ឥណ្ឌានិងអូស្ត្រាលី ចុះកិច្ចព្រមព្រៀងសហប្រតិបត្តិការ ក្នុងនោះមានចំណងសហការផ្នែកយោធា
ចុះផ្សាយនៅថ្ងៃ៖
ស្តាប់ - ០៧:៤៩
កាលពីរសៀលថ្ងៃព្រហស្បតិ៍ ទី៤មិថុនា ឥណ្ឌា និង អូស្ត្រាលី ទើបបានចុះកិច្ចព្រមព្រៀងសហប្រតិបត្តិការជាមួយគ្នា ជាច្រើនវិស័យ ក្នុងនោះមានកិច្ចព្រមព្រៀងសហប្រតិបត្តិការយោធា។ ការខិតទៅជិតចាប់ដៃគ្នា រវាងឥណ្ឌា និងអូស្ត្រាលីនាពេលនេះ គឺវាស្ថិតក្នុងបរិបទ នៃយុទ្ធសាស្ត្រវាទទីរបស់ចិន និងក្នុងតំបន់អាស៊ីប៉ាស៊ីហ្វិក ព្រមទាំងភាពចុះខ្សោយនៃវត្តមានរបស់អាេមរិក នៅក្នុងតំបន់នេះ។ តើ ឥណ្ឌា និង អូស្ត្រាលី កំពុងតែរកវិធីរៀបចំយុទ្ធសាស្ត្រ ពួតដៃគ្នាការពារខ្លួន និងទប់ទល់ជាមួយចិន ឬ?
តាមពិតទៅ លោក ស្កុត ម៉ូរីសុន នាយករដ្ឋមន្ត្រីអូស្ត្រាលី មានគម្រោង ទៅកាន់ទីក្រុងញូដេលី ដើម្បីធ្វើទស្សនកិច្ច និងចុះហត្ថលេខា តែគម្រោងនេះ បានលើកម្តងជា២ដង ដោយសារដំបូង គឺភ្លើងឆេះព្រៃនៅអូស្ត្រាលី ហើយក្រោយមកគឺដោយសារតែការឆ្លងរាតត្បាតនូវជំងឺកូវីដ១៩នេះតែម្តង។ ម្លោះហើយ ពេលនេះ គេបានសម្រេច ចុះកិច្ចព្រមព្រៀងពីចំងាយ តាមរយៈប្រព័ន្ធវីស្យូខុនហ្វឺរិនស៍ពីចំងាយ។
ក្នុងចំណោមកិច្ចព្រមព្រៀងដែលគេបានចុះហត្ថលេខា គឺមានក្នុងវិស័យសិក្សាអបរំ វិស័យវិទ្យាសាស្ត្រ បច្ចេកវិទ្យា ព្រមទាំងវិស័យធនធានរ៉ែ។ ដូចយើងធ្លាប់ដឹងហើយ ឥណ្ឌាមានមហិច្ឆិតា ចង់ក្លាយជាមហាអំណាចម្នាក់ ក្នុងវិស័យបច្ចេកវិទ្យា និងវិស្វកម្ម។ និស្សិតឥណ្ឌាច្រើនណាស់ ដែលកំពុងតែរៀនជំនាញនេះ ហើយអ្នកខ្លះបានចេញទៅស្រូបបទពិសោធន៍ នៅក្រៅប្រទេសរួចទៅហើយ។ ចំណែកអូស្ត្រលីវិញ ជាប្រទេសដ៏ធំល្វឹងល្វើយ ដែលសំបូរធនធានរ៉ែកម្រ ហើយដែលចាំបាច់បំផុតក្នុងការផលិតឧបករណ៍ បច្ចេកវិទ្យាទំនើប។ ដូច្នេះចំណងសហប្រតិបត្តិការរវាងប្រទេសទាំង២ ក្នុងវិស័យទាំងនេះ គឺជារឿងមួយធម្មតាបំផុត។
កិច្ចព្រមព្រៀងសហប្រតិបត្តិការយោធា ឥណ្ឌា- អូស្ត្រាលី
អ្វីដែលពិសេស គួរឲ្យចាប់អារម្មណ៍បំផុតនោះ គឺ ឥណ្ឌា និង អូស្ត្រាលី ក៍បានចុះកិច្ចព្រមព្រៀងសហប្រតិបត្តិការផ្នែកយោធា ជាមួយគ្នា។ និយាយឲ្យលំអិត គឺជាកិច្ចព្រមព្រៀង ជួយគ្នាទៅវិញទៅមកផ្នែកភស្តុភា និងសហប្រតិបត្តិការសន្តិសុខផ្លូវសមុទ្រ។
នៅក្នុងឱកាសចុះហត្ថលេខានេះ លោកនាយករដ្ឋមន្ត្រីឥណ្ឌា ណារិន្ទ្រា ម៉ូឌី បានលើកឡើងថា ឥណ្ឌាប្តេជ្ញា ពង្រឹងនិងកសាងសហប្រតិបត្តិការឲ្យកាន់តែស្អិតរមួត ជាមួយអូស្ត្រាលី។ លោកបន្តថា មិត្តភាព និងការសហការគ្នានេះ គឺមិនមែនដើម្បី តែប្រយោជន៍រវាងប្រទេសទាំង២នោះទេ តែក៏វាសំខាន់ណាស់ដែរ សម្រាប់តំបន់ ឥណ្ឌូប៉ាស៊ីហ្វិកទាំងមូលតែម្តង។ ចំណែកលោក ស្កុត ម៉ូរីសុន នាយករដ្ឋមន្ត្រីអូស្ត្រាលីវិញ បានលើកឡើងថា ស្ថិតក្នុងកាលៈទេសៈបច្ចុប្បន្ននេះ អូស្ត្រាលីមានបំណងចង់បានដៃគូ មិត្តភាពគួរជាទីទុកចិត្តដូចជាឥណ្ឌា។
នៅខាងចុងបញ្ចប់នៃសន្និសីទពីចំងាយនេះ ភាគីទាំងសងខាង បានប្រកាសរួមគ្នាថា ចាប់ពីពេលនេះទៅ រដ្ឋមន្ត្រីការបរទេស និងរដ្ឋមន្ត្រីការពារជាតិ នៃប្រទេសទាំង២ នឹងជួបប្រជុំគ្នាឲ្យបានមួយឆ្នាំ២ដង ដើម្បីនិយាយគ្នាពីយុទ្ធសាស្ត្រផ្សេងៗ។
មិននិយាយពីចិន តែគិតទៅដល់ចិនគ្រប់វិនាទី
មន្ត្រីទូតជាន់ខ្ពស់ម្នាក់ របស់ឥណ្ឌា បានអះអាងប្រាប់អ្នកកាសែតថា ភាគីឥណ្ឌា និងអូស្ត្រាលី មិនបាននិយាយអំពីបញ្ហាចិនទេ នៅក្នុងសន្និសីទជំនួបកំពូលពីចំងាយនេះ។ តែយ៉ាងណាក៏ដោយ អ្នកវិភាគភូមិសាស្ត្រនយោបាយគ្រប់គ្នា លើកឡើងថា វាគ្មានអ្វីត្រូវឆ្ងល់ទេ ការចាប់ដៃពួតគ្នា រវាងឥណ្ឌា និង អូស្ត្រាលីនាពេលនេះ គឺប្រទេសទាំងត្រូវការកម្លាំងជួយគ្នា ក្នុងគ្រាអាសន្នណាមួយ ដែលអាចប្រឈមជាមួយចិន។ ជាពិសេសទៀតនោះ បច្ចុប្បន្ននេះ ចិន និងអាមេរិក កំពុងតែសង្រ្កឺតធ្មេញដាក់គ្នាខ្លាំងសម្បើមណាស់។
យ៉ាងណាមិញ លោក Purnendra Jain សាស្ត្រាចារ្យនៅសកលវិទ្យាល័យAdélaïdeអូស្ត្រាលី បាននិយាយប្រាប់ AFP ថា លោកគិតថាគេមិនបានបញ្ចេញឈ្មោះចិន នៅក្នុងពេលជំនួបកំពូលមែន។ តែលោកជឿច្បាស់ណាស់ ថាស្រមោលរបស់ចិន មានពេញនៅក្នុងខួរក្បាលរបស់មេដឹកនាំអូស្ត្រាលី និងឥណ្ឌា។
លោកសាស្ត្រាចារ្យរូបនេះបន្ថែមថា នាយករដ្ឋមន្ត្រីឥណ្ឌា និងអូស្ត្រាលី យល់ដឹងយ៉ាងច្បាស់ ថាបច្ចុប្បន្ននេះ កាលៈទេសៈវាច្របូលច្របល់ និងតានតឹងកម្រិតណា។ ដូច្នេះ ប្រទេសទាំង២ត្រូវតែរួមគ្នាធ្វើអ្វីម្យ៉ាង ដើម្បីជួួយទប់កម្លាំងគ្នាប្រឈមជាមួយចិន ដែលជាមហាអំណាចវាទទីក្នុងតំបន់ មិនថាទាក់ទិននឹងបញ្ហាជំងឺឆ្លងកូវីដ១៩ មិនថាទាក់ទិននឹងបញ្ហាការដោះដូរពាណិជ្ជកម្មសេរី ហើយជាពិសេសនោះ គឺថាត្រូវប្រកាន់ជំហរបែបណាជាមួយចិន។
រកវិធីបង្ហាញកម្លាំង ការពារតំបន់ឥណ្ឌូប៉ាស៊ីហ្វិក ពីការវាតទីរបស់ចិន
ឥណ្ឌា និងអូស្ត្រាលី គឺជាប្រទេស២ដ៏សំខាន់ នៅក្នុងតំបន់យុទ្ធសាស្ត្រ ឥណ្ឌូប៉ាស៊ីហ្វិក ដែលបច្ចុប្បន្ននេះ កំពុងតែស្ថិតក្នុងយុទ្ធសាស្រ្តវាតទីរបស់ចិន។ ដូច្នេះ ចំណងសហប្រតិបត្តិការក្នុងវិស័យសន្តិសុខផ្លូវសមុទ្រ រវាងឥណ្ឌា និង អូស្ត្រាលីនាពេលនេះ គឺវាបានស្តែងច្បាស់ណាស់ អំពីការរួមកម្លាំងគ្នា ការពារតំបន់នេះ ពីការវាទទីរបស់ចិន។
សកម្មភាពវាទទីរបស់ចិន នៅក្នុងតំបន់សមុទ្រចិនខាងត្បូង តំបន់ប៉ាស៊ីហ្វិក និងតំបន់ជុំវិញសមុទ្រឥណ្ឌា បានធ្វើឲ្យឥណ្ឌា និង អូស្ត្រាលី មានការក្តៅក្រហាយក្នុងចិត្តមិនតិចទេ។ និយាយឲ្យចំ គឺប្រទេសទាំង២នេះ សុទ្ធតែមានបញ្ហា រកាំរកូសជាមួយនឹងចិន។ ឥណ្ឌា វិញ មិនមែនត្រឹមតែបញ្ហា ក្នុងតំបន់លំហសមុទ្រទេ តែក៏មានបញ្ហាព្រំដែនដីគោក ជាមួយចិនដែរ។ យ៉ាងណាមិញ ប៉ុន្មានថ្ងៃចុងក្រោយនេះ បណ្តាញព័ត៌មានឥណ្ឌា បានចុះផ្សាយច្រើនណាស់ អំពីការដែលចិនបញ្ជូនទ័ព ចូលជ្រៅមកខាងដីឥណ្ឌា នៅតំបន់ Ladakh លើជួរភ្នំហិមាល័យ។
តំបន់លំហសមុទ្រ ឥណ្ឌូប៉ាស៊ីហ្វិកនេះ ជាតំបន់រសើបខ្លាំងណាស់ ព្រោះវាជាតំបន់ឆ្លងកាត់ នាវាដឹកទំនិញ និងជាពិសេសគឺនាវាដឹកប្រេងតែម្តង។ កាលពីឆ្នាំ២០១០ ជំនាន់លោកអូបាម៉ា រដ្ឋាភិបាលអាមេរិក បានបង្កើនកិច្ចសហការផ្នែកសន្តិសុខផ្លូវសមុទ្រ ក្នុងតំបន់នេះ ដោយមានការចូលរួម ពីអូស្ត្រាលី សិង្ហបុរី ឥណ្ឌូណេស៊ី និងឥណ្ឌា។
បច្ចុប្បន្ន ចិនកំពុងអនុវត្តយុទ្ធសាស្រ្តផ្លូវមួយខ្សែក្រវ៉ាត់មួយរបស់ខ្លួន នៅក្នុងតំបន់នេះ។ ចិនមានវត្តមានដាក់ពង្រាយកម្លាំង ព័ទ្ធសឹងតែជុំវិញទៅហើយ។ ចិនបាននិងកំពុង សាងសង់នូវកំពង់ផែយុទ្ធសាស្ត្រជាច្រើនកន្លែង ជុំវិញមហាសមុទ្រឥណ្ឌា ដូចជានៅភូមា បង់ក្លាដែស នៅស្រីលង្ការ នៅចំហៀងខាងកើតអាហ្វ្រិក នៅម៉ាល់ឌីវ និងជាពិសេសនៅប៉ាគីស្ថាន ដែលជាសត្រូវធំរបស់ឥណ្ឌា។ ចង់មិនចង់ ទាំងឥណ្ឌា ទាំងអូស្ត្រាលី មានអារម្មណ៍ថា ចិនកំពុងតែបិទផ្លូវគ្រប់ច្រក។
ជាងនេះទៀត រដ្ឋាអាេមរិកបច្ចុប្បន្ន ដឹកនាំដោយលោកដូណាល់ ត្រាំ មិនបានធ្វើឲ្យអូស្ត្រាលី និងឥណ្ឌា មានការទុកចិត្ត ថាអាចមកជួយបាននោះទេ។ អាមេរិក ដែលកំពុងតែទន់ខ្សោយសេដ្ឋកិច្ច ហើយមានវិបត្តិផ្ទៃក្នុងទៀត តើឲ្យប្រទេសជាមិត្តសង្ឃឹមរំពឹងអីបាន។ ដូច្នេះហើយ បានជាអូស្ត្រាលី និងឥណ្ឌា រកវិធីការពារខ្លួនដោយខ្លួនឯង។ ប្រទេសទាំងពីរនេះ បានចាប់ផ្តើមទិញសម្ភារៈយោធាច្រើនណាស់ មានទាំងយន្តហោះចម្បាំង នាវាចម្បាំង និងនាវាមុធទឹកបាតសមុទ្រ ដើម្បីបង្ហាញថា ខ្លួនគឺជាម្ចាស់អំណាច រក្សាសន្តិសុខ ក្នុងតំបន់ឥណ្ឌូប៉ាស៊ីហ្វិកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ