យូនីសេហ្វ អំពាវនាវឱ្យបន្តចាក់ថ្នាំបង្ការលើកុមារ ទោះកំពុងមានវិបត្តិកូវីដ១៩
ក្រុមប្រទេសនៅតំបន់អាស៊ីខាងត្បូង ដូចជាបង់ក្លាដែស នេប៉ាល់ អាហ្វហ្កានីស្ថាន ឬប៉ាគីស្ថាន ត្រូវតែចាប់ផ្តើមបើកយុទ្ធនាការចាក់ថ្នាំបង្ការដល់កុមារឡើងវិញ។ ការអាក់ខាននិងផ្អាកយុទ្ធនាការ ដោយហេតុតែវិបត្តិកូរ៉ូណាវីរុសថ្មី អាចនឹងធ្វើឱ្យកុមាររាប់ម៉ឺននាក់ រងគ្រោះដល់ជីវិត។ នេះបើការព្រមានរបស់អង្គការយូនីសេហ្វ។
ចុះផ្សាយនៅថ្ងៃ៖
ស្តាប់ - ០១:៥៩
ពុំសូវមានក្មេងរងគ្រោះធ្លាក់ខ្លួនឈឺធ្ងន់ធ្ងរទេ តែកុមាររាប់សិបម៉ឺននាក់អាចនឹងត្រូវរងគ្រោះដោយសារការអាក់ខានមិនបានចាក់ថ្នាំបង្ការ។ នេះបើប្រសាសន៍របស់អ្នកស្រី នាយិកាអង្គការយូនីសេហ្វប្រចាំតំបន់អាស៊ីខាងត្បូង។
នៅក្នុងសេចក្តីថ្លែងការណ៍ចេញផ្សាយនៅថ្ងៃអង្គារទី ២៨មេសា យូនីសេហ្វ បានសម្តែងការព្រួយបារម្ភយ៉ាងខ្លាំងថា គ្មានថ្នាំបង្ការ ជាការគំរាមកំហែងសុខភាពកុមារ យ៉ាងធ្ងន់ធ្ងរ ខ្លាំងណាស់។ បើតាមយូនីសេហ្វ ដោយហេតុកូវីដ១៩ បង់ក្លាដែស និង នេប៉ាល់ បានបញ្ឈប់យុទ្ធនាការចាក់ថ្នាំបង្ការជំងឺកញ្ជ្រឹល -ស្អូច។ ចំណែកអាហ្វហ្កានីស្ថាន និងប៉ាគីស្ថាន ដែលជាប្រទេសរងគ្រោះជំងឺស្វិតដៃជើងជាងគេ ក្នុងបីប្រទេសនៅលើពិភពលោក ក៏បានផ្អាកសកម្មភាពប្រយុទ្ធប្រឆាំងនឹងជំងឺគ្រុនស្វិតដៃជើងដែរ។
យុទ្ធនាការចាក់ថ្នាំបង្ការកុមារអាក់ខាន ជំងឺរាតត្បាតដែលអាចបញ្ចៀសបាន ដូចជាជំងឺកញ្ជ្រឹល និងជំងឺខាន់ស្លាក់ ស្រាប់តែលេចឡើងវិញនៅប្រទេសបង់ក្លាដែស ប៉ាគីស្ថាន និងនេប៉ាល់ ស្រេចទៅហើយនៅពេលនេះ។ នេះបើតាមយូនីសេហ្វដដែល។
ភ្នាក់ងារអង្គការសហប្រជាជាតិទទួលបន្ទុកកុមារ បានអំពាវនាវឱ្យរដ្ឋាភិបាលទាំងឡាយ ចាប់ផ្តើមបើក យុទ្ធនាការចាក់ថ្នាំបង្ការឡើងវិញ និងបង្កើនសកម្មភាពឱ្យបានខ្លាំងមុន ដោយគ្មានបង្អង់ នៅពេលស្ថានភាពរាតត្បាតរបស់កូវីដ១៩ អាចគ្រប់គ្រងបាន។ សម្រាប់ពេលនេះ រដ្ឋាភិបាលត្រូវតែបើកឱ្យមានសកម្មភាពចាក់ថ្នាំបង្ការ ជាធម្មតា ដោយគិតគូរចាត់វិធានការការពារការចម្លងមេរោគកូរ៉ូណាថ្មី។ នេះជាការទទូចបន្ថែមរបស់ទីប្រឹក្សាអង្គការយូនីសេហ្វ។
សូមបញ្ជាក់ថា កូវីដ១៩ ក៏បានធ្វើឱ្យផ្គត់ផ្គង់ថ្នាំបង្ការមានការខ្វះខាតយ៉ាងខ្លាំងដែរ។ ឥណ្ឌា ដែលធ្លាប់ផ្គត់ផ្គង់ថ្នាំបង្ការឱ្យអង្គការយូនីសេហ្វ ដល់ទៅជាង ១២៥០លានដូសក្នុងឆ្នាំ២០១៩ បានបន្ថយសកម្មភាពសេដ្ឋកិច្ចយ៉ាងខ្លាំង។ ឥណ្ឌាបានសម្រេចបិទបង្ខាំងប្រជាពលរដ្ឋឱ្យក្នុងផ្ទះតាំងពីមួយខែមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ