ហេតុអ្វីតៃប៉ិបើកទីផ្សារឱ្យអាមេរិកនាំចូលសាច់ជ្រូកនិងសាច់គោមកតៃវ៉ាន់ ?
ចុះផ្សាយនៅថ្ងៃ៖
ស្តាប់ - ០៤:៤៩
ប្រឈមនឹងចិន សហរដ្ឋអាមេរិក និងតៃវ៉ាន់រំកិលរកគ្នា កាន់តែជិត។ មានសញ្ញាថ្មីមួយបន្ថែមបញ្ជាក់អំពីការរឹតចំណងទំនាក់ទំនងនេះ។ រដ្ឋាភិបាលតៃវ៉ាន់ ទើបបានប្រកាសបើកព្រំដែនទទួលសាច់ជ្រូកនិងសាច់គោនាំចូកមកពីសហរដ្ឋអាមេរិក ទោះបីជាសាច់ជ្រូកនិងសាច់គោអាមេរិកមិនត្រូវស្តង់ដារសុខភាពដ៏តឹងតែងរបស់កោះក៏ដោយ។ ការព្រមធ្វើសម្បទាននេះ ទំនងជាជំហានដំបូងនៃដំណើរឆ្ពោះទៅរកកិច្ចព្រមព្រៀងផ្តោះប្តូរពាណិជ្ជកម្មសេរីអាមេរិក-តៃវ៉ាន់។
ក្រោយពីមានផ្ទុះជំងឺគោឆ្កួត នៅសហរដ្ឋអាមេរិក កាលពីឆ្នាំ២០០០មក តៃវ៉ាន់បានដាក់រនាំងហាមមិនឱ្យនាំសាច់គោអាមេរិកចូលលើកោះទេ។ ប៉ុន្តែពេលនេះតៃវ៉ាន់បានលើកបម្រាមទាំងនោះចេញវិញខ្លះ។ អំណើះតទៅ សហរដ្ឋអាមេរិកអាចនាំចូលនូវសាច់គោដែលមានអាយុចាប់ពី៣០ខែឡើងទៅ។ សាច់ជ្រូកអាមេរិកដែលចិញ្ចឹមដោយប្រើ ថ្នាំគីមី ractopamine បំប៉ន ក៏អាចជ្រៀតចូលក្នុងទីផ្សារតៃវ៉ាន់វិញបានដែរ។ សារធាតុគីមីបំប៉នសត្វ ឱ្យទ្រលក់ទ្រលន់ញាត់សាច់ច្រើនតែពុំសូវមានខ្លាញ់ មានប្រើច្រើនក្នុងកសិកម្មចិញ្ចឹមសត្វនៅតំបន់អាមេរិកខាងជើង តែជាប់បម្រាមមិនឱ្យប្រើប្រាស់ទេ នៅអឺរ៉ុប នៅរុស្ស៊ី និងនៅចិន។ តៃវ៉ាន់ក៏ហាមឃាត់ដែរ ពីមុន។
តៃវ៉ាន់ ស្ថិតក្នុងចំណោមប្រទេសដែលទទួលទានសាច់ច្រើនជាងគេបំផុត។ ប្រជាពលរដ្ឋតៃវ៉ាន់ម្នាក់ៗ បរិភោគសាច់៩០គីឡូក្រាម ជាមធ្យមក្នុងមួយឆ្នាំៗ។ ដូច្នេះតៃវ៉ាន់ជាទីផ្សារនាំចូលសាច់ដ៏គួរឱ្យចាប់អារម្មណ៍។ ហើយសហរដ្ឋអាមេរិកនេះក៏ធ្លាប់ជាប្រទេសផ្គត់ផ្គង់សាច់គោលំដាប់ទីមួយឱ្យតៃវ៉ាន់ និងស្ថិតនៅជួរទីបួន ខាងផ្គត់ផ្គង់ចូលសាច់ជ្រូកឱ្យតៃវ៉ាន់។ ប៉ុន្តែបើគិតអំពីបរិមាណវិញ គឺមានកំរិតតិចតួចណាស់។ អាមេរិកនាំចូលសាច់គោ ប្រមាណ៧ម៉ឺនតោន និងសាច់សាច់ជ្រូក៩ពាន់តោន តែប៉ុណ្ណោះ។ ហេតុអ្វីបានជាតិចដូច្នេះ ?
តៃវ៉ាន់ ពីមុននោះ មានច្បាប់សុវត្ថិភាពនាំចូលសាច់តឹងតែងណាស់។ ជាបទដ្ឋានសុវត្ថិភាពដែលគិតគូរខ្លាំងដល់សុខភាពចិត្តអ្នកទិញផង និងមកពីតៃវ៉ាន់មានឆន្ទៈការពារកសិកម្មចិញ្ចឹមសត្វក្នុងស្រុករបស់ខ្លួន ជាពិសេសការចិញ្ចឹមជ្រូក។ កសិកម្មចិញ្ចឹមជ្រូកតៃវ៉ាន់ អាចបំរើទីផ្សារក្នុងស្រុកបានទៅ៩០%នៃតម្រូវការជាតិ ពោលគឺស្ទើរតែគ្រប់គ្រាន់ដោយមិនបាច់រំពឹងលើការនាំចូល តែពុំមានការប្រកួតប្រជែងប៉ុន្មានទេ។
ពលរដ្ឋតៃវ៉ាន់ បានបើកចំហឱ្យមានការនាំចូលសាច់ពីបរទេស តាំងពីឆ្នាំ ២០១០មក។ ឆ្នាំដែលជ្រូកតៃវ៉ាន់រងជំងឺរាតត្បាតស្លាប់រាល និងដែលបានធ្វើឱ្យតៃវ៉ាន់ស្រាប់តែមានឱនភាពសាច់ជ្រូក ក្នុងស្រុកយ៉ាងខ្លាំង មិនធ្លាប់មាន។ កាលពីឆ្នាំទៅ ជំងឺគ្រុនជ្រូកអាហ្វ្រិកនៅចិន បានរាលដាលឆ្លងមកដល់តៃវ៉ាន់ និងធ្វើឱ្យការចិញ្ចឹមជ្រូកនៅតៃវ៉ាន់រងការគំរាមកំហែងយ៉ាងខ្លាំង។
ការធ្មេចភ្នែក បន្ធូរច្បាប់សុខភាពដ៏តឹងតែងព្រមឱ្យអាមេរិកអាចនាំចូលសាច់មកតៃវ៉ាន់បាន ជាការព្រមព្រៀងក្នុងបរិបទដ៏ពិសេស។ គឺពេលនេះវ៉ាស៊ីនតោននិងតៃប៉ិកំពុងរំកិលខិតចូលជិតគ្នាកាន់តែកៀក ក្នុងផ្ទៃនៃការគំរាមកំហែងយោធាកាន់តែខ្លាំងឡើងតំបន់ច្រកសមុទ្ទតៃវ៉ាន់ ពីសំណាក់ចិន។ កាលពីដើមខែសីហា តៃវ៉ាន់បានថែមទាំងមានឱកាសទទួលស្វាគមន៍រដ្ឋមន្ត្រីក្រសួងសុខាភិបាលអាមេរិកលើដែនកោះរបស់ខ្លួនផង។ គិតចាប់តាំងពីអាមេរិកបានកាត់ផ្តាច់ទំនាក់ទំនងការទូតជាមួយតៃវ៉ាន់ នៅឆ្នាំ១៩៧៩ ដើម្បីទទួលស្គាល់គោលការណ៍ចិនតែមួយរបស់ប៉េកាំងមក នេះជាលើកទីមួយដែលមន្ត្រីជាន់ខ្ពស់អាមេរិកថ្នាក់ដល់ទៅរដ្ឋមន្ត្រីបានមកបំពេញទស្សនកិច្ចនៅតៃវ៉ាន់នោះ។
លោកស្រីប្រធានាធិបតីតៃវ៉ាន់ សំឡឹងឃើញថាពេលនេះជាឱកាសដ៏ប្រពៃនៃការចាប់ផ្តើមបើកកិច្ចចរចាស្វែងរកកិច្ចព្រមព្រៀងផ្តោះប្តូរពាណិជ្ជកម្មសេរីអាមេរិក-តៃវ៉ាន់។ បើតាមប្រសាសន៍របស់លោកស្រី ឆៃ អ៊ីងវេន កាលពីថ្ងៃសុក្រកន្លងទៅ នេះ សេចក្តីសម្រេចព្រមបើកទីផ្សារសាច់តៃវ៉ាន់ឱ្យអាមេរិក ជាយុទ្ធសាស្ត្រមួយដែលនឹងផ្តល់ប្រយោជន៍សេដ្ឋកិច្ច និង នយោបាយ។ តៃវ៉ាន់គ្មានឆន្ទៈចង់យកចំណេញពីការបោះឆ្នោតប្រធានាធិបតីអាមេរិកឡើយ ប៉ុន្តែ តៃវ៉ាន់ត្រូវយកចំណុចខ្លាំងនៃសេដ្ឋកិច្ចរបស់ខ្លួនមកប្រើ ដើម្បីធានាការពារប្រព័ន្ធផ្គត់ផ្គង់ស្បៀងអាហារក្រោយវិបត្តិកូវីដ១៩ និងក្នុងបរិបទនៃសង្គ្រាមពាណិជ្ជកម្មរវាងចិននិងអាមេរិក។ ឱកាសហុចហើយ តៃវ៉ាន់ត្រូវឆក់យកឱ្យបាន។ បើតៃវ៉ាន់ហ៊ានសម្រេច សំណុំរឿងនាំចូលសាច់ជ្រូកនិងសាច់គោអាមេរិក នោះមានន័យថាតៃវ៉ាន់បានចាក់គ្រឹះពង្រឹងទំនាក់ទំនងជាមួយអាមេរិក និងជាការចាប់ផ្តើមបើកកិច្ចសហប្រតិបត្តិការអាមេរិក-តៃវ៉ាន់ លើគ្រប់វិស័យ។
សេចក្តីសម្រេចរបស់តៃវ៉ាន់ បានទទួលការស្វាគមន៍ពីភាគីអាមេរិក ពីគ្រប់និន្នាការនយោបាយ រាប់ទាំងទីប្រឹក្សាសេដ្ឋកិច្ចរបស់បេក្ខជនប្រធានាធិបតី ចូ បៃដិនផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ