កូរ៉េខាងជើងគំរាមពង្រឹងសមត្ថភាពនុយក្លេអ៊ែរយោធា និងអភិវឌ្ឍកម្លាំងយោធាយុទ្ធសាស្រ្ត
នៅកូរ៉េខាងជើង ទីភ្នាក់ងារសារព័ត៌មានផ្លូវការឈ្មោះ KCNA បានឲ្យដឹងក្នុងថ្ងៃអាទិត្យ ទី២៤ ឧសភាថា នៅក្នុងកិច្ចប្រជុំរបស់គណៈកម្មការយោធាមជ្ឈិមមួយដឹកនាំដោយលោកគីម ជុងអ៊ុន មានសំណុំរឿងជាច្រើនត្រូវបានលើកយកទៅជជែក ពិសេសវិធានការថ្មីស្តីពីការពង្រឹងសមត្ថភាពនុយក្លេអ៊ែរយោធា។ គិតតាំងពីជិត ៣សប្តាហ៍កន្លងទៅ នេះជាការលេចមុខលើកទី១ របស់លោកគីម ជុងអ៊ុននៅកិច្ចប្រជុំរបស់គណៈកម្មការយោធាមជ្ឈិមកូរ៉េខាងជើងពេលនេះ។ ដំណឹងស្តីពីការពង្រឹងសមត្ថភាពនុយក្លេអ៊ែរយោធាកូរ៉េខាងជើងមួយនេះបានធ្លាក់មក ខណៈមានព័ត៌មានមួយចុះផ្សាយដោយកាសែតអាមេរិក Washington Post ក្នុងថ្ងៃសុក្រ ទី២២ ឧសភាដែលថា រដ្ឋបាលក្រុងវ៉ាស៊ីនតោនបានជជែកនាពេលថ្មីៗពីលទ្ធភាពនៃការសាកនុយក្លេអ៊ែររបស់អាមេរិក។
ចុះផ្សាយនៅថ្ងៃ៖
ស្តាប់ - ០២:២០
ព័ត៌មានស្តីពីកិច្ចប្រជុំរបស់គណៈកម្មការយោធាមជ្ឈិមកូរ៉េខាងជើងត្រូវបានទីភ្នាក់ងារសារព័ត៌មានផ្លូវការកូរ៉េខាងជើងឈ្មោះ KCNA ចុះផ្សាយក្នុងថ្ងៃអាទិត្យ ទី២៤ ឧសភា តែ KCNA មិនបានបញ្ជាក់ពីថ្ងៃខែដែលគណៈកម្មការយោធាមជ្ឈិមកូរ៉េខាងជើងបានរៀបចំប្រជុំទេ។ ប្រធានរឿងសំខាន់ជាងគេដែលកិច្ចប្រជុំបានជជែក និងសម្រេច គឺវិធានការថ្មីក្នុងការពង្រឹងសមត្ថភាពនុយក្លេអ៊ែរយោធា តែ KCNA មិនបានលំអិតអ្វីបន្ថែមទេ។ បន្ទាប់មក កិច្ចប្រជុំបានផ្តោតលើការដាក់កម្លាំងយោធាយុទ្ធសាស្រ្តក្នុងភាពអាសន្ននៅក្នុងក្របខ័ណ្ឌនៃការបង្កើន និងការអភិវឌ្ឍន៍លើកម្លាំងយោធារបស់ប្រទេស។ បន្ទាប់មកទៀត និងបើតាម KCNA ដដែល កិច្ចប្រជុំក៏បានពិនិត្យ និងធ្វើឲ្យចម្រើនលើចំណុចខ្វះខាតនៅក្នុងសកម្មភាពយោធា និងនយោបាយ។
គេមិនដឹងថា តើកិច្ចប្រជុំរបស់គណៈកម្មការយោធាមជ្ឈិមកូរ៉េខាងជើងដឹកនាំដោយលោកគីម ជុងអ៊ុនបានរៀបចំពេលណាទេ។ តែបើបានរៀបចំនៅប៉ុន្មានថ្ងៃចុងក្រោយមែន នេះជាលើកទី១ ដែលមនុស្សខ្លាំងក្រុងព្យុងយ៉ាងបានលេចមុខជាសាធារណៈ គិតតាំងពី ៣សប្តាហ៍កន្លងទៅ នេះបើតាមកាសែតកូរ៉េខាងត្បូងឈ្មោះ Yonhap។ គួររម្លឹកថា អវត្តមានលោកគីម ជុងអ៊ុននៅក្នុងខួបកំណើតលោកគីម អ៊ីលស៊ុងដែលជាស្ថាបនិករបបកូរ៉េខាងជើង និងជាជីតាក្នុងថ្ងៃទី១៥ មេសាកន្លងទៅបានបំផុសឲ្យមានពាក្យចចាអារ៉ាមជុំវិញសុខភាពរបស់លោកគីម ជុងអ៊ុន។ តែនៅដើមខែឧសភា មនុស្សខ្លាំងរូបនេះបានលេចមុខ និងហាក់មានសុខភាពល្អធម្មតា។
យ៉ាងណាក៏ដោយ ដំណឹងស្តីពីការពង្រឹងសមត្ថភាពនុយក្លេអ៊ែរយោធាកូរ៉េខាងជើងពេលនេះបានធ្លាក់មក ខណៈមានព័ត៌មានមួយចុះផ្សាយដោយកាសែតអាមេរិក Washington Post ក្នុងថ្ងៃសុក្រ ទី២២ ឧសភាដែលថា រដ្ឋបាលក្រុងវ៉ាស៊ីនតោនបានលើកឡើងពីលទ្ធភាពនៃការសាកល្បងនុយក្លេអ៊ែររបស់អាមេរិកលើកទី១ គិតតាំងពីឆ្នាំ ១៩៩២ ដើម្បីផ្ញើសារទៅព្រមានរុស្ស៊ី និងចិន។ តែលោក Daryl Kimball នាយកប្រតិបត្តិនៃសមាគមត្រួតពិនិត្យអាវុធដែលមានមូលដ្ឋាននៅអាមេរិកបានយល់ឃើញថា ការសម្រេចរបស់អាមេរិកចង់សាកល្បងនុយក្លេអ៊ែរអាចប៉ះពាល់ដល់ការចរចារវាងអាមេរិក និងកូរ៉េខាងជើងស្តីពីអាវុធនុយក្លេអ៊ែរ។ តាមលោក Kimball បើអាមេរិកសាកល្បងនុយក្លេអ៊ែរមែន លោកគីម ជុងអ៊ុនអាចនឹងមិនគោរពពាក្យសន្យាដែលផ្អាកការសាកល្បងនុយក្លេអ៊ែរកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ