ប្រជាជនអូស្ត្រាលីរិះគន់នាយករដ្ឋមន្ត្រីទៅលំហែកាយនៅកោះហាវ៉ៃ ខណៈប្រទេសមានភ្លើងឆេះព្រៃ
លោក ស្កុត ម៉ូរីសុន នាយករដ្ឋមន្ត្រីអូស្ត្រាលី បានបង្ខំចិត្ត បង្ខើចការឈប់សម្រាកវិស្សមកាល នៅលើកោះហាវ៉ៃ ដើម្បីត្រលប់មកប្រទេសវិញ បន្ទាប់ពីមានការរិះគន់ខ្លាំងៗ ពីសំណាក់ប្រជាជនអូស្ត្រលី ថាលោក ឆ្លៀតទៅលំហែកាយ ខណៈដែលប្រទេសកំពុងជួបគ្រោះភ្លើងឆេះព្រៃ និងផ្សែងខ្មៅអួរអាប់ នៅតាមទីក្រុងធំៗ។ នៅថ្ងៃអាទិត្យទី២២ធ្នូ លោកនាយករដ្ឋមន្ត្រីអូស្រ្តាលី បានត្រលប់មកវិញហើយដោយបានថ្លែងសុំទោសប្រជាជន និងបានទៅជួបផ្តល់កម្លាំងចិត្ត ដល់ក្រុមពន្លត់អគ្គីភ័យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
ការសម្រាកលំហែរកាយ របស់លោកនាយករដ្ឋមន្ត្រីអូស្ត្រាលី ស្កុត ម៉ូរីសុន ជាមួយនឹងគ្រួសារ នៅលើកោះហាវ៉ៃ បានក្លាយជារឿងរ៉ាងធ្វើឲ្យប្រជាជនអូស្ត្រាលីរិះគន់ធ្ងន់ៗ។ មតិមហាជន បានលើកឡើងថា លោកស្កុត ម៉ូរីសុន មិនត្រឹមតែមិនបង្ហាញការឈឺឆ្អាល ស្ទុះស្ទាររឿងភ្លើងឆេះព្រៃទេ តែថែមទាំងបាននាំប្រពន្ធកូន ទៅលំហែរកាយ នៅលើកោះហាវ៉ៃថែមទៀត។ ចំណែកនៅក្នុងស្រុកឯណេះ ក្រុមពន្លត់អគ្គីភ័យកំពុងតស៊ូយ៉ាងលំបាក ជាមួយអណ្តាតភ្លើង ហើយនៅតាមទីក្រុងធំៗ ដូចជាស៊ីដនី កង់បេរ៉ា ផ្សែងខ្មៅអួរអាប់ កំពុងធ្វើបាបផ្លូវដង្ហើម របស់ប្រជាជនជាខ្លាំង។
ក្រោយការរិះគន់ទាំងនេះ លោកស្កុត ម៉ូរីសុន បានបង្ខើចវិស្សមកាល ហើយបានត្រលប់មកអូស្ត្រាលីវិញ។ លោកបានថ្លែង ថាលោកយល់ពីការមិនសប្បាយចិត្តរបស់ប្រជាជន និងសូមការអភ័យទោសពីប្រជាជនចំពោះកំហុសនេះ។ លោកបន្ថែមថា លោកជឿថាប្រជាជនអូស្ត្រាលីនឹងយល់ អនុគ្រោះដល់លោក ព្រោះថាលោកបានសន្យាជាមួយកូនៗថានឹងទៅសម្រាកលំហែ តែក្នុងនាមជានាយករដ្ឋមន្ត្រី លោកក៏ត្រូវមានការទទួលខុសត្រូវផ្សេងទៀតដែរ។
សូមបញ្ជាក់ថា ជាច្រើនថ្ងៃមកហើយ ដែលភ្លើងឆេះព្រៃ នៅភាគខាងកើតឈាងខាងត្បូងអូស្ត្រាលី បានលេបត្របាក់ផ្ទៃដីប្រមាណជា៣សែនគីឡូម៉ែត្រក្រឡា។ សីតុណ្ហភាពបានឡើងដល់ ៥០អង្សារសេ មនុស្ស១០នាក់បានបាត់បង់ជីវិត ផ្ទះប្រមាណ៨០០ខ្នង ត្រូវភ្លើងឆាបត្របាក់។ ទីក្រុងស៊ីដនី ដែលនៅកៀកនឹងភ្លើងបំផុត កំពុងតែជួបបញ្ហា ដោយសារតែផេះ ផ្សែងខ្មៅអួរអាប់ គ្រប់ដណ្តាប់ពីលើ។ គ្រូពេទ្យ បានលើកឡើងអំពីករណីជំងឺផ្លូវដង្ហើម កើនឡើងយ៉ាងខ្លាំង ខណៈដែលប្រព័ន្ធសុខាភិបាលអូស្ត្រាលី មិនបានត្រៀមលក្ខណៈដោះស្រាយ។
គួរកត់សំគាល់ផងដែរថា ការសម្រាកលំហែកាយរបស់លោកនាយករដ្ឋមន្ត្រី ស្កុត ម៉ូរីសុន ខណៈពេលដែលប្រទេសជួបគ្រោះអាសន្ននេះ មិនមែនជាការរិះគន់តែមួយចំណុចពីប្រជាជននោះទេ។ ប៉ុន្មានថ្ងៃចុងក្រោយនេះ ប្រជាជនអូស្ត្រាលីបានផ្ទុះការតវ៉ា រិះគន់រដ្ឋាភិបាលរបស់លោកស្កុត ម៉ូរីសុន ដែលមិនយកចិត្តទុកដាក់ទាល់តែសោះ នៅក្នុងបញ្ហាអាកាសធាតុ ការកើនឡើងនូវកំដៅផែនដី។ ប្រជាជនបានរិះគន់ ទៅលើគោលនយោបាយថាមពល ដែលរដ្ឋាភិបាលមិនព្រមបោះបង់ចោលការប្រើធ្យូងថ្ម ដែលជាប្រភពនៃការបញ្ចេញឧស្ម័នកាបូនិក ទៅក្នុងបរិយាកាស។ អ្នកជំនាញបរិស្ថាន បានលើកឡើងថា ជាមួយនឹងការកើនឡើងកំដៅផែនដី សីតុណ្ហភាពកាន់តែឡើងក្តៅ និងស្ងួតខ្លាំង ដែលវាអំណោយផល ដល់ការរីករាលដាលនូវអគ្គីភ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ