Amnesty International៖រដ្ឋាភិបាលភូមាមិនបានចាត់វិធានការអ្វីដើម្បីការពារពលរដ្ឋរ៉ូហ៊ីងយ៉ាទេ
ប្រទេសភូមាមានពេលត្រឹមថ្ងៃសៅរ៍ ទី២៣ ឧសភាដើម្បីបញ្ជូនរបាយការណ៍ទី១ ស្តីពីវិធានការការពារពលរដ្ឋរ៉ូហ៊ីងយ៉ាអ្នកកាន់សាសនាអ៊ីស្លាមទៅឲ្យតុលាការយុត្តិធម៌អន្តរជាតិក្រុងឡាអេ។ នៅក្នុងរបាយការណ៍ រដ្ឋាភិបាលភូមាត្រូវបង្ហាញចេញនូវវិធានការមួយចំនួនដែលមានគោលដៅរារាំងរាល់ទង្វើទាំងឡាយណាដែលអាចរួមចំណែក និងលើកទឹកចិត្តឲ្យមានឧក្រិដ្ឋកម្មប្រល័យពូជសាសន៍លើពួករ៉ូហ៊ីងយ៉ា និងជួយការពារជនជាតិភាគតិចមួយនេះពីទង្វើទារុណកម្មថ្មីៗទៀត។ តែបើយោងតាមអង្គការសិទ្ធិមនុស្សអន្តរជាតិ Amnesty International គ្មានវិធានការណាមួយត្រូវបានរដ្ឋាភិបាលភូមាយកទៅអនុវត្តជាក់ស្តែងទេ។ យើងស្តាប់លោកនីកូឡា បេកឺឡាំង នាយក Amnesty International ប្រចាំតំបន់ដែលវិទ្យុបារាំងអន្តរជាតិបានជួបសម្ភាសន៍តាមទូរស័ព្ទពីទឹកដីហុងកុង។
ចុះផ្សាយនៅថ្ងៃ៖
ស្តាប់ - ០១:៤៧
« ប្រទេសភូមាមិនបានឲ្យសញ្ញាអ្វីមួយដែលបញ្ជាក់ថា ខ្លួនចង់រួមដោយស្មោះត្រង់នៅក្នុងនីតិវិធីយុត្តិធម៌អន្តរជាតិដើម្បីដោះស្រាយរឿងជោគវាសនារបស់ពលរដ្ឋរ៉ូហ៊ីងយ៉ាអ្នកកាន់សាសនាអ៊ីស្លាមទេ។ រដ្ឋាភិបាលភូមាបន្តរារាំងមិនឲ្យអង្គការសហប្រជាជាតិ និងក្រុមអ្នកសង្កេតការណ៍អន្តរជាតិធ្វើដំណើរទៅកាន់រដ្ឋរ៉ាក់ឃីនឡើយ។ វាអាចដែលថា រដ្ឋអំណាចភូមាបានផ្ញើរបាយការណ៍មួយស្តីពីវិធានការការពារពលរដ្ឋរ៉ូហ៊ីងយ៉ាទៅឲ្យតុលាការយុត្តិធម៌អន្តរជាតិក្រុងឡាអេ។
តែយើងមិនបានសង្កេតឃើញមានវិធានការណាមួយត្រូវបានអនុវត្តជាក់ស្តែងនៅនឹងកន្លែងផ្ទាល់តាមសំណូមពរ និងការបញ្ជារបស់តុលាការយុត្តិធម៌អន្តរជាតិនោះទេ។ អ្វីដែលតុលាការយុត្តិធម៌អន្តរជាតិចង់ឲ្យរដ្ឋាភិបាលភូមាធ្វើ គឺប្រឆាំងទប់នឹងទង្វើទាំងឡាយណាដែលរួមចំណែកនៅក្នុងឧក្រិដ្ឋកម្មប្រឆាំងនឹងពួករ៉ូហ៊ីងយ៉ា រួមទាំងឧក្រិដ្ឋកម្មប្រឆាំងពូជសាសន៍។ ឧក្រិដ្ឋកម្មទាំងអស់នេះបានកើតមាននៅក្នុងតំបន់រ៉ាក់ឃីនដែលមានពលរដ្ឋរ៉ូហ៊ីងយ៉ារស់នៅចំនួន ៦០០ ០០០នាក់។ រដ្ឋាភិបាលភូមាបានអះអាងថា ខ្លួនបានធ្វើតាមសំណើ និងការទាមទាររបស់អន្តរជាតិរួចហើយ ឧទាហរណ៍ដូចជាការបង្កើតឲ្យមានគណៈកម្មការស៊ើបអង្កេតមួយស្តីពីឧក្រិដ្ឋកម្មប្រព្រឹត្តិនៅក្នុងតំបន់រ៉ាក់ឃីន។
តែតាមពិតទៅនោះ នេះគ្រាន់ជាវិធានការមួយដើម្បីចំណេញពេលដែលគ្មានគោលដៅដើម្បីឆ្លើយតបនឹងគំនាបណាមួយពីខាងក្រៅ ពិសេសមិនបានធ្វើឲ្យរដ្ឋាភិបាលភូមាផ្លាស់ប្តូរនយោបាយរើសអើង និងឧក្រិដ្ឋកម្មប្រឆាំងពលរដ្ឋរ៉ូហ៊ីងយ៉ា រួមទាំងជនជាតិភាគតិច និងជាតិពិន្ធុផ្សេងទៀត ដូចយ៉ាងពួកឈីន ពួកឆាន ឬពួកកាឈីននៅកន្លែងផ្សេងទៀតក្នុងប្រទេសទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ