ចិននិងអាមេរិក សន្យាចាប់ដៃគ្នាគោរពកិច្ចព្រមព្រៀងពាណិជ្ជកម្ម
ចុះផ្សាយនៅថ្ងៃ៖
ស្តាប់ - ០៧:៤៨
កាលពីថ្ងៃចន្ទ ទី២៤សីហា ភាគីទាំងពីរ ចិននិងអាមេរិក បានចេញលិខិតប្រកាសថា ទាំងសងខាង នឹងខិតខំធ្វើយ៉ាងណា អនុវត្ត និងគោរពកិច្ចព្រមព្រៀងពាណិជ្ជកម្ម ដែលប្រទេសទាំង២ បានចុះហត្ថលេខា កាលពីខែមករា ដើមឆ្នាំនេះ។ នេះគឺជាការសន្យាដែលបង្ហាញថា ភាគីទាំង២ ហាក់កំពុងតែបន្ទន់ឥរិយាបទរៀងៗខ្លួន ដើម្បីកាត់បន្ថយភាពតានតឹង ទាក់ទិននឹងបញ្ហាសង្រ្គាមពាណិជ្ជកម្ម។ ទោះយ៉ាងណា ក្រៅពីបញ្ហាសង្រ្គាមពាណិជ្ជកម្មនេះ ចិននិងសហរដ្ឋអាមេរិក កំពុងតែមានទំនាស់នឹងគ្នា ជាច្រើនសំណុំរឿងផ្សេងទៀត ដូចជាបញ្ហាសិទ្ធិមនុស្ស បញ្ហហុងកុង ជម្ងឺកូវីដ១៩ ព្រមទាំងសំណុំរឿង Huawei ផង។
ប្តេជ្ញារួមគ្នា ធ្វើឲ្យកិច្ចព្រមព្រៀងពាណិជ្ជកម្មបានជោគជ័យ
វាគឺជារឿងគួរឲ្យភ្ញាក់ផ្អើលដែរ ព្រោះថាបើនិយាយអំពីកំដៅនៃភាពតានតឹង រវាងមហាអំណាចទាំង២នេះ គឺថាវាក្តៅគគុក សឹងតែគ្រប់សំណុំរឿង។ រដ្ឋាភិបាលលោកដូណាល់ ត្រាំ បានរករឿងចោទចិន សឹងតែរាល់ថ្ងៃ ដូចជាបញ្ហានៅហុងកុង បញ្ហាជម្ងឺកូវីដ១៩ និងបញ្ហាក្រុមហ៊ុនបច្ចេកវិទ្យាHuawei ដែលអាមេរិក បានចោទថាគឺជាឧបករឈ្លបយកការណ៍ និងលួចប្រមូលទិន្នន័យ ហើយថ្មីៗនេះ គឺសំណុំរឿងTikTok ហើយនឹងការបញ្ជាបិទស្ថានកុងស៊ុល សងសឹកគ្នារៀងៗខ្លួនទៀត។
ក៏ប៉ុន្តែទាក់ទិននឹងបញ្ហាសំណុំរឿងពាណិជ្ជកម្មវិញ គេឃើញថាពេលនេះ ប្រទេសទាំង២ ហាក់បានបន្ទន់ឥរិយាបទច្រើន។ ភាគីទាំង២ គឺអាមេរិកតំណាងដោយ លោក Robert Lighthizer មន្ត្រីទទួលបន្ទុកកិច្ចការពាណិជ្ជកម្ម និងភាគីចិន តំណាងដោយលោកអនុនាយករដ្ឋមន្ត្រី Liu He បានជួបប្រជុំគ្នា តាមប្រព័ន្ធវីស្យូខុនហ្វេរិនស៍ កាលពីថ្ងៃចន្ទទី២៤សីហា។
ក្រោយការប្រជុំនេះ ភាគីទាំង២ បានប្រកាសប្តេជ្ញារួមគ្នា ថានឹងគោរព អនុវត្តកិច្ចព្រមព្រៀងពាណិជ្ជកម្ម ដែលខ្លួនបានចុះហត្ថលេខា កាលពីខែមករា។ នៅក្នុងលិខិតប្រកាសរបស់ភាគីអាមេរិក គេបានលើកឡើងថា ភាគីទាំង២ បានសង្កេតឃើញថា មានការវិវ្ឍន៍ល្អច្រើនហើយ នៅក្នុងការគោរពកិច្ចព្រមព្រៀងពាណិជ្ជកម្ម ហើយភាគីទាំង២ នឹងចាត់វិធានការបន្ថែមទៀត ដើម្បីធ្វើយ៉ាងណា ឲ្យកិច្ចព្រមព្រៀងនេះបានជោគជ័យ។ ចំណែកខាងភាគីចិនវិញ បានលើកឡើងថា ចិននិងសហរដ្ឋអាមេរិក សន្យាថានឹងបង្កើត នូវលក្ខខណ្ឌ ក៏ដូចជាបរិយាកាសល្អៗ ដើម្បីធ្វើយ៉ាងណា អនុវត្តឲ្យបានសម្រេច នូវដំណាក់កាលដំបូង នៃកិច្ចព្រមព្រៀងពាណិជ្ជម្ម រវាងចិននិងសហរដ្ឋអាមេរិក។
កូវីដ១៩មករំខាន
ដូចយើងដឹងហើយ ថាក្រោយការឡើងកាន់តំណែងរបស់លោកដូណាល់ ត្រាំ គឺបញ្ហាវិវាទពាណិជ្ជកម្មជាមួយចិន បានកើនឡើងឥតឈប់ ដោយលោកដូណាល់ ត្រាំ បានចោទថាចិនបានលួចការងាររបស់អាមេរិក និងបានដើរខ្សែលើ ព្រោះថា ជញ្ជីងពាណិជ្ជកម្ម គឺផ្អៀងចំណេញទៅខាងចិនច្រើន។ ឆ្លងកាត់សង្រ្គាមពាក្យសំដី អស់ប្រមាណជា២ឆ្នាំ ទីបំផុតទៅ ចិន និងអាមេរិក បានសម្រេចបាននូវកិច្ចព្រមព្រៀងមួយ កាលពីខែមករា ដើមឆ្នាំ២០២០។
នៅក្នុងកិច្ចព្រមព្រៀងនេះ ចំណុចធំៗដែលគេបានកំណត់ គឺថា ភាគីចិន យល់ព្រមសុខចិត្ត បន្ថែមការទិញទំនិញ និងសេវាកម្មពីអាមេរិក ឲ្យបានក្នុងតម្លៃ២០០ពាន់លានដុល្លារ ក្នុងរយៈពេល២ឆ្នាំ។ ជាថ្នូរវិញ រដ្ឋាភិបាលអាមេរិក បានយល់ព្រម ផ្អាករាល់ការដំឡើងពន្ធទាំងអស់ ទៅលើទំនិញនាំចូលពីចិន។
ក៏ប៉ុន្តែ កូវីដ១៩បានធ្វើឲ្យរាំងស្ទះទាំងស្រុង ប្រមាណ៧ខែមកនេះ។ បើគិតត្រឹមចុងខែមិថុនា ភាគីចិន បានបំពេញកាតព្វកិច្ច ខ្លួនក្នុងការទិញទំនិញ និងសេវាកម្មពីអាមេរិក បានត្រឹមតែ៤៦% នៃអ្វីដែលគេបានកំណត់ សម្រាប់ដំណាក់កាលនេះប៉ុណ្ណោះ។ នេះបើផ្អែកតាមតួលេខ របស់ Peterson Institute for International Economics។ តែយ៉ាងណា ភាគីអាមេរិក គេបានយល់ពីកាលៈទេសៈលំបាក បង្កដោយវិបត្តិកូវីដ១៩នេះ។
ស្ថានភាពសេដ្ឋកិច្ចចិនពេលនេះ បានបើកទ្វារឡើងវិញជាបណ្តើរៗហើយ។ ភាគីទាំង២បានចាប់ផ្តើមនិយាយគ្នា កាលពីថ្ងៃព្រហស្បតិ៍សប្តាហ៍មុន។ ចិនគេបានលើកឡើងអំពី ការប្រឹងប្រែងរបស់គេ ក្នុងការធ្វើកំណែទម្រង់ស៊ីជំរៅ ទៅលើគ្រោងឆ្អឹងនៃវិស័យពាណិជ្ជកម្មតែម្តង ដើម្បីធ្វើយ៉ាងណា ការពារច្បាប់កម្មសិទ្ធបញ្ញា ហើយនិងដកចេញ នូវឧបសគ្គទាំងឡាយ ដែលរារាំងសហគ្រាសអាមេរិក ដែលរកស៊ីក្នុងវិស័យហិរញ្ញវត្ថុ វិស័យកសិកម្ម និងជាពិសេសនោះ គឺលុបចេញ នូវការបង្ខំទាញយកសមត្ថភាពបច្ចេកវិទ្យា។ ភាគីទាំង២ ក៏បាននិយាយគ្នា អំពីការបង្កើនការទិញទំនិញនិងសេវាកម្មអាមេរិក ពីសំណាក់ចិន។
លោកដូណាល់ ត្រាំ ចង់រកដង្ហើមសេដ្ឋកិច្ចជាមួយចិន ដើម្បីឃោសនាយកសម្លេងឆ្នោត
បើយើងសម្លឹងមើលទៅ គឺវាអាចមានហេតុផលនយោបាយដែរ សម្រាប់លោកដូណាល់ ត្រាំ ដែលកំពុងតែស្វែងរកសម្លេងឆ្នោត នាពេលនេះ។ ការផ្តល់សន្ទុះពាណិជ្ជកម្មជាមួយចិនឡើងវិញនេះ គឺវាអាចជួយសម្រាលវិបត្តិសេដ្ឋកិច្ចរបស់អាមេរិក បានមួយផ្នែកដែរ។ ចិនយល់ព្រមទិញទំនិញ និងសេវាកម្មអាមេរិក ឲ្យបានច្រើន មានន័យថា សហគ្រាស ក៏ដូចជាអាមេរិកនឹងមានការងារធ្វើ។ បើសេដ្ឋកិច្ចអាមេរិក ងើបឡើងវិញ លោកដូណាល់ ត្រាំ ក៏អាចមានអ្វីយកទៅអួត ឃោសនាដែរ។
មួយវិញទៀត លោកដូណាល់ ត្រាំ ធ្លាប់បានសន្យាជួយកសិករអាមេរិក ក្នុងការលក់ចេញនូវទិន្នផលទៅឲ្យចិន ឲ្យបានច្រើន ជាពិសេសនោះ គឺទិន្នផលសណ្តែកសៀង។ សង្រ្គាមពាណិជ្ជកម្ម ប្រមាណ២ឆ្នាំកន្លងមកនេះ ចិនបានដំឡើងពន្ធ និងបានកាត់បន្ថយការនាំចូលសណ្តែកសៀង ពីអាមេរិកច្រើនណាស់។ ដូច្នេះ ការត្រូវរ៉ូវគ្នាឡើងវិញ រវាងភាគីទាំង២នាពេលនេះ គឺវានឹងបើកទីផ្សារនេះ ឲ្យអាមេរិកអាចនាំចូលសណ្តែកសៀងទៅចិន បានច្រើនឡើងវិញ។
លោកស៊ី ជីនពីង ទទួលស្គាល់ថា សេដ្ឋកិច្ចចិនកំពុងធ្វើដំណើរពើបនឹងឧបសគ្គពីខាងក្រៅ
មានអ្នកវិភាគសេដ្ឋកិច្ចខ្លះ បានលើកឡើងថា ប្រមាណ២០ឆ្នាំចុងក្រោយនេះ ចិនបានកេងយកផលចំណេញច្រើនណាស់ អំពីទីផ្សារដោះដូរពាណិជ្ជកម្ម វិស័យរោងចក្រ ទំនិញគ្រប់មុខ។ ទៅដល់តំបន់ចុងកាត់មាត់ញកណា នៅទូទាំងពិភពលោក ក៏យើងឃើញមានទំនិញ Made in China ដែរ។
គឺលោកដូណាល់ ត្រាំ ដែលជាអ្នកធ្វើឲ្យសេចក្តីសុខរបស់ចិន បានរង្គោះរង្គើក្រឡាប់ចាក់។ ដំបូងឡើយចិន ខំប្រឹងពើងទ្រូងតតាំងជាមួយអាមេរិកដែរ ក៏ប៉ុន្តែកាន់តែតតាំង គឺកាន់តែខាតបង់។ បន្ថែមពីនេះ ជម្ងឺកូវីដ១៩បានធ្វើឲ្យសេដ្ឋកិច្ចចិន កាន់តែលំបាកថែមមួយកម្រិតទៀត។ ប្រការនេះ ហាក់បានធ្វើឲ្យចិន ដឹងខ្លួនថា ត្រូវតែសង្រួមឥរិយាបទខ្លះមកវិញ មិនថាជាមួយអាមេរិក ឬជាមួយនរណាទេ ដើម្បីធ្វើយ៉ាងណា រក្សាលំនឹងសេដ្ឋកិច្ច។ សេដ្ឋកិច្ចគឺជាសរសរទ្រូងដ៏សំខាន់ ក្នុងការទប់អំណាច របស់គណបក្សកុម្មុយនីស្តចិន។
យ៉ាងណាមិញ នៅថ្ងៃអង្គារទី២៥សីហា លោកស៊ី ជីនពីង ប្រធានាធិបតីចិន បានថ្លែងនៅក្នុងកម្មវិធីសន្និសីទមួយ ដោយលោកបានលើកឡើងថា “សេដ្ឋកិច្ចចិនកំពុងតែធ្វើដំណើរ ទៅពើបប្រទះនឹងបញ្ហារង្គោះរង្គើ បណ្តាលមកពីទីផ្សារខាងក្រៅ”។ ទីផ្សារខាងក្រៅនោះ គឺលោកស៊ី ជីនពីង ចង់សំដៅទៅលើមតិរបស់ប្រទេសផ្សេងៗទៀត ដែលជាទូទៅ គេនាំគ្នា ស្អប់ចិន លែងចង់រកស៊ី និងទិញទំនិញរបស់ចិន។ លោកស៊ី ជីនពីង មានប្រសាសន៍បន្ថែមថា “ដើម្បីប្រឈមនឹងឧបសគ្គទាំងនេះ ចិនត្រូវតែងាកមកពង្រឹកទីផ្សារក្នុងស្រុក មិនត្រូវរំពឹងតែទៅលើការនាំចេញ”។
លោកប្រធានាធិបតីចិន លើកឡើងទៀតថា “ដើម្បីបើកចំហរទីផ្សារចិនឲ្យធំឡើងវិញ ចិនត្រូវតែសហការឲ្យបានសកម្ម ជាមួយប្រទេស ជាមួយតំបន់ និងសហគ្រាសទាំងអស់ ដែលចង់រកស៊ីជាមួយចិន ដោយរាប់ទាំងសហរដ្ឋអាមេរិកផង”។ សម្តីនេះ គឺវាហាក់មានន័យថា លោកស៊ី ជីនពីង បានដកថយមួយជំហាន និងសុខចិត្តធ្វើសម្បទានជាមួយអាមេរិក ដើម្បីធ្វើយ៉ាងណា ស្តារទំនាក់ទំនងឡើងវិញ ហើយការពារពាណិជ្ជកម្ម និងសេដ្ឋកិច្ចចិនឲ្យបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ