មាសបន្តឡើងថ្លៃ ខ្លាំងដល់កំរិតកំពូលជាថ្មី
ចុះផ្សាយនៅថ្ងៃ៖
ស្តាប់ - ០៤:៥៦
មាសត្រូវប៉ាន់ជាងពេលណាៗទាំងអស់។ មាសបន្តឡើងថ្លៃជាលំដាប់ នៅលើទីផ្សារពិភពលោក។ កាលពីថ្ងៃចន្ទទី ២៧ កក្កដា តម្លៃមាសបានឡើងដល់កំរិតកំពូល ពុំធ្លាប់មាន។ វិបត្តិសេដ្ឋកិច្ចបណ្តាលមកពីជំងឺរាតត្បាតសកលកូវីដ១៩ ភាពតានតឹងនយោបាយរវាងសហរដ្ឋអាមេរិកនិងចិន និងការធ្លាក់ថ្លៃរបស់ដុល្លារ បានជំរុញឱ្យលោហៈមួយនេះ កាន់តែមានតម្លៃ។
ចាស់ខ្មែរពីដើម និយមទិញមាសទុក មិនខុសទេ។ ទោះនៅក្នុងសម័យកុំព្យូទ័រ សតវត្សរ៍ទី២១នេះហើយក៏ដោយ ក៏មាសជាទ្រព្យដែលមិនចេះបាត់បង់តម្លៃដែរ។ ផ្ទុយទៅវិញ មាសកាន់តែមានតម្លៃ នៅពេលស្រុកមិនស្រួល ជួបសង្គ្រាម ឬមានវិបត្តិសេដ្ឋកិច្ច។ ជំនួញមាស ឬការទិញភាគហ៊ុនមាស ផ្តល់ផលចំណេញជាងគេបង្អស់ សម្រាប់ឆ្នាំ២០២០នេះ។
មាសឡើងថ្លៃជាលំដាប់ ១OZ (ដែលស្មើនឹង៨ជី៣ហ៊ុន) ថ្លៃ១៨០០ដុល្លារ កាលពីថ្ងៃពុធទី២២កក្កដា២០២០សប្តាហ៍មុន និងឡើងដល់ ១៩៤៤,៧១ នៅថ្ងៃចន្ទទី ២៧កក្កដា ២០២០វេលាម៉ោងបីព្រឹកម៉ោងសកល។ ជារួមមក គិតត្រឹមពីខែមករា២០២០មក ទល់នឹងថ្ងៃនេះ តម្លៃមាសបានឡើងថ្លៃជាង ២៧% និងថ្លៃខ្លាំងបំបែកឯតទគ្គកម្មតែម្តងទៀត។ កាលពីខែកញ្ញាឆ្នាំ២០១១ មាសឡើងថ្លៃកប់ពពកជាប់ក្នុងកំណត់ត្រា ប៉ុន្តែមួយOZ ថ្លៃតែ ១៩២១ដុល្លារប៉ុណ្ណោះ។
វិបត្តិកូរ៉ូណាវីរុសនិងសេដ្ឋកិច្ច
បន្ទាប់ពីទ្រឹងថ្លៃបន្តិចនៅខែមិថុនា មាសចាប់ស្ទុះឡើងថ្លៃវិញ ដោយសារកត្តាច្រើនយ៉ាង ៖ ទីមួយគឺវិបត្តិកូរ៉ូណាវីរុសនិងសេដ្ឋកិច្ច ចាប់ធ្លាក់ធ្ងន់ធ្ងរនៅក្នុងជាច្រើនប្រទេស ដែលជំរុញឱ្យកំណើនសេដ្ឋកិច្ចពិភពលោក នៅឆមាសទីពីរ ពិបាកងើបឡើងវិញ ឬងើបឡើងវិញតែគ្មានភាពប្រាកដប្រជា។
នៅសហរដ្ឋអាមេរិក ធនាគារកណ្តាល ដែលព្រួយបារម្ភកាន់តែខ្លាំងចំពោះផលវិបាកបង្កឡើងដោយវិបត្តិកូវីដ១៩ ទៅលើទីផ្សារការងារនិងការចាយវាយរបស់ពលរដ្ឋ ត្រូវធ្វើអន្តរាគមន៍ ចូលជួយទីផ្សារហិរញ្ញវត្ថុជាថ្មី។ នៅប៉ែកអឺរ៉ុបវិញ គណៈកម្មការអឺរ៉ុបបានប្រកាសថាតំបន់ចាយប្រាក់អឺរ៉ូមានដំណើរសេដ្ឋកិច្ចដើរថយក្រោយខ្លាំង ជាងការគ្រោងទុក នៅឆ្នាំ២០២០នេះ ហើយនៅឆ្នាំ២០២១ តំបន់អឺរ៉ូនឹងមានសន្ទុះសេដ្ឋកិច្ចឡើងវិញតែខ្សោយជាងការរំពឹងទុក។ ជាផលវិបាក អ្នកវិនិយោគនាំគ្នាងាកទៅរកទិញ លោហៈមាស ដ៏មានតម្លៃ ដើម្បីការពារខ្លួនពីទីផ្សារដ៏យោគយោល។ បើតាមក្រុមប្រឹក្សាមាសពិភពលោក គ្រាន់តែនៅខែមិថុនា មិនដល់មួយខែផង មូលនិធិវិនិយោគបានប្រមូលទិញមាស ១០៤តោនបន្ថែម ក្នុងតម្លៃដល់ទៅ ៦ពាន់លានដុល្លារ។ មូលនិធិមាសបានបំពេញស្តុកមាសច្រើនដូចសម័យមានវិបត្តិហិរញ្ញវត្ថុឆ្នាំ២០០៩យ៉ាងដូច្នោះ។ នៅធនាគារកណ្តាលពិភពលោកវិញ តួកគីដែលកំពុងឆ្លងកាត់វិបត្តិសេដ្ឋកិច្ចធ្ងន់ធ្ងរ បានប្រមូលទិញមាសចំនួនដល់ទៅ ២៨តោន ក្នុងមួយខែឧសភា ដើម្បីបានក្លាយជាប្រទេស១០ដំបូងគេនៅលើពិភពលោកដែលមានប្រាក់បំរុងជាមាសច្រើនជាងគេ (៦៦២តោន)។
ប្រាក់ដុល្លារថោក
ប្រាក់ដុល្លារធ្លាក់ថ្លៃ ក៏ជាកត្តាមួយដែលមកកល់ដំឡើងថ្លៃមាស។ ដោយហេតុតែកំណើនអ្នកឆ្លងកូវីដ១៩ ប្រាក់ដុល្លារអាមេរិកបានចុះថ្លៃច្រើន បើប្រៀបទៅ នឹងរូបិបណ្ណផ្សេងទៀត។ វិធានការដ៏ធំធេងរបស់ធនាគារកណ្តាលអាមេរិក Fred ទិញប្រាក់កម្ចីរដ្ឋនិងបំណុលក្រុមហ៊ុន ដើម្បីទ្រទ្រង់សេដ្ឋកិច្ចជាតិពីវិបត្តិកូវីដ១៩ ក៏បានចូលរួមមួយចំណែកទៀតធ្វើឱ្យប្រាក់ដុល្លារ ចុះថ្លៃ។ ភាពមិនចុះសម្រុងគ្នារវាងសេតវិមាននិងសភាលើផែនការស្រោចស្រង់សេដ្ឋកិច្ច ទាញបញ្ចុះប្រាក់ដុល្លារមួយជាន់ទៀត។ ហើយបើដុល្លារចុះថ្លៃ មាសត្រូវតែឡើងថ្លៃ។ ដោយតម្លៃមាសនៅលើទីផ្សារពិភពលោក ចុះបញ្ជីជាដុល្លារ មាសត្រូវតែថោកសម្រាប់អ្នកប្រើរូបិយបណ្ណផ្សេង។
នៅថ្ងៃចន្ទទី ២៧កក្កដា២០២០ លុយដុល្លារចុះថ្លៃខ្លាំងមែនទែននៅចំពោះមុខប្រាក់អឺរ៉ូ (មិនធ្លាប់មានទេគិតក្នុងរយៈពេលពីរឆ្នាំកន្លងមកនេះ ដោយ១អឺរ៉ូដូរបានជាង ១,១៧ដុល្លារអាមេរិក) និងប្រាក់យ៉េនជប៉ុន (១ដុល្លារ=១០៥,៣៨យ៉េន) ដែលក៏រូបិយបណ្ណដ៏មានសុវត្ថិភាពសម្រាប់អ្នកវិនិយោគ។
សង្គ្រាមត្រជាក់ចិន-អាមេរិក
កត្តាចុងក្រោយ គឺភាពតានតឹងការទូត និងសេដ្ឋកិច្ចរវាងសហរដ្ឋអាមេរិកនិងចិន។ មហាអំណាចពិភពលោកទីមួយនិងទីពីរ មានជម្លោះពាណិជ្ជកម្មនិងការទូត ជាបន្ទុកធ្លាក់សង្កត់លើទីផ្សារភាគហ៊ុនខ្លាំងណាស់។ អ្នកវិនិយោគពិតជាព្រួយបារម្ភជាងពេលណាទាំងអស់ អំពីការធ្លាក់ចុះ និងថមថយ នៃសកម្មភាពផ្តោះប្តូរពាណិជ្ជកម្ម។ ជាលទ្ធផលអ្នកវិនិយោគត្រូវងាកជាថ្មីទៅរកមាស ដែលផ្តល់ចំណេញច្រើន និងជាការវិនិយោគដ៏ប្រកបដោយសុវត្ថិភាពបំផុត។
យោងតាមបរិបទបច្ចុប្បន្ន អ្នកវិភាគជាច្រើន ឃើញថា មាស នឹងបន្តឡើងថ្លៃទៀត ហើយនឹងអាចឡើងថ្លៃ ដល់ទៅជាង ពីរពាន់ដុល្លារក្នុងមួយអោន នៅខែកញ្ញា២០២០ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ