ប៉េកាំងចោទក្រុមហ៊ុនហ្វេសប៊ុកថា ប្រកាន់រើសអើង មនោគមវិជ្ជា
ប្រទេសចិន តាមរយៈអ្នកនាំពាក្យរបស់ក្រសួងការបរទេស កាលពីថ្ងៃសុក្រទី៥មិថុនាបានប្រតិកម្មរិះគន់វិធានការថ្មីរបស់ក្រុមហ៊ុនហ្វេសប៊ុក ដែលទីក្រុងប៉េកាំងចាត់ទុកថា ជាការរើសអើងមនោគវិជ្ជា។ នៅថ្ងៃព្រហស្បតិ៍ ក្រុមហ៊ុនបណ្តាញសង្គមហ្វេសប៊ុក បានដាក់ចេញវិធានការជាច្រើន ដូចជា បញ្ជាក់ឈ្មោះប្រព័ន្ធផ្សព្វផ្សាយ ដែលជាកម្មសិទ្ធិរបស់រដ្ឋាភិបាលបរទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ទៅតាមវិធានការថ្មី ដែលក្រុមហ៊ុនបណ្តាញសង្គមហ្វេសប៊ុក បង្ហាញជាផ្លូវការ កាលពីថ្ងៃព្រហស្បតិ៍ រាល់ប្រព័ន្ធផ្សព្វផ្សាយរបស់រដ្ឋ ដែលមានតាំងពីកាសែត និងវិទ្យុទូរទស្សន៍ ដែលបង្ហោះផ្សាយនៅលើបណ្តាញហ្វេសប៊ុក នឹងត្រូវគេបញ្ជាក់អត្តសញ្ញាណយ៉ាងជាក់ច្បាស់ថា ជាកម្មសិទ្ធិរបស់រដ្ឋ។
ច្បាប់ថ្មីរបស់ហ្វេសប៊ុក ធ្វើឲ្យទីក្រុងប៉េកាំងមិនសប្បាយចិត្ត ព្រោះថា ប្រព័ន្ធផ្សព្វផ្សាយរបស់ចិន ភាគច្រើនជាកម្មសិទ្ធិរបស់រដ្ឋអំណាច ជាឧបករណ៍ឃោសនារបស់បក្សកុម្មុយនិស្តចិន ដូចជាទីភ្នាក់ងារស៊ីនហួរ ទីភ្នាក់ងារចិនថ្មី ទូរទស្សន៍CCTV ឬកាសែតអង់គ្លេសChina Daily ជាដើម។ នៅក្នុងសន្និសីទកាសែតកាលពីថ្ងៃសុក្រ អ្នកនាំពាក្យរបស់ក្រសួងការបរទេសចិន អំពាវនាវឲ្យក្រុមហ៊ុនហ្វេសប៊ុកលះបង់ចោល ការប្រកាន់រើសអើងមនោគមវិជ្ជា និងត្រូវធ្វើការ ដោយសមភាព ជាមួយប្រព័ន្ធផ្សព្វផ្សាយបរទេស ដែលមានវត្តមាននៅទឹកដីអាមេរិក។
សម្រាប់ មន្រ្តីហ្វេសប៊ុក ទទួលបន្ទុក សន្តិសុខអ៊ីនធ័រនែត វាជាការធម្មតា ដែលអ្នកប្រើប្រាស់ហ្វេសប៊ុក ត្រូវដឹងថា ព័ត៌មានដែលគេទើបតែអាន ជាព័ត៌មានរបស់ប្រព័ន្ធផ្សព្វផ្សាយ ដែលអាចស្ថិតនៅក្រោមឥទ្ធិពលរបស់រដ្ឋាភិបាល។
ច្បាប់ថ្មីរបស់ហ្វេសប៊ុកសំដៅផងដែរ ហាមមិនឲ្យមានការផ្សាយពាណិជ្ជកម្មរបស់ប្រព័ន្ធផ្សព្វផ្សាយ ដែលគ្រប់គ្រងដោយរដ្ឋបរទេស។
ដោយបង្កើតបទបញ្ជា ថ្មី ហ្វេសប៊ុក មានគោលដៅ ការពារ កុំឲ្យបរទេសអាចលូកដៃ សាជាថ្មី ក្នុងកិច្ចការបោះឆ្នោតប្រធានាធិបតីអាមេរិក នៅខែវិច្ឆិកាចុងឆ្នាំនេះ។ ក្រុមហ៊ុន អាមេរិកាំង បានចាប់ផ្តើម ចាត់វិធានការជាច្រើន ដើម្បីរឹតបន្តឹងខ្លឹមសារចុះផ្សាយនៅលើបណ្តាញហ្វេសប៊ុក បន្ទាប់ពីមានរកឃើញមានប្រតិបត្តិការលូកដៃរបស់បរទេស ជាពិសេស រុស្ស៊ី ទៅក្នុងការបោះឆ្នោតប្រធានាធិបតីអាមេរិកាំង កាលពីឆ្នាំ ២០១៦។ កាលណោះ ហ្វេសប៊ុកបានរកឃើញមានការផ្សាយពាណិជ្ជកម្មជាច្រើនរបស់ប្រព័ន្ធផ្សព្វផ្សាយបរទេស ដែលមានគោលដៅជះឥទ្ធិពលទៅលើការសម្រេចចិត្តរបស់អ្នកបោះឆ្នោតអាមេរិក។
នៅឆ្នាំ ២០១៨ ហ្វេសប៊ុកចាប់ផ្តើមយុទ្ធនាការប្រយុទ្ធប្រឆាំងនឹងព័ត៌មានក្លែងបន្លំ គណនីក្លែងក្លាយ ដែលបង្កើតឡើងដោយក្រុមហ៊ុនបរទេស។ វិធានការថ្មីរបស់ហ្វេសប៊ុក ដែលត្រូវអនុវត្តចាប់ពីខែកក្កដាឆ្នាំ ២០២០ ត្រូវបានបង្កើតឡើង នៅក្នុងកាលៈទេសៈដែលទំនាក់ទំនងចិន-អាមេរិក កាន់តែតានតឹង។ រដ្ឋាភិបាលប្រទេសទាំងពីរបានបណ្តេញអ្នកកាសែត គ្នាទៅវិញ ដោយសារតែវិបត្តិកូវីដ និងបញ្ហាសិទ្ធិមនុស្សនៅហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ