សភាចិនកំពុងគិតបញ្ចប់អាណត្តិតំណាងរាស្ត្រប្រឆាំងនៅហុងកុង
ចុះផ្សាយនៅថ្ងៃ៖
ស្តាប់ - ០៥:៤៤
នៅប៉េកាំង គណៈកម្មាធិការអចិន្ត្រយ៍សភាប្រជាជនចិន បានបើកកិច្ចប្រជុំបន្ទាន់ នៅថ្ងៃសៅរ៍ទី៨សីហា ដើម្បីជជែកគិតគូរពីសំណុំរឿងរដ្ឋបាលហុងកុង និងពីការបន្តអាណត្តិរបស់តំណាងរាស្ត្រហុងកុង ខណៈពេលដែលសហរដ្ឋអាមេរិក បានដាក់ទណ្ឌកម្មលើមន្ត្រីជាន់ខ្ពស់ហុងកុង ចំនួន១១រូប ក្នុងនោះ រួមមានទាំង មេដឹកនាំរដ្ឋបាលហុងកុង លោកស្រី ការី ឡាំ ផង។
តើអនាគតនៃអាណត្តិរបស់តំណាងរាស្ត្រហុងកុង ដែលប្រឆាំងចិនប៉េកាំង នឹងក្លាយទៅជាយ៉ាងណា?
ហុងកុង ជាសំណុំរឿងក្តៅ។ អាជ្ញាធរហុងកុង បានសម្រេចលើកពេលបោះឆ្នោតសភា ទៅឆ្នាំក្រោយហើយ នៅខែកញ្ញា អ្នកតំណាងរាស្ត្រទាំងឡាយ ត្រូវផុតដាច់អាណត្តិ។ ដើម្បីបន្តជីវិតសភានិងរដ្ឋបាលហុងកុង តទៅទៀត គឺចាំបាច់ត្រូវរៀបចំក្បាលម៉ាស៊ីន ក្នុងសម័យអន្តរកាលមួយឱ្យរឹងមាំ។ ហេតុនេះទើប គណៈកម្មាធិការអចិន្ត្រយ៍សភាប្រជាជនចិន បើកកិច្ចប្រជុំបន្ទាន់ នៅពេលនេះ ហើយត្រូវប្រជុំគ្នាដល់ទៅចំនួន ៤ថ្ងៃ ឯណោះ។
កិច្ចពិភាក្សាកំពុងតែប្រព្រឹត្តទៅនៅឡើយ! អ្វីដែលគេបានដឹង បើតាមកាសែតបរទេស ផ្នែកកិច្ចការរដ្ឋបាល គឺ លោកស្រី ការី ឡាំ មេដឹកនាំរដ្ឋបាលហុងសព្វថ្ងៃ អាចនឹងនៅតែបន្តដឹកនាំហុងកុងតទៅទៀត។ ប៉ុន្តែ ក្នុងសភាហុងកុង វិញ គឺចាំបាច់ត្រូវតែជម្រុះចោល សមាជិកសភា រូបណា ដែលប្រឆាំង។ អ្នកតំណាងរាស្ត្រប្រឆាំងនៅហុងកុង ជាបក្សពួកក្រុមចលនាគាំទ្រលទ្ធិប្រជាធិបតេយ្យ ហើយជាបន្លាក្នុងកែវភ្នែក នៃរដ្ឋបាលហុងកុងផង និងប៉េកាំងផង។
ជាដំបូងនេះ គេដឹងច្បាស់ថា អ្នកតំណាងរាស្ត្រប្រឆាំង យ៉ាងហោច ៤-៥នាក់ នឹងច្បាស់ជាលំបាកបន្តពន្យារអាណត្តិ រហូតដល់កាលបោះឆ្នោតសភាឆ្នាំក្រោយណាស់ ពីព្រោះពួកគេក៏បានត្រូវស្ថិតនៅក្នុងចំណោមបេក្ខជនតំណាងរាស្ត្រប្រមាណជាង១០នាក់ទៀត ដែលត្រូវ អាជ្ញាធរហុងកុង កាលពីពេលថ្មីៗនេះ បានសម្រេចដកសិទ្ធិមិនឱ្យឈរឈ្មោះ រួចស្រេចទៅហើយ ។
ទន្ទឹមនឹងគ្នានេះដែរ អ្នកតំណាងរាស្ត្រ ដែលគាំទ្រខាងចិនប៉េកាំង លោក Junius Ho បានចេញយោបល់ក្តែងៗថាត្រូវតែបញ្ចប់អាណត្តិរបស់តំណាងរាស្ត្រណា ដែលមានទំនោរប្រកាសឯករាជ្យ ហើយធ្វើសកម្មភាពកុបកម្ម។
ចំណោទផ្នែកគតិយុត្តិនៅត្រង់ថា ការសម្រេចបន្តអាណត្តិសភា តែលុបចោលអាណត្តិរបស់តំណាងរាស្ត្រប្រឆាំង ជាសំណួរមួយដែលលំបាកខ្លាំង ហើយនេះក៏ជាបញ្ហាព្រួយបារម្ភខ្លះដែរ របស់លោកស្រី ការី ឡាំ ។
ទោះបីយ៉ាងនេះ គេឃើញច្បាស់ថា ការមិនចង់បន្តអាណត្តិឱ្យអ្នកតំណាងរាស្ត្រប្រឆាំង ការលុបសិទ្ធហាមឃាត់អ្នកគាំទ្រប្រជាធិបតេយ្យ មិនឱ្យឈ្មោះឈរបោះឆ្នោត គឺជាការបោសសម្អាតទ្រង់ទ្រាយធំតែម្តង នៅក្នុងសភាហុងកុង និងនៅក្នុងជួរដឹកនាំរដ្ឋបាលហុងកុង។ ការចាប់ខ្លួនអ្នកតវ៉ានៅតាមផ្លូវ ជាបន្តបន្ទាប់។ មេៗក្រុមចលនានិស្សិតហុងកុង ក្រុមអ្នកគាំទ្រប្រជាធិបតេយ្យ គឺត្រូវប្រឈមមុខឡើងតុលាការ មិនស្វាងសោះ នាប៉ុន្មានសប្តាហ៍ចុងក្រោយនេះ។
ការកោះប្រជុំបន្ទាន់របស់សភាចិននេះ គឺក្រោយពេលតែបន្តិចប៉ុណ្ណោះ បន្ទាប់ពីសហរដ្ឋអាមេរិក សម្រេចដាក់ទណ្ឌកម្មលើថ្នាក់ដឹកនាំហុងកុង។ តើទណ្ឌកម្មអាមេរិកនេះ ធ្ងន់ធ្ងន់យ៉ាងណា?
សហរដ្ឋអាមេរិក ដាក់ទណ្ឌកម្មលើថ្នាក់ដឹកនាំហុងកុង នៅពេល ជាចំណាត់ការបន្ថែម បន្ទាប់ពីអាមេរិក កាលពីខែមុន បានបិទបញ្ចប់លក្ខន្តិកៈពិសេសរបស់ហុងកុង ដើម្បីសងសឹកចិនដែលអនុម័តច្បាប់សន្តិសុខជាតិហុងកុង។ ទណ្ឌកម្មថ្មីនេះ ផ្តោតទៅការបង្កកទ្រព្យសម្បត្តិទាំងអស់របស់មន្ត្រីគ្រាក់ៗហុងកុង ចំនួន១១នាក់។ អ្នកដែលត្រូវជាប់ទណ្ឌកម្មអាមេរិក គឺមាន មន្ត្រីជាន់ខ្ពស់ ខាងសន្តិសុខ ខាងយុត្តិធម៌ មេប៉ូលិសហុងកុង ហើយក្នុងនោះ គឺលោកស្រី ការី ឡាំ ថ្នាក់ដឹកនាំរដ្ឋបាលហុងកុងដែរ។
នៅមានទៀត ប្រធានការិយាល័យទំនាក់ទំនងចិនហុងកុង លោក Luo Huining ក៏ជាប់ឈ្មោះក្នុងបញ្ជីទណ្ឌកម្មបង្កកទ្រព្យសម្បត្តិនេះដែរ។ មន្ត្រីថ្នាក់ខ្ពស់រូបនេះ បានប្រតិកម្មភ្លាមៗថាគ្មានលុយឯណាទៅលាក់នៅក្រៅស្រុកទេ អាមេរិកចង់ធ្វើអីធ្វើទៅ។ លោកថែមទាំងវាយបកទៀតថា ទង្វើរបស់អាមេរិកនេះ គឺស្តែងពីចេតនាច្បាស់ក្រឡែត គាំទ្រអ្នកហុងកុងដែលប្រឆាំងចិន និងចង់បង្កអស្ថិរភាពនៅហុងកុងនិងនៅចិន។ នេះជាត្លុកកំប្លែកគួរឱ្យសើច និងគួរឱ្យខ្មាស់។
ប្រតិកម្មធ្ងន់ជាងនេះទៀត គឺមន្ត្រីជាន់ខ្ពស់ខាងពាណិជ្ជកម្មហុងកុង លោក Edward Yau ថាសកម្មភាពអាមេរិក ជាទង្វើព្រៃ និងគ្មានពិចារណាហេតុផល។
ចំពោះសហរដ្ឋអាមេរិកវិញ ទណ្ឌកម្មបង្កកទ្រព្យសម្បត្តិនេះ ដាក់ចំពោះបុគ្គលថ្នាក់ដឹកនាំហុងកុង ដែលគាំទ្រចិន និងជួយចិន ធ្វើឱ្យបំពានលើស្វ័យភាពតំបន់ហុងកុង ហើយដែលបានចូលរួមចំណែកធ្វើឱ្យរឹតត្បិត កាត់ផ្តាច់សេរីភាពបញ្ចេញមតិ និងសិទ្ធជួបប្រជុំតវ៉ា ជាសិទ្ធិសំខាន់របស់ពលរដ្ឋហុងកុង។ សកម្មភាពនេះ មិនអាចទទួលយកបានសោះឡើយ ចំពោះអាមេរិក។ នេះបើតាមលោក Steve Mnuchin រដ្ឋមន្រ្តីក្រសួងរតនាគារសហរដ្ឋអាមេរិក និងដែលអះអាងថា ទណ្ឌកម្មរបស់អាមេរិកនៅពេលនេះ គឺបង្កទ្រព្យសម្បត្តិគ្រប់បែបយ៉ាងរបស់ មន្ត្រីជាន់ខ្ពស់ហុងកុង ទាំង១១រូបនោះ នៅលើទឹកដីសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ