កូរ៉េខាងជើងថាលែងសូវមានប្រយោជន៍ដែលត្រូវរក្សាទំនាក់ទំនងល្អរវាង គីម-ត្រាំ
ចុះផ្សាយនៅថ្ងៃ៖
ស្តាប់ - ០៦:២៦
១២មិថុនា២០១៨-១២មិថុនា២០២០ ថ្ងៃនេះជាខួបពីរឆ្នាំគត់នៃជំនួបជាលើកប្រវត្តិសាស្ត្ររវាងប្រធានាធិបតីអាមេរិកកំពុងកាន់អំណាច ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន។ ពីរឆ្នាំក្រោយ ក្តីសង្ឃឹមបានរលាយស្ទើរអស់។ ក្នុងថ្ងៃខួប ព្យុងយ៉ាងបាន បរិហាររិះគន់ ដោយប្រើពាក្យចោទប្រកាន់ធ្ងន់ៗថាអាមេរិកមានពុតត្បុត និងបានប្រកាសថា ការរក្សាទំនាក់ទំនងល្អជាលក្ខណៈបុគ្គលរវាងលោកត្រាំ និងលោកគីម ដូចជាលែងសូវមានប្រយោជន៍ទៀតហើយ។
តាំងពីប៉ុន្មានថ្ងៃមកហើយដែលព្យុងយ៉ាងបានបង្កើនការវាយប្រហារជាពាក្យសំដីលើសហរដ្ឋអាមេរិកនិងកូរ៉េខាងត្បូង។ កាលពីថ្ងៃពុធទី ១០មិថុនា កូរ៉េខាងជើងបានប្រកាសផ្តាច់រាល់គ្រប់បណ្តាញទំនាក់ទំនងជាមួយកូរ៉េខាងត្បូង។ នៅថ្ងៃព្រហស្បតិ៍ ព្យុងយ៉ាងបានព្រមានដោយប្រយោលថានឹងទៅរំខានសម័យបោះឆ្នោតប្រធានាធិបតីខែវិច្ឆកា ប្រសិនបើអាមេរិក នៅបន្តលូកលាន់ក្នុងវិបត្តិអន្តរកូរ៉េ។
នៅថ្ងៃសុក្រទី ១២មិថុនានេះ ការវាយប្រហារ និងរិះគន់អាមេរិក មានកាន់តែខ្លាំង និងដោយពាក្យសំដីធ្ងន់ៗក្រៃមិនធ្លាប់ជួបប្រទះពីមុនទេ។ ដូចចង់ជម្រះបញ្ជី រដ្ឋមន្ត្រីក្រសួងការបរទេសកូរ៉េខាងជើង លោក Ri Son Gwon បានចោទសហរដ្ឋអាមេរិកថា មានពុតត្បុត និងបានស្វែងរកវិធីផ្តួលទម្លាក់របបដឹកនាំព្យុងយ៉ាង។ បើតាមមន្ត្រីរូបនេះ ក្តីសង្ឃឹមដ៏ធំធេងរបស់ពិភពលោក ដែលដុះចេញពីជំនួបកំពូលជាប្រវត្តិសាស្ត្រ និងប្រកបដោយនិម្មិត្តរូបបំផុតនៅសិង្ហបុរី កំពុងក្លាយជា សុបិន្តដ៏អាក្រក់បំផុត និងជាការខកចិត្តអស់សង្ឃឹមយ៉ាងខ្លាំង។
សន្យាខ្យល់
លោករី បានអះអាងថា ប្រជាពលរដ្ឋកូរ៉េ ចង់បានសន្តិភាពណាស់ តែវ៉ាស៊ីនតោនបែរប្រឹងធ្វើគ្រប់យ៉ាង ដើម្បីទម្លាក់ស្ថានភាពឱ្យដុនដាបនិងធ្ងន់ធ្ងរទៅវិញ។ កូរ៉េខាងជើងមានឆន្ទៈមុះមុតជាងពេលណាទាំងអស់ ចង់បញ្ចប់ភាពស្អប់ខ្ពើមគ្នារវាងព្យុងយ៉ាងនិងវ៉ាស៊ីនតោន ហើយបើកសករាជថ្មីនៃកិច្ចសហប្រតិបត្តិការ សករាជសន្តិភាព និងរុងរឿង ដោយបានប្រឹងប្រែងបញ្ចេញសកម្មភាពរំសាយនុយក្លេអ៊ែរជាច្រើន ក្រោយពីជំនួបកំពូលរវាងលោកដូណាល់ ត្រាំ និងលោក គីមជុងអ៊ុន។
នៅថ្ងៃទី ១២មិថុនា២០១៨ លោក ត្រាំ និងលោកគីម បានបើកជំនួបកំពូលជាលើកទីមួយ និងជាប្រវត្តិសាស្ត្រនៅប្រទេសសិង្ហបុរី។ មេដឹកនាំទាំងពីរបានសេចក្តីថ្លែងការណ៍រួមដោយគ្មានការលម្អិតខ្លឹមសារថា អំពីការព្រមព្រៀងរំសាយអាវុធនុយក្លេអ៊ែរពីឧបទ្វីបកូរ៉េ។ លោកត្រាំផ្ទាល់បានបង្ហោះសារថា ព្យុងយ៉ាងលែងជាការគំរាមកំហែងនុយក្លេអ៊ែរទៀតហើយ។
ជំនួបកំពូលលើកទីពីរ នៅខែកុម្ភៈឆ្នាំ២០១៩ នៅទីក្រុងហាណូយ ជាបរាជ័យទាំងស្រុង ភាគីទាំងពីរមិនអាចព្រមព្រៀងគ្នារវាងការព្រមធ្វើសម្បទានរបស់កូរ៉េខាងជើងជាថ្នូរនឹងការលើកទណ្ឌកម្មខ្លះ។
អ្នកការទូតអាមេរិកនៅតែបន្តអះអាងថា កូរ៉េខាងជើងមិនចាត់វិធានការរំសាយនុយក្លេអ៊ែរទេ។ តែបើតាមតាមរដ្ឋមន្ត្រីក្រសួងការបរទេសកូរ៉េខាងជើង ព្យុងយ៉ាងគួរតែបានទទួលរង្វាន់លួងចិត្តខ្លះ ចំពោះការសម្រេចចិត្តផ្អាកការសាកល្បងនុយក្លេអ៊ែរ មីស៊ីសបាលីស្ទិកអន្តរទ្វីប ចំពោះការរំសាយមជ្ឈមណ្ឌលនុយក្លេអ៊ែរ ឬចំពោះការព្រមបញ្ជូនឥដ្ឋិធាតុទាហានអាមេរិកស្លាប់ក្នុងសង្គ្រាមកូរ៉េពីឆ្នាំ១៩៥០ដល់ឆ្នាំ១៩៥៣។
កូរ៉េខាងជើងបានផ្តល់អោយអាមេរិកច្រើនតែគ្មានបានអ្វីត្រលប់មកវិញសោះ។ កូរ៉េខាងជើងបន្តជាប់ទណ្ឌកម្មអន្តរជាតិយ៉ាងធ្ងន់ធ្ងរដដែល។ សម្រាប់លោករី គ្មានអ្វីអាក្រក់ជាងសន្យាហើយមិនគោរពទេ។ ដូច្នេះកូរ៉េខាងជើងនឹងលែងផ្តល់អ្វីឱ្យមេដឹកនាំអាមេរិក ដោយមិនអាចទទួលអ្វីបានមកវិញឡើយ។
ទំនាក់ទំនងល្អ បែបបុគ្គល លែងសូវមានប្រយោជន៍
លោកត្រាំនៅតែបន្តអួតអាងថាមានទំនាក់ទំនងជាលក្ខណៈល្អជាមួយលោក គីម ជុងអ៊ុន ដែលបុរសខ្លាំងទាំងពីរបានជួបគ្នាជាលើកទីបី នៅខែមិថុនា២០១៩ នៅតំបន់គ្មានកងទ័ពត្រង់បន្ទាត់ព្រំដែនខ័ណ្ឌចែកកូរ៉េទាំងពីរ។ លោកត្រាំ ថែមទាំងបានឆ្លងចូលជាន់ដីកូរ៉េខាងជើងជាលើកទីមួយផង។
ប៉ុន្តែ សម្រាប់ព្យុងយ៉ាង ភាពជឿនលឿនការទូតមិនអាចកំរិតត្រឹមការរក្សាទំនាក់ទំនងល្អ ជាលក្ខណៈបុគ្គល រវាងមេដឹកនាំទាំងពីរបានទេ។ ភាពល្អូនល្អើនរបស់មេដឹកនាំទាំងពីរផ្តល់ប្រយោជន៍តិចតួចណាស់។ ស្ថានភាពនៅឧបទ្វីបកូរ៉េបានធ្លាក់ចុះដុនដាបជាលំដាប់ ទៅតាមរលកនៃទំនាក់ទំនងអាមេរិក-កូរ៉េខាងជើង នារយៈពេលពីរឆ្នាំមកនេះ។ បើតាមលោក រី ត្រាំ អ្វីៗដែលរដ្ឋបាលលោកដូណាល់បានធ្វើកន្លងមក គឺ គ្រាន់តែដើម្បីបានចំណេញនយោបាយលើឆាកអន្តរជាតិ ដោយទុកកូរ៉េខាងជើងឱ្យនៅឯកាដដែល។
ជាមួយពន្លឺសុទិដ្ឋនិយមតែតិចៗទៅ កូរ៉េខាងជើងត្រូវពង្រឹងសមត្ថភាពនុយក្លេអ៊ែរឡើងវិញ ដើម្បីទប់ទល់អាមេរិក។ ដូច្នេះជាផលវិបាក ឧបទ្វីបកូរ៉េពេលនេះក្លាយជាតំបន់ក្តៅនិងដ៏គ្រោះថ្នាក់ជាងគេនៅលើពិភពលោក ដោយមានស្រមោលសង្គ្រាមនុយក្លេអ៊ែរ អន្ទោលតាមជាប់ស្អិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ