កូរ៉េខាងជើងគំរាមពីការផ្ទុះសង្រ្គាមនុយក្លេអ៊ែរ
កូរ៉េខាងជើង នៅថ្ងៃអាទិត្យនេះ បានផ្ទុះកំហឹង ដាក់អាមេរិក និងកូរ៉េខាងត្បូង ដែលក្រុងព្យុងយ៉ាងបានចោទប្រកាន់ថា ជាប្រទេសចង់ធ្វើសង្រ្គាម។ កូរ៉េខាងជើងនៅ បានគំរាមពីការផ្ទុះសង្រ្គាមនុយក្លេអ៊ែរ នៅមួយថ្ងៃមុនសមយុទ្ធផ្លូវអាកាសដ៏សំខាន់ របស់អាមេរិក និងកូរ៉េខាងត្បូង ដែលត្រូវប្រពឹ្រត្តទៅ ពីថ្ងៃចន្ទ រហូតដល់ថ្ងៃសុក្រ សប្តាហ៍ក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ក្នុងរយៈពេល ៥ថ្ងៃ ចាប់ពីថ្ងៃចន្ទ ស្អែក សមយុទ្ធផ្លូវអាកាសរបស់អាមេរិក និងកូរ៉េខាងត្បូង នឹងប្រើប្រាស់យន្តហោះសរុប ២៣០គ្រឿង ដែលនៅក្នុងនោះមានផងដែរ យន្តហោះចម្បាំង ប្រភេទ F 22 Raptor ដែលពូកែលាក់ខ្លួន របស់អាមេរិក។ សមយុទ្ធផ្លូវអាកាសរបស់អាមេរិក និងកូរ៉េខាងត្បូង ធ្វើឡើងនៅតែ៥ថ្ងៃក្រោយដែលកូរ៉េខាងជើងបានបាញ់សាកល្បង ដោយជោគជ័យ មីស៊ីល បាលីស្ទីក អន្តរទ្វីប។
នៅក្នុងវិចារណកថា របស់កាសែតផ្លូវការរបស់បក្សកុម្មុយនិស្ត ចុះផ្សាយនៅថ្ងៃអាទិត្យនេះ កូរ៉េខាងជើងបានបរិហារ ចាត់ទុកសមយុទ្ធផ្លូវអាកាសរបស់អាមេរិក និងកូរ៉េខាងត្បូង ថា ជាការញុះញង់ ប្រឆាំងនឹងកូរ៉េខាងជើង ដែលនឹងអាចឆ្លើយតបវិញ ដោយសង្រ្គាមនុយក្លេអ៊ែរ នៅគ្រប់ពេលវេលា។ កាសែតRondong របស់កូរ៉េខាងជើងនៅព្រមានបន្ថែមថា សមយុទ្ធផ្លូវអាកាសរបស់អាមេរិក និងកូរ៉េខាងត្បូង សំដៅប្រឆាំងកូរ៉េខាងជើង គឺ ប្រៀបបាននឹងភាពឆោតល្ងង់ ដែលនាំទៅដល់ការបំផ្លាញខ្លួនឯង របស់អាមេរិក និងកូរ៉េខាងត្បូង។
វិចារណកថា ឆេះដុំរបស់កូរ៉េខាងជើង ធ្វើឡើង ផងដែរ នៅមួយថ្ងៃក្រោយ ដែលទីប្រឹក្សាផ្នែកសន្តិសុខជាតិរបស់សេតវិមាន គឺ លោកHR McMasterបានលើកឡើងពីការកើនឡើង ពីមួយថ្ងៃ ទៅមួយថ្ងៃ នៃលទ្ធភាពផ្ទុះសង្រ្គាមជាមួយកូរ៉េខាងជើង។ នៅថ្ងៃបាញ់បង្ហោះ មីស៊ីល នៅថ្ងៃពុធ កន្លងទៅ កូរ៉េខាងជើងបានបញ្ជាក់ថា មីស៊ីលបាលីស្ទីក Hwasong 15 អាចពាំនាំគ្រាប់បែក ទៅវាយប្រហារទឹកដីគ្រប់កន្លែងរបស់អាមេរិក។ ប៉ុន្តែ អ្នកជំនាញ នៅតែមិនទាន់ជំនឿទុកចិត្តថា កូរ៉េខាងជើងមានសមត្ថភាព មានបច្ចេកវិទ្យា ដើម្បីអាចបំពាក់ក្បាលគ្រាប់នុយក្លេអ៊ែរ នៅលើមីស៊ីលបាលីស្ទីករបស់ខ្លួន។
យ៉ាងណាក៏ដោយ សង្រ្គាមពាក្យសំដី និងការបាញ់សាកល្បងគ្រាប់បែកនុយក្លេអ៊ែរ និងមីស៊ីលបាលីស្ទីកជាបន្តបន្ទាប់របស់កូរ៉េខាងជើង កំពុងធ្វើឲ្យមានការព្រួយបារម្ភកាន់តែខ្លាំងពីការផ្ទុះសង្រ្គាម នៅឧបទ្វីបកូរ៉េ ដែលធ្លាប់រងការបំផ្លាញដ៏ធ្ងន់ធ្ងរ ម្តងហើយ នៅឆ្នាំ ១៩៥០ និង១៩៥៣។ លើកនេះ នៅពេលដែលអាមេរិក លើកឡើងកាន់តែញយដង ពីជម្រើសយោធា ទៅលើកូរ៉េខាងជើង គឺក្រុងសេអ៊ូល ក្រុងពាណិជ្ជកម្មដ៏សំខាន់ ដែលមានមនុស្សរស់នៅ១០លាននាក់ ដែលប្រឈមខ្លាំងជាងគេនឹងការវាយប្រហាររបស់កូរ៉េខាងជើង ព្រោះក្រុងសេអ៊ូល ស្ថិតនៅប្រមាណតែ ៥០គីឡូម៉ែត្រប៉ុណ្ណោះ ពីចុងកាណុងរបស់ក្រុងព្យុងយ៉ាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ