មេរោគផ្លូវដង្ហើមថ្មី កូរ៉ូណាវីរុសសម្លាប់មនុស្សម្នាក់ទៀត នៅប្រទេសចិន
នៅប្រទេសចិន ករណីមនុស្សស្លាប់ដោយសារមេរោគ កូរ៉ូណាវីរុសបានកើតមានជាលើកទី២ នៅទីក្រុងវូហាន ដែលជាកន្លែងផ្ទុះដំបូងនៃមេរោគផ្លូវដង្ហើម នៅប្រទេសចិន។ នេះបើតាមការប្រកាសរបស់អាជ្ញាធរសុខាភិបាល ចិន កាលពីថ្ងៃព្រហស្បតិ៍ម្សិលមិញ។ នៅពេលមេរោគថ្មី កំពុងចម្លងដល់មនុស្ស ៤១នាក់ ដែលនៅក្នុងនោះ ៥នាក់ ស្ថិតក្នុងស្ថានភាពធ្ងន់ធ្ងរ នៅទីក្រុងវូហាន ភាគកណ្តាលប្រទេសចិន អាជ្ញាធរថៃ បានអះអាងថា គេបានរកឃើញ ករណីអ្នកជម្ងឺ ទី២ ដែលមានផ្ទុកមេរោគកូរ៉ូណាវីរុស នៅក្រៅទឹកដីចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៧
មេរោគថ្មី នៃអំបូរ កូរ៉ូណាវីរុស បានសម្លាប់មនុស្សម្នាក់ទៀត នៅទីក្រុងវូហាន។ តាមការប្រកាសរបស់អាជ្ញាធរសុខាភិបាលចិន អ្នកជម្ងឺ វ័យ ៦៣ឆ្នាំ បានស្លាប់ កាលពីថ្ងៃពុធ បន្ទាប់ពី បានឆ្លងមេរោគ កូរ៉ូណាវីរុស តាំងពីថ្ងៃទី ៣១ធ្នូ។ នៅក្នុងសេចក្តីប្រកាសដែលចុះផ្សាយ តាមវិបសៃតិ៍ផ្លូវការរបស់គណៈកម្មការសុខភាព និងអនាម័យក្រុងវូហាន កាលពីថ្ងៃព្រហស្បតិ៍ អាជ្ញាធរចិនបានលម្អិតពីស្ថានភាពធ្ងន់ធ្ងររបស់អ្នកជម្ងឺ ដែលមានបញ្ហារលាកសាច់ដុំបេះដូង របេង ហើយនិងសរីរាង្គជាច្រើនទៀត ដែលខូច មិនដំណើរការ។
គិតចាប់តាំងផ្ទុះឡើងដំបូង នៅទីក្រុងវូហាន ភាគកណ្តាលប្រទេសចិន នាពាក់កណ្តាលខែធ្នូ ឆ្នាំមុន មេរោគផ្លូវដង្ហើម ថ្មី នៃអំបូរមេរោគ កូរ៉ូណាវីរុស បានសម្លាប់មនុស្ស២នាក់ ក្នុងចំណោមអ្នកជម្ងឺយ៉ាងតិច ៤១នាក់ នៅទីក្រុងវូហាន ដែលក្នុងនោះ ៥នាក់ ស្ថិតក្នុងស្ថានភាពធ្ងន់ធ្ងរ។
អាជ្ញាធរចិន នៅទីក្រុងវូហានជឿថា ផ្សារលក់គ្រឿងសមុទ្រ ដែលមានលក់ត្រី និងសត្វស្លាបផ្សេងទៀត ជាប្រភពកើតមានមេរោគថ្មីនៃអំបូរកូរ៉ូណាវីរុស។ នៅក្រោយ ផ្ទុះរាតត្បាត មេរោគផ្លូវដង្ហើមថ្មី អាជ្ញាធរចិន បានបិទផ្សារត្រី តាំងពីថ្ងៃទី១មករាមក។
ប៉ុន្តែ អាជ្ញាធរជប៉ុន ដែលបានរកឃើញមានករណីអ្នកផ្ទុកមេរោគកូរ៉ូណាវីរុស ជាលើកទី ១ នៅ ប្រទេសជប៉ុន នៅសប្តាហ៍នេះ បាននិយាយថា អ្នកជម្ងឺម្នាក់(ជនជាតិចិន រស់នៅភាគខាងត្បូងទីក្រុងតូក្យូ) ដែលគេរកឃើញថា មានមេរោគកូរ៉ូណាវីរុស ធ្លាប់បានធ្វើដំណើរទៅទីក្រុងវូហានមែន ប៉ុន្តែ មិនបានទៅផ្សារត្រីនៅទីនោះទេ។
នៅប្រទេសថៃ អាជ្ញាធរបានអះអាងនៅថ្ងៃសុក្រនេះ ថា បានរកឃើញមានករណីអ្នកមានមេរោគកូរ៉ូណាវីរុស សាជាថ្មី ដែលធ្វើឲ្យថៃ ជួបករណី អ្នកមានមេរោគកូរ៉ូណាវីរុស ជាលើកទី២។ តាមអាជ្ញាធរថៃ ដូចករណីមុន អ្នកដែលគេរកឃើញមានផ្ទុកមេរោគកូរ៉ូណាវីរុស ជាទេសចរ ជនជាតិចិន មកពីទីក្រុងវូហាន។
នៅពេលដែលបុណ្យចូលឆ្នាំ ចិន កាន់តែចូលខិតមកដល់ អាជ្ញាធរថៃ ផ្នែកសុខាភិបាលបានប្រកាសពង្រឹង ការឆ្លុះ ត្រួតពិនិត្យសុខភាព របស់អ្នកដំណើរ នៅតាមព្រលានយន្តហោះ ជាទី ដែលគេរំពឹងថា នឹងមានឆ្លងចេញចូល អ្នកទេសចរចិន មកពីទីក្រុងវូហាន ជាង ១ពាន់នាក់ ក្នុងមួយថ្ងៃៗ។
នៅពេលអង្គការសុខភាពពិភពលោក កំពុងបន្តស្រាវជ្រាវ ដើម្បី ស្វែងយល់ពី ប្រភព មធ្យោបាយ ចម្លង និងទំហំគ្រោះថ្នាក់នៃមេរោគថ្មី នៅប្រទេស ចិន អាជ្ញាធរសុខាភិបាលចិនកាលពីថ្ងៃពុធ មិនបានបដិសេធទេថា អាចមានគ្រោះថ្នាក់ឆ្លងមេរោគ កូរ៉ូណាវីរុសពីមនុស្សទៅមនុស្ស ពោលគឺវាឆ្លងក្នុងចំណោមសមាជិកគ្រួសារ។ យ៉ាងណាក៏ដោយ អាជ្ញាធរវាយតម្លៃថា ការឆ្លងពីមនុស្សទៅមនុស្ស អាចមានលទ្ធភាព កើតឡើងតិចតួចបំផុត។
អ្វីដែលធ្វើឲ្យគេព្រួយបារម្ភខ្លាំង នោះ គឺករណីផ្ទុះមេរោគផ្លូវដង្ហើមថ្មី បានកើតមាន នៅពេលដែលពិធីបុណ្យចូលឆ្នាំចិន កាន់តែខិតចូលមកដល់ ដែលការណ៍នេះ នឹងធ្វើឲ្យមានចរាចរណ៍មនុស្ស ចុះឡើងច្រើន ដែលងាយនឹងធ្វើឲ្យមានការចម្លងមេរោគ ពីកន្លែងមួយ ទៅកន្លែងមួយ។ មេរោគថ្មីនេះធ្វើឲ្យគេនឹកទៅដល់ជម្ងឺផ្លូវដង្ហើម ដ៏រាតត្បាត ដែលបង្កឡើងដោយមេរោគ SARS នៃអំបូរមេរោគកូរ៉ូណាវីរុស ដែលផ្ទុះឡើងដំបូង នៅប្រទេសចិន ប៉ុន្តែ បានរីកសាយភាយ ដល់ប្រទេស ចំនួន ២៣ក្នុងពិភពលោក និងបានសម្លាប់មនុស្សជាង ៦០០នាក់ នៅប្រទេសចិន និងទីក្រុងហុងកុង កាលពីឆ្នាំ ២០០៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ