ក្រុមប្រទេសG7 ទាមទារឲ្យចិនបោះបង់ចោលគម្រោងអនុម័តច្បាប់សន្តិសុខជាតិហុងកុង
ក្រុមប្រទេសមហាអំណាចឧស្សាហកម្ម G7 នៅថ្ងៃពុធម្សិលមិញ បានចេញសេចក្តីប្រកាសទាមទារឲ្យប្រទេសចិន លះបង់ចោលគម្រោងការអនុវត្តច្បាប់ ស្តីពីសន្តិសុខជាតិ នៅហុងកុង។ ទីក្រុងប៉េកាំង តាមរយៈ រដ្ឋមន្រ្តីការបរទេស លោកយ៉ាង ជាឈី បានច្រានចោលយ៉ាងដាច់អហង្កា ការទាមទាររបស់ក្រុមប្រទេសG7។ នៅទីក្រុងប៉េកាំង ចាប់ពីថ្ងៃព្រហស្បតិ៍នេះ រហូតដល់ថ្ងៃសៅរ៍ គណៈកម្មាធិការអចិន្ត្រៃយ៍របស់សភា នឹងពិភាក្សាពីសេចក្តីព្រាងច្បាប់ស្តីពីសន្តិសុខជាតិហុងកុង។
ចុះផ្សាយនៅថ្ងៃ៖
ស្តាប់ - ០២:២៤
នៅក្នុងសេចក្តីប្រកាសកាលពីថ្ងៃពុធ ក្រុមប្រទេសមហាអំណាចឧស្សាហកម្ម G7 ក្រើនរំលឹកឲ្យប្រទេសចិនលះបង់ចោលគម្រោងការអនុវត្តច្បាប់ដ៏ចម្រូងចម្រាស ស្តីពីសន្តិសុខជាតិហុងកុង។ សម្រាប់ក្រុមប្រទេសG7 ដែលប្រមូលផ្តុំ អាមេរិក អាល្លឺម៉ង់ ជប៉ុន បារាំង អង់គ្លេស អ៊ីតាលី និងកាណាដា ច្បាប់សន្តិសុខជាតិ ដែលចិនគ្រោងអនុវត្តនៅទឹកដីហុងកុង នឹងធ្វើឲ្យស្វ័យភាព របស់ហុងកុង ស្ថិតក្នុងគ្រោះថ្នាក់។ “ច្បាប់សន្តិសុខជាតិហុងកុង នឹងគំរាមកំហែង ប្រព័ន្ធដឹកនាំស្វយ័តរបស់ហុងកុង ដែលរហូតមក បានជួយហុងកុងឲ្យអភិវឌ្ឍខ្លួន ក្លាយជាតំបន់ហិរញ្ញវត្ថុអន្តរជាតិដ៏សំខាន់ នៅក្នុងតំបន់” នេះជាសេចក្តីប្រកាសរួមរបស់បណ្តារដ្ឋមន្រ្តីការបរទេសរបស់ក្រុមG7។
នៅក្នុងសេចក្តីប្រកាស ក្រុម G7 បង្ហាញផងដែរពីក្តីបារម្ភដែរថា វិធានការបង្កើតច្បាប់សន្តិសុខជាតិហុងកុងនឹង គំរាមកំហែងដល់សិទ្ធិមនុស្សជាមូលដ្ឋាន និងសេរីភាពបញ្ចេញមតិរបស់អ្នករស់នៅហុងកុង។
ក្រសួងការបរទេសចិន នៅថ្ងៃពុធដដែល បានចេញសេចក្តីប្រកាសដែលនៅក្នុងនោះ រដ្ឋមន្រ្តីការបរទេសចិន លោកយ៉ាង ជាឈី បានទាត់ចោល សេចក្តីប្រកាសរបស់ក្រុមប្រទេសមហាឧស្សាហកម្ម G7 ទាក់ទងនឹងរឿងហុងកុង។ នៅក្នុងជំនួបទល់មុខគ្នាជាមួយប្រមុខការបរទេសអាមេរិក នៅកោះហាវ៉ៃ កាលពីថ្ងៃពុធម្សិលមិញ រដ្ឋមន្រ្តីការបរទេសចិន បញ្ជាក់ដែរថា ការប្តេជ្ញាចិត្តរបស់ចិន ដើម្បី អនុវត្តច្បាប់សន្តិសុខជាតិហុងកុង នឹងនៅតែដដែល មិន ផ្លាស់ប្តូរនោះទេ។
ទីក្រុងប៉េកាំងតែងអះអាងថា អនាគតច្បាប់សន្តិសុខជាតិ ហុងកុង មានគោលដៅសំខាន់ប្រឆាំងតែសកម្មភាពទាំងឡាយណាដែលមានទិសដៅ បំបែកទីក្រុងហុងកុងពីប្រទេសចិន ឬប្រឆាំង នឹងអំពើហិង្សា ដែលគំរាមកំហែងដល់សន្តិសុខសណ្តាប់ធ្នាប់នៅហុងកុងតែប៉ុណ្ណោះ។ នៅក្រោយ មហាបាតុកម្ម ប្រឆាំងសេចក្តីព្រាងច្បាប់ស្តីពីការធ្វើបត្យាប័នទៅចិន ដែលបានរញ្ជួយ ទីក្រុង ហុងកុង ជាង៧ខែ កាលពីឆ្នាំមុន ទីក្រុង ប៉េកាំងបង្កើតច្បាប់សន្តិសុខជាតិហុងកុង ដើម្បីបិទបញ្ចប់មិនឲ្យមានមហាបាតុកម្ម ប្រឆាំងចិនតទៅទៀត។
ចាប់ពីថ្ងៃព្រហស្បតិ៍ រហូតដល់ថ្ងៃសៅរ៍ គណៈកម្មាធិការអចិន្ត្រៃយ៍ របស់សភា នឹងបើកការពិភាក្សាលើសេចក្តីព្រាងច្បាប់ សន្តិសុខជាតិហុងកុង។ តាម ទីភ្នាក់ងារព័ត៌មានចិន ស៊ីនហួរ សេចក្តីព្រាងច្បាប់ផ្តោតសំខាន់លើចំណុច៤ គឺប្រឆាំងនឹងការញុះញង់បំបែកបំបាក់ទឹកដី ការធ្វើវិទ្ធង្សនា ប្រឆាំងរដ្ឋអំណាច សកម្មភាពភេរវកម្ម និងការឃុបឃិត ជាមួយជនបរទេស ឬកម្លាំងខាងក្រៅដើម្បីបំផ្លាញសន្តិសុខជាតិ។
តាមទីភ្នាក់ងារចិន ស៊ីនហួរ សេចក្តីព្រាងច្បាប់សន្តិសុខជាតិហុងកុងនឹងអនុញ្ញាតផងដែរឲ្យប៉េកាំងបញ្ជូនទាហាន បន្ថែមទៅហុងកុង។ សមាជិកម្នាក់របស់គណៈកម្មាធិការអចិន្ត្រៃយ៍ទទួលបន្ទុកទីក្រុងហុងកុង បាននិយាយដែរថា ច្បាប់ស្តីពីសន្តិសុខជាតិហុងកុង មានចែងផងដែរ ពីការធ្វើបត្យាប័នទៅប្រទេសចិន។ គឺច្បាប់ធ្វើបត្យាប័នទៅប្រទេសចិន ដែលជាដើមហេតុនៃមហាបាតុកម្មប្រឆាំង ភ្លូកទឹក ភ្លូកដី នៅហុងកុង កាលពីឆ្នាំមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ