តុលាការឡាអេបញ្ជាឱ្យភូមាចាត់វិធានការការពារកុំឱ្យមានអំពើប្រល័យពូជសាសន៍
តុលាការយុត្តិធម៌អន្តរជាតិ បានចេញសេចក្តីសម្រេចនៅថ្ងៃព្រហស្បតិ៍ ទី ២៣ មករា ២០២០ នេះ បញ្ជាឱ្យភូមា ប្រើគ្រប់ វិធានការ និងអំណាចដែលមាន ការពារកុំមានអំពើប្រល័យពូជសាសន៍លើជនជាតិភាគតិចកាន់សាសនាអ៊ីស្លាម រ៉ូហ៊ីងយ៉ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
តុលាការអន្តរជាតិដែលមានទីស្នាក់ការនៅទីក្រុងឡាអេ បានព្រមព្រៀងតាមសំណើរបស់ប្រទេសហ្កំប៊ី ដែលសុំឱ្យតុលាការសម្រេចចាត់វិធានការជាបន្ទាន់ប្រឆាំងនឹងភូមា។
ប្រធានចៅក្រម បានអាចសេចក្តីសម្រេចបង្គាប់ឱ្យភូមា ត្រូវតែចាត់គ្រប់វិធានការ ដែលខ្លួនមាន ដើម្បីការពារកុំឱ្យមានការប្រព្រឹត្តអំពើបែបប្រល័យពូជសាសន៍ ដូចជាការធ្វើឃាតក្រុមជនជាតិភាគតិចរ៉ូហ៊ីងយ៉ា និងការធ្វើទុក្ខមុកម្នេញដើម្បីកម្ចាត់ក្រុមជនជាតិភាគតិចនេះមួយផ្នែកឬទាំងស្រុង។
តុលាការ ដែលជាស្ថាប័នយុត្តិធម៌កំពូលរបស់អង្គការសហប្រជាជាតិ បានបញ្ជាឱ្យភូមា ផ្តល់របាយការណ៍ស្តីពីវិធានការដែលខ្លួនប្រើ តាមបង្គាប់តុលាការ នៅរវាងបួនខែ យ៉ាងយូរ និងបន្ទាប់មក ជារៀងរាល់៦ខែម្តង។
សូមបញ្ជាក់ថា សេចក្តីសម្រេចនេះ មិនមែនជាសាលក្រមទេ។ តែជាចម្លើយតបទៅនឹងបណ្តឹងរបស់ប្រទេសហ្កំប៊ី។ ហ្កំប៊ីដែលមានប្រជាជនភាគច្រើនជាអ្នកកាន់សាសនាអ៊ីស្លាម និងតំណាងឱ្យ៥៧ប្រទេសជាសមាជិកអង្គការសហប្រតិបត្តិការអ៊ីស្លាម បានចោទភូមាថាបានរំលោភអនុសញ្ញាអង្គការសហប្រជាជាតិឆ្នាំ១៩៤៨ និងបង្ក្រាបបែបឧក្រិដ្ឋប្រល័យពូជសាសន៍លើជនជាតិរ៉ូហ៊ីងយ៉ា។ សវនាការទាក់ទងនឹងបណ្តឹងនេះ ត្រូវការប្រើពេលវេលាជាច្រើនឆ្នាំ ហេតុដូច្នេះហើយបានជា ក្នុងពេលរង់ចាំសេចក្តីសម្រេចចុងក្រោយ ហ្កំប៊ី បានស្នើសុំទៅតុលាការ ឱ្យសម្រេចចាត់វិធានការបន្ទាន់ប្រឆាំងនឹងភូមា នៅថ្ងៃនេះសិន។
ភូមាមិនអាចធ្វើបណ្តឹងឧទ្ធរណ៍ប្រឆាំងនឹងសេចក្តីសម្រេចរបស់តុលាការយុត្តិធម៌នៅថ្ងៃនេះទេ។ ជាសេចក្តីសម្រេចដែលតាមច្បាប់ ភូមាដាច់ខាតត្រូវគោរព ប៉ុន្តែតុលាការគ្មានមធ្យោបាយអ្វីគាបភូមាឱ្យត្រូវតែធ្វើតាមឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ