អឺរ៉ុបជជែកគ្នាយ៉ាងតឹងតែងចំពោះគម្រោងស្តារសន្ទុះសេដ្ឋកិច្ចឡើងវិញចេញពីវិបត្តិកូវីដ
ចុះផ្សាយនៅថ្ងៃ៖
ស្តាប់ - ០៩:០៥
ថ្ងៃសុក្រទី១៧កក្កដា នៅក្រុងព្រុចសែល ប្រទេសប៊ែលស៊ិក, មេដឹកនាំទាំង២៧ប្រទេសរបស់សហភាពអឺរ៉ុប ផ្តើមបើកការជជែកពិភាក្សាគ្នាចំនួនពីរថ្ងៃ។ ជាការជជែកពិភាក្សាជួបមុខគ្នាលើកទី១ បន្ទាប់ពីខកខានជួបមុខគ្នាផ្ទាល់ អស់ជិត៥ខែមក។ តាមអ្នកជំនាញ គេយល់ថា នេះជាការចរចាយ៉ាងតឹងតែង មិនធ្លាប់មាន និងលំបាកខ្លាំង ពិសេសចំពោះគម្រោងស្តារសេដ្ឋកិច្ចឡើងវិញចេញពីវិបត្តិកូវីដ១៩។
គម្រោងស្តារសន្ទុះសេដ្ឋកិច្ចឡើងវិញនេះ ថ្នាក់ដឹកនាំអឺរ៉ុប ចរចាគ្នាច្រើនខែដែរមកហើយ ប៉ុន្តែរកចំណុចរួមយល់ព្រមគ្នាមិនឃើញសោះ។ តើរយៈពេលចរចាពីរថ្ងៃនេះទៀត អាចរកចំណុចរួមព្រមគ្នាដែរទេ? តើនៅមានអ្វីដែលមេដឹកនាំអឺរ៉ុបនៅខ្វែងគំនិតគ្នាទៀត?
របៀបវរៈដ៏តានតឹងនៅក្នុងការពិភាក្សាពីរថ្ងៃនេះ គឺមានពីរធំដែរ។
ទី១ គឺរឿងលុយ ជាចម្បង។ មេដឹកនាំប្រទេសសមាជិកត្រូវជជែកចរចាគ្នាអនុម័តកញ្ចប់ថវិកាអឺរ៉ុប ផែនការសកម្មភាពរយៈពេលវែង សម្រាប់៧ឆ្នាំទៅមុខទៀត គឺឆ្នាំ២០២១ -២០២៧ ដែលអាចមានទឹកប្រាក់ អាចដល់ ១ពាន់១០០ពាន់លាន ឬក៏ ១ពាន់០៧៤ ពាន់លានអឺរ៉ូ នេះបើតាមសំណើរបស់នាយករដ្ឋមន្ត្រី ប៊ែលស៊ិក និងសំណើរបស់ប្រធានគណៈកម្មាការសហភាពអឺរ៉ុប។
ចំណុចទី២ ដ៏ចម្រូងសម្រាស់ច្រើនខែមកហើយ គឺគេត្រូវសម្រេចពីគម្រោងថវិកា ៧៥០ពាន់លានអឺរ៉ូ សម្រាប់ស្រោចស្រង់សេដ្ឋកិច្ច ចេញពីវិបត្តិកូវីដ១៩។ ៧៥០ពាន់លានអឺរ៉ូ នេះ គឺចែកជាពីរផ្នែក ២៥០ពាន់លាន សម្រាប់ជាប្រាក់ឱ្យរដ្ឋសមាជិករងគ្រោះដោយសារកូវីដ១៩ ខ្ចីយកប្រើប្រាស់ ហើយ៥០០ពាន់លានអឺរ៉ូទៀត គឺសម្រាប់ឧបត្ថម្ភធន ជួយដល់រដ្ឋសមាជិកដែលរងគ្រោះខ្លាំងជាងគេ។ ទម្រង់បែបបទនិងលក្ខខណ្ឌផ្តល់ឱ្យរដ្ឋនីមួយៗ ថាខ្ចី ឬក៏សុំនេះ ត្រូវមានចំណុចប្លែកៗច្រើន ដែលត្រូវជជែកគ្នាឱ្យលម្អិតមែនទែន។
ជំហរអាល្លឺម៉ង់ ដែលត្រូវធ្វើប្រធានផ្លាស់វេននៃកិច្ចប្រជុំ គឺដើម្បីបានប្រាក់ដ៏សម្បើមទាំងនោះ ក្រៅពីវិភាគទានរបស់រដ្ឋសមាជិក គឺត្រូវប្រើឈ្មោះ សហភាពអឺរ៉ុប ដើម្បីដើរខ្ចីលុយស្ថាប័នហិរញ្ញវត្ថុអន្តរជាតិ ហើយបំណុលគឺត្រូវជាបំណុលរួម។ នេះក៏ជាលក្ខខណ្ឌមួយដែល បារាំង អ៊ីតាលី និងអេស្ប៉ាញ ជាដើម ធ្លាប់បានលើកឡើងរួចមកហើយ។
គម្រោងស្តារសន្ទុះសេដ្ឋកិច្ចឡើងវិញនេះ ថ្នាក់ដឹកនាំអឺរ៉ុប ចរចាគ្នាច្រើនខែដែរមកហើយ តែរកចំណុចរួមយល់ព្រមគ្នាមិនឃើញសោះ។ ពេលខ្លះ ក៏លើកអង្គប្រជុំចោលទទេ គ្មានបានការអ្វី។ នៅពេលនេះវិញ តើរយៈពេលចរចាពីរថ្ងៃនេះទៀត អាចរកចំណុចរួមព្រមគ្នាដែរទេ? ហើយតើនៅមានអ្វីដែលមេដឹកនាំអឺរ៉ុបនៅខ្វែងគំនិតគ្នាទៀត?
ការខ្វែងគំនិតគ្នាគឺនៅតែមាន រហូតមកដល់ថ្ងៃសុក្រនេះទៀត។ ចំពោះ អធិការបតីអាល្លឺម៉ង់, លោកស្រី ម៉ាក់កែល យល់ថា ការចរចាកំពូលលើកនេះ គឺតឹងតែងលំបាកខ្លាំង ព្រោះលោកស្រីឃើញថា នៅមានចំណុចខ្វែងគ្នាខុសគ្នាច្រើននៅឡើយ។
ទន្ទឹមនេះ នាយករដ្ឋមន្ត្រីអៀរឡង់វិញ ថាសង្ឃឹមតិចណាស់ សង្ឃឹមមិនដល់៥០ភាគរយផងដែរ ដែលអាចសម្រេចជោគជ័យនោះ។ សូមជ្រាបថា អៀរឡង់ ជាក្រុមប្រទេសមួយ នៅក្នុងចំណោម ហូឡង់ ស៊ុយអែត ដាណឺម៉ាក់ ដែលហាក់មិនសូវឯកភាពតាំងពីច្រើនខែមកហើយ ទៅនឹងគម្រោងកញ្ចប់ថវិកាស្តារសេដ្ឋកិច្ច ព្រោះតែលក្ខខណ្ឌមួយចំនួន ឧទាហរណ៍ករណីផ្តល់លុយ ជាជំនួយឥតសំណង ជាដើម។ ក្រុមប្រទេសខ្លះទាំងនេះថាចង់ឱ្យខ្ចី មិនចង់ឱ្យដាច់ ជាជំនួយដុល ឥតសំណងទេ។
ផ្ទុយទៅវិញ សម្រាប់លោក Charles Michel នាយករដ្ឋមន្ត្រីប៊ែលស៊ិក និងជាអធិបតីនៃអង្គប្រជុំ បានស្តែងសុទិដ្ឋិនិយមថា លោកជឿលើសេចក្តីក្លាហានរបស់អ្នកនយោបាយ គឺច្បាស់ជាអាចរកឃើញកិច្ចព្រមព្រៀងរួមមួយបាន នៅទីបំផុត។
នាយករដ្ឋមន្ត្រី លុចសំបួរ Xavier Bettel សម្តែងមតិក្នុងន័យចិត្តធម៌។ លោកថ្លែងក្នុងន័យថា គេគួរតែផ្តល់ជំនួយ ផ្តល់លុយ ដល់ប្រទេសផ្សេងទៀតដែលរងគ្រោះ នៅថ្ងៃនេះ ព្រោះយើងមិនដឹងថា ថ្ងៃស្អែក ឬអនាគត យើងទៅវិញទេ ដែលនឹងត្រូវទទួលជំនួយ យើងទៅវិញទេ ដែលអាចនឹងជាជនរងគ្រោះម្តង។ ដូច្នេះ គេត្រូវជួយគ្នា និងបង្ហាញសាមគ្គីភក្តីភាពចំពោះគ្នា។
ស្របគ្នាដែរ នាយករដ្ឋមន្ត្រីអ៊ីតាលី Giuseppe Conte ទទូចជាថ្មី ឬក៏និយាយដាក់សម្ពាធបន្តិចផង ថា គួរគិតដល់ប្រយោជន៍នៃប្រជាជនអ៊ីតាលីនិងពលរដ្ឋអឺរ៉ុប ដែលកំពុងរងគ្រោះផង។
រីឯ ប្រធានាធិបតីបារាំង ថ្លែងពីក្រុងព្រុចសែល តាំងពីដើមទី ប្រាប់កាសែតបារាំង ថានេះជាពេលវេលាដែលត្រូវបង្ហាញការពិត និងបង្ហាញមហិច្ចតារបស់អឺរ៉ុប។ ពេលនេះ យើងកំពុងតែជួបវិបត្តិសុខភាពសាធារណៈដែលមិនធ្លាប់មានក្នុងប្រវត្តិសាស្ត្រមនុស្សជាតិ ដូច្នេះ យើងត្រូវការចាំបាច់ នូវសេចក្តីសាមគ្គីរួមគ្នារបស់អឺរ៉ុប។ លោកម៉ាក្រុងបន្តថាលោកមានទំនុកចិត្តចំពោះលទ្ធភាពនៃការរកឃើញកិច្ចព្រមព្រៀងចុះសម្រុងគ្នាសម្រាប់គម្រោងស្តារសេដ្ឋកិច្ចឡើងវិញក្រោយវិបត្តិមេរោគរាតត្បាតកូវីដ១៩។
ក្រៅពីលក្ខខណ្ឌរឿងឱ្យខ្ចី និងរឿងឱ្យដាច់ជាជំនួយឥតសំណងនេះ គឺលក្ខខណ្ឌចែងពីប្រទេសត្រូវបានលុយជំនួយនេះ ទាល់តែគោរពនីតិរដ្ឋ។ នេះក៏ជាចំណុចខ្ទាស់គ្នានិងខ្វែងគំនិតគ្នាដែរ។
តាមធម្មតា សហភាពអឺរ៉ុប ឈរលើគោលការណ៍គោរពសិទ្ធិមនុស្ស ប្រជាធិបតេយ្យ ហើយនីតិរដ្ឋ គឺជាមូលដ្ឋានគ្រឹះនៃគោលការណ៍ទាំងនេះ និងដែលមានចែងស្រេចស្រាបក្នុងធម្មនុញ្ញរបស់ខ្លួន។ ក៏ប៉ុន្តែ នយោបាយនៃប្រទេសសមាជិកនីមួយៗ អាចមានការប្រែប្រួលខ្លះ តាមការផ្លាស់ប្តូរនៃថ្នាក់ដឹកនាំថ្មីរបស់ខ្លួន។ ចំពោះប្រទេស ហុងគ្រី និងប៉ូឡូញ សព្វថ្ងៃនេះ គឺហាក់ត្រូវគេចង្អុរមុខថា កំពុងតែមានជំនោរផ្តាច់ការ រើអើងនិយម ដូច្នេះហើយទើបសមាជិករដ្ឋដទៃទៀត ទាមទារឲ្យសមាជិកផ្សេងទៀតដាក់គោលការណ៍គោរពសិទ្ធិមនុស្សនិងនីតិរដ្ឋ ជាចំណុចសំខាន់មួយដែរ។
ជាក់ស្តែង ហុងគ្រី និង ប៉ូឡូញ ហាក់កំពុងតែចង់ដើរឃ្លាតពីជំហរនៃការគោរពសិទ្ធិមនុស្សនិងនីតិរដ្ឋ ដែលជាមូលដ្ឋានគ្រឹះមួយរបស់គោលការណ៍សហភាពអឺរ៉ុប ពិសេសគឺក្រោមការដឹកនាំប្រទេសរបស់លោក Viktor Orban នាយករដ្ឋមន្ត្រីហុងគ្រី ដែលហាក់បាននិងកំពុងបានបំពានខ្លះៗមកហើយ។
ទោះយ៉ាងណាក្តី នាយករដ្ឋមន្ត្រី លុចសំបួរ Xavier Bettel ក៏បានបង្ហាញការយល់ឃើញថា គេមិនគួរយក អ៊ីតាលី និងអេស្ប៉ាញ ជាចំណាប់ខ្មាំងនោះទេ។ ពេលនេះ ប្រទេសទាំងពីរកំពុងរងគ្រោះខ្លាំងជាងគេ ប្រសិនបើ ហុងគ្រី ធ្វើវេតូ ជំទាស់តែមួយសំឡេង គឺច្បាស់ជាមិនអាចសម្រេចអ្វីចេញទេ នេះប្រសិនបើភាគីមេដឹកនាំផ្សេងទៀត នៅតែចង់បញ្ចូលលក្ខខណ្ឌគោរពសិទ្ធិមនុស្សនិងនីតិរដ្ឋ នៅក្នុងលក្ខខណ្ឌនៃគម្រោងស្តារសេដ្ឋកិច្ច ទៀតនោះ។
ក្នុងកិច្ចប្រជុំលើកនេះ អ្នកខ្លះ គេសង្ឃឹមច្រើនលើ ភាពជាអ្នកដឹកនាំរបស់លោកស្រីអធិការបតីអាល្លឺម៉ង់ ថាទំនងជាអាចនិយាយទៅមានទឹកមាត់ប្រៃ? តើមកពីអ្វី?
លើកនេះ អាចពិសេសជាងជំនួបចរចាសព្វដង ព្រោះថាជាថ្ងៃខួបកំណើត ៥៩ឆ្នាំ របស់នាយករដ្ឋមន្ត្រី ព័រទុយហ្គាល់ Antonio Costa ហើយក៏ជាឱកាសខួបរម្លឹកកំណើត៦៦ឆ្នាំ នៃអធិការបតីអាល្លឺម៉ង់ផង គឺលោកស្រី Merkel ដែលជាអ្នកនយោបាយស្រី ប្រលូកក្នុងពិភពសហភាពអឺរ៉ុបតាំងពី២០០៧ គឺចាស់វស្សាជាងគេ ក្នុងចំណោមមេដឹកនាំទាំង២៦ប្រទេសផ្សេងទៀត! ថ្នាក់ដឹកនាំផ្សេងៗ អាចនឹងមានការយោគយល់ចំពោះចំណុចពីរនេះ។
ម្យ៉ាងទៀត អាល្លឺម៉ង់ ដែលក្លាយជាប្រធានផ្លាស់វេនដឹកនាំអង្គប្រជុំ ហើយដែលរកឃើញទំនុកចិត្ត និងការឯកភាពគ្នាជាមួយបារាំង រួចហើយ។ ដូច្នេះ ការរួមដៃគ្នារវាងបារាំងនិងអាល្លឺម៉ង់ ដែលជាក្បាលម៉ាស៊ីនធំពីរនៅអឺរ៉ុប ប្រហែលទំនងជាអាចបញ្ចុះបញ្ចូលសមាជិកដទៃទៀតបាន។
ប៉ុន្តែអ្វីៗ អាចនឹងប្រួលប្រែ ក៏មិនដឹង។ ថ្ងៃនេះ ជាថ្ងៃដំបូង ដូច្នេះលទ្ធផលអាចនឹងដឹង ខ្លះៗនៅយប់នេះ ម៉ោងនៅអឺរ៉ុប ឬក៏សេចក្តីសម្រេចទាំងស្រុង អាចដឹងនៅថ្ងៃស្អែក ថ្ងៃបញ្ចប់កិច្ចប្រជុំកំពូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ