ព្យុះសង្ឃរាសម្លាប់មនុស្សយ៉ាងតិច ១៦នាក់នៅហ្វីលីពីន
នៅប្រទេសហ្វីលីពីន ដែលប្រជាជនភាគច្រើនជាអ្នកកាន់គ្រិស្តសាសនា ពិធីបុណ្យណូអែលត្រូវបានប្រែក្លាយទៅជាសោកនាដកម្ម ក្រោយពីព្យុះដ៏កំណាចឈ្មោះ “ហ្វានហ្វូន” បានបោកបក់មកលើតំបន់ភាគកណ្តាលប្រទេស កាលពីថ្ងៃពុធ បណ្តាលឲ្យមនុស្សស្លាប់យ៉ាងតិច ១៦នាក់ និងបំផ្លិចបំផ្លាញផ្ទះសម្បែងរបស់ប្រជាជន ដែលភាគច្រើនជាភូមិនៅតំបន់ដាច់ស្រយាល។
ចុះផ្សាយនៅថ្ងៃ៖
ក្រៅពីបានសម្លាប់មនុស្ស និងបានបំផ្លិចបំផ្លាញផ្ទះរបស់ប្រជាជន នៅតាមភូមិដាច់ស្រយាល ព្យុះសង្ឃរាហ្វានហ្វូន ដែលមានល្បឿនខ្យល់រហូតដល់ទៅជិត ២០០គីឡូម៉ែត្រក្នុងមួយម៉ោងនោះ ក៏បានបក់រំលំបង្គោលភ្លើងអស់ជាច្រើនផងដែរ ដែលជាហេតុបណ្តាលឲ្យការផ្គត់ផ្គង់ចរន្តអគ្គិសនី នៅកន្លែងជាច្រើនត្រូវកាត់ផ្តាច់ ដោយក្នុងនោះ តំបន់ទេសចរណ៍ដ៏ពេញនិយមមួយចំនួនរបស់ហ្វីលីពីន ក៏ត្រូវរងនូវការខូចខាតយ៉ាងច្រើនផងដែរ។
អាជ្ញាធរមូលដ្ឋាននៅក្បែរតំបន់ដែលរងគ្រោះដោយព្យុះសង្ឃរានេះបានប្រាប់ទីភ្នាក់ងារព័ត៌មានអាអែហ្វប៉េថា គិតមកទល់នឹងថ្ងៃព្រហស្បតិ៍នេះ ចរន្តអគ្គិសនីនៅក្នុងតំបន់នោះនៅតែមិនទាន់អាចតភ្ជាប់មកវិញនៅឡើយនោះទេ ចំណែកឯបណ្តាញទូរស័ព្ទ និងអ៊ីនធ័រនែតក៏ត្រូវកាត់ផ្តាច់ផងដែរ ដែលជាហេតុធ្វើឲ្យបណ្តាញទំនាក់ទំនងទៅកាន់តំបន់នោះត្រូវកាត់ផ្តាច់ ហើយធ្វើឲ្យគេមិនអាចវាយតម្លៃបានជាក់លាក់នៅឡើយ ទៅលើការខូចខាតដោយព្យុះសង្ឃរានេះ។
មធ្យោបាយដឹកជញ្ជូនវិញក៏ត្រូវកាត់ផ្តាច់ ដោយសេវាដឹកជញ្ជូនអ្នកដំណើរតាមផ្លូវទឹកចេញចូលតំបន់ទេសចរណ៍ត្រូវបានកាត់ផ្តាច់ ហើយអ្នកទេសចរកូរ៉េម្នាក់បានប្រាប់អាអែហ្វប៉េថា ព្រលានយន្តហោះដ៏សំខាន់មួយ ដែលជាច្រកចេញចូលតាមផ្លូវអាកាសទៅកាន់តំបន់ទេសចរណ៍ក្នុងតំបន់នោះក៏ត្រូវរងនូវការខូចខាតយ៉ាងធ្ងន់ធ្ងរផងដែរ ដែលជាហេតុបណ្តាលឲ្យអ្នកដំណើរត្រូវជាប់គាំងនៅឯព្រលានយន្តហោះ។ អ្នកទេសចរបរទេសខ្លះទៀត ដែលកំពុងជាប់គាំងនៅព្រលានយន្តហោះនោះបានឲ្យដឹងថា ពួកគេបានព្យាយាមទាក់ទងសួរដំណឹងអំពីមិត្តភក្តិរបស់ពួកគេផ្សេងទៀត ក៏ប៉ុន្តែ មិនអាចទាក់ទងបាន ដោយសារតែប្រព័ន្ធទំនាក់ទំនងត្រូវកាត់ផ្តាច់។
គួរបញ្ជាក់ថា ព្យុះសង្ឃរាហ្វានហ្វូននេះបានបក់បោកមកដល់ឆ្នេរហ្វីលីពីន តាំងពីយប់ថ្ងៃអង្គារ ហើយបានបន្តបោកបក់ពេញមួយថ្ងៃពុធ ដែលជាថ្ងៃបុណ្យណូអែល ដោយធ្វើដំណើរកាត់តាមបណ្តាកោះជាច្រើន ក្នុងតំបន់ប៉ែកកណ្តាលប្រទេស។ មនុស្សប្រមាណជាជិត ៦ម៉ឺននាក់ ត្រូវបានគេជម្លៀសចេញ តាំងពីថ្ងៃអង្គារ ដោយគន្លងផ្លូវនៃព្យុះសង្ឃរាហ្វានហ្វូននេះ មានលក្ខណៈស្រដៀងគ្នាទៅនឹងព្យុះសង្ឃរាដ៏កំណាចបំផុតមួយក្នុងប្រវត្តិហ្វីលីពីន គឺព្យុះសង្ឃរាហៃយ៉ាន កាលពីឆ្នាំ២០១៣ ដែលកាលណោះ វាបានសម្លាប់មនុស្សយ៉ាងតិចជាង ៦ពាន់នាក់ និងជាង១ពាន់នាក់ផ្សេងទៀតត្រូវបាត់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ