ឥទ្ធិពលនៃផ្សែងភ្លើងឆេះព្រៃនៅប្រទេសអូស្រា្តលីបានឆ្លងដល់ឆ្នេរសមុទ្រប្រទេសនូវែលសេឡង់
នៅក្នុងប្រទេសអូស្រ្តាលី ពិធីបិទឆ្នាំចាស់ឆ្លងចូលឆ្នាំថ្មី ២០២០ កំពុងបន្តគ្របដណ្តប់ដោយភ្លើងឆេះព្រៃដែលបានចាប់ផ្តើមតាំងពីខែកញ្ញា ឆ្នាំ ២០១៨។ គិតត្រឹមថ្ងៃទី១ មករា ឆ្នាំ ២០២០ មានផ្ទះសម្បែងជាង ១ ០០០ខ្នងត្រូវបានឆាបឆេះដោតអណ្តាតភ្លើង មានមនុស្សស្លាប់យ៉ាងតិចចំនួន ១៧នាក់ និងមានព្រៃឈើជាង ៥លានហិចតាត្រូវបានលេបត្របាក់ដោយអណ្តាតភ្លើង។ ផ្អែកតាមរូបភាពផ្កាយរណប ឆ្នេរសមុទ្រនៃប្រទេសនូវែលសេឡង់ដែលមានចម្ងាយដល់ទៅ ២ ០០០គីឡូម៉ែត្រពីប្រទេសអូស្រា្តលីក៏ទទួលរងផ្សែងភ្លើងឆេះព្រៃនៅអូស្រា្តលីដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
នៅព្រឹកថ្ងៃពុធ ទី១ មករាដែលជាថ្ងៃចូលឆ្នាំថ្មី ២០២០ ទីក្រុងកង់បេរ៉ាដែលមានប្រជាជនរស់នៅជាង ៣០០ ០០០នាក់បានគ្របដណ្តប់ដោយពពកផ្សែងនៅលើអាកាស ហើយខ្យល់នៅក្នុងទីក្រុងមួយនេះកំពុងមានគុណភាពអាក្រក់ខ្លាំងជាងគេក្នុងលោក។ រីឯនៅទីក្រុងស៊ីដនី ពិធីបាញ់កាំជ្រួចឆ្លងចូលឆ្នាំថ្មីបានធ្វើឡើងនៅក្នុងបរិយាកាសបំពុលដោយផ្សែងភ្លើងឆេះព្រៃដែលបានចាប់ផ្តើមតាំងពីខែកញ្ញា ឆ្នាំ ២០១៨។ ផ្អែកតាមរូបភាពផ្កាយរណប ឥទ្ធិពលផ្សែងភ្លើងឆេះព្រៃបានហោះឆ្លងដល់ឆ្នេរសមុទ្ររបស់ប្រទេសនូវែលសេឡង់ដែលមានចម្ងាយដល់ទៅ ២ ០០០គីឡូម៉ែត្រពីទឹកដីអូស្រ្តាលី។
នៅរដ្ឋ New South Wales ប៉ូលិសបានបញ្ជាក់ពីការរកឃើញសាកសពថ្មីចំនួន ៣នាក់ ហើយបើសរុបតាំងពីយប់ថ្ងៃចន្ទ ទី៣០ ធ្នូមក មានចំនួនមនុស្សស្លាប់ ៨នាក់បន្ថែមទៀត។ ក្តីបារម្ភខ្លាំងបានផ្តោតលើចំនួនមនុស្សបាត់ខ្លួនជាច្រើននាក់នៅប៉ែកអាគ្នេយ៍ដែលកំពុងបន្តរងការឆាបឆេះមិនទាន់អាចគ្រប់គ្រងបាន។ អណ្តាតភ្លើងបានកាត់ផ្តាច់ភ្លើងអគ្គិសនី ទូរស័ព្ទ និងអ៊ីនធឺណែត ព្រមទាំងធ្វើឲ្យមានអ្នកដើរលេង និងអ្នកស្រុកជាច្រើនពាន់នាក់ជាប់គាំងនៅមាត់សមុទ្រ។ បន្ទាប់ពីបានសម្រាកតាមឆ្នេសមុទ្រក្នុងយប់ថ្ងៃចុងក្រោយឆ្នាំ ២០១៩ មក មានអ្នកខ្លះអាចត្រឡប់ចូលផ្ទះរបស់ខ្លួនវិញជាមួយនឹងការបើកផ្លូវបណ្តោះអាសន្ន តែអ្នកខ្លះទៀតគ្មានជម្រើសអ្វីក្រៅពីសម្រាកថែមមួយយប់ទៀតទេ។
នៅស្រុកទេសចរណ៍ Mallacoota ស្ថិតក្នុងរដ្ឋ Victoria មនុស្សទាំង ៤ ០០០នាក់ដែលជាប់គាំងនៅឆ្នេរសមុទ្រ និងដែលទទួលបានការការពារដោយរថយន្តរបស់ក្រុមពន្លត់អគ្គីភ័យត្រូវបានរួចផុតពីគ្រោះភ័យ។ តែរដ្ឋអំណាចបានផ្តើមគិតគូរពីលទ្ធភាពជួយផ្គត់ផ្គង់ស្បៀងអាហាររយៈពេលប៉ុន្មានសប្តាហ៍សម្រាប់ស្រុក Mallacoota។ គួររម្លឹកថា ភ្លើងឆេះព្រៃដែលចាប់ផ្តើមកាលពីខែកញ្ញា ឆ្នាំ ២០១៩ បានបំផ្លាញផ្ទះសម្បែងជាង ១ ០០០ខ្នង មានមនុស្សស្លាប់យ៉ាងតិចចំនួន ១៧នាក់ និងមានព្រៃឈើជាង ៥លានហិចតាត្រូវបានលេបត្របាក់ដោយអណ្តាតភ្លើង ពោលស្មើនឹងជាងផ្ទៃក្រឡាដីរបស់ប្រទេសមួយចំនួន ដូចយ៉ាងប្រទេសដាណឺម៉ាក ឬប្រទេសហូឡង់៕
(ព័ត៌មានដកស្រង់ពី AFP)
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ