យូនីសេហ្វ ៖ កូវីដ១៩ អាចសម្លាប់កុមារ ដោយប្រយោល ដល់៦ពាន់នាក់ក្នុងមួយថ្ងៃៗ
កុមារមិនសូវរងគ្រោះឆ្លងជំងឺកូវីដ១៩ដោយផ្ទាល់ទេ ប៉ុន្តែការប្រយុទ្ធប្រឆាំងនឹងជំងឺរាតត្បាតសាកលមួយនេះ អាចបង្កមហន្តរាយធ្ងន់ធ្ងរបំផុតនៅក្នុងបណ្តាប្រទេសក្រីក្រ ដោយអាចនឹងធ្វើឱ្យកុមារជាងមួយលាននាក់បាត់បង់ជីវិត។ បើតាមអង្គការយូនីសេហ្វ អាចនឹងមានកុមារប្រមាណ៦ពាន់ ស្លាប់ក្នុងមួយថ្ងៃៗ ក្នុងរយៈពេល៦ខែខាងមុខនេះ ដោយសារផលវិបាកមិនផ្ទាល់នៃកូវីដ១៩។
ចុះផ្សាយនៅថ្ងៃ៖
ស្តាប់ - ០២:៤៣
បើតាមការសិក្សារបស់សាកលវិទ្យាល័យអាមេរិក Johns Hopkins មានកុមារអាយុក្រោម៥ឆ្នាំ រស់នៅក្នុង១១៨ប្រទេសនៅលើភពផែនដី ចំនួន ដល់ទៅជាង១លានពីរសែននាក់ អាចនឹងត្រូវស្លាប់ នៅរវាង៦ខែខាងមុខ។ មូលហេតុគឺមកពីប្រព័ន្ធការពារនិងថែទាំសុខភាពកុមារ ត្រូវរងការរំខាន ដោយការប្រយុទ្ធប្រឆាំងនឹងជំងឺរាតត្បាតថ្មីកូវីដ១៩។ នេះជាការពន្យល់របស់អង្គការយូនីសេហ្វ ដោយរំលឹកថា អង្គការមិនទាន់បានបូកបញ្ចូលនឹងអត្រាមរណៈដ៏ខ្ពស់នៃកុមារក្រោយអាយុ៥ឆ្នាំ នៅក្នុងប្រទេសក្រីក្រ ចំនួន២លាននាក់កន្លះ ដែលបានស្លាប់ ជារៀងរាល់មួយឆមាស ស្រាប់ទៅហើយផង។
ក្រៅអំពីមរណភាពកុមារ ស្ត្រីជាមាតាក៏ជាជនរងគ្រោះខ្លាំងដែរ។ ដោយហេតុតែស្ត្រីមិនបានទៅតាមដានសុខភាពពេលកំពុងពរពោះនិងទទួលបានការថែទាំសុខភាពត្រឹមត្រូវ ក្រោយពីឆ្លងទន្លេរួច ព្រោះរវល់ខ្លាចកូវីដ១៩ យូនីសេហ្វគិតថាអាចនឹងមានស្ត្រីទើបក្លាយជាមាតាដល់ទៅ ៥៦៧០០នាក់បន្ថែមទៀត ត្រូវស្លាប់បន្ថែមពីអត្រាមរណៈចំនួន ជាង១៤ម៉ឺន៤ពាន់នាក់ នាពេលបច្ចុប្បន្ន។
មរណភាពកុមារ និងមាតា បានធ្លាក់ចុះយ៉ាងខ្លាំង និងជាលំដាប់ នាទសវត្សរ៍ចុងក្រោយនេះ។ ដូច្នេះសូមកុំបណ្តោយម្តាយនិងកុមារ ត្រលប់ទៅជាជនរងគ្រោះនឹងជំងឺដែលអាចបញ្ចៀសបាន ព្រោះហេតុផលប្រយុទ្ធប្រឆាំងនឹងកូវីដ១៩ឱ្យសោះ។ នេះជាសម្រែកថ្ងូររបស់នាយកអង្គការយូនីសេហ្វ។
នៅក្នុងបណ្តាប្រទេសក្រីក្រ ដែលមានប្រព័ន្ធសុខាភិបាលខ្សោយនិងផុយស្រួយ កូវីដ១៩បានប៉ះពាល់ដល់សេវាសុខាភិបាល ការផ្គត់ផ្គង់ថ្នាំសង្កូវ ស្បៀងអាហារ ធនធានមនុស្ស និងហិរញ្ញវត្ថុយ៉ាងខ្លាំង។ វិធានការទប់ស្កាត់កូវីដ១៩ ដូចជាការបិទខ្ទប់ប្រជាពលរដ្ឋឱ្យនៅតែក្នុងផ្ទះ បម្រាមគោចរ ឬការហាមឃាត់មិនឱ្យធ្វើដំណើរ និងការភ័យខ្លាច បានកាត់បន្ថយសកម្មភាពទៅពេទ្យដើម្បីព្យាបាលជំងឺ និងការថែទាំសុខភាព ជាទូទៅខ្លាំងណាស់។ បើតាមយូនីសេហ្វ រហូតដល់ពាក់កណ្តាលខែមេសា កុមារជាង១១៧លាននាក់ នៅក្នុងប្រទេសចំនួន ៣៨ មិនបានមកចាក់ថ្នាំបង្ការជំងឺកញ្ជ្រឹល ដែលអាចសម្លាប់ជីវិតកុមារបានយ៉ាងងាយ តែអាចបញ្ចៀសបានស្ទើរទាំងស្រុងតាមរយៈថ្នាំវ៉ាក់សាំង។ ប្រទេសរងគ្រោះខ្លាំងជាងគេ គឺបង់ក្លាដែស ឥណ្ឌា ប្រេស៊ីល អេត្យូពី និងកុងហ្គោ។ អង្គការយូនីសេហ្វសូមអំពាវនាវឱ្យគ្រប់ប្រទេសទាំងអស់ ចាប់ផ្តើមបញ្ចេញសកម្មភាពភ្លាម ពេលកូវីដ១៩ចាប់ថមថយអំណាច ដើម្បីកុំឱ្យកុមាររងគ្រោះខ្លាំងពេក ពីផលវិបាកនិងផលប៉ះពាល់មិនផ្ទាល់របស់កូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ