ចិនព្រមានកាណាដាពីការផ្តល់សិទ្ធិជ្រកកោនឲ្យបាតុករអ្នកប្រជាធិបតេយ្យហុងកុង
នៅថ្ងៃព្រហស្បតិ៍ ទី១៥ តុលា ចិនតាមរយៈឯកអគ្គរដ្ឋទូតលោកខុង ផេវូប្រចាំទីក្រុងអូតាវ៉ា ប្រទេសកាណាដាបានចេញមុខព្រមានកាណាដាដែលបានផ្តល់សិទ្ធិជ្រកកោនឲ្យបាតុករអ្នកប្រជាធិបតេយ្យហុងកុង។ លោកខុង ផេវូបានពន្យល់ថា កាយវិការរបស់ក្រុងអូតាវ៉ានឹងអាចជះផលវិបាកសុខភាព និងសន្តិសុខដែលប្រជាជនកាណាដាដែលកំពុងរស់នៅលើទឹកដីហុងកុង។ ប្រមុខការទូតកាណាដាលោកហ្រ្វង់ស័រ ហ្វីលីព ឆំប៉ាញបានប្រតិកម្មតបវិញដោយចាត់ទុកការព្រមានរបស់លោកខុង ផេវូថាជារឿងមិនអាចទទួលយកបាន និងធ្វើឲ្យរំខាន។ រឿងរ៉ាវថ្មីនេះនឹងធ្វើឲ្យទំនាក់ទំនងរវាងចិន និងកាណាដាដែលកំពុងតានតឹងស្រាប់រឹតតែធ្លាក់ធ្ងន់ធ្ងរថែមទៀត។
ចុះផ្សាយនៅថ្ងៃ៖
ស្តាប់ - ០២:២១
កំហឹងរបស់ចិនបានផ្ទុះឡើង បន្ទាប់ពីកាណាដាបានផ្តល់សិទ្ធិជ្រកកោននយោបាយឲ្យប្តី ប្រពន្ធហុងកុង ២នាក់ដែលបានចូលរួមនៅក្នុងបាតុកម្មរបស់ក្រុមអ្នកទាមទារប្រជាធិបតេយ្យនៅហុងកុងកាលពីឆ្នាំ ២០១៩។ ទន្ទឹមនឹងយល់ព្រមទទួលប្តី ប្រពន្ធហុងកុងទាំង ២នាក់ កាណាដាក៏បានត្រៀមខ្លួនដើម្បីទទួលពាក្យសុំសិទ្ធិជ្រកកោនពីបាតុករហុងកុងអ្នកទាមទារប្រជាធិបតេយ្យដទៃទៀតដែលបានរត់គេចខ្លួនពីការវាយបង្រ្កាបរបស់កម្លាំងសន្តិសុខចិន។ ចិនតាមរយៈឯកអគ្គរដ្ឋទូតប្រចាំកាណាដាលោកខុង ផេវូបានចេញមុខព្រមានកាណាដាលើរឿងរ៉ាវមួយនេះ។
« យើងស្នើយ៉ាងទទូចដល់រដ្ឋាភិបាលកាណាដាកុំឲ្យផ្តល់សិទ្ធិជ្រកកោននយោបាយដល់ពួកឧក្រិដ្ឋជនហុងកុង ព្រោះវាជាការលូកដៃចូលជ្រៀតជ្រែកកិច្ចការផ្ទៃក្នុងរបស់ចិន និងធ្វើឲ្យពួកឧក្រិដ្ឋជនទាំងនេះកាន់តែមានភាពកក់ក្តៅ » នេះជាការថ្លែងរបស់លោកខុង ផេវូនៅក្នុងសន្និសីទកាសែតមួយតាមអនឡាញ។ បន្ទាប់មក លោកខុង ផេវូបានព្រមានកាណាដាត្រង់ៗថា បើកាណាដាពិតជាយកចិត្តទុកដាក់ចំពោះភាពរុងរឿង និងស្ថិរភាពរបស់ហុងកុង រួមទាំងសុខភាព និងសុវត្ថិភាពរបស់ប្រជាជនកាណាដាចំនួន ៣០០.០០០នាក់រស់នៅហុងកុង បូកទាំងវត្តមានរោងចក្រ សហគ្រាសកាណាដាជាច្រើនលើទឹកដីហុងកុងមែននោះ កាណាដាត្រូវគាំទ្រដល់កិច្ចខិតខំប្រឹងប្រែងរបស់ចិនប្រឆាំងនឹងឧក្រិដ្ឋកម្មហិង្សានៅហុងកុង។
« ការលើកឡើងរបស់លោកខុង ផេវូជារឿងមិនអាចទទួលយកបាន និងជាការរំខាន » នេះជាប្រតិកម្មបកវិញរបស់ប្រមុខការទូតកាណាដាលោកហ្រ្វង់ស័រ ហ្វីលីព ឆំប៉ាញ។ គួររម្លឹកថា ចិន និងកាណាដាបានស្គាល់ទំនាក់ទំនងតានតឹងខ្លាំងតាំងពីដំណាច់ឆ្នាំ ២០១៨ ពោលតាំងពីកាណាដាបានចាប់ខ្លួនលោកស្រី Meng Wanzhou តាមសំណើរបស់សហរដ្ឋអាមេរិក។ លោកស្រី Meng ជានាយិកាហិរញ្ញវត្ថុរបស់ក្រុមហ៊ុនចិន Huawei និងជាកូនស្រីរបស់ស្ថាបនិកក្រុមហ៊ុន Huawei។ ជាការសងសឹកពីការចាប់ខ្លួនលោកស្រី Meng នៅកាណាដាកាលណោះ ចិនក៏បានចាប់ខ្លួនអតីតមន្រ្តីការទូតកាណាដាលោក Michael Kovring និងអ្នកជំនួញកាណាដាលោក Michael Spavor នៅចិនវិញដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ