រដ្ឋបាលហុងកុងចាត់ទុកបាតុកម្មប្រជាធិបតេយ្យជា «ភេរវកម្ម» ដែលបង្កគ្រោះថ្នាក់ដល់ស្ថិរភាព និងភាពរុងរឿង
ចុះផ្សាយនៅថ្ងៃ៖
ស្តាប់ - ០៧:២៩
កាលពីថ្ងៃអាទិត្យទី២៤ឧសភា បាតុករហុងកុងបានធ្វើការប្រឆាំង ទៅនឹងគម្រោងច្បាប់ថ្មីមួយរបស់រដ្ឋអំណាចប៉េកាំង ដែលមានខ្លឹមសារហាមឃាត់ រាល់សកម្មភាពក្បត់ជាតិ ការបះបោរបំបែកទឹកដី និងសកម្មភាពវិទ្ធង្សនា នៅហុងកុង។ សម្រាប់បាតុករប្រជាធិបតេយ្យហុងកុង គម្រោងច្បាប់នេះ គឺជាចេតនាបំបិទសិទ្ធសេរីភាព និងមតិរិះគន់នៅហុងកុង ពីសំណាក់ប៉េកាំង។ ក្រោយការប៉ះទង្គិចគ្នា រវាងហ្វូងបាតុករ និងសមត្ថកិច្ចហុងកុង តំណាងរដ្ឋបាលហុងកុង បានលើកឡើងថាស្ថិរភាព និងសន្តិសុខហុងហុង កំពុងតែត្រូវបានគម្រាមដោយ « សកម្មភាពភេរវកម្ម » របស់ក្រុមបាតុករជ្រុលនិយម។
គម្រោងច្បាប់ប្រឆាំងនឹងសកម្មភាពបះបោរក្បត់ជាតិ
គម្រោងច្បាប់ ដែលកំពុងតែឆ្លងកាត់សភាប្រជាមានិតចិនប៉េកាំងនេះ បើផ្អែកតាមការចុះផ្សាយរបស់បណ្តាញព័ត៌មាន Reuters គឺមានខ្លឹមសារហាមឃាត់ រាល់សកម្មភាព « ក្បត់ជាតិ សកម្មភាពបះបោរ បំបែកទឹកដី និងសកម្មភាពវិទ្ធង្សនា ប្រឆាំងនឹងរបបដឹកនាំ នៅហុងកុង »។ ជាងនេះទៀត គម្រោងច្បាប់ថ្មីនេះបានចែងថា ត្រូវតែយកទៅអនុវត្ត និងតម្រូវតាម ឲ្យបានឆាប់បំផុត នៅក្នុងច្បាប់គ្រិះរបស់ហុងកុង ពោលគឺរដ្ឋធម្មនុញ្ញរបស់ដែនដីស្វយយ័តហុងកុង។ រដ្ឋអំណាចប៉េកាំង បានស្នើសុំទៅសភា ថាច្បាប់នេះ នឹងត្រូវចូលជាធរមានភ្លាមៗតែម្តង ក្រោយការអនុម័តជាផ្លូវការ។
តាមការគ្រោងទុក នៅថ្ងៃព្រហស្បតិ៍ទី២៨ឧសភា សភាប្រជាមានិត្យចិននឹងបោះឆ្នោតអនុម័ត ហើយលទ្ធផលនោះ គឺប្រាកដជាគ្មានអ្វីខុសពីការរំពឹងទុកទេ ព្រោះថាសភានេះ តែងតែបោះឆ្នោតជាឯកច្ឆ័ន នូវរាល់ច្បាប់ដែលបក្សកុម្មុយនីស្តចិនដាក់ស្នើមក។
កាលពីថ្ងៃអាទិត្យ នៅហុងកុង ក្រុមបាតុករជាច្រើនរយនាក់ បានជួបជុំគ្នា ធ្វើការតវ៉ានឹងគម្រោងច្បាប់ថ្មីនេះ ព្រោះសម្រាប់ពួកគេ វាគឺជាក្រញ៉ាំថ្មីមួយទៀត ដែលប៉េកាំងមានចេតនា ដាក់មកលើប្រជាជនហុងកុង។ សម្រាប់ក្រុមបាតុករប្រជាធិបតេយ្យហុងកុង ច្បាប់នេះ វានឹងមកបំបិទសិទ្ធិសេរីភាពនយោបាយ សេរីភាពបញ្ចេញមតិនានានៅហុងកុង ព្រោះរាល់សកម្មភាពរិះគន់តវ៉ាទាំងអស់ គឺគេអាចយកទៅបកស្រាយ ថាជាសកម្មភាពបះបោរ ក្បត់ជាតិ ប្រឆាំងនិងរបបដឹកនាំ។
« ភេរវកម្ម »
គោលជំហរផ្លូវការរបស់រដ្ឋបាលហុងកុង គឺគាំទ្រដោយឥតងាករេ និងឥតលក្ខខណ្ឌ ទៅនឹងអ្វីដែលប៉េកាំងសម្រេច។ ស្ថាប័ន និងអង្គភាពសាធារណៈហុងកុង មួយចំនួន មានដូចជា នាយកដ្ឋានពន្ធដា អង្គភាពពន្លត់អគ្គីភ័យ ជាដើម សុទ្ធតែបានចេញញត្តិ ប្រកាសគាំទ្រ គម្រោងច្បាប់ថ្មីរបស់ចិនដីគោក ដែលនឹងត្រូវយកមកអនុវត្តក្នុងរដ្ឋធម្មនុញ្ញហុងកុង។
អ្នកនាំពាក្យរដ្ឋបាលហុងកុង បានចេញលិខិតមួួយ កាលពីល្ងាចថ្ងៃអាទិត្យ ដោយបានលើកឡើងថា « ប្រជាជនហុងកុង ក៏ដូចជាអ្នកវិនិយោគទាំងអស់ គ្មានអ្វីត្រូវបារម្ភ និងច្បាប់ថ្មីរបស់ចិនទេ ព្រោះច្បាប់នេះគឺដើម្បីស្តារស្ថិរភាព និងសន្តិសុខរបស់ហុងកុងឡើងវិញ។ ផ្ទុយទៅវិញ គឺមានប្រទេសមួយចំនួន ដែលលាក់ខ្លួន ពួនសំងំពីក្រោយ គាំទ្រសកម្មភាពបះបោរ ហិង្សាប្រើអាវុធ បង្កចលាចល របស់ពួកបាតុករ »។
ការបង្ក្រាបបាតុកម្ម ដោយប្រើធម៌ក្តៅកាលពីថ្ងៃអាទិត្យម្សិលមិញ ក៏ជារូបភាពមួយបង្ហាញ ថាអាជ្ញាធរហុងកុង មានបំណងគាំទ្រច្បាប់ថ្មីរបស់ចិន យ៉ាងពេញទំហឹង។ នៅថ្ងៃចន្ទនេះ លោក ចន លី អគ្គលេខាធិការទទួលបន្ទុកសន្តិសុខហុងកុង បានលើកឡើងនៅក្នុងលិខិតប្រកាសមួយថា៖ « សកម្មភាពភេរវកម្ម ក៏ដូចជាសកម្មភាពបះបោរទាមទារឯករាជ្យ កំពុងតែឡើងខ្លាំងដៃ នឹងចាក់ឬសនៅហុងកុង »។
ចំណែក លោក គ្រីស តាំង មេនគរបាលហុងកុង បានលើកឡើងដោយចំៗតែម្តងថា ហុងកុងបាន ប្រែក្លាយពីដែនដីដ៏មានសុវត្ថិភាព មកជាដែនដីដែលអសន្តិសុខបំផុត ដោយសារតែសកម្មភាពបះបោរ របស់ក្រុមប្រជាធិបតេយ្យជ្រុលនិយម។ យោងតាមមន្ត្រីរូបនេះ គិតចាប់ពីខែមិថុនាឆ្នាំមុនមក នរគបាលហុងកុង បានធ្វើការរឹបអូស វត្ថុតាង មានអាវុធ គ្រាប់ផ្ទុះជាច្រើន ចំនួន១៤លើក ដែលជាទូទៅសម្ភារៈគ្រោះថ្នាក់ទាំងនោះ គឺគេតែងតែធ្លាប់ឃើញ ក្នុងសកម្មភាពបង្ក្រាបភេរវកម្មនៅប្រទេសផ្សេង។
យករូបភាពហិង្សារបស់បាតុកម្ម ជាលេសដើម្បីបំបាក់ចលនាប្រជាធិបតេយ្យ
ការប្រើពាក្យថា « សកម្មភាពភេរវកម្ម » នេះ គឺជាការបោះជំហានថ្មីមួយទៀត របស់រដ្ឋអំណាចចិន និងអាជ្ញាធរហុងកុង ក្នុងយុទ្ធសាស្ត្របង្រ្កាប។ វិធីសាស្ត្រនេះ គឺធ្វើយ៉ាងណា ឲ្យពិភពលោកឃើញថា ក្រុមបាតុករប្រជាធិបតេយ្យនៅហុងកុង គឺជាក្រុមហិង្សា ប្រើអាវុធជាតិផ្ទុះ ធ្វើសកម្មភាពបង្កគ្រោះថ្នាក់ដល់អាយុជីវិតជនស្លូតត្រង់ឯទៀត។
យ៉ាងណាមិញ កាលពីក្នុងបាតុកម្មថ្ងៃអាទិត្យទី២៤ឧសភា មានបុរសម្នាក់ ដែលគេអះអាងថា ជាមេធាវីហុងកុង ត្រូវបានក្រុមបាតុករព្រួតគ្នាវាយយ៉ាងដំណំ ដោយគ្រាន់តែបុរសនោះ និយាយហាមឃាត់ការដាក់បំរាស់ នៅតាមផ្លូវរបស់ក្រុមបាតុករ។ សកម្មភាពវាយដំលើបុរសនោះ ត្រូវបានគេថត នៅផ្សព្វផ្សាយយ៉ាងព្រោងព្រាតលើបណ្តាញសង្គម។ រូបភាពវីដេអូ អមដោយសារ សរសេរក្នុងន័យចោទប្រកាន់ថាក្រុមបាតុករហុងកុង គឺជាក្រុមជ្រុលនិយមហឹង្សាអាណាធិបតេយ្យ។
មួយវិញទៀត ពាក្យថា ភេរវកម្មនេះ គឺអាជ្ញាធរចិន ចង់ខ្ចីពាក្យដែលប្រទេសលោកខាងលិច មានអឺរ៉ុប និងអាមេរិកជាដើម ដែលនិយមប្រើដើម្បីធ្វើការបង្រ្កាបក្រុមជ្រុលនិយមណាមួយ ដូចជាក្រុមអ៊ីស្លាមជ្រុលនិយមជាដើម។ ក្នុងន័យថា វាអាចមានន័យថា ប្រទេសលោកខាងលិចដែលធ្វើសកម្មភាពប្រឆាំងភេរវកម្មក្នុងស្រុកឯង មិនត្រូវមកគាំទ្រសកម្មភាពភេរវកម្មនៅហុងកុងឡើយ។
បណ្តាញកាសែតធំៗរបស់ចិន ដូចជាកាសែត Global Times និងកាសែតដំណឹងប្រជាជនចិន បានយកវីដេអូបុរសមេធាវី ដែលត្រូវបាតុករហុងកុងវាយដំនោះ ទៅផ្សព្វផ្សាយយ៉ាងព្រោងព្រាត ហើយសរសេរថា « នេះឬសកម្មភាពទាមទារសិទ្ធិសេរីភាព និងប្រជាធិបតេយ្យ ដែលអាមេរិកគាំទ្រនោះ? »
បើតាមការវិភាគ ចិនបានបោះជំហាន ឈានចូលដំណាក់កាលបង្ក្រាប់កាន់តែខ្លាំង គឺដើម្បីកុំឲ្យហួសពេល ព្រោះរដ្ឋាភិបាលអាមេរិក ដឹកនាំដោយលោកដូណាល់ ត្រាំ កំពុងតែចងសត្រូវពេញមុខជាមួយចិន។ ហុងកុងអាចជាកូនអុកដែលអាមេរិកយកមកលេង ដើម្បីយកឈ្នះចិន។
តៃវ៉ាន់ និង អាមេរិក ជួយក្រុមប្រជាធិបតេយ្យហុងកុង?
ការធ្វើច្បាប់ថ្មីបន្ថែម ការបង្ក្រាបដោយហិង្សា វាហាក់ដូចជាមានទំរង់ ចាក់ដុតឲ្យបាតុករហុងកុង កាន់តែក្តៅក្រេវក្រោធ ហើយធ្វើបាតុកម្មកាន់តែហិង្សា។ ក្នុងន័យនេះ ប៉េកាំង អាចប្រាប់ទៅពិភពលោកថា « មើលចុះ ថាបាតុករហុងកុងហិង្សាសាហាវកម្រិតណា! »។
តាមធម្មតានៅថ្ងៃពុធទី២៧ ឧសភា នឹងមានបាតុកម្មធំមួយទៀត ដែលលើកនេះ គឺប្រឆាំងនឹងច្បាប់មួយ ដែលសភាហុងកុងកំពុងចង់អនុម័ត ទាក់ទិននឹងការផ្តន្ទាទោស ចំពោះការប្រមាថមើលងាយ មិនគោរពបទភ្លេងជាតិចិន។
ជាងនេះទៀត រដ្ឋាភិបាលតៃវ៉ាន់ បានប្រកាសថានឹងជួយទំនុកបំរុងគាំទ្រការតស៊ូរបស់ប្រជាជនហុងកុង។ គេមិនដឹងទេ ថាតៃវ៉ាន់មានបំណងចង់ជួយដោយវិធីណាទេ ពេលនេះ។ បច្ចុប្បន្ន តៃវ៉ាន់ គឺជាដែនដីលាក់ខ្លួន របស់ក្រុមប្រជាធិបតេយ្យហុងកុង ដែលរត់គេចពីការចាប់ខ្លួន។ តើអាចទេ ដែលតៃវ៉ាន់ ជួយបាតុករហុងកុង តាមរយៈការផ្តល់សម្ភារៈបាតុកម្ម ឬអាវុធ? នេះជាសំណួរមួយ ដ៏គ្រោះថ្នាក់ខ្លាំងណាស់ ភារៈ? តែកាលណាយើង និយាយដល់តៃវ៉ាន់ គឺមានន័យថា និយាយដល់អាេមេរិកដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ