មហាសេដ្ឋីដែលរិះគន់លោកស៊ី ជីនពីង ត្រូវតុលាការចិនផ្តន្ទាទោស ឲ្យជាប់ពន្ធនាគារ ១៨ឆ្នាំ
ចុះផ្សាយនៅថ្ងៃ៖
ប្រទេសចិនបានបំបិទមាត់អ្នកប្រឆាំង រិះគន់លោកប្រធានាធិបតីស៊ី ជីនពីងម្នាក់ ទៀត។ នៅថ្ងៃអង្គារទី ២២ កញ្ញា តុលាការក្រុងប៉េកាំង បានសម្រេចផ្តន្ទាទោស មហាសេដ្ឋីអចលនទ្រព្យម្នាក់ឲ្យជាប់ពន្ធនាគារ ១៨ឆ្នាំ ពីបទប្រព្រឹត្តអំពើពុករលួយ។ លោក Ren Zhiquiang ត្រូវបានប៉ូលិសចាប់ឃាត់ខ្លួន តាំងពីខែមីនា នៅក្រោយ លោកសរសេរសាររិះគន់លោកប្រធានាធិបតីចិន ក្នុងរឿងគ្រប់គ្រងវិបត្តិកូវីដនៅប្រទេសចិន។ គេវាយតម្លៃថា លោកស៊ី ជីនពីង បានយកលេស ប្រយុទ្ធប្រឆាំងអំពើពុករលួយ ដើម្បី បង្រ្កាបក្រុមអ្នកប្រឆាំងនឹងលោក។
មហាសេដ្ឋីអចលនទ្រព្យម្នាក់ ដែលធ្លាប់ចេញមុខរិះគន់លោកប្រធានាធិបតី ស៊ី ជីនពីង ត្រូវបានតុលាការសម្រេចផ្តន្ទាទោស នៅថ្ងៃអង្គារនេះ ឲ្យជាប់ពន្ធនាគារ ១៨ឆ្នាំ និងត្រូវពិន័យឲ្យបង់ប្រាក់ ជាង ៥សែនអឺរ៉ូ សម្រាប់បទចោទប្រកាន់ ប្រព្រឹត្តអំពើពុករលួយ ទទួលសំណូកសូកប៉ាន់ កេងបន្លំលុយរដ្ឋ និង រំលោភអំណាច។ តាមតុលាការក្រុងប៉េកាំង លោកហ្សិន ឈឿឈាំង ក្នុងនាមជាបុគ្គលមានប្រជាប្រិយភាពក្នុងពិភពអ្នកជំនួញអចលទព្រព្យ បានរំលោភអំណាច សម្រាប់ផលប្រយោជន៍ផ្ទាល់ខ្លួន និងបានកេងបន្លំលុយរដ្ឋប្រមាណ ១១១ លានយ័ន ដែលស្មើនឹងជាង ១៦លានដុល្លារ។
វិស័យអចលនទ្រព្យ ដែលលោកហ្សិន ឈឿឈាំង បានធ្វើជំនួញ កាក់កប រហូតដល់ឆ្នាំ ២០១៥ ជាវិស័យដែលសំបូរទៅដោយរឿង កេងបន្លំ ពុករលួយ នៅក្នុងប្រទេសចិន ដែលកំពុងសម្រុកខ្លាំងខាងសំណង់ហេដ្ឋារចនាសម្ព័ន្ធ។ ដោយសារតែគ្មានស្ថាប័នឯករាជ្យដើម្បីផ្ទៀងផ្ទាត់ គេមិនដឹងច្បាស់ថា តើលោកហ្សិន ឈឿឈាំងពិតជាបានប្រព្រឹត្តអំពើពុករលួយ ដូចការចោទប្រកាន់របស់តុលាការដែរឬយ៉ាងណានោះទេ។
តាមសាលក្រមរបស់តុលាការចេញផ្សាយ នៅលើវិបសៃតិ៍របស់តុលាការ នៅថ្ងៃអង្គារនេះ លោកហ្សិន ឈឿឈាំងបានទទួលសារភាពកំហុស បទឧក្រិដ្ឋរបស់ខ្លួន និងមិនប្តឹង ឧទ្ធរណ៍នោះទេ។ មួយវិញទៀត តាមតុលាការក្រុងប៉េកាំង មហាសេដ្ឋីអចលនទ្រព្យចិន រូបនេះ បានយល់ព្រមទទួលសាលក្រមរបស់តុលាការ ដែលសម្រេចរឹបអូសយកទ្រព្យសម្បត្តិរបស់លោក ដែលបានមកពីសកម្មភាពខុសច្បាប់កន្លងមក។
មហាសេដ្ឋីដែលហ៊ាននិយាយប្រៀបធៀបលោកស៊ី ជីនពីងទៅតួត្លុក
ការផ្តន្ទាទោសទៅលើលោកមហាសេដ្ឋី ហ្សិន ឈឿឈាំង នៅពេលនេះ បញ្ជាក់ពីយុទ្ធនាការបង្រ្កាបអ្នកប្រឆាំងនឹងលោកស៊ី ជីនពីង នៅក្នុងចំណោមជួរថ្នាក់នាំជាន់ខ្ពស់របស់ប្រទេសចិន ព្រោះថា លោកហ្សិន ឈឿឈាំងត្រូវបានចាប់ខ្លួន និងរងការស៊ើបអង្កេត នៅក្រោយ លោកចេញមុខនិយាយរិះគន់ លោកស៊ី ជីនពីង ក្នុងរឿងគ្រប់គ្រងជំងឺកូវីដ នៅប្រទេសចិន….
ក្រុមប្រឆាំងអំពើពុករលួយ បានសើរើស៊ើបអង្កេតប្រឆាំង មហាសេដ្ឋីអចលនទ្រព្យ លោកហ្សិន ឈឿឈាំង គឺនៅបន្ទាប់ពី លោកបានសរសេរលិខិតចំហរមួយ រិះគន់ បក្សកុម្មុយនិស្តចិន និងលោកប្រធានាធិបតីចិន លោកស៊ី ជីនពីង។
នៅខែ មីនា នៅក្នុងលិខិតផ្សាយនៅលើបណ្តាញសង្គម របស់លោក ដែលមានអ្នកតាមដាន ជាង ១០លាននាក់ លោកហ្សិន ឈឿឈាំងបានសរសេរឌឺដងថា លោកមិនបានឃើញអធិរាជបង្ហាញគ្រឿងតែងកាយថ្មីនោះទេ។ ប៉ុន្តែ គឺត្លុក ដែលស្រាតននលគក ដែលនៅតែទាមទារ ចាត់ទុកខ្លួនជាអធិរាជ។ នៅក្នុងដាក់លិខិត មហាសេដ្ឋី អចលនទ្រព្យចិន មិនបាននិយាយចំឈ្មោះ លោកប្រធានាធិបតីស៊ី ជីនពីង ប៉ុន្តែ លោកបានសរសេរលិខិតរិះគន់នេះឡើង នៅក្រោយ លោកស៊ី ជីនពីង កាលពីខែ ចុងខែកុម្ភៈ លើកថ្លែងសរសើរការគ្រប់គ្រង បានដោយជោគជ័យ លើវិបត្តិកូវីដ នៅប្រទេសចិន។
លោកហ្សិន ឈឿឈាំងបានសរសេរបន្ថែមថា វិបត្តិកូវីដបានបើកភ្នែកឲ្យគេឃើញ ការពិតមួយដែលថា គណបក្សការពារផលប្រយោជន៍របស់ខ្លួន មន្រ្តីរដ្ឋាភិបាលការពារផលប្រយោជន៍របស់ខ្លួន ចំណែក ព្រះរាជា គិតតែពីការពារ ផលប្រយោជន៍ និងអំណាចស្នូលរបស់ខ្លួន។
នៅក្រោយចេញផ្សាយលិខិតរិះគន់ជាសាធារណៈ លោកហ្សិន ឈឿឈាំង បាត់មុខ រហូតដល់ខែមេសា នៅពេលប៉ូលិសសម្រេចបើកការស៊ើបអង្កេតប្រឆាំងលោក ពីបទរំលោភធ្ងន់ធ្ងរវិន័យរបស់បក្ស ដែលជាពាក្យប្រើទូទៅ សម្រាប់ ការប្រព្រឹត្តអំពើពុករលួយ។
នៅខែកក្កដា គណបក្សកុម្មុយនិស្តចិនបានសម្រេចដកកាតសមាជិក បក្សពីលោកហ្សិន ឈឿឈាំង ដែលគណបក្សបានចោទប្រកាន់ថា មិនស្មោះស្ម័គ្រ ចំពោះបក្ស។ ការដកអភ័យឯកសិទ្ធិរបស់បក្សជាការបើកផ្លូវឲ្យមានការចោទប្រកាន់នៅតុលាការ ដែលតាមពិតសម្រេចចេញសាលក្រមតាមខ្សែគូសវាសរបស់បក្សកុម្មុយនិស្ត។
លោកហ្សិន ឈឿឈាំងជាកាណុងរិះគន់
វាជាជារឿងកម្រ ដែលមហាសេដ្ឋី អ្នកធ្វើជំនួញ មានបាន នៅប្រទេសចិន ហ៊ាននិយាយរិះគន់មេដឹកនាំបក្សកុម្មុយនិស្ត។ ដើម្បីបានសុខ និងរក្សាការពារ មុខជំនួញ និងទ្រព្យសម្បត្តិ មហាសេដ្ឋីចិន ជាទូទៅមិនចេញមុខ រិះគន់ការដឹកនាំរបស់រដ្ឋាភិបាល និងជាពិសេស លោកប្រធានាធិបតីចិន ស៊ី ជីនពីងតែម្តង ដែលគេស្គាល់ហើយថា បានបង្កើតយុទ្ធនាការប្រយុទ្ធប្រឆាំង នឹងអំពើពុករលួយ ដើម្បី បង្រ្កាប បោសសម្អាតក្រុមអ្នកប្រឆាំង នៅក្នុងជួរបក្ស និងក្នុងចំណោមមន្រ្តីជាន់ខ្ពស់របស់រដ្ឋាភិបាល។
តាមប្រវត្តិដែលកាសែតក្នុងស្រុកបានសរសេររៀបរាប់កន្លងមក លោក ហ្សិន ឈឿឈាំង ជាកូនរបស់មន្រ្តីក្រសួងពាណិជ្ជកម្ម ធ្លាប់ចូលបម្រើកងទ័ព និងក្លាយជាសមាជិករបស់បក្សកុម្មុយនិស្តចិន តាំងពីឆ្នាំ ១៩៧៤មក។ នៅក្នុងអត្ថបទចុះផ្សាយប្រវត្តិផ្ទាល់ខ្លួនកន្លងមក លោកហ្សិន ឈឿឈាំង បានធា្លប់លើកឡើងថា លោកស្គាល់ជិតដិតមន្រ្តីជាន់ខ្ពស់របស់បក្សកុម្មុយនិស្ត ជាពិសេស អតីតអនុប្រធានគណៈកម្មការប្រយុទ្ធប្រឆាំងអំពើពុករលួយ។ ធ្លាប់ជាអនុប្រធាន របស់លេខាធិការដ្ឋានបក្សកុម្មុយនិស្ត ប៉ុន្តែ លោកមិនដែលធ្វើនយោបាយនោះទេ។ តាមរយៈបក្សកុម្មុយនិស្តចិន លោកបានឡើងតំណែងជាបន្តបន្ទាប់ រហូតក្លាយជានាយកក្រុមហ៊ុនអចលនទ្រព្យ របស់រដ្ឋ ឈ្មោះ Hua Yuan ដែលលោកបានចូលនិវត្តនៅឆ្នាំ ២០១៥។
ជាសមាជិករបស់បក្សកុម្មុយនិស្ត អស់រាប់ទសវត្សរ៍ ប៉ុន្តែ លោកលោកហ្សិន ឈឿឈាំង មិនដែលតមសំដី ដើម្បីសំដែងមតិផ្ទាល់ខ្លួន ដែលមានន័យរិះគន់គណបក្សនោះទេ។ នៅប្រទេសចិន លោកលោកហ្សិន ឈឿឈាំងត្រូវគេចាត់ទុកជាកាណុងរិះគន់ ជាមហាសេដ្ឋី អចលនទ្រព្យលើកដំបូងគេ ដែលហ៊ាននិយាយការពិត។ កាលពីឆ្នាំ ២០១៦ នៅលើប្លុកផ្ទាល់ខ្លួន នៅក្នុងបណ្តាញសង្គម Weibo ដែលស្មើនឹងបណ្តាញសង្គម Twitter លោកបានធ្លាប់បានសរសេររិះគន់លោកស៊ី ជីនពីងម្តងហើយ នៅពេលលោកប្រធានាធិបតី ចិនអំពាវនាវឲ្យប្រព័ន្ធផ្សព្វផ្សាយ សរសេរល្អៗ បម្រើគណបក្សកុម្មុយនិស្តចិន។ កាលណោះ មហាសេដ្ឋី ហ្សិន ឈឿឈាំង ដែលទាមទារឲ្យមានសេរីភាព និងឯករាជ្យរបស់សារព័ត៌មាន បានវាយតម្លៃថា ប្រព័ន្ធផ្សព្វផ្សាយ ដំណើរការបានដោយមកពីការបង់ពន្ធរបស់ប្រជាជន ដូច្នេះ ប្រព័ន្ធផ្សព្វផ្សាយត្រូវបម្រើ ប្រជាជន ប៉ុន្តែ មិនមែនបក្សនោះទេ។ ការបញ្ចេញមតិរបស់លោក ឈឿឈាំង ដែលបានទទួលការគាំទ្រ និងតាមដានមើលរបស់អ្នកប្រើប្រាស់អ៊ីនធ័រនែតចិនរាប់លាននាក់ បានធ្វើឲ្យរដ្ឋាភិបាលមិនសប្បាយចិត្ត និងបានសម្រេចបិទប្លុករបស់លោកឈឿឈាំង។
ក្រៅតែពីហ៊ានចេញមុខរិះគន់ លោកប្រធានាធិបតី ស៊ី ជីនពីង ដែលធ្វើឲ្យលោកត្រូវជាប់ទោសទណ្ឌ លោកហ្សិន ឈឿឈាំង ក៏ជាបុគ្គលចម្រូងចម្រាសផងដែរ នៅប្រទេសចិន។ លោកធ្លាប់ត្រូវបានកាសែតរដ្ឋចិនសរសេរចោទប្រកាន់ថា ជាមនុស្សមូលធននិយម នៅពេលលោកនិយាយការពារគោលនយោបាយ ដំឡើងថ្លៃផ្ទះ នៅប្រទេសចិន។ នៅពេលមួយលោកធ្លាប់បាននិយាយប្រាប់កាសែតថា អ្នកដែលមិនចង់វិនិយោគ លើវិស័យអចលនទ្រព្យ នៅមុន ការកើនឡើងលឿនខ្លាំងនៃវិស័យអចលនទ្រព្យ គឺសក្តិសមនឹងធ្លាក់ខ្លួន រស់នៅក្នុងភាពក្រីក្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ