Removedebris ផ្កាយរណបកម្ចាត់សំរាម ដំបូងគេ នៅក្នុងទីអវកាស
អ្នកវិទ្យាសាស្រ្ត កាលពីថ្ងៃពុធ ទី ១៩កញ្ញា បានសាកល្បងដោយជោគជ័យ បេសសកម្មបោសសម្អាតសំរាម នៅក្នុងទីអវកាស ដោយប្រើ ផ្កាយរណបគំរូ ឈ្មោះ Removedebris។ Removedebris ដែលជាបច្ចេកវិទ្យាចុងក្រោយរបស់ក្រុមហ៊ុនអឺរ៉ុប Airbus និងឧបត្ថម្ភថវិកាដោយគណៈកម្មការអឺរ៉ុប ត្រូវបានកសាងឡើង ក្នុងគោលដៅចាប់ប្រមូលសំរាម ដែលនៅអណ្តែតពាសពេញក្នុងទីអវកាស។
ចុះផ្សាយនៅថ្ងៃ៖ កែប្រែថ្ងៃទី៖
គ្រឿងកំទេចកំទី និងផ្កាយរណបចាស់ៗ ដែលគេលែងត្រូវការ ឬផ្កាយរណបដែលខូចមិនដំណើរការ មានចំនួនកាន់តែច្រើន ក្នុងទីអវកាស។ សំរាមក្នុងទីអវកាសមិនត្រឹមតែអាចបង្កគ្រោះថ្នាក់ ដូចជាបុកបំផ្លាញ ផ្កាយរណបតែប៉ុណ្ណោះទេ ប៉ុន្តែកំទេចកំទីលោហៈធាតុ ដែលជាសំណល់របស់ផ្កាយរណប និងដែលអាចរត់ក្នុងល្បឿន ៤៨ ០០០គីឡូម៉ែត្រ ក្នុងមួយម៉ោង អាចបង្កគ្រោះថ្នាក់ផងដែរដល់អាយុជីវិតរបស់អវកាសយានិក។
បណ្តាញត្រួតពិនិត្យអវកាសរបស់សហរដ្ឋអាមេរិកកំពុងតាមដានវត្ថុ ប្រមាណ ៤ម៉ឺន នៅក្នុងទីអវកាស។ គេរកឃើញថា សំរាមអវកាសច្រើនជាង ៧៦០០តោន កំពុងហោះអណ្តែតចោល នៅក្នុងគន្លងតារាវិថីជុំវិញផែនដី។
គឺក្នុងគោលដៅកម្ចាត់សំរាមក្នុងទីអវកាស ដែលក្រុមវិស្វករ របស់ក្រុមហ៊ុនAirbus រួមជាមួយអ្នកស្រាវជ្រាវវិទ្យាសាស្រ្ត បានចំណាយពេល៦ឆ្នាំមកហើយ ដើម្បី កសាងផលិត ផ្កាយរណបចាប់សំរាម Removedebris នេះឡើង។ នៅក្នុងដំណាក់កាលសាកល្បង ជាលើកដំបូង ផ្កាយរណបRemovedebris ត្រូវបានបាញ់បង្ហោះ ទៅ កាន់ទីយានអវកាសអន្តរជាតិ ISS តាំងពីខែ មិថុនាម្ល៉េះ។ ទើបតែនៅថ្ងៃពុធ ដែលRemovedebris បានបញ្ចេញស្នាដៃចាប់សំរាមរបស់ខ្លួន។ នៅក្នុងរូបភាពវីដេអូ របស់Removedebris ដែលក្រុមការងាររបស់ក្រុមហ៊ុនAirbusបានបង្ហាញកាលពីថ្ងៃព្រហស្បតិ៍ គេឃើញថា ផ្កាយរណប ចាប់សំរាមRemovedebrisបានបាញ់សំណាញ់ទៅក្តោបវត្ថុតូចមួយ ដែលកំពុងអណ្តែត និងស្ថិតនៅឆ្ងាយពីវាប្រមាណ៧ម៉ែត្រប៉ុណ្ណោះ។
ជារួម Removedebris មានបំពាក់ដោយបច្ចេកវិទ្យាទំនើបបី ដើម្បី កម្ចាត់បោសសម្អាតសំរាមក្នុងទីអវកាស។ ទី១ គឺតាមរយៈសំណាញ់ ទី១ ដោយប្រើស្ន សម្រាប់បាញ់ចាប់សំរាម ហើយនិងទី៣ ប្រព័ន្ធចាប់សញ្ញា ដែលអនុញ្ញាតឲ្យRemovedebris អាចហោះទៅរកទីកន្លែងរបស់សំរាមក្នុងទីអវកាស។ ក្រៅពីនោះ ផ្កាយរណបកម្ចាត់សំរាម Removedebris មានផងដែរ ផ្ទាំងស្រោបម្យ៉ាង ដែលគេប្រើសម្រាប់ រុញផ្កាយរណបសំរាម ឲ្យហោះចាកចេញពីគន្លងតារាវិថី សំដៅផែនដី។ ច្បាស់ណាស់ថា ការងាររបស់ Removedebris មិនមែនប្រមូលសំរាមទុកគរចោល ក្នុងទីអវកាសនោះទេ ប៉ុន្តែគឺប្រមូល រួចបន្ទាប់ ចាប់ក្រសោប រុំវា ជាមួយនឹងផ្ទាំងម្យ៉ាង ដើម្បី រុញទម្លាក់ វាឲ្យទៅ ឆេះឯង ក្នុងបរិយាកាស នៅពេលហោះធ្លាក់មកលើផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ