នុងបរិបទនៃភាពតានតឹងសាជាថ្មី រវាង អាមេរិក និងកូរ៉េខាងជើង។ កូរ៉េខាងត្បូង ចិន និងជប៉ុន ធ្លាប់មានទំនាក់ទំនងមិនសូវល្អូកល្អឺនប៉ុន្មាន ដោយសារបញ្ហាប្រវត្តិសាស្រ្ត ការប្រកួតប្រជែង សេដ្ឋកិច្ច និងជម្លោះ ដណ្តើមដី កោះនៅក្នុងសមុទ្រចិនខាងកើត។
ប្រទេសចិន នៅថ្ងៃអង្គារនេះ ជាម្ចាស់ផ្ទះ រៀបចំជំនួបកំពូល ត្រីភាគី ជាមួយជប៉ុន និងកូរ៉េខាងត្បូង ដែលសុទ្ធសឹងជាសម្ព័ន្ធមិត្តរបស់អាមេរិក គូប្រជែងរបស់មហាអំណាចចិន។ ទោះមានជម្លោះដណ្តើមដីកោះ ឬធ្លាប់ឈឺចាប់ នឹងគ្នា ដោយសាររឿងរ៉ាវប្រវត្តិសាស្រ្ត ដូចជាការឈ្លានពាន របស់កងទ័ពជប៉ុន នៅប្រទេសចិន និងកូរ៉េខាងត្បូងក្តី ក្នុងសម័យសង្រ្គាមលោក ប៉ុន្តែ ថ្នាក់ដឹកនាំរបស់ប្រទេសចិន ជប៉ុន និងកូរ៉េខាងត្បូង បានទុករឿងទាំងនោះ នៅមួយកន្លែង ដោយឡែក ដោយមិនលាយឡំជាមួយបញ្ហាផលប្រយោជន៍សេដ្ឋកិច្ច និងសន្តិសុខរួមគ្នានោះទេ។
នៅក្នុងពិធីបើកសម្ពោធ ជំនួបកំពូល នៅថ្ងៃអង្គារនេះ នៅទីក្រុង Chengdu លោកនាយករដ្ឋមន្រ្តីចិន លី ខឺឈាំង បានថ្លែងនៅចំពោះមុខលោកនាយករដ្ឋមន្រ្តី ជប៉ុន ស្ហ៊ីនហ្សូ អាបេ និងប្រធានាធិបតីកូរ៉េខាងត្បូង លោកមូន ចៃអ៊ីនថា លោកសង្ឃឹមថា សហប្រតិបត្តិការរវាងប្រទេសទាំងពីរ នឹងអាចការពារ សុវត្ថិភាព និងស្ថិរភាព នៅក្នុងតំបន់អាស៊ី។
នេះជាលើកទី ៨ហើយ ដែលចិន ជប៉ុន និងកូរ៉េខាងត្បូង បានបើកជំនួបកំពូលត្រីភាគី ជាមួយ គ្នា ដោយជំនួបកំពូល លើកទី ៧ បានបើកធ្វើ កាលពីខែ ឧសភា ឆ្នាំមុន នៅទីក្រុងតូក្យូ។ ដូចឆ្នាំដែរ សំណុំរឿង នុយក្លេអ៊ែរ កូរ៉េខាងជើង ជាប្រធានបទ នាំមុខគេ ក្នុងជំនួបកំពូលត្រីភាគីចិន ជប៉ុន និងកូរ៉េខាងត្បូង។ ប៉ុន្តែ ខុសពីឆ្នាំមុន ដែលជំនួបកំពូលបើកធ្វើ នៅក្នុងបរិយាសដ៏ធូស្រាល ពោលគឺនៅមួយខែមុន ជំនួបកំពូល មេដឹកនាំកូរ៉េខាងជើង និងលោកដូណាល់ ត្រាំ នៅប្រទេសសិង្ហបុរី ជំនួបកំពូលត្រីភាគី ចិន ជប៉ុន និងកូរ៉េខាងត្បូង លើកនេះ ធ្វើឡើង នៅក្នុងបរិបទ ដែលកូរ៉េខាងជើង ត្រលប់ទៅដំឡើងសំឡេងគំរាមដាក់អាមេរិក សាជាថ្មី។
សូមរំលឹកថា នៅប៉ុន្មានសប្តាហ៍មកនេះ ដើម្បីដាក់សម្ពាធ ឲ្យអាមេរិក ធ្វើសម្បទាន នៅក្នុងការចរចា ជាពិសេសក្នុងរឿងសម្រាលទណ្ឌកម្មសេដ្ឋកិច្ចមកលើកូរ៉េខាងជើង មេដឹកនាំកូរ៉េខាងជើង ធ្លាប់បានគំរាមដាក់ឱសានវាទ ឲ្យអាមេរិក ផ្តល់ចម្លើយ ឲ្យបានមុនដំណាច់ឆ្នាំនេះ បើសិន មិនចង់ទទួល អំណោយពិសេសសម្រាប់ បុណ្យណូអែល ទេនោះ។ អ្នកជំនាញមួយចំនួនវាយតម្លៃថា កូរ៉េខាងជើង ដែលបានផ្គើនសេចក្តីសម្រេចរបស់ក្រុមប្រឹក្សាសន្តិសុខ ដោយបាញ់សាកល្បង ជាបន្តបន្ទាប់ គ្រាប់មីស៊ីលទៅក្នុងសមុទ្រជប៉ុន នឹងអាចបាញ់សាកល្បង មីស៊ីលអន្តរទ្វីប ដើម្បី កំញើញ ដាក់អាមេរិក។
នៅក្នុងសន្នីសិទកាសែតរួមគ្នា នៅថ្ងៃអង្គារនេះ លោកនាយករដ្ឋមន្រ្តីចិន លី ខឺឈាំងបានបញ្ជាក់ថា មេដឹកនាំប្រទេសទាំង៣ បានព្រមព្រៀងគ្នារួចហើយថា នឹងជំរុញ ឲ្យភាគីជម្លោះទាំងពីរ គឺកូរ៉េខាងជើង និងអាមេរិក ត្រលប់ចូលតុចរចា ឲ្យបានកាន់តែឆាប់ ដើម្បី បន្ធូរបន្ថយភាពតានតឹង ជាពិសេស ជម្លោះ ពាក្យសំដី ដែលមានកាន់តែខ្លាំង រវាងអាមេរិក និងកូរ៉េខាងជើង។
ចិនជាអ្នកផ្តល់ជំនួយសេដ្ឋកិច្ចចំបងដល់កូរ៉េខាងជើងពិតមែន ប៉ុន្តែ មេដឹកនាំចិន គ្មានឥទ្ធិពលខ្លាំង ដើម្បី បញ្ចុះបញ្ចូលឲ្យកូរ៉េខាងជើង លះបង់ចោលកម្មវិធីផលិតគ្រាប់បែកនុយក្លេអ៊ែរនោះទេ។ ចិនដែលមិនប្រាថ្នាចង់បានប្រទេសជិតខាងរបស់ខ្លួន ទោះបីជាសម្ព័ន្ធមិត្ត ក៏ដោយ មានគ្រាប់បែក នុយក្លេអ៊ែរ ដែលអាចគំរាមសន្តិសុខចិន បានចូលរួមបោះឆ្នោត នៅក្រុមប្រឹក្សាសន្តិសុខជាច្រើនដង ដើម្បី ដាក់ទណ្ឌកម្មលើកូរ៉េខាងជើង។ ទន្ទឹមគ្នានេះ ចិនក៏បារម្ភដែរថា ការដាក់សម្ពាធ ទណ្ឌកម្មសេដ្ឋកិច្ចរបស់អង្គការសហប្រជាជាតិក៏នឹងធ្វើ របបកុម្មុយនិស្តព្យុងយ៉ាង ដួលរលំ។ ផលវិបាក គឺ ចិននឹងទទួលថ្មបាក់ លំហូរប្រជាជនកូរ៉េខាងជើង ទៅក្នុងទឹកដីចិននេះឯង។ ដោយសារតែហេតុផលនេះហើយ បានជាចិនត្រូវការជំនួយពីខាងក្រៅ។ លើកនេះ ចិនចង់បានជំនួយពីជប៉ុន និងកូរ៉េខាងត្បូង ដែលសុទ្ធជាសម្ព័ន្ធមិត្តរបស់អាមេរិក។ ចិនចង់ឲ្យកូរ៉េខាងត្បូង និងជប៉ុនទៅបញ្ចុះបញ្ចូលអាមេរិក នៅក្នុងរឿង ដកទណ្ឌកម្មសេដ្ឋកិច្ច ទៅលើកូរ៉េខាងជើង។
កាលពីថ្ងៃទី ១៧ ធ្នូរ ទីក្រុងប៉េកាំង និងទីក្រុងម៉ូស្គូ ដែលជាសមាជិកអចិន្រ្តៃយ៍របស់ក្រុមប្រឹក្សាសន្តិសុខ បានលើកសំណើទៅក្រុមប្រឹក្សាឲ្យបន្ធូរបន្ធយទណ្ឌកម្ម ខ្លះ លើកូរ៉េខាងជើង ដើម្បីបុព្វហេតុមនុស្សធម៌ នៅកូរ៉េខាងជើង ប៉ុន្តែ ក្នុងលក្ខខណ្ឌដែលកូរ៉េខាងជើង បន្តការសន្យារំសាយចោលអាវុធនុយក្លេអ៊ែរ។
ប្រទេសជប៉ុន ដែលប្រឈមខ្លាំងនឹងការគំរាមកំហែង វាយប្រហាររបស់កូរ៉េខាងជើង វាយតម្លៃថា វានៅឆាប់ពេក ដែលគេត្រូវដកទណ្ឌកម្មសេដ្ឋកិច្ចពីកូរ៉េខាងជើង ជាពិសេស នៅក្នុងបរិបទបច្ចុប្បន្ន ដែលកូរ៉េខាងជើង សាកល្បង ជាបន្តបន្ទាប់ បាញ់គ្រាប់មីស៊ីលទៅធ្លាក់ក្នុងដែនសមុទ្រជប៉ុនបែបនេះ។
ចិនចង់បង្ហាញតួនាទីការទូតដើម្បី សម្របសម្រួល ជប៉ុន កូរ៉េខាងត្បូង
ដោយបើកជំនួបកំពូលត្រីភាគី ចិន ជប៉ុន និងកូរ៉េខាងត្បូង ទីក្រុងប៉េកាំង បានបើកឱកាសឲ្យមេដឹកនាំជប៉ុន និងកូរ៉េខាងត្បូង បានជួបទល់មុខគ្នា នៅក្នុងការពិភាក្សាទ្វេភាគី ដែលបានខកខាន មិនបានធ្វើ អស់ ១៥ខែមកហើយ ដោយសារតែការអាក់អន់ស្រពន់ចិត្ត រវាងគ្នា នៅជាងមួយឆ្នាំមកនេះ។ ទំនាក់ទំនង ការទូត ជប៉ុន និងកូរ៉េខាងត្បូង បានធ្លាក់ចុះ អាក្រក់ រហូតរាលដាលដល់ទំនាក់ទំនងសេដ្ឋកិច្ច រវាងប្រទេសទាំងពីរ ដោយសារតែជម្លោះ រើឡើងវិញទាក់ទងនឹងដានប្រវត្តិសាស្រ្ត ជាពិសេស គឺរឿងធ្វើអាណានិគម រយៈពេល ៣៥ឆ្នាំរបស់ជប៉ុនទៅលើឧបទ្វីបកូរ៉េ។
នៅឆ្នាំ២០១៩ ដើម្បីឆ្លើយតបនឹងសេចក្តីសម្រេចរបស់តុលាការកូរ៉េខាងត្បូង ដែលបានផ្តន្ទាទោស ក្រុមហ៊ុនជប៉ុនឲ្យសងជម្ងឺចិត្ត ពលករកូរ៉េខាងត្បូង ដែលធ្វើការនៅក្រុមហ៊ុនជប៉ុនក្នុងអំឡុងសម័យសង្រ្គាម រដ្ឋាភិបាលជប៉ុនបានប្រកាសដកកូរ៉េខាងត្បូង ចេញពីបញ្ជីប្រទេសដៃគូពាណិជ្ជកម្មពិសេស។ កូរ៉េខាងត្បូងវិញ បានប្រកាសគំរាម ផ្អាកមិនចែករំលែក ព័ត៌មានយោធាសម្ងាត់ជាមួយជប៉ុន ប៉ុន្តែ បានប្តូរចិត្តមកវិញ ជាមួយលក្ខខណ្ឌ។
នៅមុនធ្វើដំណើរទៅប្រទេសចិន លោកនាយករដ្ឋមន្រ្តីជប៉ុន ស៊្ហីនហ្សូ អាបេ ទទួលស្គាល់ថា ទំនាក់ទំនងជាមួយប្រទេសកូរ៉េខាងត្បូង នៅល្អក់កករ នៅឡើយទេ។ ប៉ុន្តែ យ៉ាងណាក៏ដោយ ប្រទេសទាំងពីរនៅតែមានជំហរ គោលដៅរួមគ្នា មួយ នោះ បញ្ហាកូរ៉េខាងជើង ព្រោះថា ប្រទេសទាំងពីរ ចង់ ឬមិនចង់ ជាផ្ទាំងស៊ីប នៃការគំរាមកំហែង វាយប្រហារមុនគេរបស់កូរ៉េខាងជើង។
ជម្លោះខ្វែងគំនិត រវាងសម្ព័ន្ធមិត្តទាំងពីរ បានធ្វើឲ្យសហរដ្ឋអាមេរិក ខ្វល់ខ្វាយ បារម្ភថា នឹងអាចជះឥទ្ធិពលអាក្រក់ទៅលើនយោបាយការទូតរបស់អាមេរិក នៅអាស៊ី ជាពិសេស ក្នុងគោលដៅ យុទ្ធសាស្រ្ត ទប់ទល់នឹងមហាអំណាចចិន ក៏ដូចជាកូរ៉េខាងជើង។ ក៏ប៉ុន្តែ នៅពេលមហាអំណាចចិន ចូលខ្លួន មកជួយសម្របសម្រួល ជម្លោះការទូតជប៉ុន និងកូរ៉េខាងត្បូងយ៉ាងដូច្នេះ អាមេរិកក៏ប្រឆាំងជំទាស់អ្វីដែរ ព្រោះដើម្បីផលប្រយោជន៍រួម គឺទំនាក់ទំនងល្អឡើងវិញ រវាងសម្ព័ន្ធមិត្តសំខាន់ទាំងពីររបស់អាមេរិក។
ប្រការដែលសំខាន់ នៅត្រង់ថា តើចិននឹងអាចបញ្ចុះបញ្ចូលបានកម្រិតណា? តើចិនអាចបញ្ចុះបញ្ចូលឲ្យជប៉ុន និងកូរ៉េខាងត្បូង ទម្លាក់ចោល ជម្លោះដែលកើតឡើងដោយសារការឈឺចាប់ប្រវត្តិសាស្រ្តដែរឬទេ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ