ធនាគារពិភពលោក ថា អត្រាកំណើនសេដ្ឋកិច្ចចិន អាចនឹងត្រូវធ្លាក់ចុះ ជិតដល់សូន្យ
ចុះផ្សាយនៅថ្ងៃ៖
ស្តាប់ - ០៧:២៧
វិស័យឧស្សាហកម្មចិននៅខែមីនា កើនឡើងហួសពីការរំពឹងទុក ក៏ប៉ុន្តែ ធនាគារពិភពលោកថា សេដ្ឋកិច្ចចិននឹងរងផលប៉ះពាល់ធ្ងន់ធ្ងរដោយកូវីដ១៩ ហើយអត្រាកំណើនសេដ្ឋកិច្ចរបស់ចិនអាចនឹងត្រូវធ្លាក់ចុះជិតដល់សូន្យ (០,១%)។ ក្នុងពេលជាមួយគ្នា សេដ្ឋកិច្ចក្នុងតំបន់អាស៊ីទាំងមូល ក៏នឹងត្រូវរងផលប៉ះពាល់ធ្ងន់ធ្ងរផងដែរ ហើយវានឹងបង្កនូវផលវិបាកខ្លាំងដល់កិច្ចខិតខំប្រឹងប្រែង ក្នុងការលុបបំបាត់ភាពក្រីក្រ។
ខែមីនានេះ វិស័យឧស្សាហកម្ម ចិនបានវារងើបក្បាលឡើងបន្តិចវិញ ហើយក៏ស្រាប់តែស្ទុះឡើងខ្លាំងតែម្តង ស្ទើរហួសពីការរំពឹងទុករបស់អ្នកជំនាញសេដ្ឋកិច្ច។ តើមកពីហេតុអ្វី?
សេដ្ឋកិច្ចចិនប៉ះពាល់ខ្លាំង នៅខែកុម្ភៈដោយសារតែប្រទេសទាំងមូលត្រូវបិទខ្ទប់ ព្រោះតែមេរោគកូវីដ១៩។ ក្នុងខែមីនានេះ ពិសេសនៅពេលជិតចុងខែតែម្តង វិស័យឧស្សាហកម្មនិងសិប្បកម្មចិន មានកំណើនឡើងមកវិញ ក៏ព្រោះថា រដ្ឋអំណាចបានចាប់ផ្តើមបន្ធូរបន្ថយការរឹតត្បិតក្នុងការធ្វើដំណើរ ដកបម្រាមហាមឃាត់ពលរដ្ឋឱ្យនៅតែក្នុងផ្ទះ បានដកចេញវិញជាបណ្តើរៗ ហើយអ្នកដែលអាចត្រូវធ្វើការបាន ក៏បានចាប់ផ្តើមការងារមួយចំនួនឡើងវិញ ដូច្នេះហើយ គឺបានធ្វើឱ្យសកម្មភាពសេដ្ឋកិច្ចកម្រើករលាស់ខ្លួន នៅខែមីនានេះ ខុសពីខែកុម្ភៈ ដែលស្ទើរតែគ្រប់ផ្នែកត្រូវបិទខ្ទប់ទាំងអស់។
តាំងពីអំលុងពេលពាក់កណ្តាលខែមីនាមកម្ល៉េះ ដែលចិនបានចាប់ផ្តើមជឿជាក់លើខ្លួនឯង ថាអាចទប់ទល់ស្ថានការណ៍មេរោគកូវីដ១៩បាន ហើយក៏ផ្តើមកំណត់កម្មវត្ថុកែប្រែស្ថានភាពអាក្រក់ និងកាត់បន្ថយផលវិបាកនៃការឆ្លងវីរុសនេះ។ រដ្ឋបាលទីក្រុងប៉េកាំង បានប្រកាសយុទ្ធសាស្ត្រស្តារស្រោចស្រង់សេដ្ឋកិច្ចជាតិឡើងវិញ ដូចជាដាក់ចេញវិធានការកាត់បន្ថយពន្ធ ដើម្បីជំរុញការវិនិយោគ ព្រមទាំងបានលើកទឹកចិត្តចំពោះគម្រោងសាងសង់នានា ដើម្បីស្តារស្ថានភាពខូចខាត ដែលប៉ះពាល់ដោយមេរោគកូរ៉ូណាថ្មី។ ម៉ាស៊ីនរោគចក្រឧស្សាហកម្មធំៗរបស់ចិន នៅទូទាំងប្រទេស បានផ្តើមសកម្មភាពឡើងវិញដែរ ។
ការព្យាកររបស់ធនាគារពិភពលោក អះអាងថា សេដ្ឋកិច្ចចិនអាចនឹងគ្មានកំណើននោះទេ។ ព្រោះហេតុអ្វី?
តាមការបញ្ជាក់ផ្លូវការ រោងចក្រឧស្សាហកម្មធំៗរបស់ចិន ផ្តើមសកម្មភាពឡើងវិញ។ ទោះយ៉ាងនេះក្តី នៅថ្ងៃចន្ទទី៣០មីនា ប្រធានក្រុមអ្នកជំនាញសេដ្ឋកិច្ចរបស់ធនាគារពិភព លោក Aaditya Mattoo យល់ថា «ការកើនឡើងសកម្មភាពផលិតកម្មបន្តិចមកវិញនេះ គឺមិនមែនមានន័យថាជាវិលត្រឡប់ទៅរកស្ថានភាពសេដ្ឋកិច្ចធម្មតាវិញនោះទេ»។ មួយវិញទៀត «ស្ថានភាពមេរោគកូរ៉ូណាថ្មីនេះ អស្ថិរភាពនៅឡើយ គឺនៅមិនទាន់ស្ងប់ស្ងាត់ទាំងស្រុងដែរ នៅស្រុកចិននោះ»។ មិនតែប៉ុណ្ណោះ បើទោះបីរោគចក្រធំៗរបស់ចិនផ្តើមដំណើរការមែន ក៏ប៉ុន្តែ ផ្នែករោងចក្រតូចៗ ក្រុមហ៊ុនសហគ្រាសធុនតូចនិងមធ្យម គឺកំពុងស្ថិតនៅក្នុងស្ថានភាពលំបាក រើខ្លួនមិនទាន់រួចនៅឡើយទេ។
កំណើនសេដ្ឋកិច្ចចិន វាមិនអាស្រ័យតែម្យ៉ាងក្នុងការចាប់ផ្តើមសកម្មភាពផលិតកម្មនៅស្រុកចិននោះទេ តែវាក៏អាស្រ័យខ្លាំងណាស់ដែរ ទៅលើស្ថានភាពសេដ្ឋកិច្ចពិភពលោក ពិសេសនៅសហរដ្ឋអាមរិកនិងនៅអឺរ៉ុប ដែលជាដៃគូពាណិជ្ជកម្មដ៏សំខាន់របស់ចិន ហើយកំណើតវិស័យឧស្សាហកម្មចិនក៏អាស្រ័យលើការរីករាលដាលនៃវិបត្តិមេរោគកូវីដ១៩ នៅបស្ចិមលោកនេះ ដែរ។
សម្រាប់ឆ្នាំ២០២០នេះ ចិនរំពឹងថាមានកំណើនសេដ្ឋកិច្ច ប្រមាណ៦ភាគរយ តែចិន មិនទាន់កំណត់ការព្យាករថ្មីទេ។ ជាធម្មតានិងតាមទម្លាប់ អាជ្ញាធរទទួលខុសត្រូវខាងសេដ្ឋកិច្ចចិន តែងតែប្រកាសកំណត់ការព្យាករពីកំណើនសេដ្ឋកិច្ចប្រចាំឆ្នាំរបស់ខ្លួន នៅរៀងរាល់ខែមីនា។ ខែមីនាឆ្នាំនេះ ថ្ងៃទី៣១មីនា ចិននៅមិនទាន់ចេញមុខ ប្រកាសផ្តល់ទិន្នន័យស្តីពីកំណើតសេដ្ឋកិច្ចអ្វីនៅឡើយទេ។ បើតាមអ្នកជំនាញនៅធនាគារពិភពលោក, ចិនអាចទំនងជាមិនព្យាករអ្វីច្រើនទេ ឬក៏ស្ងាត់ៗ ធ្វើមិនដឹងមិនឮតែម្តង ។ ចំពោះធនាគារពិភពលោក គឺបានព្យាករថា កំណើនសេដ្ឋកិច្ចចិនស្ទើរតែគ្មាន ឬប៊ិះសូន្យ ពោលគឺអាចទំនងមានតែ០,១ភាគរយតែប៉ុណ្ណោះ។
ចិនជួបបញ្ហាកំណើនសេដ្ឋកិច្ច នោះការប៉ះពាល់ដល់សេដ្ឋកិច្ចនិងខូចខាតដល់ទីផ្សារពាណិជ្ជកម្មក្នុងតំបន់ «ជារឿងដែលជៀសមិនផុត»។ ចំពោះធនាគារពិភពលោក ការធ្លាក់ចុះកំណើនសេដ្ឋកិច្ចមិនមែនតែនៅស្រុកចិនទេ គឺនៅតំបន់អាស៊ីខាងកើតនិងប៉ាស៊ីហ្វិកទាំងមូលផង។ តាមស្ថាប័នជំនាញដដែល ឆ្នាំ២០១៩ កំណើនសេដ្ឋកិច្ចក្នុងតំបន់ មានជាង៥,៨ភាគរយឯណោះ ផ្ទុយទៅវិញ នៅឆ្នាំ២០២០នេះ សេដ្ឋកិច្ចក្នុងតំបន់អាស៊ីទាំងមូល ទំនងអាចនឹងឡើងត្រឹមតែ២,១ភាគរយប៉ុណ្ណោះ ហើយផ្ទុយមកវិញ បើមានសេណារីយ៉ូអាក្រក់ថែមទៀត គឺអាចថយចុះ «០,៥%»។ មានន័យថា ផលិតផលក្នុងស្រុក នៅក្នុងតំបន់អាស៊ីទាំងមូល មិនមែនត្រឹមតែមិនកើនទេ តែវាថែមទាំងថយចុះ «០,៥%» ។
វិបត្តិកូរ៉ូណាថ្មី ប៉ះពាល់ដល់ការខំប្រឹងប្រែងទប់ស្កាត់ភាពក្រីក្រ។ មនុស្សច្រើនជាង២០លាននាក់ នៅតំបន់អាស៊ី ទំនងជាលំបាកងើបមុខចេញពីភាពក្រីក្រ។
កាលពីដំបូងដៃឡើយ ពោលគឺកាលពីមុនពេលផ្ទុះមេរោគកូរ៉ូណាថ្មីនេះ ធនាគារពិភពលោកបានរំពឹងថា គេអាចនឹងអាចកាត់បន្ថយអត្រាភាពក្រីក្រ ទៅលើមនុស្ស ចំនួន៣៥លាននាក់ នៅតំបន់អាស៊ីខាងកើតនិងប៉ាស៊ីហ្វិក ក្នុងនោះ២៥លាននាក់ នៅស្រុកចិន។ ក៏ប៉ុន្តែនៅពេលនេះ សេណារីយ៉ូទំនងជាត្រូវក្រឡាប់ចាក់ទៅវិញ គឺអត្រាភាពក្រីក្រ អាចទំនងជាត្រូវកើនឡើងវិញ។ បានសេចក្តីថា នៅតំបន់អាស៊ីខាងកើតនិងប៉ាស៊ីហ្វិក អាចនឹងមានមនុស្សប្រមាណជា២៤លាននាក់ លំបាកនឹងចាកចេញពីភាពក្រីក្រ ហើយអាចនឹងត្រដររស់នៅជាមួយប្រាក់ចំណូល ៥ដុល្លារកន្លះ ក្នុងមួយថ្ងៃតែប៉ុណ្ណោះ។
នៅតំបន់អាស៊ី ការងារផ្នែកសេវាកម្ម គឺជាប្រភពចំណូលសំខាន់សម្រាប់សេដ្ឋកិច្ច, សេវាកម្មបម្រើតាមផ្ទះ ជាផ្នែកកាត់បន្ថយភាពក្រីក្រសំខាន់ខ្លាំង ត្រូវបានប៉ះទង្គិចយ៉ាងពេញទំហឹងនិងដោយផ្ទាល់ ព្រោះតែវិបត្តិកូវីដ១៩។ វិស័យទេសចរណ៍ និងការលក់រាយ នៅប្រទេសថៃ ប្រឈមមុខលំបាកខ្លាំង ហើយផ្នែកសិល្បកម្មនិងវាយនភណ្ឌកាត់ដេរ នៅវៀតណាម ក៏រងគ្រោះសម្បើមណាស់ដែរ។
ដើម្បីជួយបន្ធូរបន្ថយការប៉ះពាល់រឹតតែខ្លាំងនោះ ធនាគារពិភពលោក បានជូនអនុសាសន៍មួយចំនួនដល់រដ្ឋាភិបាលនៅក្នុងតំបន់អាស៊ី ថាត្រូវតែប្រឹងប្រែងវិនិយោគឱ្យអស់ពីសមត្ថភាព ក្នុងការថែទាំសុខភាពប្រជាជន និងព្យាបាលអ្នកជំងឺឱ្យបានគត់មត់បំផុត ហើយយកចិត្តទុកដោះស្រាយបញ្ហាដែលកើតឡើងនិងប៉ះពាល់ភ្លាមៗ។ អាជ្ញាធរក៏គួរជួយសម្រួលផ្នែកសេវាសង្គមកិច្ច ដូចជា ករណីឈប់សម្រាកពីការងារដោយនៅតែទទួលបានប្រាក់កម្រៃដដែល។ មិនតែប៉ុណ្ណោះ រដ្ឋត្រូវជួយសម្របសម្រួលដល់វិធានការពន្ធដារ និងពន្ធគយ ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ