នៅពីក្រោយការប្រកួតប្រជែងនៃការផលិតវ៉ាក់សាំងប្រឆាំងកូវីដ១៩
នៅក្នុងប្រវត្តិស្រាវជ្រាវរកវ៉ាក់សាំងប្រឆាំងមេរោគ គេមិនធ្លាប់ដែលឃើញ ការស្រាវជ្រាវណាដែលសកម្ម ស្វាហាប់ និងប្រកួតប្រជែងខ្លាំង ដូចការស្រាវជ្រាវរកវ៉ាក់សាំង ប្រឆាំងកូវីដ នោះទេ។ តាមអង្គការសុខភាពពិភពលោក មានវ៉ាក់សាំងប្រមាណ ១៣០នៅក្នុងពិភពលោក ដែលគេកំពុងសិក្សាស្រាវជ្រាវ ប៉ុន្តែ នៅក្នុងនោះ មានតែជាង២០ ប៉ុណ្ណោះ ដែលឈានមុខគេ និងកំពុងស្ថិតក្នុងដំណាក់កាលធ្វើតេស្តសាកល្បង វេជ្ជសាស្រ្ត ទៅលើមនុស្ស។
ចុះផ្សាយនៅថ្ងៃ៖
ស្តាប់ - ០៥:៣៤
ប្រឈមនឹងជំងឺរាតត្បាតកូវីដ១៩ ដែលសម្លាប់មនុស្សជាង៥សែននាក់ និងឆ្លងទៅមនុស្ស ប្រមាណ ១០លាននាក់ នៅទូទាំងពិភពលោក ការប្រណាំងប្រជែង ដើម្បី រកវ៉ាក់សាំង ប្រឆាំងជំងឺកូវីដ កំពុងសស្រាក់សស្រាំជាងពេលណាៗទាំងអស់។ បេក្ខជនវ៉ាក់សាំងបានកើនចំនួនជារៀងរាល់សប្តាហ៍ រហូតដល់ ជាង ២០០ ប៉ុន្តែ ក្នុងចំណោមនោះមានតែ បេក្ខជនវ៉ាក់សាំង ចំនួន២១ប៉ុណ្ណោះ ដែលឈានចូលដល់ដំណាក់កាលធ្វើតេស្តវេជ្ជសាស្រ្ត មានន័យថា ធ្វើតេស្តសាកល្បងប្រសិទ្ធិភាពរបស់វា នៅក្នុងខ្លួនមនុស្ស នៅបន្ទាប់ពីធ្វើតេស្តបានសម្រេចលើពពួកសត្វ។
បើតាមអង្គការសុខភាពពិភពលោក នៅក្នុងចំណោមវ៉ាក់សាំង ទាំង២១ មានវ៉ាក់សាំងចំនួន ១១ដែលកំពុងត្រូវពិសោធន៍ធ្វើតេស្តក្នុងដំណាក់កាលទី១ ពោលគឺកំពុងត្រូវគេធ្វើតេស្តក្នុងចំណោមមនុស្សជាង១០០នាក់ ដែលមានសុខភាពល្អ។ វ៉ាក់សាំង ៨ផ្សេងទៀត បានឈានចូលដល់ដំណាក់កាលទី២ ដោយត្រូវគេយកទៅធ្វើតេស្តសាកល្បងក្នុងចំណោមអ្នកជំងឺ អ្នកដែលធ្វើការប្រឈមនឹងជំងឺកូវីដ។ ជារួម មានតែវ៉ាក់សាំង៣ប៉ុណ្ណោះ ដែលឈានមុខគេ បានចូលដល់ដំណាក់កាលទី៣ ពោលគឺការធ្វើតេស្តក្នុងទ្រង់ទ្រាយ ធំ មានមនុស្សរាប់ពាន់នាក់ដែលចូលរួម ដើម្បី រកប្រសិទ្ធិភាពរបស់វ៉ាក់សាំង និងផលប៉ះពាល់របស់វា។ បើសិនការធ្វើតេស្តក្នុងដំណាក់កាលទី៣ ផ្តល់លទ្ធផលវិជ្ជមាន នោះ អង្គការសុខភាពពិភពលោកនឹងអាចអនុម័ត សម្រេចឲ្យគេផលិតវ៉ាក់សាំង សម្រាប់ប្រើប្រាស់ជាផ្លូវការ។
រហូតមកដល់ថ្ងៃនេះ មានតែវ៉ាកសាំង តែមួយប៉ុណ្ណោះ ដែលបានទទួលភ្លើងខៀវឲ្យគេយកទៅប្រើសម្រាប់ប្រឆាំងជំងឺកូវីដ។ តាមកាសែតក្នុងស្រុកចិន គណៈកម្មការកងទ័ពមជ្ឈឹមបក្ស ដែលស្ថិតក្រោមអំណាចរបស់ក្រសួងការពារជាតិ ចិន បានអនុញ្ញាតឲ្យគេចាក់ វ៉ាក់សាំងដែលគេទើបរកបានថ្មីៗ ទៅលើទាហានចិន។ ក្រសួងការពារជាតិចិនមិនបានបញ្ជាក់ទេថា តើទាហានទាំង២លាននាក់ របស់ចិន នឹងត្រូវទទួលចាក់វ៉ាក់សាំង របស់ក្រុមហ៊ុនផលិតឱសថ ក្នុងស្រុកចិនឈ្មោះ CanSinoBIO ដែរឬយ៉ាងណានោះទេ។ ក្រុមហ៊ុនផលិតឱសថចិនវិញអះអាងថា ក្រុមហ៊ុននៅមិនទាន់មានផែនការផលិតសម្រាប់លក់ជាទូទៅនោះទេ។
តាមអ្នកទទួលខុសត្រូវរបស់មន្ទីរពិសោធន៍កាណាដាម្នាក់ ដែលធ្វើការសហការ ផ្នែកបច្ចេកវិទ្យាជាមួយ ក្រុមហ៊ុនផលិតឱសថ ចិន CansinoBio វ៉ាក់សាំងប្រឆាំងកូវីដ ដែលទាហានចិនបានទទួល ជាវ៉ាកសាំងដែលកំពុងស្ថិតក្នុងដំណាក់កាលធ្វើតេស្តទី៣នៅឡើយ។ ប៉ុន្តែ យ៉ាងណាក៏ដោយ វាជាដំណឹងល្អ សម្រាប់ភាគីកាណាដា បើសិនជាវ៉ាក់សាំងពិតជាផ្តល់លទ្ធផលវិជ្ជមាន ព្រោះវាបានជួយទៅពង្រឹងប្រព័ន្ធការពារ របស់មនុស្ស ដែលជាគោលការណ៍គ្រឹះនៃការចាក់វ៉ាក់សាំង។
គោលការណ៍គ្រឹះនៃការចាក់វ៉ាក់សាំង គឺ ដំណើរការជំរុញ ពង្រឹងប្រព័ន្ធភាពស៊ាំនឹងរោគក្នុងខ្លួនមនុស្ស ឬសត្វ តាមរយៈការចាក់បញ្ចូលantigène ដែលអាចជាមេរោគ គ្មានគ្រោះថ្នាក់ សម្រាប់ទៅឲ្យប្រព័ន្ធភាពស៊ាំនៃរាងកាយ បានស្គាល់ទុកជាមុន។ ការកំណត់អត្តសញ្ញាណមេរោគ បែបនេះ នឹងជួយឲ្យប្រព័ន្ធការពារ ផលិតបញ្ចេញអង់ទីករ ទៅប្រឆាំងមេរោគពិតប្រាក។
ដើម្បីរកវ៉ាក់សាំងប្រឆាំងនឹងជំងឺកូវីដ គេសិក្សាលើមធ្យោបាយផលិតវ៉ាក់សាំងផ្សេងៗគ្នា។ ក្រុមហ៊ុនផលិតឱសថអង់គ្លេស AstraZeneca ចាប់អារម្មណ៍ ប្រើមេរោគAdénovirusដែលមានក្នុងខ្លួនសត្វស្វា chimpanzés សម្រាប់យកទៅផលិត វ៉ាក់សាំង ប្រឆាំងកូវីដ។ គេធ្លាប់បានប្រើមេរោគប្រភេទនេះសម្រាប់ផលិតវ៉ាក់សាំងប្រឆាំងជំងឺថ្លើមប្រភេទ C។ មេរោគក្នុងខ្លួនសត្វស្វា ដែលលែងសកម្មហើយនោះ ត្រូវគេចាក់បញ្ចូលកូដGénétiqueដែលអាចផលិតទុកជាមុន ប្រូតេអ៊ីនមេរោគកូរ៉ូណា។ ដោយមានប្រូតេអ៊ីនប្រភេទនេះក្នុងខ្លួន រួចជាស្រេច អ្នកជំងឺនឹងអាចមានប្រព័ន្ធការពារខ្លួនរឹងមាំ សម្រាប់ផលិតអង់ទីករ ប្រឆាំងនឹងប្រូតេអ៊ីនរបស់មេរោគកូរ៉ូណាពិតៗ។ ក្រុមហ៊ុនអង់គ្លេសកំពុងធ្វើតេស្តវ៉ាក់សាំង ដំណាក់កាលទី៣ នៅអង់គ្លេស ប្រេស៊ីល និងអាហ្វ្រិកខាងត្បូង។
ចំណែក វិទ្យាស្ថាន ប៉ាស្ទ័ររបស់បារាំង វិញ ដែលចាប់ផ្តើមធ្វើតេស្តសាកល្បងវ៉ាក់សាំងលើមនុស្ស ចាប់ពីខែកក្កដាក្រោយទៅ បានប្រើមេរោគ កញ្ជ្រិល ដែលលែងសកម្ម សម្រាប់យកទៅផលិតវ៉ាក់សាំង ប្រឆាំងកូវីដ។ ក្រុមហ៊ុនផលិតឱសថរបស់ចិន Cansinoវិញ ប្រើមេរោគ Adénovirusដែលតែងលេចមុខនៅរដូវគ្រុនផ្តាសាយ សម្រាប់យកទៅផលិតវ៉ាក់សាំងប្រឆាំងកូវីដ។
ក្រុមហ៊ុនអាមេរិកាំង Moderna ដែលចាប់ផ្តើមដំណាក់កាលទី៣នៃការធ្វើតេស្តលើមនុស្សនៅអាមេរិក មិនបានប្រើមេរោគ ដើម្បីផលិតវ៉ាក់សាំងនោះទេ។ ផ្ទុយទៅវិញ ក្រុមហ៊ុនបានប្រើបច្ចេកវិទ្យា ដើម្បីផលិតវ៉ាក់សាំង ប្រឆាំងកូវីដ ដែលមានឈ្មោះថា mRNA-1273។ វ៉ាក់សាំង របស់ក្រុមហ៊ុន Moderna មិនមែនជាមេរោគ ប៉ុន្តែ ជាកូដGénétique មួយផ្នែករបស់មេរោគ ដែលមាននាទីជាអ្នកនាំសារ ទៅប្រាប់ ជាលិការក្នុងខ្លួនមនុស្សឲ្យផលិត ប្រូតេអ៊ីនរបស់វីរុស។ បន្ទាប់មក ដោយចាប់បានសញ្ញាវត្តមានប្រូតេអ៊ីន ប្រព័ន្ធការពារក៏ឆាប់បញ្ចេញអង់ទីករ សម្រាប់ទប់ទល់នឹងមេរោគកូរ៉ូណាពិតៗ។
ដោយសារតែវិធីសាស្រ្តរបស់ក្រុមហ៊ុនអាមេរិកាំង Moderna អាចធ្វើឲ្យគេផលិតវ៉ាក់សាំង បានលឿន និងក្នុងតម្លៃថោក ក្រុមហ៊ុនModerna ចាប់ផ្តើមល្បីឈ្មោះ និងមានតម្លៃភាគហ៊ុនឡើងថ្លៃ នៅទីផ្សារភាគហ៊ុនអន្តរជាតិ។
តាំងពីចាប់ផ្តើមឲ្យមានការស្រាវជ្រាវរកវ៉ាក់សាំងប្រឆាំងកូវីដ ក្រុមហ៊ុនផលិតឱសថ និងរដ្ឋាភិបាលជាច្រើនបានចាប់ប្រណាំងប្រជែងគ្នា ដើម្បី រកឲ្យបានវ៉ាក់សាំងដំបូងគេបង្អស់ សម្រាប់ប្រឆាំងជំងឺកូវីដ។ ក្រុមហ៊ុន និងគម្រោងជាច្រើនដែលបានទទួលជំនួយប្រាក់រាប់រយលានដុល្លារ ពីខាងរដ្ឋ និងវិស័យឯកជន បានសន្យាផលិតឲ្យបានវ៉ាក់សាំង យ៉ាងយូរបំផុត នៅដើមឆ្នាំ ក្រោយ។ ក្រុមហ៊ុន អង់គ្លេស AstraZeneca អះអាងថា នៅក្រោយ ការសាកល្បង ដំណាក់កាលទី៣ដែលអាចផ្តល់លទ្ធផលនៅអំឡុងខែសីហា ក្រុមហ៊ុនអាចផលិតវ៉ាក់សាំងប្រឆាំងកូវីដ នៅអំឡុងខែតុលា ចុងឆ្នាំ និងអាចលក់ក្នុងតម្លៃ ២អឺរ៉ូ ក្នុងមួយដូស។ សម្រាប់អ្នកជំនាញខាងមេរោគ និងជំងឺឆ្លង ស្រាវជ្រាវ និងផលិតវ៉ាក់សាំង ដើម្បីចរាចរ ក្នុងទីផ្សារ ក្នុងរយៈពេល តិច ជាង១ឆ្នាំ គឺជារឿង ដែលពិបាកនឹងកើតឡើងព្រោះថា ដើម្បីផលិតវ៉ាក់សាំងមួយៗដែលមានប្រសិទ្ធិភាព គេត្រូវការពេលវេលា ជាច្រើនឆ្នាំ មិនមែនរាប់ខែនោះទេ។ មួយវិញទៀត នៅពេល គេអាចផលិត វ៉ាក់សាំង បាន ហើយនៅពេលនេះ ក៏គេនៅមិនទាន់ប្រាកដថា វ៉ាក់សាំង នឹងអាច មានប្រសិទ្ធិភាព ប្រឆាំងមេរោគកូរ៉ូណាបានដែរដោយសារថា មេរោគតែង វិវឌ្ឍ ផ្លាស់ប្តូរជាប់ប្រចាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ