បោះឆ្នោតសភា៖ បងប្អូនត្រកូលរ៉ាចាប៉ាក់សេសង្ឃឹមពង្រឹងអំណាចកាន់តែខ្លាំង នៅស្រីលង្កា
ប្រជាជនស្រីលង្កា ជាង ១៦លាននាក់ត្រូវធ្វើដំណើរទៅបោះឆ្នោត សភា នៅថ្ងៃពុធ នេះ នៅក្នុងបរិបទដែលសេដ្ឋកិច្ចប្រទេសកំពុងបាក់ទ្រម ដោយសារវិបត្តិសេដ្ឋកិច្ច។ ដោយរំពឹងទទួលជ័យជំនះផ្តាច់មុខ នៅក្នុងការបោះឆ្នោតសភា ត្រកូលរ៉ាចាប៉ាក់សេ ដែលមានប្អូនជាប្រធានាធិបតី និងបងប្រុស ជានាយករដ្ឋមន្រ្តី រំពឹងពង្រឹងអំណាច ដើម្បី គ្រប់គ្រងស្រីលង្កាយូរតទៅទៀត រហូតដល់កូនចៅជំនាន់ក្រោយ។
ចុះផ្សាយនៅថ្ងៃ៖
ស្តាប់ - ០៣:០៩
បន្ទាប់ពីត្រូវលើកពេលអស់ ៤ខែ ដោយសារវិបត្តិកូវីដ ស្រីលង្កា នៅថ្ងៃពុធនេះ បានរៀបចំការបោះឆ្នោត ដែលក្នុងនោះ បេក្ខជនជាង ៧ពាន់នាក់ ត្រូវប្រកួតប្រជែងគ្នា សម្រាប់អាសនៈ២២៥នៅរដ្ឋសភា។
ប្រធានាធិបតី ស្រីលង្កា លោកហ្គូតាបាយ៉ា រ៉ាចាប៉ាក់សេ ហើយនិងបងប្រុស លោកម៉ាហិនដា រ៉ាចាប៉ាក់សេ ដែលមានតំណែងជានាយករដ្ឋមន្រ្តី សង្ឃឹមទទួលបានសំឡេងភាគច្រើន ២ភាគ៣ នៅរដ្ឋសភា ដើម្បីអាចកែប្រែរដ្ឋធម្មនុញ្ញ សំដៅពង្រឹងអំណាចរបស់ប្រធានាធិបតី។
បើសិនគណបក្សរបស់ខ្លួន ឈ្នះឆ្នោត ទទួលបានសំឡេងភាគច្រើននៅរដ្ឋសភា នោះ បងប្អូនត្រកូលរ៉ាចាប៉ាក់សេនឹងធ្វើកំណែទម្រង់ រដ្ឋធម្មនុញ្ញ ដែលរដ្ឋាភិបាលមុនបានតាក់តែងឡើង ដើម្បី កំណត់អំណាច និងអាណត្តិប្រធានាធិបតី ត្រឹមតែ២អាណត្តិ។
ប៉ុន្តែ បងប្អូនត្រកូល រ៉ាចាប៉ាក់សេ ដែលបានត្រលប់ទៅកាន់អំណាច សាជាថ្មី នៅស្រីលង្កា ខែវិច្ឆិកាឆ្នាំមុន ចង់កែប្រែរដ្ឋធម្មនុញ្ញឡើងវិញ ដើម្បីប្រមូលអំណាច តុលាការ ប៉ូលិស ឲ្យមកស្ថិតក្នុងដៃគ្រប់គ្រងរបស់ប្រធានាធិបតី។ ដោយធ្វើកំណែទម្រង់ រដ្ឋធម្មនុញ្ញ ត្រកូលរ៉ាចាប៉ាក់សេលែងចង់ឲ្យមានការកំណត់អាណត្តិប្រធានាធិបតី តទៅទៀត។ ជាក់ស្តែង បងប្រុស របស់ប្រធានាធិបតី គឺលោកម៉ាហិនដា រ៉ាចាប៉ាក់សេ ដែលដឹកនាំ ស្រីលង្កា អស់១០ឆ្នាំ ជាមួយកណ្តាប់ដៃដែក រហូតដល់ឆ្នាំ ២០១៥ មិនអាចឈរឈ្មោះសម្រាប់ការបោះឆ្នោតប្រធានាធិបតីដោយសារតែការកំណត់អាណត្តិ នៅក្នុងច្បាប់រដ្ឋធម្មនុញ្ញនេះឯង។
នៅក្នុងថ្ងៃឃោសនាបោះឆ្នោតចុងក្រោយ កាលពីថ្ងៃអាទិត្យកន្លងទៅ លោកម៉ាហិនដា ដែលត្រូវប្អូនប្រុស តែងតាំងឲ្យធ្វើជានាយករដ្ឋមន្រ្តី នៅចុងឆ្នាំមុន បានអំពាវនាវឲ្យគេបោះឆ្នោតឲ្យគណបក្សរបស់លោក ដើម្បី ជំរុញសេដ្ឋកិច្ច កសាងសង្គមស្រីលង្កាឲ្យមានសណ្តាប់ធ្នាប់ឡើងវិញ។
តាមអង្គការការពារសិទ្ធិមនុស្ស មេធាវី អ្នកកាសែត និង សកម្មជនសិទ្ធិមនុស្ស បានរងការគំរាមកំហែងកាន់តែច្រើន ចាប់តាំងពីបងប្អូនត្រកូល រ៉ាចាប៉ាក់សេ ត្រលប់ចូលកាន់អំណាចសាជាថ្មី នៅស្រីលង្កា។ បងប្អូនរ៉ាចាប៉ាក់សេ មានស្នាដៃ បិទបញ្ចប់សង្រ្គាមស៊ីវិល ជាមួយពួកឧទ្ទាម តាមូលដែលបានសម្លាប់មនុស្សជាង ១សែននាក់ នៅស្រីលង្កា ប៉ុន្តែ គ្រួសាររ៉ាចាប៉ាក់សេ ក៏រងរិះគន់ណាស់ដែរថា បានប្រព្រឹត្តអំពើពុករលួយ ផ្តាច់ការ បែងចែកអំណាចតែក្នុងរង្វង់ បងប្អូនគ្រួសាររាចាប៉ាក់សេ។
នៅ ស្រីលង្កា គេមិនមានស្ថាប័នស្ទង់មតិឯករាជ្យនោះទេ ប៉ុន្តែ អ្នកសង្កេតការណ៍ជាច្រើនវាយតម្លៃរួចហើយថា គណបក្សរបស់បងប្អូនត្រកូលរាចាប៉ាក់សេ នឹងអាចឈ្នះឆ្នោតសភាលើកនេះ ដោយសារតែគណបក្សប្រឆាំង ដែលមានជម្លោះផ្ទៃក្នុងមិនឈប់ ចុះខ្សោយកម្លាំង។ អ្នកវិភាគមួយចំនួនវាយតម្លៃថា ដោយអាចត្រលប់ទៅឈរឈ្មោះ សាជាថ្មី សម្រាប់តំណែងប្រធានាធិបតី នៅស្រីលង្កា លោកនាយករដ្ឋមន្រ្តី ម៉ាហិនដា រ៉ាចាប៉ាក់សេ បានរៀបចំត្រួសត្រាយផ្លូវរួចហើយ ដើម្បីឲ្យ Namal កូនប្រុស របស់លោកដែលមានអាយុ ៣៤ឆ្នាំ អាចក្លាយជាប្រធានាធិបតីដឹកនាំស្រីលង្កា ទៅថ្ងៃអនាគត។ បច្ចុប្បន្ននេះ ក្រៅតែពីលោកម៉ាហិនដា បងប្អូនប្រុស២នាក់ ផ្សេងទៀត របស់លោកប្រធានាធិបតីហ្គូតាបាយ៉ា រ៉ាចាប៉ាក់សេ ក៏មានតំណែងសំខាន់ផងដែរ នៅក្នុងរដ្ឋាភិបាលស្រីលង្កា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ