នៅក្រោយការបាញ់រះសម្លាប់មនុស្សនៅខូរ៉ាត ចាប់មានសំណួរពីបុគ្គលិកលក្ខណៈរបស់ខ្មាន់កាំភ្លើង
នៅប្រទេសថៃ នៅថ្ងៃចន្ទនេះ គ្រួសារជនរងគ្រោះកំពុង រង់ចាំទទួលយកសាកសពសាច់ញាតិ របស់ពួកគេ ដែលត្រូវខ្មាន់កាំភ្លើងបាញ់សម្លាប់ កាលពីថ្ងៃអាទិត្យ។ ទន្ទឹមគ្នានេះ មានការចោទសួរផងដែរ ពីអត្តចរិត និងមូលហេតុពិតប្រាកដ ដែលធ្វើឲ្យនាយទាហាន ចក្រាផាន់ ធ័មម៉ា ចូលទៅបាញ់រះសម្លាប់មនុស្ស នៅបន្ទាយទាហាន និង នៅផ្សារទំនើប ក្នុងខេត្តនគររាជសីមា ឬទីក្រុងខូរ៉ាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០២
ខ្មាន់កាំភ្លើង ចក្រាផាន់ ធ័មម៉ា អាយុ ៣២ឆ្នាំ បានបាញ់សម្លាប់មនុស្ស ២៩នាក់ និងធ្វើឲ្យរងរបួស ជាង ៤០ នាក់ នៅព្រឹត្តិការណ៍បាញ់រះសម្លាប់មនុស្ស នៅបន្ទាយទាហាន និងផ្សារទំនើបTerminal 21 ក្នុងទីក្រុងខូរ៉ាត ដែលស្ថិតនៅចម្ងាយ ជាង ២៥០គីឡូម៉ែត្រពីទីក្រុងបាងកក។ បន្ទាប់ពីហេតុការណ៍បាញ់រះសម្លាប់មនុស្ស អូសបន្លាយ ពេល អស់១៧ម៉ោង ខ្មាន់កាំភ្លើង នៅទីបំផុត ត្រូវកងកម្លាំងប៉ូលិសថៃ បាញ់សម្លាប់ នៅព្រឹកថ្ងៃអាទិត្យ។
បន្ទាប់ពីពិធីសូត្រមន្ត របស់ព្រះសង្ឃ នៅមុខផ្សារទំនើប ជាទីដែលខ្មាន់កាំភ្លើង បាញ់សម្លាប់ ដោយមិនរើសមុខ ក្រុមគ្រួសារជនរងគ្រោះ កំពុងតម្រង់ជួរ ចាំទទួលយកសាកសពសាច់ញាតិ របស់ពួកគេ ពី បន្ទប់តម្កល់សព នៅព្រឹកថ្ងៃចន្ទ នៅខេត្តនគររាជសីមា។ គ្រប់គ្នាទួញយំសោក សង្រេង មិននឹកស្មានថា កូនចៅ របស់ខ្លួនធ្លាក់ខ្លួនស្លាប់ក្នុងថ្លុកឈាម ដោយសារសា្នដៃរបស់ខ្មាន់កាំភ្លើង។
កាលពីថ្ងៃអាទិត្យ លោកនាយករដ្ឋមន្រ្តីថៃ បាននិយាយថា គំនុំសងសឹក ដោយសារជម្លោះប្រាក់បំណុល ជាមូលហេតុ ជំរុញ ខ្មាន់កាំភ្លើង បាញ់សម្លាប់មេបញ្ជាការ របស់ខ្លួន និងស្ត្រីចំណាស់ អាយុ ៦៣ឆ្នាំ ម្នាក់ទៀត នៅបន្ទាយទាហាន។ ប៉ុន្តែ គេនៅតែមិនទាន់ពីមូលហេតុពិតប្រាកដ ដែលធ្វើឲ្យខ្មាន់កាំភ្លើង ចក្រាផាន់ លើកដៃ បាញ់រះ សម្លាប់មនុស្សស្លូតត្រង់ នៅតាមផ្លូវ និងនៅផ្សារទំនើប កណ្តាលក្រុងខូរ៉ាត។ គេបានចោទសួរផងដែរ ពីបុគ្គលិកលក្ខណៈ របស់ខ្មាន់កាំភ្លើង ដែលសាក្សីខ្លះអះអាងថា បានបាញ់សម្លាប់មនុសុ្សដោយមិនរើសមុខ ហើយបាញ់ចំៗ តម្រង់ សំដៅតែក្បាលរបស់ជនរងគ្រោះ។
ខ្មាន់កាំភ្លើង ចក្រាផាន់ អាយុ ៣២ឆ្នាំ ជាពលបាលឯក ជំនាញខាងបាញ់កាំភ្លើងចម្ងាយឆ្ងាយ នៅបន្ទាយទាហានដ៏ធំមួយ នៅខេត្តនគររាជសីមា។ អ្នកនាំពាក្យម្នាក់របស់ក្រសួងការពារជាតិថៃ គឺ លោក វីនថៃ សូវ៉ារី បាននិយាយប្រាប់ទីភ្នាក់ងារព័ត៌មានបារាំង AFPថា ចក្រាផាន់ មិនធ្លាប់មានប្រវត្តិអាក្រក់នោះទេ នៅក្នុងឯកសាររបស់ក្រសួង។ ប៉ុន្តែ អ្វីដែលគេបានដឹងច្រើនពីនាយទាហាន ចក្រាផាន់ រហូតមកដល់ពេលនេះ គឺ ចក្រាផាន់ ចូលចិត្ត ប្រើបណ្តាញសង្គម។ ជាក់ស្តែង ខ្មាន់កាំភ្លើងរូបនេះចេះប្រើបណ្តាញសង្គមហ្វេសប៊ុក ដើម្បី បង្ហាញ ពីសកម្មភាពបាញ់សម្លាប់របស់ខ្លួន នៅតាមផ្លូវ រហូតដល់ ផ្សារទំនើប។ សារជាច្រើនរបស់ខ្មាន់កាំភ្លើង ដូចជាថា តើខ្ញុំត្រូវសុំចុះចាញ់ដែរឬទេ ឬថា គ្មានអ្នកណាម្នាក់ ដែលអាចគេចផុតពីសេចក្តីស្លាប់ ត្រូវបានបង្ហោះផ្សាយ មុននឹងត្រូវក្រុមហ៊ុនហ្វេសប៊ុក បិទ លុបចោលទៅវិញ កាលពីថ្ងៃសៅរ៍។
នាយករដ្ឋមន្រ្តីថៃ លោកប្រាយុទ្ធចាន់អូចា បានចាត់ទុក ហេតុការណ៍បាញ់រះ សម្លាប់មនុស្ស កាលពីថ្ងៃអាទិត្យថា ជារឿងដែលមិនធ្លាប់មាន នៅប្រទេសថៃ។ ប៉ុន្តែ ប្រទេសថៃ ត្រូវគេចាត់ទុកជាប្រទេសសំខាន់ មួយ ក្នុងចំណោមក្រុមប្រទេស ដែលមានអាវុធច្រើនជាងគេក្នុងលោក។ គេវាយតម្លៃថា មានអាវុធ ពី ៦ ទៅ ១០លានដើម កំពុងចរាចរក្នុងប្រទេស ចំណែក ឧក្រិដ្ឋកម្មសម្លាប់មនុស្សដោយកាំភ្លើង ក៏ឧស្សាហ៍កើតច្រើនណាស់ដែរនៅប្រទេសថៃ។ យ៉ាងណាក៏ដោយ វាជារឿងកម្រ ដែលទាហានថៃ លើកដៃបាញ់សម្លាប់ប្រជាជនស៊ីវិល ប្រជាជនស្លូតត្រង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ