អ.ស.ប ថាកូរ៉េខាងជើងរំលោភទណ្ឌកម្មអន្តរជាតិក្នុងសំណុំរឿងនុយក្លេអ៊ែរ
អង្គការសហប្រជាជាតិ កាលពីថ្ងៃចន្ទ ២៨ កញ្ញាម្សិលមិញ បាននិយាយថាកូរ៉េខាងជើងកំពុងតែរំលោភលើទណ្ឌកម្មអន្តរជាតិដែលមានបំណងទប់ស្កាត់មហិច្ឆតាផលិតអាវុធនុយក្លេអ៊ែររបស់ប្រទេសមួយនេះ។ បើតាមរបាយការណ៍របស់ អ.ស.ប កូរ៉េខាងជើងរំលោភទណ្ឌកម្មដោយការនាំចូលប្រេងក្នុងចំនួនដ៏ច្រើនលើសលុប និងការបញ្ជូនពលរដ្ឋរបស់ខ្លួនឲ្យទៅធ្វើការនៅក្រៅប្រទេស។
ចុះផ្សាយនៅថ្ងៃ៖
ស្តាប់ - ០២:១២
ក្រុមប្រឹក្សាសន្តិសុខអ.ស.ប បាននិយាយថាប្រទេសកូរ៉េខាងជើងបាននាំចូលប្រេងលើសបរិមាណកំណត់ក្នុងរយៈពេលត្រឹមតែ៥ខែដំបូងនៃឆ្នាំ ២០២០ នេះតែប៉ុណ្ណោះ។ ក្រោមទណ្ឌកម្មអន្តរជាតិ កូរ៉េខាងជើងអាចនាំចូលប្រេងបានតែចំនួន ៥សែនធុងប៉ារ៉ែលប៉ុណ្ណោះក្នុងមួយឆ្នាំ។
របាយការណ៍របស់គណៈកម្មាធិការអន្តររដ្ឋាភិបាលបានឲ្យដឹងថា ចំនួនប្រេងបញ្ជូនទៅកាន់ប្រទេសកូរ៉េខាងជើងគឺហួសពីបរិមាណកំណត់ដោយផ្អែកលើ រូបភាព ទិន្នន័យ និងការគណនា។
“សាធារណរដ្ឋប្រជាធិបតេយ្យប្រជាមានិតកូរ៉េ និងនាវាដែលមានទង់ជាតិបរទេស ព្រមទាំងម្ចាស់របស់ពួកគេបានបន្តសកម្មភាពរំលោភលើបម្រាមអន្តរជាតិ” ដោយការនាំចូលប្រេងខុសច្បាប់។ នេះគឺជាប្រសាសន៍របស់អ្នកជំនាញអ.ស.ប ដោយហៅឈ្មោះផ្លូវការរបស់កូរ៉េខាងជើង។
របាយការណ៍មិនបានបញ្ជាក់នោះទេ ថាប្រទេសណាដែលបាននាំចេញប្រេងទៅកាន់កូរ៉េខាងជើង ប៉ុន្តែការនាំចេញក៏រួមបញ្ចូលទាំងរថយន្តទំនើបនិងស្រាផងដែរ។ ដោយឡែក ប្រទេសចិន និងរុស្ស៊ីដែលជាសម្ព័ន្ធមិត្តដ៏សំខាន់របស់ទីក្រុងព្យុងយ៉ាងបានច្រានចោលការរកឃើញខាងលើ។
ក្រៅពីនេះ របាយការណ៍របស់អ.ស.ប បានឲ្យដឹងថា កូរ៉េខាងជើង ក៏បានរំលោភទណ្ឌកម្មផ្សេងទៀតដែរ ដោយការនាំចេញធ្យូងថ្ម និងការបញ្ជូនពលរដ្ឋរបស់ខ្លួនទៅធ្វើការនៅបរទេស។
គួររំឭកជូនថា ដោយសារតែមហិច្ឆតាផលិតអាវុធនុយក្លេអ៊ែរ ទីក្រុងព្យុងយ៉ាងត្រូវរស់ស្ថិតនៅក្រោមទណ្ឌកម្មអន្តរជាតិជាច្រើនចាប់តាំងពីឆ្នាំ ២០១៧ មក។ ទណ្ឌកម្មទាំងនោះមានដូចជា ការកំណត់លើបរិមាណប្រេងនាំចូល ការហាមឃាត់លើការនាំចេញធ្យូងថ្ម ត្រី និងវាយនភណ្ឌជាដើម។ល។
តែបើទោះបីជារងសម្ពាធទណ្ឌកម្ម និងបើទោះបីជាមានជំនួបកំពូល ៣ លើករវាងមេដឹកនាំកូរ៉េខាងជើងគីម ជុងអ៊ុន និងប្រធានាធិបតីអាមេរិកដូណាល់ ត្រាំទៅហើយក្តី ក្រុមអ្នកវិភាគបានលើកឡើងថា កូរ៉េខាងជើងនៅតែបន្តអភិវឌ្ឍឃ្លាំងអាវុធនុយក្លេអ៊ែរនិងមីស៊ីលបាលីស្ទិករបស់ខ្លួនដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ