កូវីដ១៩៖ សហគ្រាសឱសថ Sanofi និង GSK សហការគ្នាស្រាវជ្រាវវ៉ាក់សាំង ឲ្យបានក្នុងឆ្នាំ២០២១
សហគ្រាសផលិតឱសថដ៏ធំរបស់បារាំង ឈ្មោះ Sanofi និង សហគ្រាសផលិតឱសថអង់គ្លេស GSK បានប្រកាសនៅថ្ងៃអង្គារទី១៤មេសាថា គេនឹងរួមដៃសហការគ្នា ធ្វើការស្រាវជ្រាវ ស្វែងរកថ្នាំវ៉ាក់សាំង បង្កាមេរោគកូវីដ១៩។ សហគ្រាសទាំងពីរអះអាងថា គេនឹងប្រឹងប្រែង ឲ្យបានលទ្ធផល នៅក្នុងឆ្នាំ២០២១ខាងមុខ។
ចុះផ្សាយនៅថ្ងៃ៖
ស្តាប់ - ០២:១៩
សហគ្រាសផលិតឱសថបារាំង Sanofi និង សហគ្រាសផលិតឱសថអង់គ្លេស GSK នឹងធ្វើការច្របាច់បញ្ចូល បច្ចេកទេសជំនាញស្រាវជ្រាវ របស់គេរៀងៗខ្លួន ដើម្បីសហការគ្នា ឈានទៅសម្រេចលទ្ធផលលើថ្នាំវ៉ាក់សាំង ប្រឆាំងកូវីដ១៩ នៅក្នុងឆ្នាំ២០២១។ នេះបើផ្អែកតាមសេចក្តីប្រកាសរួមគ្នា ធ្វើឡើងដោយសហគ្រាសទាំង២ នៅថ្ងៃអង្គារទី១៤មេសា។
យោងតាមសេចក្តីប្រកាសនេះ វ៉ាក់សាំងដែលគេនឹងស្រាវជ្រាវ គឺជាប្រភេទវ៉ាក់សាំង ដែលមានលាយផ្សំជាមួយសារធាតុ ដែលមានតួនាទីដាស់ប្រព័ន្ធសរីរាង្គការពារខ្លួនរបស់មនុស្ស ឲ្យមានភាពរឹងមាំ ទប់ជាមួយនឹងមេរោគ (Vaccin avec adjuvant)។ ការសាកល្បងទៅលើមនុស្ស អាចនឹងចាប់ផ្តើមនៅចុងឆ្នាំ២០២០ ហើយបើសិនជាបានជោគ័យ វ៉ាក់សាំងនឹងត្រូវអាចផលិតបាន នៅក្នុងឆមាសទី២ឆ្នាំ២០២១។
សហគ្រាស Sanofi របស់បារាំង នឹងចូលរួមតាមរយៈការផ្តល់នូវកោសិកាអង់ទីហ្សែន នៃប្រូតេអ៊ីនS ដែលមាននៅក្នុងមេរោគកូវីដ១៩ រីឯសហគ្រាស GSK របស់អង់គ្លេសវិញ មានបច្ចេកវិទ្យាពិសេស ក្នុងការផលិតវ៉ាក់សាំង ប្រឆាំងនឹងជម្ងឺឆ្លងទ្រង់ទ្រាយធំ ដែលផ្សំលាយជាមួយសារធាតុដាស់ប្រព័ន្ធការពារខ្លួនរបស់មនុស្ស។
គួរបញ្ជាក់ថា ការសហការគ្នានេះ គឺស្ថិតនៅក្នុងក្របខណ្ឌដែលសហគ្រាសផលិតឱសថ Sanofi របស់បារាំង បានចុះកិច្ចព្រមព្រៀងសហប្រតិបត្តិការ កាលពីខែកុម្ភៈ ជាមួយនឹង អាជ្ញាធរស្រាវជ្រាវនិងអភិវឌ្ឍន៍វិជ្ជសាស្ត្រសរីរាង្គ Biomedical Advanced Research and Development Authority (BARDA) ដែលជាផ្នែកមួយនៃក្រសួងសុខាភិបាលអាមេរិក។ ស្ថិតក្នុងក្របខណ្ឌនេះដែរ Sanofi ក៏ត្រូវសហការជាមួយមន្ទីរពិសោធន៍ឱសថអាមេរិក ឈ្មោះ Translate Bio។
គួរបញ្ជាក់ថា ប្រឈមនឹងការឆ្លងរាលដាលនូវមេរោគកូវីដ១៩ មានមន្ទីរពិសោធន៍ សហគ្រាសផលិតឱសថជាច្រើន កំពុងស្វះស្វែងស្រាវជ្រាវផលិតវ៉ាក់សាំង ប្រឆាំងនឹងមេរោគនេះ។ កាលពីថ្ងៃចន្ទកន្លងទៅ ប្រធានាធិបតីអ៊ុយក្រែន បានសន្យាផ្តល់រង្វាន់លើកទឹកចិត្តចំនួន១លានដុល្លារ ដល់អ្នកវិទ្យាសាស្ត្រអ៊ុយក្រែនណា ដែលអាចស្រាវជ្រាវផលិតវ៉ាក់សាំងប្រឆាំងកូវីដ១៩បាន។ ដោយឡែក បើផ្អែកតាមការចុះផ្សាយ របស់ទីភ្នាក់ងារព័ត៌មានផ្លូវការចិន បានឲ្យដឹងថា អ្នកជំនាញចិន នឹងចាប់ផ្តើមសាកល្បងទៅលើមនុស្ស នូវថ្នាំវ៉ាក់សាំងប្រឆាំងមេរោគកូវីដ១៩ចំនួន២ប្រភេទ ក្នុងពេលដ៏ឆាប់ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ