ភូមាត្រៀមបាញ់បង្ហោះផ្កាយរណប ជាលើកដំបូងរបស់ខ្លួនដើម្បីតាមដានបរិស្ថាន
ភូមា ដែលជាប្រទេសក្រីក្រមួយ នៅអាស៊ីអាគ្នេយ៍ នឹងបាញ់បង្ហោះផ្កាយរណបផ្ទាល់ខ្លួនមួយ ដើម្បីតាមដានបរិស្ថាន នៅលើផែនដី។ គម្រោងការផ្កាយរណបរបស់ភូមា ជាផ្នែកមួយនៃកម្មវិធីអវកាសរបស់សមាគមអាស៊ីមួយ ដែលមានទិសដៅបំពាក់បច្ចេកវិទ្យា សម្រាប់ទប់ទល់គ្រោះមហន្តរាយធម្មជាតិ ឬការប្រែប្រួលអាកាសធាតុ។
ចុះផ្សាយនៅថ្ងៃ៖
ស្តាប់ - ០២:២៩
ភូមា ដែលជាប្រទេសក្រីក្រជាងគេ នៅក្នុង សម្ព័ន្ធ អវកាសអាស៊ី ដែលមានថៃ វៀតណាម ហ្វីលីពីន ឥណ្ឌូណេស៊ី និងជប៉ុន ជាសមាជិក កំពុងត្រៀមខ្លួន ដើម្បីបាញ់បង្ហោះផ្កាយរណបជាលើកដំបូងរបស់ខ្លួន ដើម្បី ការពារជីវិតមនុស្សរាប់លាននាក់ពីគ្រោះមហន្តរាយធម្មជាតិ។
ផលិតនៅប្រទេសជប៉ុន ផ្កាយរណបរបស់ភូមា ត្រូវបានគូររចនា និងអភិវឌ្ឍឡើង ដោយក្រុមវិស្វករភូមា នៅក្នុងអគារមហាវិទ្យាល័យ បច្ចេកវិទ្យាអវកាស ដែលមានទីតាំងនៅកណ្តាលប្រទេសភូមា។ សម្រាប់ប្រធានមហាវិទ្យាល័យភូមា បច្ចេកវិទ្យាថ្មីនេះនឹងជួយភូមា ឲ្យលោត បោះមួយជំហានធំ។
ផ្កាយរណបរបស់ភូមា នឹងត្រូវបាញ់ចេញពីទឹកដីបរទេស នៅអំឡុងដើមឆ្នាំក្រោយ។ ទោះជាភូមា គ្មានកន្លែងសម្រាប់បាញ់បង្ហោះផ្កាយរណប ប៉ុន្តែ វិស្វករភូមា នឹងមានសិទ្ធិគ្រប់គ្រងបញ្ជាផ្កាយរណប ដោយរួមសហការជាមួយ មជ្ឈមណ្ឌលត្រួតពិនិត្យមួយផ្សេងទៀត ដែលមានទីតាំងនៅប្រទេសជប៉ុន។
សម្រាប់អ្នកវិទ្យាសាស្រ្តជប៉ុន លោក Yukihiro Takahashi មកពីសកលវិទ្យាហុកកៃដូ ដែលធ្វើការជាមួយវិស្វករភូមា ភូមាដើរតួនាទីសំខាន់មួយ នៅក្នុងគម្រោង បើទោះជាភូមាចូលរួមបង់វិភាគទាន តែ១៦លានដុល្លារ សម្រាប់គម្រោងដែលមានតម្លៃ សរុប ១០០លានដុល្លារ។
ជប៉ុន ហ្វីលីពីន វៀតណាម ឥណ្ឌូណេស៊ី បង់ក្លាដែស ម៉ុងហ្គោលី ថៃ ម៉ាឡេស៊ី និងភូមា បានរួមគ្នា នៅក្នុងសម្ព័ន្ធអវកាសអាស៊ី ដើម្បីផលិត និងបាញ់បង្ហោះផ្កាយរណប សម្រាប់តាមដាន ព្យុះ គ្រោះរញ្ជួយដី ចរន្តទឹកសមុទ្រ នៅទ្វីបអាស៊ី ក៏ដូចជា ដីកសិកម្ម ឬការរីករាលដាលនៃមេរោគរាតត្បាតណាមួយ។
គោលដៅរបស់សម្ព័ន្ធអវកាសអាស៊ី គឺបាញ់បង្ហោះ ផ្កាយរណប ដែលមានតម្លៃថោក ចំនួន ៥ ក្នុងមួយឆ្នាំ (ផ្កាយរណបដែលមានទម្ងន់តិចជាង ១០០គីឡូក្រាម និងមានជីវិត ៥ឆ្នាំ) រហូត ដល់គ្រប់ចំនួន ៥០ នៅក្នុងគន្លងតារាវិថី។ ផ្កាយរណបរបស់សម្ព័ន្ធអវកាសអាស៊ី នឹងមានបំពាក់ដោយកាម៉េរ៉ា ដ៏ជឿនលឿនបំផុត ដែលអាចថតរូបភាពដីកសិកម្ម ការអភិវឌ្ឍក្រុង ការកាប់បំផ្លាញព្រៃ និងការជីករ៉ែខុសច្បាប់ជាដើម។
លោក Sinead O’Sullivan អ្នកស្រាវជ្រាវអាមេរិកាំងម្នាក់ មកពីវិទ្យាសា្ថនបច្ចេកវិទ្យា Massachusetts នៅអាមេរិក បានទាមទារជាច្រើនឆ្នាំមកហើយ ដើម្បីឲ្យប្រទេសកំពុងអភិវឌ្ឍ វិនិយោគ នៅក្នុងវិស័យបច្ចេកវិទ្យា ផ្កាយរណប ផ្ទាល់ខ្លួន ជាជាង ពឹងផ្អែកប្រទេសមហាអំណាច ដូចជាអាមេរិកជាដើម ដែលតែងលក់រូបភាពផ្កាយរណប ក្នុងតម្លៃថ្លៃកប់ពពក។ គេប៉ាន់ស្មានថា រាល់១ដុល្លារ ដែលអាមេរិកចំណាយសម្រាប់គម្រោងផ្កាយរណប នឹងនាំឲ្យអាមេរិកចំណេញមកវិញ ដល់ទៅ ៤០ដុល្លារ សម្រាប់សេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ