ការបាញ់រះសម្លាប់មនុស្ស នៅខូរ៉ាត ឆ្លុះបញ្ចាំងពីការប្រើប្រាស់កាំភ្លើង ក្នុងឧក្រិដ្ឋកម្មសម្លាប់មនុស្ស នៅថៃ
ចុះផ្សាយនៅថ្ងៃ៖
ស្តាប់ - ០៦:១៧
ហេតុការណ៍បាញ់រះ សម្លាប់មនុស្ស នៅខេត្តនគររាជសីមា ឬ ខូរ៉ាតរបស់ប្រទេសថៃ បានបិទបញ្ចប់ នៅព្រឹកថ្ងៃអាទិត្យ ទី៩កុម្ភៈ បន្ទាប់ពីកងកម្លាំងប៉ូលិសថៃបានបាញ់សម្លាប់ខ្មាន់កាំភ្លើង ដែលចូលទៅចាប់ជំរិតមនុស្សក្នុងផ្សារទំនើប កណ្តាលក្រុងខូរ៉ាត។ នៅក្នុងសន្និសីទកាសែត នៅថ្ងៃអាទិត្យនេះ លោកនាយករដ្ឋមន្រ្តីថៃ ប្រាយុទ្ធ ចាន់អូចា បានលើកនិយាយពីចំនួនមនុស្សស្លាប់ ២៦នាក់ ដែលក្នុងនោះ ១នាក់ ជាប៉ូលិសថៃ និងអ្នករបួស៥០នាក់ ផ្សេងទៀត។ តាមប្រមុខរដ្ឋាភិបាលថៃ បញ្ហាផ្ទាល់ខ្លួន ទាក់ទងនឹងជម្លោះអចលនទ្រព្យ ជាដើមហេតុធ្វើឲ្យខ្មាន់កាំភ្លើង ដែលមានឋានៈជាពលបាលឯក បើកការបាញ់រះសម្លាប់មនុស្ស នៅបន្ទាយទាហាន មុននឹងរាលដាលទៅដល់ផ្សារទំនិញ នៅកណ្តាលក្រុងខូរ៉ាត។
នៅខេត្តនគរាជសីមារ ឬខូរ៉ាតរបស់ប្រទេសថៃ ហេតុការណ៍បាញ់រះសម្លាប់មនុស្សបានអូសបន្លាយ ពេល អស់ ១៧ម៉ោង និងបានសម្លាប់មនុស្ស សរុប ២៧នាក់ ដែលនៅក្នុងនោះ ម្នាក់ ជាខ្មាន់កាំភ្លើង ដែលទើបត្រូវកងកម្លាំងប៉ូលិសថៃ បាញ់សម្លាប់នៅព្រឹកថ្ងៃអាទិត្យនេះ។ នៅក្នុងសន្និសីទកាសែត នៅមន្ទីរពេទ្យ ជាទីដែលលោកអញ្ជើញទៅសួរសុខទុក្ខជនរងគ្រោះ ដែលរងរបួសដោយសារខ្មាន់កាំភ្លើង លោកនាយករដ្ឋមន្រ្តី ថៃ ប្រាយុទ្ធ ចាន់អូចាបានលើកឡើងពី គំនុំសងសឹកផ្ទាល់ខ្លួន (ជម្លោះទាក់ទងនឹងរឿងលក់ផ្ទះ) ដែលជាដើមហេតុធ្វើឲ្យខ្មាន់កាំភ្លើង បើកការបាញ់សម្លាប់មនុស្ស អស់ ២៦នាក់ និងធ្វើឲ្យរងរបួស មនុស្ស ៥០នាក់។
ដោយពិតទៅ នៅក្នុងសារបង្ហោះផ្សាយលើគណនីហ្វេសប៊ុករបស់ខ្លួន នៅពេលចូលក្នុងផ្សារទំនើប Terminal 21 កណ្តាលក្រុងខូរ៉ាត ខ្មាន់កាំភ្លើង ចក្រាផាន់ ធ័មម៉ា បានសរសេរថាក្លាយខ្លួនជាអ្នកមាន ដោយសារកេងចំណេញពីអ្នកដទៃ តើពួកគេហ្នឹងគិតថា នឹងអាចចាយលុយនៅឋាននរក?
លោកនាយករដ្ឋមន្រ្តីថៃ បានចាត់ទុកហេតុការណ៍បាញ់រះសម្លាប់មនុស្សលើកនេះ ថា ជារឿងដែលមិនធ្លាប់មាននៅប្រទេសថៃ និងចង់ឲ្យហេតុការណ៍លើកនេះ ជារឿងចុងក្រោយដែលថៃ ត្រូវជួបប្រទះ។
ហេតុការណ៍បាញ់រះសម្លាប់មនុស្ស ដ៏ច្រើនបែបនេះ ជារឿងថៃមិនធ្លាប់ជួបប្រទះ ទេពីមុន។ គេធ្លាប់ឃើញរឿងនេះ បែបនេះ ភាគច្រើន កើតឡើងនៅអាមេរិក ហើយចុងក្រោយ បំផុត គឺនៅប្រទេសនូវែលហ្សេឡង់ កាលពីខែមីនាឆ្នាំមុន ដែលខ្មាន់កាំភ្លើងជាតិអូស្ត្រាលីម្នាក់ បានបាញ់រះសម្លាប់មនុស្សជាង ៥០នាក់ នៅវិហារអ៊ីស្លាម នៅទីក្រុងក្រៃឈើច។
នៅក្នុងករណីរបស់ខ្មាន់កាំភ្លើង ដែលជាទាហានថៃ ឈ្មោះ ចក្រាផាន់ ធ័មម៉ា គេបានចូលទៅលួចយកអាវុធ គ្រឿងផ្ទុះពីក្នុងឃ្លាំងអាវុធ របស់បន្ទាយ មុនទៅចេញទៅបាញ់សម្លាប់មនុស្សតាមផ្លូវ និងនៅផ្សារទំនើប កណ្តាលក្រុងខូរ៉ាត។ នៅក្នុងសន្និសីទកាសែត នៅថ្ងៃនេះ លោកនាយករដ្ឋមន្រ្តីថៃ បានអះអាងថា លោកជាអ្នកគ្រប់គ្រងដោយផ្ទាល់សន្តិសុខ ឃ្លាំងអាវុធ នៅ បន្ទាយទាហានក្នុងខេត្តនគររាជសីម៉ា។ តាមលោកប្រាយុទ្ធចាន់អូចា ឃ្លាំងអាវុធ ត្រូវបានគេយាមត្រឹមត្រូវ គ្មានការធ្វេសប្រហែស នោះទេ។ នាយករដ្ឋមន្រ្តីថៃ អះអាងយ៉ាងដូច្នេះ បន្ទាប់ ពីមានការចុះផ្សាយថា ខ្មាន់កាំភ្លើង បានលួចយកគ្រាប់កាំភ្លើង និងកាំភ្លើងស្វ័យប្រវត្តិ ពីឃ្លាំងអាវុធ របស់បន្ទាយដ៏សំខាន់មួយ របស់ថៃ ដើម្បីយកទៅប្រើបាញ់រះសម្លាប់មនុស្សលើកនេះ។
នៅប្រទេសថៃ ហេតុការណ៍បាញ់រះសម្លាប់មនុស្សដ៏ច្រើន បែបនេះ មិនធ្លាប់កើតមានមែន ប៉ុន្តែ ឧក្រិដ្ឋកម្មបាញ់សម្លាប់មនុស្សដោយកាំភ្លើង មិនមែនជារឿងថ្មីទេ នោះទេ។ ប្រទេសថៃ ដែលមានអ្នកប្រើប្រាស់អាវុធជាឯកជនដល់ទៅ ១០លាននាក់ ក្នុងចំណោមប្រជាជនថៃ សរុប ៦៩លាននាក់ បានក្លាយជាប្រទេសធំ ទី២នៅអាស៊ីអាគ្នេយ៍ ដែលឧក្រិដ្ឋកម្ម សម្លាប់មនុស្ស ដោយប្រើកាំភ្លើង មានអត្រាខ្ពស់បំផុត ដោយរាប់បញ្ចូលទាំងអំពើហិង្សា ជម្លោះប្រដាប់ នៅភាគខាងត្បូងប្រទេសថៃ។
ហេតុការណ៍បាញ់សម្លាប់មនុស្សលើកនេះ ធ្វើឲ្យ គេនឹកទៅដល់ករណីប្លន់សម្លាប់មនុស្សនៅហាងមាស នៅខេត្តលុបបូរី កាលពីខែមុន ដែលចោរបានបាញ់សម្លាប់មនុស្ស៣នាក់ ដែលនៅក្នុងនោះម្នាក់ជាកុមារ។ ថៃ ស្ថិតក្នុងចំណោមក្រុមប្រទេស ដែលមានចរាចរណ៍អាវុធ ច្រើនជាងគេក្នុងពិភពលោក។ នៅប្រទេសថៃ គេរាប់ឃើញ មានអ្នកកាន់អាវុធ ប្រមាណ ១០លាននាក់ ប៉ុន្តែ នៅក្នុងនោះ មានតែ ៦លាននាក់ តែប៉ុណ្ណោះ ដែលបានចុះបញ្ជីច្បាប់ត្រឹមត្រូវ។
នៅថៃ ច្បាប់ផ្តល់សិទ្ធិឲ្យគេអាចទិញអាវុធ ការពារខ្លួន ជាលក្ខណៈឯកជន បើសិនគេមានភស្តុតាងបង្ហាញថា គេមានទ្រព្យសម្បត្តិ ត្រូវការពារ ឬកំពុងរស់នៅ ក្នុងតំបន់ដែលប្រឈមអសន្តិសុខខ្លាំង។ តាមអង្គការគ្រប់គ្រងនយោបាយអាវុធ ប្រចាំប្រទេសថៃ នៅពេលមានអាវុធជាច្រើន មិនត្រូវបានចុះបញ្ជី ត្រឹមត្រូវ តាមច្បាប់ ការលក់អាវុធ នៅប្រទេសថៃ មានលក្ខណៈ បើកចំហ ដូចជានៅតាមទីផ្សារ ហើយមួយអាវុធចំនួន ត្រូវបានទិញ លក់ដូរ ដោយឧក្រិដ្ឋជន។
ជាថ្មីម្តងទៀត បណ្តាញហ្វេសប៊ុកបានក្លាយជាមធ្យោបាយផ្សព្វផ្សាយរបស់ខ្មាន់កាំភ្លើង
ហេតុការណ៍បាញ់សម្លាប់មនុស្សនៅប្រទេសថៃ លើកនេះ ទោះបីជារឿងកម្រ មិនធ្លាប់មាននៅប្រទេសថៃ ប៉ុន្តែ វាបានធ្វើឲ្យថៃត្រូវគេចាត់ចូលក្នុងបញ្ជីប្រទេស ដូចជាអាមេរិក និងនូវែលហ្សេឡង់ដែរ ដែលនៅទីនោះ ខ្មាន់កាំភ្លើង បានថតបង្ហោះផ្សាយផ្ទាល់ សកម្មភាព បាញ់រះសម្លាប់ជនស្លូតត្រង់ តាមបណ្តាញសង្គមហេ្វសប៊ុក។
ចំណុចដូចគ្នា រវាងការបាញ់សម្លាប់មនុស្សនៅអាមេរិក នៅនូវែលហ្សេឡង់ ហើយនិងនៅប្រទេសថៃ គឺថា ខ្មាន់កាំភ្លើង មានអាវុធ ពេញដៃ និងចេះប្រើបច្ចេកវិទ្យាអ៊ីនធ័រនែត ដូចជាបណ្តាញសង្គម ហ្វេសប៊ុក ដើម្បី ចែកចាយ បង្ហាញ រូបភាពសម្លាប់មនុស្សដ៏ឃោឃៅរបស់ខ្លួន។ នៅក្នុងករណីដើរបាញ់រះសម្លាប់មនុស្ស របស់ខ្មាន់កាំភ្លើង ចក្រាផាន់ ធ័មម៉ា រូបភាពវីដេអូ និងរូបថតរបស់ជនរងគ្រោះដែលដេកស្លាប់ នៅក្នុងថ្លុកឈាម ដោយសារគ្រាប់កាំភ្លើងរបស់ជនដៃដល់ ត្រូវបានបង្ហោះផ្សាយ ពេញហ្វេសប៊ុក តាំងពីកើតមានហេតុការណ៍ នៅរសៀលថ្ងៃសៅរ៍ម្សិលមិញ។
ក្រុមហ៊ុនហ្វេសប៊ុកបានអះអាងថា គេបានលុបចោល គណនី ហ្វេសប៊ុក និងអាំងស្តាក្រាមរបស់ចក្រកាផាន់ និងលុបចោលរូបភាពដែលខ្មាន់កាំភ្លើងបានបង្ហោះផ្សាយនៅលើបណ្តាញហ្វេសប៊ុក តាំងពីថ្ងៃសៅរ៍ម្ល៉េះ។ នៅក្នុងសេចក្តីថ្លែងការណ៍ថ្ងៃអាទិត្យនេះ ក្រុមហ៊ុនហ្វេសប៊ុកបាននិយាយថា គេកំពុងតាមដានរកមើលរូបភាពហិង្សាផ្សេងទៀត ដែលទាក់ទងនឹងការបាញ់រះ សម្លាប់មនុស្សនៅទីក្រុងខូរ៉ាត។ ជាមួយគ្នានេះ ក្រុមហ៊ុននឹងព្យាយាមផងដែរ មិនឲ្យអ្នកប្រើប្រាស់ផ្សេងទៀត ចុះផ្សាយ រូបភាពហិង្សា ដែលអាចអាទាក់ទងនឹងហេតុការណ៍ បាញ់សម្លាប់មនុស្សរបស់ខ្មាន់កាំភ្លើង ចក្រាផាន់។
ក្រុមហ៊ុនហ្វេសប៊ុក មើលទៅ សកម្មខ្លាំងណាស់ ដើម្បីទប់ស្កាត់កុំឲ្យរូបភាព វីដេអូ របស់ខ្មាន់កាំភ្លើង ត្រុវគេចែកចាយ លើបណ្តាញ ប៉ុន្តែ ដូចលើកមុន គឺដូចករណីបាញ់សម្លាប់មនុស្ស នៅនូវែលហ្សេឡង់ ហ្វេសប៊ុកនៅតែយឺតយ៉ាវ មិនអាចបិទភ្លាមៗ ការបង្ហោះផ្សាយ រូបភាពហិង្សារបស់ខ្មាន់កាំភ្លើង។
នៅនូវែលហ្សេឡង់ រូបភាពវីដេអូ ដែល ខ្មាន់កាំភ្លើងបានថតបង្ហោះផ្សាយផ្ទាល់ពីការបាញ់រះសម្លាប់មនុស្សនៅវិហារអ៊ីស្លាម បានចរាចរ ត្រូវគេចែករំលែក ក្នុង រយៈពេល១ម៉ោង មុននឹងត្រូវហ្វេសប៊ុកសម្រេចបិទ ខ្ទប់។ នៅថៃលើកនេះ ខ្មាន់កាំភ្លើង អាចប្រើបណ្តាញសង្គមបង្ហោះ ផ្សាយសកម្មភាពហិង្សារបស់ខ្លួន បានប៉ុន្មានម៉ោង មុននឹងត្រូវហ្វេសប៊ុកបិទខ្ទប់ទៅវិញ។ ហ្វេសប៊ុក ទោះបីជាប្រើបញ្ញាសិប្បនិម្មិត សម្រាប់តាមចាប់ រូបភាពហិង្សា សមា្លប់មនុស្ស នៅតែមិនអាចបិទខ្ទប់ បានទាំងអស់ទេ ព្រោះថា អ្នកប្រើប្រាស់មានដល់ទៅ ២ពាន់លាននាក់។ ចង់ ឬមិនចង់ បណ្តាញសង្គមហ្វេសប៊ុក ដែលជាមធ្យោបាយ ពេញនិយម និងមានប្រសិទ្ធិភាព កំពុងក្លាយជាកន្លែង ផ្សព្វផ្សាយសំខាន់មួយដែររបស់អ្នកដែលចង់បង្ហាញ មុខមាត់ របស់ខ្លួន ដែលនៅក្នុងនោះមានផងដែរ ខ្មាន់កាំភ្លើងចក្រាផាន់ ធ័មម៉ា
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ