កូរ៉េខាងជើងបាញ់មីស៊ីលសំដៅសមុទ្រជប៉ុន
កូរ៉េខាងជើងបានបាញ់មីស៊ីល២ដើមទៅក្នុងសមុទ្រជប៉ុន នៅព្រឹកថ្ងៃសៅរ៍នេះ។ តាមក្រសួងការពារជាតិកូរ៉េខាងត្បូង មីស៊ីល ទាំង២ដើម ដែលកូរ៉េខាងជើងបាញ់ចេញនៅថ្ងៃនេះ ទំនងជាមីស៊ីលបាលីស្ទិក ចម្ងាយមធ្យម។ កងទ័ពកូរ៉េខាងត្បូងបានថ្កោលទោស សកម្មភាពបាញ់មីស៊ីលរបស់កូរ៉េខាងជើង ថា ធ្វើឡើងដោយមិនសមស្របនឹងកាលៈទេសៈដែលពិភពលោកកំពុងជួបវិបត្តិជំងឺរាតត្បាតកូវីដ ១៩ បង្កឡើងដោយមេរោគកូរ៉ូណាថ្មី។
ចុះផ្សាយនៅថ្ងៃ៖
ស្តាប់ - ០២:៤៣
ក្រសួងការពារជាតិកូរ៉េខាងត្បូង នៅថ្ងៃសៅរ៍នេះ បានអះអាងថា មីស៊ីលទាំង២ ដើម ដែលត្រូវបានបាញ់ចេញពីភាគខាងលិចកូរ៉េខាងជើងបានហោះកាត់ទឹកដីកូរ៉េខាងជើង ពីលិច ទៅកើត មុននឹងទៅធ្លាក់ក្នុងសមុទ្រជប៉ុន។ តាមទីភ្នាក់ងារព័ត៌មានបារាំង AFP ក្រសួងការពារជាតិជប៉ុនបានបញ្ជាក់ដែរថា គេចាប់បានសញ្ញា ដែលអាចជាប្រភេទមីស៊ីលបាលីស្ទិក។
ចាប់តាំងពីដើមខែមីនា នេះជាលើកទី៣ ដែលកូរ៉េខាងជើងបាញ់សាកល្បងគ្រាប់មីស៊ីលប្រភេទនេះ នៅក្នុងបរិបទដែលការចរចាជាមួយអាមេរិក ស្តីពីកម្មវិធីនុយក្លេអ៊ែរ និងមីស៊ីលបាលីស្ទិក របស់កូរ៉េខាងជើង កំពុងជាប់គាំង គ្មានច្រកចេញ។ សម្រាប់អ្នកវិភាគ តាមរយៈការបាញ់សាកល្បង ជាបន្តបន្ទាប់ កូរ៉េខាងជើងកំពុងសម្រិតសម្រាំងសមត្ថភាពមីស៊ីល និងអាវុធនុយក្លេអ៊ែររបស់ខ្លួន នោះបើទោះបីជាកំពុងរងការដាក់ទណ្ឌកម្ម សេដ្ឋកិច្ច និងការថ្កោលទោសពីសហគមន៍អន្តរជាតិក្តី។ មួយវិញទៀត កូរ៉េខាងជើង អាចចង់បង្ហាញថា ការបាញ់សាកល្បងមីស៊ីលគឺជារឿងសាមញ្ញ និងធម្មតា គ្មានគ្រោះថ្នាក់នោះទេ។
នៅប៉ុន្មានទសវត្សរ៍ចុងក្រោយនេះ កូរ៉េខាងជើងបានរងការរិះគន់ពីសហគមន៍អន្តរជាតិ ថា ផ្តោតអាទិភាព ការចំណាយថវិកាច្រើនទៅលើវិស័យកងទ័ព និងកម្មវិធីផលិតអាវុធនុយក្លេអ៊ែរ ទោះបីជា ក្នុងកាលៈទេសៈ ដែលប្រជាជនកំពុង ជួបគ្រោះអត់ឃ្លាន និងបញ្ហាសុខាភិបាលក្តី។
មួយវិញទៀត ដំណឹងបាញ់មីស៊ីលរបស់កូរ៉េខាងជើង កើតឡើង នៅប៉ុន្មានម៉ោងក្រោយ ដែលទីភ្នាក់ងារព័ត៌មានរដ្ឋកូរ៉េខាងជើង KCNA បានប្រកាសពីការកោះប្រជុំសភាជាន់ខ្ពស់កូរ៉េខាងជើង នៅថ្ងៃទី១០មេសាខាងមុខ។ តាមអ្នកជំនាញកូរ៉េខាងត្បូង ប្រចាំវិបសៃតិ៍ជំនាញបញ្ហាកូរ៉េខាងជើង លោក Rachel Minyoung Lee កូរ៉េខាងជើងមិនប្រថុយ រៀបចំកិច្ចប្រជុំសភា ដែលមានមនុស្សចូលរួម ដល់ទៅ ជាង ៧០០នាក់ទេ បើសិន កូរ៉េខាងជើងមិនជឿជាក់ច្បាស់ខ្លួនអាចចាត់វិធានការទប់ស្កាត់ការឆ្លងមេរោគកូរ៉ូណាថ្មីនោះ។
រហូតមកដល់ពេលនេះ ប្រទេសកុម្មុយនិស្តកូរ៉េខាងជើង មិនបានរាយការណ៍ពីករណីឆ្លងណាមួយ ក្នុងទឹកដីរបស់ខ្លួននោះទេ។ ប៉ុន្តែ វិធានការរឹតបន្តឹង ក្នុងការធ្វើដំណើរ យុទ្ធនាការបំផុសបំផុលឲ្យមនុស្សពាក់ម៉ាស ការដាក់ពិន័យជាសាធារណៈ មន្រ្តី ដែលល្មើសនឹងវិធានការ ដាក់ឲ្យនៅដាច់ដោយឡែក ហើយនិង ការបង្កើតមណ្ឌលត្រួតពិនិត្យសុខភាព ធ្វើឲ្យគេជឿថា ជំងឺកូវីដ ១៩កំពុងមានវត្តមានក្នុងទឹកដីកូរ៉េខាងជើង។ រងទណ្ឌកម្មសេដ្ឋកិច្ចអន្តរជាតិ ដោយសារតែកម្មវិធីផលិតអាវុធនុយក្លេអ៊ែរ កូរ៉េខាងជើងដែល មានវិស័យសុខាភិបាលទន់ខ្សោយ បានចាត់វិធានការបង្ការ ទប់ស្កាត់កុំឲ្យមេរោគកូរ៉ូណាអាចរីករាលដាលខ្លាំង នៅទឹកដីរបស់ខ្លួន។
នៅដើមខែមីនានេះ អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុករឿងកូរ៉េខាងជើង បានអំពាវនាវឲ្យទីក្រុងព្យុងយ៉ាងបើកព្រំដែនអនុញ្ញាតឲ្យអ្នកជំនាញសុខភាព និងជំនួយមនុស្សធម៌របស់អង្គការសហប្រជាជាតិ។ ក្រុមប្រឹក្សាសន្តិសុខរបស់អង្គការសហប្រជាជាតិធ្លាប់បាននិយាយហើយថា នឹងអាចធ្វើការលើកលែង ផ្អាកទណ្ឌកម្មសេដ្ឋកិច្ច មួយរយៈ ដើម្បី ជួយកូរ៉េខាងជើងប្រយុទ្ធប្រឆាំងនឹងមេរោគកូវីដ ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ