រដ្ឋាភិបាលចិនប្រាប់ពលរដ្ឋខ្លួនកុំឲ្យទៅរៀន និងដើរកំសាន្តនៅអូស្ត្រាលី
ភាពតានតឹង ចិន អូស្ត្រាលី កាន់តែធ្លាក់ចុះដុនដាបមួយកម្រិតទៀត។ នៅថ្ងៃ អង្គារម្សិលមិញ ក្រសួងអប់រំចិន ទើបបានចេញសេចក្តីប្រកាស ណែនាំនិស្សិតចិនឲ្យប្រុងប្រយ័ត្ន មុននឹងសម្រេចជ្រើសរើសយកអូស្ត្រាលី ជាកន្លែងសម្រាប់បន្តការសិក្សានៅបរទេស។ ក្រសួងអប់រំចិនបានលើកឡើងពីគ្រោះថ្នាក់ ឆ្លងជំងឺកូវីដ និងការរើសអើង ស្អប់ជនជាតិអាស៊ី នៅអូស្ត្រាលី។ តើពហិការរបស់និស្សិតចិននឹងអាចប៉ះពាល់យ៉ាងណា ដល់វិស័យអប់រំអូស្ត្រាលី?
ចុះផ្សាយនៅថ្ងៃ៖
ស្តាប់ - ០២:១៦
នៅក្នុងសេចក្តីប្រកាស ចុះផ្សាយនៅថ្ងៃអង្គារ ក្រសួងអប់រំចិន បានក្រើនរំលឹកនិស្សិតចិន ឲ្យពិចារណា និងប្រុងប្រយ័ត្នពីគ្រោះថ្នាក់ បើសិន ពួកគេចង់ចុះឈ្មោះរៀន ឬត្រលប់ទៅរៀនបន្តនៅប្រទេសអូស្ត្រាលី។ ក្រសួងអប់រំចិនបានលើកឡើងពី លទ្ធភាពឆ្លងជំងឺកូវីដ នៅក្នុងពេលធ្វើដំណើរ ហើយនិងការកើតឡើង ជាបន្តន្ទាប់ ករណីរើសអើងជនជាតិអាស៊ី នៅទឹកដីអូស្ត្រាលី នៅក្នុងកាលៈទេសៈនៃការឆ្លងរាតត្បាតជំងឺកូវីដ១៩ ដែលមានប្រភពដើមដំបូង ចេញពីប្រទេសចិន។
នៅថ្ងៃចន្ទ ក្រសួងការបរទេសចិនបានទាញសញ្ញាអាសន្នស្តីពីស្ថានភាពរបស់ប្រជាជនដែលមានដើមកំណើតអាស៊ី នៅប្រទេសអូស្ត្រាលី។ តាមអ្នកនាំពាក្យរបស់ក្រសួងការបរទេសចិន ជនជាតិចិនជាច្រើន ត្រូវគេជេរប្រមាថ ឬវាយឲ្យរបួស នៅអូស្ត្រាលី។ ចំណែក ពាក្យជេរសំដៅរើសអើងពូជសាសន៍ចិន ក៏មានសរសេរកាន់តែច្រើនណាស់ដែរ។
នៅថ្ងៃចន្ទដដែល រដ្ឋមន្រ្តីក្រសួងពាណិជ្ជកម្មអូស្ត្រាលី ទទួលស្គាល់ថា ពិតជាមានកើតឡើង ឧប្បត្តិហេតុ ដែលមានលក្ខណៈរើសអើងពូជសាសន៍ ប៉ុន្តែ លោកច្រានចោល ការលើកឡើងដែលថា អូស្ត្រាលីមិនមែនជាកន្លែងសុវត្ថិភាព សម្រាប់ជនបរទេស។
នៅថ្ងៃសុក្រ សប្តាហ៍មុន ក្រសួងទេសចរណ៍ចិន បានអំពាវនាវកុំឲ្យប្រជាជនចិន ធ្វើដំណើរទៅអូស្ត្រាលី។ នៅក្នុងកាលៈទេសៈ ដែលអូស្ត្រាលីនៅបន្តបិទព្រំដែន ដោយសារវិបត្តិកូវីដ ការប្រកាស របស់អាជ្ញាធរចិន ហាមមិនឲ្យប្រជាជនរបស់ខ្លួន ធ្វើដំណើរទៅអូស្ត្រាលី មានតម្លៃជានិមិត្តរូប ច្រើនជាង ការដាក់ទណ្ឌកម្មជាក់ស្តែង។
ប៉ុន្តែ បើសិន អ្នកទេសចរ និងនិស្សិតចិន នៅតែបន្ត ធ្វើពហិកា មិនទៅប្រទេសអូស្ត្រាលី នៅក្រោយចប់វិបត្តិកូវីដ នោះអូស្ត្រាលីនឹងខាតបង់យ៉ាងធ្ងន់ធ្ងរ ផ្នែកហិរញ្ញវត្ថុ។ នៅឆ្នាំ ២០១៨ អ្នកទេសចរចិន ជាង ១លាន៤សែននាក់ បាននាំចំណូល ប្រមាណ ១៣ពាន់លានដុល្លារសម្រាប់ឧស្សាហកម្មទេសចរណ៍អូស្ត្រាលី។ ពហិកាណាមួយរបស់និស្សិតចិន នឹងប៉ះពាល់ខ្លាំងដល់វិស័យអប់រំ របស់អូស្ត្រាលី ព្រោះថា និស្សិតចិនមានចំនួននាំមុខគេក្នុងចំណោមនិស្សិតបរទេសដែលសិក្សា នៅតាមសកលវិទ្យាល័យអូស្ត្រាលី។ គួររំលឹកថា វិស័យអប់រំអូស្ត្រាលី ជាប្រភពចំណូលសំខាន់ទី៣របស់សេដ្ឋកិច្ចអូស្ត្រាលី បន្ទាប់ពីការនាំចេញ ដែក និងធ្យូងថ្ម។ នៅឆ្នាំមុន ការចុះឈ្មោះរបស់និស្សិតបរទេសជាង ៥សែននាក់ បាននាំចំណូល គិតជាទឹកប្រាក់ ប្រមាណ ២២ពាន់លានដុល្លារ សម្រាប់សេដ្ឋកិច្ច អូស្ត្រាលី។
នៅប៉ុន្មានសប្តាហ៍មកនេះ ទីក្រុងប៉េកាំងបាន ចាត់វិធានការជាបន្តបន្ទាប់ ប្រឆាំងអូស្ត្រាលី ដូចជា ផ្អាកឈប់នាំចូល សាច់គោ និងស្រូវសាឡីរបស់អូស្ត្រាលី បន្ទាប់ពី រដ្ឋាភិបាលអូស្ត្រាលី គាំទ្រឲ្យមានការស៊ើបអង្កេតស្តីពីប្រភព និងគ្រប់គ្រងវិបត្តិកូវីដ នៅប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ