នាយករដ្ឋមន្ត្រីអង់គ្លេស ប្រកាសថានឹងផ្តល់ទិដ្ឋាការដល់ប្រជាជនហុងកុងជិត៣លាននាក់
នាយករដ្ឋមន្រ្តីអង់គ្លេសលោក បូរីស ចនសុន បានប្រកាសថា ចក្រភពអង់គ្លេសនឹងផ្តល់ទិដ្ឋាការដល់ប្រជាជនហុងកុងចំនួនជិត ៣ លាននាក់ ប្រសិនណាបើចិន នៅតែប្រកាន់ខ្ជាប់ផែនការដាក់ឲ្យអនុវត្តច្បាប់សន្តិសុខជាតិទៅលើដែនដីហុងកុង។ បើតាមលោក ចនសុន ទិដ្ឋាការអង់គ្លេស នឹងបើកផ្លូវឲ្យប្រជាជនហុងកុង អាចទៅរស់នៅ និងទទួលបានសញ្ជាតិអង់គ្លេសផងដែរ។
ចុះផ្សាយនៅថ្ងៃ៖
ស្តាប់ - ០២:០៩
“ប្រជាជនជាច្រើននៅហុងកុង មានការភ័យខ្លាចចំពោះច្បាប់សន្តិសុខជាតិថ្មីរបស់ចិន។ ដូច្នោះហើយ បើចិននៅតែបន្តបន្លាចប្រជាជនហុងកុងឥតឈប់ទេនោះ ចក្រភពអង់គ្លេសនឹងមិនអាចនៅស្ងៀមបានឡើយ”។ នេះ គឺជាសំណេរអត្ថបទមួយរបស់លោកនាយករដ្ឋមន្ត្រីអង់គ្លេស បូរីស ចនសុន ដែលមានចុះចេញផ្សាយនៅក្នុងកាសែតចិន South China Morning Post នៅថ្ងៃពុធ ទី៣ មិថុនានេះ។
នៅក្នុងអត្ថបទដដែលនេះ លោក បូរីស ចនសុន បានសរសេរដែរថា ប្រសិនណាបើចិនដាក់ឲ្យអនុវត្តច្បាប់សន្តិសុខជាតិទៅលើក្រុងហុងកុង នោះ រដ្ឋាភិបាលអង់គ្លេសនឹងផ្លាស់ប្តូរច្បាប់អន្តោប្រវេសន៍របស់ខ្លួន។ ជាការផ្លាស់ប្តូរដ៏ធំបំផុតមួយ ដែលនឹងបើកផ្លូវឲ្យប្រជាជនហុងកុងអាចទៅរស់នៅ ធ្វើការ ព្រមផងទទួលបានសញ្ជាតិអង់គ្លេស។
គួរជម្រាបជូនថា បច្ចុប្បន្ននេះ ប្រជាជនហុងកុងប្រមាណ ៣៥ ម៉ឺននាក់ កាន់លិខិតឆ្លងដែនអង់គ្លេស ដែលអនុញ្ញាតឲ្យពួកគេអាចធ្វើដំណើរចូលទឹកដីអង់គ្លេសបានដោយមិនចាំបាច់មានទិដ្ឋាការរហូតដល់រយៈពេល ៦ ខែ។ មួយវិញទៀត ប្រជាជនហុងកុងប្រមាណ ២ លាន ៥សែននាក់ផ្សេងទៀតនឹងមានសិទ្ធិផងដែរដាក់ពាក្យសុំលិខិតឆ្លងដែនអង់គ្លេសនេះបាន។
បើតាមលោកនាយករដ្ឋមន្ត្រី បូរីស ចនសុន ក្នុងករណីអង់គ្លេសកែប្រែច្បាប់អន្តោប្រវេសន៍ពិតមែននោះ ប្រជាជនហុងកុងដែលកាន់លិខិតឆ្លងដែនអង់គ្លេស នឹងអាចចូលមកប្រទេសអងគ្លេស ដើម្បីពន្យារទិដ្ឋាការបានរហូតដល់រយៈពេល ១២ ខែ និងអាចទទួលបានសិទ្ធិធ្វើអន្តោប្រវេសន៍។ បន្ថែមលើនេះ ពួកគេក៏អាចទទួលបានសិទ្ធិធ្វើការងារ និងបន្ទាប់មកទៀតអាចសុំចូលសញ្ជាតិអង់គ្លេសទៀតផង។
លោកបូរីស ចនសុន បានមានប្រសាសន៍ថា អង់គ្លេសមិនមែនកំពុងស្វះស្វែងទប់ស្កាត់ការលេចត្រដែតឡើងរបស់ចិននោះទេ។ លោកថា អង់គ្លេសស្វាគមន៍ចិនក្នុងនាមជាសមាជិកម្នាក់នៃប្រទេសអ្នកដឹកនាំពិភពលោក ដូច្នោះហើយលោក ចនសុន ក៏សង្ឈឹមដូចគ្នាថា ចិននឹងគោរពតាមកិច្ចព្រមព្រៀងអន្តរជាតិ។ ជាកិច្ចព្រមព្រៀង ដែលលោកនាយករដ្ឋមន្ត្រី បូរីស ចនសុន ចង់សំដៅដល់លក្ខន្តិកៈជាដែនដីស្វយ័តរបស់ហុងកុងដែលចិនបានសន្យាថានឹងគោរពតាមពីឆ្នាំ ១៩៩៧ ដល់ឆ្នាំ ២០៤៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ