កូរ៉េខាងជើង គំរាមបិទការិយាល័យទំនាក់ទំនងជាមួយកូរ៉េខាងត្បូង
កូរ៉េខាងជើង នៅថ្ងៃសៅរ៍ ទី ៦ មិថុនានេះ បានគំរាមបិទការិយាល័យទំនាក់ទំនងជាមួយកូរ៉េខាងត្បូងជាអចិន្ត្រៃយ៍ ចំពោះការដែលកូរ៉េខាងត្បូងខកខានក្នុងការរារាំងសកម្មជនមួយចំនួន កុំឲ្យចែកចាយខិត្តប័ណ្ណប្រឆាំងនឹងកូរ៉េខាងជើងនៅតាមតំបន់ព្រំដែននៃប្រទេសទាំងពីរ។ ធ្ងន់ធ្ងរជាងនេះទៅទៀតនោះ មន្ត្រីរបបក្រុងព្យុងយ៉ាង ថាខ្លួននឹងចាប់ផ្តើមយុទ្ធនាការធ្វើឲ្យសេអ៊ូលឈឺចាប់ទៀតផង បើសិនសេអ៊ូលនៅតែមិនអាចផ្តល់ដំណោះស្រាយតាមដែលព្យុងយ៉ាងចង់បាន។
ចុះផ្សាយនៅថ្ងៃ៖
ស្តាប់ - ០១:៥៤
ការព្រមានរបស់កូរ៉េខាងជើងខាងលើនេះ បានធ្វើឡើងតែមួយថ្ងៃប៉ុណ្ណោះបន្ទាប់ពីការព្រមានរបស់លោកស្រី គីម យ៉ូជុង ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើងគីម ជុងអ៊ុន។
កាលពីថ្ងៃព្រហស្បតិ៍ម្សិលម្ងៃ ប្អូនស្រីរបស់ គីម ជុងអ៊ុន បានគំរាមថានឹងបញ្ចប់កិច្ចព្រមព្រៀងយោធាឆ្នាំ ២០១៨ ដែលជាកិច្ចព្រមព្រៀងកាត់បន្ថយភាពតានតឹងរវាងប្រទេសបងប្អូនកូរ៉េទាំងពីរ ប្រសិនណាបើទីក្រុងសេអ៊ូល មិនអាចបញ្ឈប់ក្រុមសកម្មជន ដែលសុទ្ធតែជាទាហានរត់គេចពីកូរ៉េខាងជើងពីការបញ្ជូនសារប្រឆាំងនឹងរបបព្យុងយ៉ាងទេនោះ។
ក្រៅតែពីបញ្ចេញនូវសារព្រមានចំៗ កូរ៉េខាងជើងថែមទាំងបានគំរាមធ្វើឲ្យកូរ៉េខាងត្បូងរងទុក្ខទៀតផង ប្រសិនណាបើកូរ៉េខាងត្បូង មិនអាចរារាំង ក្រុមសកម្មជន ពីការចែកចាយព័ត៌មានរិះគន់របបគ្រប់គ្រង និងមហិច្ឆតានុយក្លេអ៊ែររបស់ក្រុងព្យុងយ៉ាង។
“រឿងដំបូងដែលយើងប្រាកដថានឹងធ្វើនោះគឺការដកមកវិញនូវការិយាល័យទំនាក់ទំនងរួមគ្នារវាងកូរ៉េខាងជើង-កូរ៉េខាងត្បូង”។ នេះ គឺជាការលើកឡើងរបស់អ្នកនាំពាក្យនាយកដ្ឋានរណសិរ្សបង្រួបបង្រួមកូរ៉េខាងជើង។ មន្ត្រីកូរ៉េខាងជើងដដែលនេះបានលើកឡើងដែរថា វិធានការផ្សេងៗនឹងធ្លាក់មកបន្តកន្ទុយគ្នាទៀតដើម្បីជាការដាក់ទណ្ឌកម្មទៅលើក្រុងសេអ៊ូល។
ដោយមើលឃើញថាកិច្ចសហប្រតិបត្តិការអន្តរកូរ៉េកំពុងធ្លាក់ចុះខ្លាំង ជាការឆ្លើយតប កូរ៉េខាងត្បូងបាននិយាយថា ខ្លួននឹងជំរុញឲ្យមានច្បាប់ថ្មីមួយ ដើម្បីហាមឃាត់សកម្មជនពីការបញ្ជូនខិត្តប័ណ្ណរិះគន់របបគ្រប់គ្រងរបស់គីម ជុងអ៊ុន ចូលទឹកដីកូរ៉េខាងជើងតាមរយៈការបង្ហោះប៉េងប៉ោង។
ក៏ប៉ុន្តែ ចំណាត់ការថ្មីរបស់ក្រុងសេអ៊ូលបែបនេះ បានបំផុសឲ្យមានខ្វែងគំនិតគ្នាជាច្រើន អំពីការរំលោភលើសិទ្ធិសេរីភាពនៃការបញ្ចេញមតិ។ យ៉ាងណាក៏ដោយ មន្ត្រីការិយាល័យប្រធានាធិបតីកូរ៉េខាងត្បូង បាននិយាយថា យុទ្ធនាការចែកចាយខិត្តប័ណ្ណរិះគន់គីម ជុងអ៊ុន បង្កជាអន្តរាយច្រើនជាងផលល្អ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ