កូវីដ១៩៖ ជនជាតិអាហ្រ្វិកស្បែកខ្មៅ រងការរើសអើងនៅក្នុងប្រទេសចិន?
ចុះផ្សាយនៅថ្ងៃ៖
ស្តាប់ - ០៧:១៥
ជនជាតិអាហ្វ្រិក ដែលកំពុងរស់នៅក្នុងខេត្តក្វាងចូវ ភាគខាងត្បូងប្រទេសចិនបានក្លាយជាមុខសញ្ញាសង្ស័យនាំជំងឺកូវីដ១៩ ចូលក្នុងប្រទេសចិន។ ជនជាតិអាហ្វ្រិកស្បែកខ្មៅចំនួនរាប់រយនាក់ ត្រូវរដ្ឋអំណាចចិនបង្ខំឲ្យចាកចេញពីផ្ទះ ឬក៏អគារស្នាក់នៅរបស់ពួកគេ ខណៈពេលដែលមន្ត្រីសុខាភិបាលចិនក្នុងខេត្តក្វាងចូវបានចាប់ផ្តើមធ្វើតេស្តទ្រង់ទ្រាយធំក្រោមយុទ្ធនាការប្រយុទ្ធប្រឆាំងនឹងករណីឆ្លងថ្មីនៃវីរុសកូវីដ១៩ ដែលនាំចូលមកពីខាងក្រៅ។ ចំណាត់ការរបស់អាជ្ញាធរចិន ទៅលើសហគមន៍អាហ្វ្រិកបែបនេះ បង្កឲ្យមានការរិះគន់ថា ចិន មានការរើសអើងលើជនជាតិអាហ្វ្រិកស្បែកខ្មៅ។
ដើមចមដែលបណ្តាលឲ្យមានការរើសអើងជនជាតិអាហ្វ្រិកស្បែកខ្មៅនៅចិន
ក្រុមជនជាតិស្បែកខ្មៅដែលរងការរើសអើង គឺជាសហគមន៍អាហ្វ្រិកដែលរស់នៅក្នុងខេត្តក្វាងចូវ ភាគខាងត្បូងប្រទេសចិន។ ខេត្តក្វាងចូវ គឺជាមជ្ឈមណ្ឌលឧស្សាហកម្មដ៏ធំមួយ និងមានប្រជាជនចំនួនប្រមាណ ១៥ លាននាក់ និងក៏ជាទីដែលមានជនជាតិអាហ្វ្រិកស្បែកខ្មៅរស់នៅច្រើនជាងគេបំផុតមួយនៅក្នុងប្រទេសចិន។
ជនជាតិអាហ្វ្រិកភាគច្រើននៅក្វាងចូវ មានទិដ្ឋាការអាជីវកម្មរយៈពេលខ្លី ដូច្នោះហើយ ពួកគេធ្វើដំណើរទៅប្រទេសចិនជាច្រើនដង ក្នុងរយៈពេលមួយឆ្នាំ ដែលជាហេតុធ្វើឱ្យមានការលំបាកក្នុងការគណនាពីទំហំប្រជាជនអាហ្វ្រិកនៅទីនោះ។
បើយោងតាមទីភ្នាក់ងារសារព័ត៌មានចិនស៊ីនហួ នៅឆ្នាំ ២០១៧ មានជនជាតិអាហ្វ្រិកស្បែកខ្មៅប្រមាណ ៣២ ម៉ឺននាក់ បានធ្វើដំណើរចូល ឬក៏ចាកចេញពីប្រទេសចិន ដោយឆ្លងកាត់តាមខេត្តក្វាងចូវនេះ។
តាមពិតទៅពីដើមឡើយ រឿងរ៉ាវរើសអើងលើជនជាតិស្បែកខ្មៅនៅចិន ជាពិសេសនៅខេត្តក្វាងចូវមិនដែលកើតមាននោះទេ។ ក៏ប៉ុន្តែ នៅពេលដែលមានផ្ទុះករណីឆ្លងជំងឺកូវីដ១៩ ក្នុងសហគមន៍អាហ្វ្រិកនៅទីនោះក្នុងខែមេសានេះ ភាពតានតឹងក៏បានផ្តើមមានតែម្តង។
គិតត្រឹមថ្ងៃព្រហស្បតិ៍ ទី៩ មេសា ករណីឆ្លងថ្មីនៃជំងឺកូវីដ១៩ នៅក្នុងខេត្តក្វាងចូវរបស់ចិន មាន ១១៤ ករណី ដែលក្នុងនោះមាន ១៦ ករណីកើតលើជនជាតិអាហ្វ្រិក។ ចំណែកករណីថ្មីផ្សេងទៀត គឺកើតលើជនជាតិចិនដែលទើបត្រលប់មកពីបរទេស។
ដំណឹងនេះ បាននាំឱ្យជនជាតិអាហ្វ្រិកក្លាយជាគោលដៅនៃការសង្ស័យនាំចូលករណីឆ្លងថ្មីនៃកូវីដ១៩ ក្នុងប្រទេសចិន។ បន្ទាប់មក មានព័ត៌មានស្តីអំពីការរើសអើងជាតិសាសន៍អាហ្វ្រិក ក៏ចាប់ផ្ទុះឡើងនៅចិនតែម្តង។
ការរើសអើងរបស់ចិនលើជនជាតិអាហ្វ្រិកស្បែកខ្មៅមានលក្ខណៈយ៉ាងម៉េចខ្លះ?
គេដឹងថា រដ្ឋាភិបាលក្រុងប៉េកាំង អាចទប់ស្កាត់ការឆ្លងរាលដាលនៃវីរុសកូវីដ១៩ ប្រកបដោយប្រសិទ្ធភាព តាមរយៈវិធានការបិទខ្ទប់ទីក្រុង និងបង្ខាំងឲ្យប្រជាជននៅតែក្នុងផ្ទះ។
ករណីឆ្លងថ្មីក្នុងស្រុក ត្រូវបានអាជ្ញាធរសុខាភិបាលចិន រាយការណ៍ជាញឹកញយថា គ្មានកើតឡើងនៅក្នុងប្រទេសទៀតនោះទេ។ ក៏ប៉ុន្តែ ករណីឆ្លងថ្មីនៃកូវីដ១៩ ដែលជាករណីនាំចូលមកពីក្រៅ នៅតែមានដដែល។ អាជ្ញាធរចិន បារម្ភខ្លាចថា ករណីឆ្លងនាំចូលមកពីខាងក្រៅ អាចបង្កជាហានិភ័យ និងអាចបណ្តាលឲ្យផ្ទុះការឆ្លងរាលដាលខ្លាំងជាលើកទី២ ម្តងទៀត។
កាលពីដើមសប្តាហ៍នេះ គេឃើញ លោកប្រធានាធិបតីចិនស៊ី ជីនពីង ចេញមុខជំរុញឱ្យអាជ្ញាធរចិន ឃ្លាំមើលដោយប្រុងប្រយ័ត្ននូវករណីឆ្លងដែលនាំចូលពីប្រទេសផ្សេងៗ។ ហេតុដូចនេះហើយ ទើបអាជ្ញាធរមូលដ្ឋានចិន ចាប់ផ្តើមយុទ្ធនាការធ្វើតេស្តរកមេរោគ ក្នុងលក្ខណៈទ្រង់ទ្រាយធំ នៅក្នុងខេត្តក្វាងចូវ ដែលមានជនជាតិអាហ្វ្រិក ធ្វើដំណើរចេញចូលច្រើនដងក្នុងមួយឆ្នាំៗ។
ខណៈពេលដែល មន្ត្រីសុខាភិបាលចិនក្នុងខេត្តក្វាងចូវ ចាប់ផ្តើមយុទ្ធនាការធ្វើតេស្តរកមេរោគកូវីដ១៩ ជនជាតិនិងអ្នកជំនួញអាហ្វ្រិកចំនួនរាប់រយនាក់ នៅក្វាងចូវ ត្រូវបានបណ្តេញចេញពីបន្ទប់សណ្ឋាគារ និងកន្លែងស្នាក់នៅរបស់ពួកគេ។
មួយវិញទៀត ដោយសារតែគ្មានកន្លែងស្នាក់ មានជនជាតិអាហ្វ្រិកស្បែកខ្មៅខ្លះ នាំគ្នាទៅដេក នៅតាមលើដងផ្លូវក្នុងខេត្តក្វាងចូវទៀតផង។ នេះបើតាមការណ៍ឲ្យដឹងពី មេដឹកនាំសហគមន៍ជនជាតិអាហ្វ្រិកនៅក្វាងចូវផ្ទាល់។
ទាក់ទងរឿងនេះ រដ្ឋអំណាចចិននិយាយថា ការដែលខ្លួនធ្វើបែបនេះ គឺដើម្បីទប់ស្កាត់ ការឆ្លងរីករាលដាលជាលើកទី២ នៃមេរោគកូរ៉ូណាថ្មី។ ក៏ប៉ុន្តែ ករណីថ្មីៗ ដែលទាក់ទងនឹងសហគមន៍អាហ្វ្រិកនៅក្វាងចូវនេះ បានបង្កឲ្យមានការចោទប្រកាន់ថា ជនជាតិចិនម្ចាស់ស្រុក ហើយនិងមន្ត្រីសុខាភិបាលចិន រើសអើងចំពោះជនជាតិអាហ្វ្រិកស្បែកខ្មៅ។
ភាពតានតឹងកំពុងកើនឡើងខ្លាំងនៅក្វាងចូវ
ស្ថានការណ៍នៅក្វាងចូវ ហាក់មានសភាពតានតឹងកាន់តែខ្លាំងពិតប្រាកដមែន។ គេធ្លាប់តែឮពីមុនមកថា ចិនឬជនជាតិអាស៊ីផ្សេងទៀត រងការរើសអើងនៅអាមេរិក ឬអឺរ៉ុប នៅពេលដែលជំងឺកូរ៉ូណា ផ្ទុះឡើងកាលពីដំបូងៗ។ មានទាំងការចុះផ្សាយព្រោងព្រាតដែលថាចិន គឺជាអ្នកជំងឺពិតប្រាកដនៅអាស៊ី។
ក៏ប៉ុន្តែ ចំណាត់ការរបស់ចិនទៅលើជនជាតិអាហ្វ្រិកស្បែកខ្មៅ នៅក្នុងខេត្តក្វាងចូវ ធ្វើឲ្យគេ គិតថា ចិនប្រហែលជាចាប់ផ្តើមរើសអើងជនបរទេសវិញម្តងហើយ។
នៅក្វាងចូវ ជនជាតិអាហ្វ្រិក ត្រូវគេធ្វើតេស្តរកមេរោគ និងដាក់ឲ្យនៅដាច់ដោយឡែកពីគេឯង ទោះបីជាពួកគេមិនបានធ្វើដំណើរចេញក្រៅប្រទេសចិនយ៉ាងណាក្តី។
ក្រៅពីនេះ ចិនបានហាមឃាត់ជនជាតិបរទេសមិនឱ្យចូលក្នុងប្រទេស ហើយអ្នកដំណើរជាច្រើននាក់ទៀត កំពុងត្រូវបានគេដាក់ឲ្យនៅដាច់ពីគេឯងរយៈពេល ១៤ថ្ងៃ ទាំងនៅកន្លែងស្នាក់នៅផ្ទាល់របស់ពួកគេ ឬក៏នៅតាមមជ្ឈមណ្ឌលនានា។
និស្សិតផ្លាស់ប្តូរការសិក្សាពីប្រទេសហ្គីណេម្នាក់គឺលោក Thiam បាននិយាយថា ប៉ូលិសចិន បញ្ជាឱ្យគាត់ស្នាក់នៅតែក្នុងផ្ទះ សូម្បីតែបន្ទាប់ពីគាត់បានធ្វើតេស្តអវិជ្ជមានកូវីដ១៩ និងមិនបានធ្វើដំណើរចាកចេញពីប្រទេសចិន ជិត៤ ឆ្នាំហើយក៏ដោយ។
យុវនិស្សិតរូបនេះ បាននិយាយប្រាប់ទីភ្នាក់ងារសារព័ត៌មានបារាំង AFP ថា ចំណាត់ការរបស់អាជ្ញាធរចិនសំដៅជាពិសេសលើជនជាតិអាហ្វ្រិកស្បែកខ្មៅ ហើយវាអយុត្តិធម៌ណាស់។
និស្សិតជនជាតិហ្គីណេរូបនេះ បានសង្កត់ធ្ងន់ទៀតថា មនុស្សទាំងអស់ដែលគាត់បានឃើញគេធ្វើតេស្ត និងដាក់ឲ្យនៅដាច់ដោយឡែកសុទ្ធតែជាជនជាតិអាហ្វ្រិក។ ចំណែកឯ ជនជាតិចិនវិញ អាចដើរហើរដោយសេរីបានធម្មតា ដូចជាគ្មានរឿងអ្វីកើតឡើងអីចឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ