ហ្វីលីពីនស្ថិតក្នុងស្ថានភាពអាសន្ន ក្រោយពីភ្នំភ្លើងតាលអាល់បានភ្ញាក់ និងជិតផ្ទុះ
នៅក្នុងប្រទេសហ្វីលីពីន ភ្នំភ្លើងតាលអាល់ដែលមានចម្ងាយប្រមាណ ៦៥គីឡូម៉ែត្រស្ថិតប៉ែកខាងត្បូងទីក្រុងម៉ានីលបានខ្ចាក់កំអែល និងបញ្ចេញផេះ រួមទាំងផ្សែងខ្មួលខ្មាញ់បាញ់ត្រង់ទៅលើនាថ្ងៃចន្ទ ទី១៣ មករា។ បរិមាណផេះ និងផ្សែងបានធ្វើឲ្យមានការលុបចោលជើងហោះហើរជាច្រើននៅអាកាសយានដ្ឋានក្នុងទីក្រុងម៉ានីល។ ឧប្បត្តិហេតុធម្មជាតិមួយនេះត្រូវបានរដ្ឋាភិបាលប្រកាសអាសន្នដោយគេមិនដឹងថា តើភ្នំភ្លើងតាលអាល់នឹងផ្ទុះនៅពេលណា។ គួររម្លឹកថា ភ្នំតាល់អាល់បានផ្តើមកក្រើកជាមួយនឹងដីរញ្ជួយនៅក្បែរនោះក្នុងថ្ងៃអាទិត្យ ទី១២ មករា។
ចុះផ្សាយនៅថ្ងៃ៖
ស្តាប់ - ០១:៥០
រហូតមកដល់ពេលនេះ មានមនុស្សយ៉ាងតិច ១០ ០០០នាក់ត្រូវបានជម្លៀសចេញពីផ្ទះសម្បែងរបស់ពួកគេដែលស្ថិតក្បែរភ្នំភ្លើង។ ចំណែកសាលារៀនដែលស្ថិតក្នុងតំបន់ភ្នំភ្លើង គ្រប់ការិយាល័យរបស់រដ្ឋាភិបាល និងផ្សារមូលប័ត្របានបិទទ្វារក្នុងថ្ងៃចន្ទ ទី១៣ មករា។ អាកាសយានដ្ឋានក្នុងទីក្រុងម៉ានីលដែលបានបិទទ្វារនាថ្ងៃអាទិត្យ ទី១២ មករាបានបើកទ្វារបណ្តោះអាសន្នអនុញ្ញាតឲ្យយន្តហោះផ្តើមហោះចេញក្នុងថ្ងៃចន្ទ ទី១៣ មករា។ គួររម្លឹកថា មានជើងហោះហើរប្រមាណជា ២៤០ ត្រូវបានលុបចោលដោយសារវត្តមានបរិមាណផេះនៅក្នុងអាកាស។ ក្រោយការព្រមានពីរដ្ឋអំណាចជុំវិញហានិភ័យផ្លូវដង្ហើមដោយការស្រូបលំអងធូលី និងផេះភ្នំភ្លើង ពលរដ្ឋដែលរស់ក្នុងតំបន់ភ្នំភ្លើងបាននាំគ្នាទិញម៉ាស់បិទចម្រុះ។
ផ្អែកតាមវិទ្យាស្ថានទទួលបន្ទុកផ្នែកភ្នំភ្លើង និងរញ្ជួយដី ភ្នំភ្លើងតាលអាល់បានផ្តើមកក្រើកក្នុងថ្ងៃអាទិត្យ ទី១២ មករាជាមួយនឹងការបញ្ចេញចំហាយទឹក និងកម្ទេចថ្មបាញ់ត្រង់ឡើងលើក្នុងកម្ពស់ ១៥គីឡូម៉ែត្រ។ ចំណែកកំអែលបានផ្តើមលេចរូបរាងច្បាស់ក្នុងថ្ងៃចន្ទ ទី១៣ មករា។ ទន្ទឹមគ្នានេះ បំផ្ទុះភ្លើងបង្កជារន្ទះបានកើតមានម្តងម្កាល និងញឹកញាប់ចេញពីមាត់ភ្នំភ្លើង។ លោក Renato Solidum នាយកវិទ្យាស្ថានទទួលបន្ទុកផ្នែកភ្នំភ្លើង និងរញ្ជួយដីបានបញ្ជាក់ថា កំអែលភ្នំភ្លើងជាសញ្ញាមួយដែលបញ្ជាក់ពីសកម្មភាពរបស់ភ្នំភ្លើង តែគេមិនដឹងថាតើសកម្មភាពមួយនេះនឹងមានរយៈពេលប៉ុន្មានទេ។ តាមលោក Solidum ការផ្ទុះភ្នំភ្លើងតាលអាល់ចុងក្រោយ គឺក្នុងឆ្នាំ ១៩៩៧។
គេនៅមិនទាន់ដឹងថា តើនៅប៉ុន្មានម៉ោង ឬនៅប៉ុន្មានថ្ងៃទៀតដែលភ្នំភ្លើងតាលអាល់នឹងផ្ទុះទេ។ អ្វីដែលគេអាចនិយាយបាន រដ្ឋាភិបាលបានប្រកាសអាសន្នក្នុងកម្រិតខ្ពស់ចំពោះឧប្បត្តិហេតុធម្មជាតិមួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ