បោះឆ្នោតតៃវ៉ាន់៖ បេក្ខនារីប្រធានាធិបតីដែលប្រឆាំងចិនដីគោក កំពុងទទួលសំឡេងនាំមុខ
គ្រាន់តែ ការិយាល័យបោះឆ្នោតប្រធានាធិបតីបិទទ្វារ លទ្ធផលនៃការរាប់សន្លឹកឆ្នោត នៅតៃវ៉ាន់ បានបង្ហាញបណ្តើរៗហើយថា លោកស្រី ប្រធានាធិបតីផុតអាណត្តិ ត្សៃ អ៊ីងវេនបានទទួលសំឡេងឆ្នោត នាំមុខ បេក្ខជន គូប្រជែងរបស់លោកស្រី ដែលមកពីគណបក្សគួមីនតង់ ដែលមាននិន្នាការរកចិនដីគោក។ តាមប្រព័ន្ធផ្សព្វផ្សាយ ក្នុងស្រុកតៃវ៉ាន់ នៅក្នុងចំណួនសន្លឹកឆ្នោត ជាង ៦លាន ដែលគេបានរាប់ រហូតមកដល់ម៉ោងនេះ លោកស្រី ត្សៃ អ៊ីងវេន បានទទួលសំឡេង ឆ្នោត ៥៦ភាគរយ ចំណែក លោក ហាន គួរយូ ដែលជាគូប្រជែង បានទទួលសំឡេងតែ ៣៩ភាគរយប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
លទ្ធផល នៃការរាប់សន្លឹកឆ្នោតបណ្តើរៗ បានបង្ហាញថា ប្រធានាធិបតីផុតអាណត្តិលោកស្រី ត្សៃ អ៊ីងវេន ដែលជាបេក្ខនារី មកពីគណបក្សប្រជាធិបតេយ្យ ចម្រើននិយម ដែលចង់បានឯករាជ្យឲ្យកោះតៃវ៉ាន់ បានទទួលសំឡេងនាំមុខ គូប្រជែងរបស់លោកស្រី គឺលោក ហាន គួរយូ មកពីគណបក្ស ដែលមាននិន្នាការទៅរកចិនដីគោក។ លទ្ធផលឆ្នោតផ្លូវការយ៉ាងណានោះ នឹងបញ្ជាក់ថា តើតៃវ៉ាន់ នឹងដើរលើផ្លូវដែលយកចិន ជាមិត្ត ឬយកចិនជាសត្រូវ។
ដោយចង់បន្តតំណែងប្រធានាធិបតី តៃវ៉ាន់មួយអាណត្តិទៀត លោកស្រី ត្សៃ អ៊ីងវេន បានតាំងខ្លួន លោកស្រី ជាអ្នកការពារ តម្លៃ សិទ្ធិសេរីភាព នៅតៃវ៉ាន់ ដែលកំពុងប្រឈមនឹងអំណាចផ្តាច់ការ កាន់តែចេញមុខរបស់ចិនដីគោក។ លោកស្រី ត្សៃ អ៊ីងវេន ដែលធ្លាប់ធ្លាក់កូដប្រជាប្រិយភាព នៅក្នុងការបោះឆ្នោតសភា និងឃុំសង្កាត់កន្លងមក បានឆ្លៀតទាញប្រយោជន៍ ចំណុចខ្សោយ របស់ទីក្រុងប៉េកាំង ដែលកំពុង ប្រឈមនឹងវិបត្តិនយោបាយនៅហុងកុង ហើយនិងជម្លោះពាណិជ្ជកម្ម ជាមួយអាមេរិក។
លោកស្រី ត្សៃ អ៊ីងវេន បានទាក់ទាញ អ្នកជាតិនិយម តៃវ៉ាន់ ផងដែរ តាមរយៈ ប្រសាសន៍របស់ប្រធានាធិបតី ចិន លោកស៊ី ជីនពីង ដែលថា ការដាក់បញ្ចូលកោះតៃវ៉ាន់ មកក្នុងប្រទេសចិនតែមួយ គឺជារឿង ដែលគេមិនអាចជៀសបាន។
នៅក្នុងយុទ្ធនាការឃោសនាបោះឆ្នោតកន្លងទៅ លោកស្រី ធ្លាប់បានអំពាវនាវប្រាប់ឲ្យពលរដ្ឋតៃវ៉ាន់ បោះឆ្នោត គាំទ្រ ឬមួយ ក៏ប្រឆាំង លទ្ធិប្រជាធិបតេយ្យ និងដែនអធិបតេយ្យភាពរបស់តៃវ៉ាន់។ លោកស្រីបាននិយាយថា បោះឆ្នោតឲ្យលោកស្រី គឺ បង្ហាញថា ពលរដ្ឋតៃវ៉ាន់ ប្តេជ្ញា ការពារ ប្រទេស និងដែនអធិបតេយ្យភាពរបស់តៃវ៉ាន់។
នៅពេលចេញពីបន្ទប់បោះឆ្នោត កាលពី ថ្ងៃសៅរ៍ លោកស្រី ត្សៃ អ៊ីងវេន បានថ្លែងប្រាប់អ្នកកាសែតថា លោកស្រី សង្ឃឹមថា ប្រជាជនតៃវ៉ាន់ ចេញទៅបោះឆ្នោត ដើម្បីសំដែងសិទ្ធិ និងពង្រឹងលទ្ធិប្រជាធិបតេយ្យតៃវ៉ាន់ ឲ្យកាន់តែរឹងមាំជាងមុន។
គូប្រជែងរបស់លោកស្រីត្សៃ អ៊ីងវេន គឺលោក ហាន គួយូ មកពីគណបក្សគួមីងតង់ ដែលប្រើពាក្យស្លោកថា តៃវ៉ាន់ សុវត្ថិភាព និងប្រជាជនតៃវ៉ាន់ ជាអ្នកមាន ធ្លាប់បានអំពាវនាវឲ្យពលរដ្ឋតៃវ៉ាន់ ជ្រើសរើសរវាងសន្តិភាព ឬវិបត្តិជាមួយចិន។ លោកហាន ធ្លាប់បានឈ្នះឆ្នោត ក្លាយជាចៅហ្វាយក្រុង Kaohsiung ដែលធ្លាប់ជាទីតាំងសំឡេងឆ្នោតរបស់គណបក្សកាន់អំណាច។ ប៉ុន្តែ លោកហាន ដែលជាអ្នកនយោបាយមិនសូវមានបទពិសោធន៍ ត្រូវគេរិះគន់ដែរថា មានជំហរ ជ្រុលខ្លាំងពេកទៅរកប្រទេសចិន។
ការបោះឆ្នោតប្រធានាធិបតី តៃវ៉ាន់ កំពុងស្ថិតនៅក្រោមក្រសែភ្នែកតាមដានរបស់ប្រទេសមហាអំណាចនៅក្នុងតំបន់ ជាពិសេសចិន ដែលមិនលាក់លៀមពីមហិច្ឆតា ដែលចង់ឲ្យលោកស្រី ត្សៃ អ៊ីងវេន ជួបបរាជ័យ ក្នុងការបោះឆ្នោត។ ជោគជ័យណាមួយរបស់លោកស្រី អ៊ីងវេននឹងរឹងរឹតតែធ្វើឲ្យចិន និងតៃវ៉ាន់ កាន់តែតានតឹងខ្លាំងនឹងគ្នាបន្ថែមទៀត។
សូមបញ្ជាក់ថា ចាប់តាំង ពីលោកស្រី ត្សៃ អ៊ីងវេន មកពីគណបក្សដែលមាននិន្នាការទាមទារឯករាជ្យចូលកាន់អំណាច នៅតៃវ៉ាន់ ឆ្នាំ ២០១៦ ប្រទេសចិនដីគោក បានដំឡើងសំឡេង ដាក់សម្ពាធលើតៃវ៉ាន់ ទាំងផ្នែកនយោបាយ និងសេដ្ឋកិច្ច និងបានបង្កើនជារឿយ សមយុទ្ធយោធានៅជិត កោះតៃវ៉ាន់៕
(ដកស្រង់ព័ត៌មានពីAFP និង Reuters)
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ