ច្បាប់សន្តិសុខជាតិហុងកុង បក់បោកឲ្យមានការភ័យខ្លាចខ្លាំងដល់តៃវ៉ាន់
ចុះផ្សាយនៅថ្ងៃ៖
ស្តាប់ - ០៥:៣៥
ការដាក់ឲ្យអនុវត្តច្បាប់សន្តិសុខជាតិរបស់ចិនទៅលើទីក្រុងហុងកុង បានធ្វើឲ្យក្រុមអ្នកគាំទ្រលទ្ធិប្រជាធិបតេយ្យ មានការព្រួយបារម្ភជាខ្លាំងអំពីការបាត់បង់ឈ្មោះជាដែនដីពិសេសរបស់ហុងកុង។ បន្ទាប់ពីច្បាប់សន្តិសុខជាតិចាប់ចូលជាធរមាននៅថ្ងៃទី១ កក្កដា ដើមសប្តាហ៍នេះមក ហុងកុងជួបភាពរំជើបរំជួលច្រើន។ ករណីចាប់ឃាត់ខ្លួនមនុស្សរាប់សិបនាក់ចាប់កើតមានឡើងភ្លាមៗ ហើយពលរដ្ឋហុងកុងវិញក៏ផ្តើមមានការប្រុងប្រយ័ត្នខ្ពស់ផងដែរក្នុងការបញ្ចេញមតិ។ ហេតុការណ៍ថ្មីចុងក្រោយនេះ បានបោកបក់ឲ្យមានរលកនៃការភ័យខ្លាចខ្លាំងក្នុងចំណោមប្រជាពលរដ្ឋតៃវ៉ាន់ ដែលបារម្ភថាគោលដៅបន្ទាប់របស់ក្រុងប៉េកាំងគឺតៃប៉ិនេះហើយ។
ហុងកុងជាគោលដៅរបស់ចិននៅថ្ងៃនេះហើយគោលដៅបន្ទាប់គឺតៃវ៉ាន់
ប្រទេសចិន បានប្រកាន់យកជំហរម៉ឺងម៉ាត់ខ្លាំងមែនទែនសំដៅទៅរកកោះតៃវ៉ាន់ ចាប់តាំងពីឆ្នាំ ២០១៦ មក ពោលគឺចាប់តាំងពីលោកស្រីឆៃ អ៊ីងវេន ដែលជាអ្នកឯករាជ្យនិយមមកពីគណបក្សប្រជាធិបតេយ្យចម្រើននិយមជាប់ឆ្នោតកាន់តំណែងជាប្រធានាធិបតីតៃវ៉ាន់។
ជ័យជំនះរបស់លោកស្រីឆៃ អ៊ីងវេន គឺជាតឹកតាងបង្ហាញឲ្យឃើញយ៉ាងច្បាស់ថា ប្រជាពលរដ្ឋតៃវ៉ាន់ ស្រលាញ់លទ្ធិប្រជាធិបតេយ្យ និងមិនចង់ស្ថិតនៅក្រោមការគ្រប់គ្រងរបស់ចិនកុម្មុយនិស្តឡើយ។ មួយវិញទៀត យុវវ័យតៃវ៉ាន់ បានសម្តែងការយកចិត្តទុកដាក់ខ្ពស់ណាស់ចំពោះព្រឹត្តិការណ៍ដែលបាននិងកំពុងកើតឡើងនៅហុងកុង ជាពិសេសរឿងរ៉ាវពាក់ព័ន្ធនឹងច្បាប់សន្តិសុខជាតិ ដែលចិនទើបបានអនុម័ត និងដាក់ឲ្យចូលជាធរមានកាលពីថ្ងៃទី១ កក្កដា ឆ្នាំ២០២០នេះ។
នៅតាមបណ្តាញសង្គមមួយរយៈពេលចុងក្រោយនេះ គេឃើញមានពោរពេញទៅដោយសារគាំទ្រដល់ចលនាប្រជាធិបតេយ្យរបស់ហុងកុង។ ពលរដ្ឋតៃវ៉ាន់ជាច្រើនផ្សេងទៀត បានបង្ហាញផងដែរពីជំហររបស់ពួកគេ គាំទ្រឯករាជ្យភាពរបស់តៃវ៉ាន់ឬបង្ហាញពីការរំលោភសិទ្ធិសេរីភាពរបស់ចិន នៅក្នុងតំបន់ទីបេនិងស៊ីនជាំង។ល។
និពន្ធនាយកទស្សនាវដ្តីតៃវ៉ាន់ម្នាក់ គឺលោកស្រី វេនឌី ប៉េង បាននិយាយថា គាត់នឹងជៀសមិនទៅក្រុងហុងកុងឡើយ ក្រោយច្បាប់សន្តិសុខជាតិត្រូវបានដាក់ឲ្យអនុវត្តនៅទីនោះ។ លោកស្រីវេនឌី បានបន្ថែមថា ច្បាប់សន្តិសុខជាតិរបស់ចិនបានធ្វើឲ្យគាត់ឆ្ងល់ថាតើចិន នឹងហ៊ានធ្វើអ្វីដល់កម្រិតណាទៀត។ តាមការគិតរបស់លោកស្រី ចិននឹងមិនឈប់ត្រឹមនេះនោះទេ ហើយគោលដៅបន្ទាប់របស់ចិនគឺដណ្តើមយកតៃវ៉ាន់មកកាន់កាប់ឲ្យខានតែបាន។
ច្បាប់សន្តិសុខជាតិហុងកុង បង្កជាការភ័យព្រួយដល់ពលរដ្ឋតៃវ៉ាន់
ជុំវិញរឿងនេះ និស្សិតតៃវ៉ាន់ម្នាក់ បានប្រាប់ទីភ្នាក់ងារបារាំង AFP ថា ការលេចឡើងនៃច្បាប់សន្តិសុខជាតិហុងកុងកាន់តែធ្វើឲ្យនាងស្អប់ចិនខ្លាំងជាងមុន។ “ចិនបានសន្យានឹងគោរពតាមលក្ខន្តិកៈជាដែនដីពិសេសរបស់ហុងកុងរហូតដល់ឆ្នាំ ២០៤៧ ប៉ុន្តែចិនសព្វថ្ងៃនេះកំពុងតែលូកដៃកាន់តែជ្រៅចាប់យកហុងកុងដោយគ្មានសន្ធូរដៃឡើយ”។ នេះ គឺជាការលើកឡើងរបស់យុវនិស្សិតតៃវ៉ាន់ខាងលើ ដោយសម្តែងក្តីបារម្ភទៀតថា នៅថ្ងៃបន្ទាប់ចិននឹងលូកដៃមកកៀកតៃវ៉ាន់ជាប់ដូចអ្វីដែលចិនកំពុងធ្វើលើហុងកុងអីចឹងដែរ។
ខណៈដែលពលរដ្ឋតៃវ៉ាន់មួយចំនួនធំ មិនពេញចិត្តចំពោះច្បាប់សន្តិសុខជាតិរបស់ចិន ពលរដ្ឋតៃវ៉ាន់ផ្សេងជាច្រើនទៀត បារម្ភសូម្បីតែធ្វើដំណើរឆ្លងកាត់ដែនដីហុងកុង។ ពួកគេ បារម្ភខ្លាចថា សារដែលពួកគេបានចែកចាយតាមបណ្តាញសង្គមអាចត្រូវចិនយកធ្វើជាឧបករណ៍ដើម្បីចាប់ពួកគេដាក់ទោសដោយផ្អែកលើច្បាប់សន្តិសុខជាតិ។
លោក Alexander Huang អ្នកវិភាគនយោបាយម្នាក់នៅឯសាកលវិទ្យាល័យ Tamkang នៃក្រុងតៃប៉ិ បានមានប្រសាសន៍ថា ច្បាប់សន្តិសុខជាតិហុងកុង កាន់តែធ្វើឲ្យចិនមើលទៅអាក្រក់ឡើងៗ និងកាន់តែធ្វើឲ្យចិនមិនអាចស្និទ្ធស្នាលនឹងពលរដ្ឋហុងកុងបាន កុំថាឡើយតែជាមួយពលរដ្ឋតៃវ៉ាន់។
គួររំឭកជូនថា នៅគ្រាកន្លងមក រដ្ឋាភិបាលចិនប៉េកាំងធ្លាប់បានបញ្ចុះបញ្ចូលតៃវ៉ាន់ឲ្យយល់ព្រមទទួលស្គាល់គោលនយោបាយចិនតែមាន និងបានសន្យាផ្តល់ឲ្យតៃវ៉ាន់នូវគំរូ “ប្រទេសមួយប្រព័ន្ធពីរ” ដូចក្រុងហុងកុង ដោយធានានូវសេរីភាពស៊ីវិល និងស្វ័យភាព។ ក៏ប៉ុន្តែ ទង្វើដែលចិនកំពុងធ្វើដាក់ហុងកុងនាពេលបច្ចុប្បន្ននេះបានជំរុញឲ្យពលរដ្ឋតៃវ៉ាន់កាន់តែមិនទុកចិត្តចិនទ្វេឡើង និងមិនព្រមជាដាច់ខាតរួមរស់ក្រោមដំបូងចិនប៉េកាំងតែមួយ ព្រោះខ្លាចជួបវាសនាដូចហុងកុងដែរ។
យុត្តាធិការសកល
ការព្រួយបារម្ភរបស់ពលរដ្ឋតៃវ៉ាន់ មិនមែនជារឿងចម្លែកនោះទេ ហើយគេអាចមើលឃើញពីគ្រោះថ្នាក់របស់ពួកគេបានតាមរយៈខ្លឹមសារនៃច្បាប់សន្តិសុខជាតិហុងកុង។ ច្បាប់ថ្មីនេះ អនុញ្ញាតឲ្យបង្កើតអង្គភាពសន្តិសុខជាតិថ្មីមួយតំណាងឲ្យប៉េកាំងនៅហុងកុងបាន។ ប៉ូលិសហុងកុងក៏បានបញ្ជាក់យ៉ាងច្បាស់ដែរថា សកម្មភាពគាំទ្រដល់ឯករាជ្យហុងកុង តៃវ៉ាន់ ទីបេ ឬក៏ស៊ីនជាំងគឺជាអំពើខុសច្បាប់។
មួយវិញទៀត យោងទៅតាមមាត្រាទី៣៨ ឧក្រិដ្ឋកម្មសន្តិសុខ អាចត្រូវបានប្រព្រឹត្តឡើងនៅគ្រប់ទីកន្លែងក្នុងពិភពលោក ដោយបុគ្គលដែលមានសញ្ជាតិណាមួយ។ ទាំងអស់នេះ បង្ហាញថា ចិនចង់ធ្វើឲ្យច្បាប់សន្តិសុខជាតិរបស់ខ្លួន ប្រើបានទូលំទូលាយ មិនថាតែនៅហុងកុង ទីបេ ស៊ីនជាំង ឬក៏តៃវ៉ាន់ឡើយ។
កាលពីសប្តាហ៍មុន លោកចិន មីងតុង (Chen Ming-tong) មន្ត្រីតៃប៉ិទទួលបន្ទុកកិច្ចការចិន-តៃវ៉ាន់ បានចោទប្រកាន់ក្រុងប៉េកាំងថាមានបំណងក្លាយជាកំពូលមហាអំណាចផុតលេខ និងចង់បញ្ជាឲ្យប្រទេសទាំងអស់ក្នុងលោកគោរពតាមច្បាប់របស់ខ្លួន។
ជាមួយគ្នានេះ លោកលីន ហ្វីហ្វាន (Lin Fei-fan) អគ្គលេខាធិការរងនៃគណបក្សកាន់អំណាចតៃវ៉ាន់ បានក្រើករំឭកដល់ពលរដ្ឋតៃវ៉ាន់ថា ឥឡូវនេះ ពួកគេអាចនឹងប្រឈមទៅនឹងការចាប់ខ្លួនដោយរដ្ឋអំណាចចិនប៉េកាំង ប្រសិនបើពួកគេធ្វើដំណើរទៅហុងកុង។ មន្ត្រីរដ្ឋាភិបាលតៃវ៉ាន់រូបនេះ មានលើកឧទាហរណ៍ពីករណីបុគ្គលិកអង្គការជនជាតិតៃវ៉ាន់ម្នាក់ ដែលត្រូវបានចាប់ដាក់ឲ្យជាប់ពន្ធនាគារក្នុងប្រទេសចិន ក្រោយហេតុផលថាបានធ្វើវិទ្ធង្សនានៅពេលធ្វើដណើរចូលក្នុងទឹកដៃចិនកាលពីឆ្នាំ ២០១៧។
អ្នកសារព័ត៌មានតៃវ៉ាន់ម្នាក់ គឺលោកស៊ុង ចិនអេន (Sung Chen-en) បាននិយាយថាច្បាប់សន្តិសុខថ្មីរបស់ប៉េកាំងមានខ្លឹមលារទូលំទូលាយជ្រុលនិងបង្កើតភាពមិនប្របាកប្រជាច្រើនដែលគេអាចនិយាយបានថាវាគឺជាយុត្តាធិការសកល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ