តើកូរ៉ូណាវីរុសប៉ះពាល់ប៉ុណ្ណា ដល់ទេសចរណ៍អាស៊ី?
ចុះផ្សាយនៅថ្ងៃ៖
ស្តាប់ - ០៦:៣៥
នៅប្រទេសចិន ចំនួនអ្នកស្លាប់ដោយសារកូរ៉ូណាវីរុសបានកើនឡើងដល់១០៦នាក់ ដែលក្នុងនោះមានមួយករណីនៅទីក្រុងប៉េកាំង និងឆ្លងទៅមនុស្ស ៤៥០០នាក់ នៅប្រទេសចិន និងជាង ១០ប្រទេសផ្សេងទៀត ក្នុងពិភពលោក។ ប្រទេសចិនដែលកំពុងសស្រាក់សស្រាំ ប្រយុទ្ធប្រឆាំងនឹងការឆ្លងរីករាលដាល មេរោគរលាកផ្លូវដង្ហើម កូរ៉ូណាវីរុស បានណែនាំប្រជាជនរបស់ខ្លួន នៅថ្ងៃអង្គារនេះ កុំឲ្យធ្វើដំណើរទៅបរទេស ក្នុងគោលបំណងកាត់បន្ថយ ការរីកសាយភាយ របស់មេរោគកូរ៉ូណាវីរុស។ សូមបញ្ជាក់ថា ចាប់តាំងពីថ្ងៃចន្ទម្សិលមិញមក ដំណើរកំសាន្ត ដែលត្រូវរៀបចំ ក្នុងប្រទេសចិន និងទៅបរទេស ត្រូវបានផ្អាកមួយរយៈ ទៅតាមបទបញ្ជារបស់អាជ្ញាធរចិន។
អាជ្ញាធរចិន នៅថ្ងៃអង្គារនេះ បានណែនាំកុំឲ្យប្រជាជនរបស់ខ្លួនធ្វើដំណើរចេញទៅបរទេស នៅក្នុងអំឡុងពេលដែលប្រទេសកំពុងប្រឈមនឹងការីករាលដាលនៃមេរោគកូរ៉ូណាវីរុស។ សេចក្តីអំពាវនាវរបស់ទីក្រុងប៉េកាំង ធ្វើឡើងនៅមួយថ្ងៃ ក្រោយ ដែលក្រុមហ៊ុនទេសចរណ៍ ក្នុងស្រុកចិន ត្រូវបានអាជ្ញាធរហាមឃាត់មិនឲ្យលក់កញ្ចប់ទេសចរណ៍ នៅក្នុងប្រទេស និងទៅក្រៅប្រទេស។
ការសម្រេចចិត្តរបស់ទីក្រុងប៉េកាំង ក្នុងផ្អាក ដំណើរកំសាន្តរបស់ប្រជាជនខ្លួន ទៅបរទេស នឹងប៉ះពាល់ខ្លាំងដល់សេដ្ឋកិច្ចពិភពលោក ជាពិសេស បណ្តាប្រទេសនៅអាស៊ី ដែលពឹងផ្អែកខ្លាំង លើអ្នកទេសចរចិន។ ត្រូវដឹងថា ប្រាក់ចំណាយរបស់អ្នកទេសចរចិន តំណាងឲ្យចំណែកមួយសំខាន់ នៃផលិតផលក្នុងស្រុកសរុបរបស់ប្រទេសមួយចំនួន ដូចជា ជប៉ុន ថៃ កម្ពុជា សិង្ហបុរី ហើយនិងទីក្រុងហុងកុងជាដើម។ នេះបើតាមការវាយតម្លៃរបស់ទីភ្នាក់ងារសេដ្ឋកិច្ច Capital Economics។
ប្រទេសជប៉ុន ដែលធ្លាប់ទទួលអ្នកទេសចរចិន ជាង ៨លាននាក់ កាលពីឆ្នាំ ២០១៨ ចាប់ផ្តើមឃើញ ចំនួនអ្នកទេសចរចិន ចុះស្បើយ ចាប់តាំងពីមានការផ្ទុះមេរោគកូរ៉ូណាវីរុសនៅប្រទេសចិន។
សម្រាប់អ្នកជំនាញសេដ្ឋកិច្ច សេដ្ឋកិច្ច និងទេសចរណ៍របស់ជប៉ុននឹងមិនសូវរងផលប៉ះពាល់ធ្ងន់ធ្ងរ ដោយសារកូរ៉ូណាវីរុស ដូចជាប្រទេសថៃ នោះទេ។ ថៃដែលមានប្រាក់ចំណូលមកពីវិស័យទេសចរណ៍ តំណាងឲ្យ១៨ភាគរយនៃផលិតផលក្នុងស្រុកសរុប។ នៅសប្តាហ៍នេះ រដ្ឋមន្រ្តីទេសចរណ៍ថៃ ធ្លាប់បានព្រមានរួចហើយថា វិបត្តិជម្ងឺកូរ៉ូណាវីរុស ដែលសាហាវដូចជម្ងឺសារ ឆ្នាំ ២០០៣នឹងអាចធ្វើឲ្យថៃ បាត់បង់ប្រាក់ចំណូល ប្រាមណ ១ពាន់ ៦០០លានដុល្លារ។
បន្ទាប់ពីថៃ អូស្ត្រាលី ដែល មានអ្នកទេសចរពីប្រទេសចិនដីគោក ដល់ទៅ ១៥ភាគរយនៃចំនួនអ្នកទេសចរបរទេសសរុប ក៏រងផលប៉ះពាល់បណ្តើរហើយៗ នៅក្រោយ ក្រុមហ៊ុនទេសចរណ៍ចាប់ផ្តើមលុបចោលដំណើរកំសាន្ត ដោយសារ ការឆ្លងរីករាតត្បាតកូរ៉ូណាវីរុស នៅប្រទេសចិន។
អឺរ៉ុបនៅមិនទាន់ប្រឈមខ្លាំងដោយសារការធ្លាក់ចុះនៃចំនួនទេសចរចិននៅឡើយទេ ព្រោះថា អ្នកទេសចរចិន មិនសូវមកទស្សនា ទឹកដីអឺរ៉ុប នៅក្នុងរដូវត្រជាក់។ ប៉ុន្តែ នៅប្រទេសបារាំង ដែលធ្លាប់ទទួលអ្នកទេសចរចិន ជាង ២លាននាក់ កាលពីឆ្នាំ២០១៩ ខាងក្រុមហ៊ុនទេសចរណ៍ សណ្ឋាគារ និងភោជនីយដ្ឋានកំពុងបារម្ភខ្លាចថា វិបត្តិកូរ៉ូណាវីរុសនឹងអាចពន្យារពេលយូរតទៅទៀត ដែលធ្វើឲ្យគេត្រូវប្រឈមខាតបង់ដោយសារតែគ្មានអ្នកទេសចរចិន ដែលត្រូវហាមឃាត់មិនឲ្យចេញពីប្រទែស ដោយសារកូរ៉ូណាវីរុស។
អ្នកជំនាញខាងជម្ងឺរាតត្បាត បានវាយតម្លៃហើយថា ករណីឆ្លងរីករាលដាលមេរោគ រលាកផ្លូវដង្ហើមថ្មី កូរ៉ូណាវីរុស នឹងអាចមានរយៈពេលយូរតទៅទៀត
អ្នកជំនាញខាងសុខភាពបានវាយតម្លៃថា វិបត្តិឆ្លងរីករាលដាលមេរោគ កូរ៉ូណាវីរុស នឹងអាចបន្ត យូរខែតទៅទៀត គឺអាចរហូតដល់រដូវក្តៅខាងមុខ ក្នុងអំឡុងខែកក្កដា ជាដើម។ ពោលគឺវាស្រដៀងគ្នាទៅនឹងវិបត្តិជម្ងឺ សារ ឆ្នាំ ២០០៣ ដែលត្រូវបានអង្គការសុខភាពពិភពលោកប្រកាសបិទបញ្ចប់ការឆ្លងរាលដាល ទាំងស្រុង នៅអំឡុងខែ កក្កដា។
អ្នកជំនាញហ៊ានអះអាងថា ការឆ្លងរីករាលមេរោគអាចយូរតទៅទៀត ដោយសារតែគេពឹងផ្អែកលើទិន្នន័យ ព័ត៌មានទទួលបានពីអាជ្ញាធរចិន។
តាមអ្នកជំនាញ ជាមួយនឹងវិធានការរបស់អាជ្ញាធរចិន ក្នុងការ បិទ ទីក្រុង ក៏ដូចជាវិធានការរឹតបន្តឹងអនាម័យដូចជា ការលាងដៃ ជាប្រចាំ ពាក់ម៉ាស នឹងធ្វើឲ្យករណីមនុស្សឆ្លងកូរ៉ូណាវីរុស ថយចុះចំនួន។ បើករណីឆ្លងថយចុះ ជាង ១នាក់ នោះមេរោគរលាកផ្លូវដង្ហើមថ្មី កូរ៉ូណាវីរុសនឹងអាចត្រូវគេបង្រ្កាបបានទាំងស្រុង។ អ្នកជំនាញបានអំពាវនាវឲ្យគេរង់ចាំមើលការវិវឌ្ឍថ្មី របស់មេរោគ នៅក្នុងរយៈពេល ២សប្តាហ៍ខាងមុខនេះ។
ការវិវឌ្ឍន៍ចុងក្រោយរបស់កូរ៉ូណាវីរុស
នៅ ប្រទេសជប៉ុន និងអាល្លឺម៉ង់ អាជ្ញាធរ បានរកឃើញករណីអ្នកជម្ងឺថ្មី ដែលសុទ្ធតែមិនធ្លាប់បានធ្វើដំណើរទៅប្រទេសចិនសោះ។ នេះជាលើកទី១ ដែលគេរកឃើញករណីឆ្លងមេរោគ កូរ៉ូណាពីមនុស្ស ទៅមនុស្ស នៅក្រៅទឹកដីចិន។
សម្រាប់អង្គការសុខភាពពិភពលោក គេនៅមិនទាន់ច្បាស់ទេ អ្នកឆ្លងមេរោគកូរ៉ូណាវីរុស អាចចម្លងទៅមនុស្សផ្សេងទៀត ទាំងនៅមិនទាន់ចេញរោគសញ្ញា ដូចតាមការលើកឡើងរបស់អាជ្ញាធរចិន នៅសប្តាហ៍នេះ។ តាមអាជ្ញាធរចិន អ្នកដែលមានផ្ទុក កូរ៉ូណាវីរុស អាចចម្លងទៅមនុស្សផ្សេងទៀត ទាំងពួកគេមិនទាន់មានរោគសញ្ញាជម្ងឺ ដូចជា គ្រុនក្តៅ ឬការពិបាកដកដង្ហើមជាដើម។ ការចម្លងមេរោគ ទាំងនៅពេលអ្នកផ្ទុកមេរោគ នៅមិនទាន់ចេញរោគសញ្ញា នឹងអាចធ្វើការឆ្លងមេរោគ លឿន ពិបាក នឹងឲ្យគេទប់ស្កាត់ បានដូចករណីជម្ងឺសារ នៅឆ្នាំ ២០០៣។
ប៉ុន្តែ អង្គការសុខភាពពិភពលោកលើកឡើងថា គេត្រូវធ្វើការស៊ើបអង្កេត បន្ថែមមុននឹងហ៊ានសម្រេចថា មេរោគកូរ៉ូណាវីរុស អាចឆ្លង ទៅមនុស្សផ្សេងទៀត ទាំងនៅមិនទាន់ចេញរោគសញ្ញា។ រហូតមក អង្គការសុខភាពពិភពលោកបានកំណត់ថា គេអាចផ្ទុកមេរោគ កូរ៉ូណាវីរុស ពី រយៈពេល ២ ទៅ១០ថ្ងៃ មុននឹងចេញរោគសញ្ញា ជាជម្ងឺ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ